遇上翻版迷人

星期日,工人放假,得番我同爸爸。晚上去大家樂食飯!!賣飛既女孩子,好似朋友迷人。樣其實少少似,估大約70%相似。但神態就好似好似,...尤其係你同佢講講下野,佢突然唔知望左去邊,定哂,似諗緊野,又似神遊物外.....一會兒,佢又番黎喇!!當然,期間我同佢講乜佢係唔知喇....!!
好奇怪!!
到底世上會唔會有性格100%相同既人呢??

老師的特質

打電話俾朋友Jason,問下佢個仔出左世未!!佢話出左世喇!!真係恭禧哂!!好開心!!我都好想生多個.....!!但係冇就係冇.......
跟著,好自然問下佢個仔幾時出世,...Jason既答案仲係好驚喜!!
「下?唔係好記得喎!!好似係25號,又好似係26號....唔係唔係,係25號.....定26號呢?」
哈哈哈.....唔緊要喇!!識Jason既朋友都應該見怪不怪!!
我太太話Jason係唔係真係做老師架!!佢好似傻下傻下咁,做野又亂哂籠咁!!
其實老師有咩特質??點先算係一個好老師??
哈哈哈.....唔知呢!!Jason係博士黎架,....學術上方面絕對不用懷疑!!但現實生活又係另外一回事!!我覺得日常生活方面安排得好D,佢會輕鬆好多囉!!

火

我本身唔係一個咁鐘意發脾氣同鬧人既人。唔係我唔夠惡,只係覺得發脾氣通常都於事無補,又傷害自己!!鬧人更加係人地做錯事由我黎生氣受罰。
但係最近,好好火!!唔知點解,好似發癲咁,好暴躁,...少少事都好煩!!!
完全靜唔到落黎,....一件事未完未解決,第二件事又黎,....跟著第三第四....繼續繼續黎!!
身邊既人,...我話埋俾佢地知點做,又點??係唔聽你講,...你好叻咩??我點解要聽你講!!最後衰左,就將個波交番俾你!!
我需要放鬆.......抽離.....!!

退休

七月一日，爸爸番工既時候，佢老細叫佢退休。咁，難聽D講，即係炒!!
呢D舊式公司，話炒就炒，少少都冇得賠….
爸爸番到黎屋企，好down….!!!
日日在家呆坐既日子點過??
爸爸正式退休,...咁我以後係唔係要養埋o個個三十幾歲,搵兩萬幾蚊一個月但一毫子都唔俾屋企,白食白住既廢物呢??係唔係要仔女都唔養先養佢呢???係唔係養佢一世呢??
爸爸話佢話佢冇錢,....佢冇錢難道我有?? 佢兩萬幾蚊一個人洗話冇錢,我兩萬幾蚊七個人洗就有錢????
佢又厚顏無恥,繼續白食白住,繼續叫工人唔好理BB黎服侍佢,繼續開二十個鐘頭唔睇,....繼續.....
到底係唔係想聯手迫死我???
如果我死,我都先殺死佢,為家人除一大害!!

自食其果

個女既污穢混亂房間,滿地垃圾/作業/文具,危機四伏!!叫佢清理已經有一年,....完全冇改善,...垃圾房比佢間房仲要整潔!!
終於令佢自食其果,昨日如常踩住垃圾/notes入房,點知notes底下仲有把鉸剪,....就係咁將腳掌刺穿,.....傷口有半吋!! 咁點?? 喊囉!!冇野識做架喇!!點樣止血點樣處理傷口...乜都唔識架!!
...唉!!幫佢止過血後,仍舊冇清理間房既意圖,踩住帶血既notes,...繼續死屍一樣訓o係度,...
迎接著第二次受傷。

不重生女重生男

個女放暑假，頭痛，惡夢！！
試想，一個十幾歲既年輕人，放暑假，每日就好似死屍咁訓o係度，加埋長開冷氣既房間，殮房一樣！
由我番工，訓到我放工，乜累得咁緊要呢？？
叫佢學野，或者參加暑期活動！咁，學校一百幾十蚊既暑期活動佢唔去(因為cheap)，選擇八百幾蚊 一星期既溜冰課程，千幾蚊既日語課程！
Okay!!我都想睇下佢學D咩番黎!! (佢好底能咁以為聽下日文歌，睇下日文漫畫就學識日文！)
佢話將來要去日本讀大學，我話佢咁大個都唔識照顧自己，點去？
佢好認真又驚奇咁話: 「乜你地唔係過埋去照顧我咩！？」
有個女，要包生養死葬，連我老婆都話後悔!! 如果再生女都唔要!!
唉!!.... 最可怕係，港女(Y Generation, 1988年至2000年出生的人)唔係一個special case，係一種風氣，個個都係咁，物以類聚，要改變…..Mission Impossible!

清官難審家庭事

與朋友雀局，局後同朋友吹水，朋友訴苦，話老婆成日懷疑自己去滾，成日要check住!! 一日打幾十個電話check住!! 朋友自己係生意人，傾生意飯局真係工作既一部份。成日要check住，幾分鐘一個電話要報告位置，要隨傳隨到去接佢，電話裡一聽到朋友附近有女人聲就發爛渣!!(無論工作定外出，周圍唔係男就係女，有女人聲有幾奇)，就算兩公婆同朋友(如小小力一家)一齊出黎食飯，一個唔高興就發爛渣叫走人，一D面都唔俾!! 佢自己去見朋友就得，你就唔去得!!令到朋友依家得失哂行家, 合作伙伴同朋友!! 以懷疑朋友去滾為藉口，連家務都唔幫手做!!
唉!!朋友冇去滾，小小力百份百相信!!咁點解仲要咁就佢呢??就係怕煩怕爭吵!!結果問題就越黎越嚴重…!! 到抵係唔係真係懷疑朋友去滾，定係藉口發小姐脾氣，真係冇人知!!但小小力覺得，兩個人相處連基本既信任都冇，條路仲點行落去…. 我係佢我會離婚!! 我老婆都係咁話….
但…. 清官難審家庭事，我冇建議朋友離婚，聽完佢訴苦水就算喇!!

三輸

梅窩居民在諮詢會反對正生書院遷入，取態之激烈，引起社會廣泛關注和討論。許多人對出席諮詢會的正生學生遭到奚落，都寄予同情。正生書院能否遷入梅窩，幫助更多誤入歧途的青少年，還待事態發展。不過，由這件事，使人警覺到政府雖然宣稱要打贏禁毒戰，但是在協助青少年重返社會的政策部署上，卻忽略了例如正生書院這類教育機構的功能。
前日在諮詢會上，出席的梅窩居民群情洶湧，會場氣氛恍如批鬥大會。正生書院20名學生靜靜地坐着，飽受言詞攻擊，個別學生嘗試游說居民，但是被「噓聲」嚇至眼淚奪眶而出；另外，出席諮詢會的梅窩小朋友，拿着「出外返學四小時，原區就讀最適宜」、「Local School for Local Needs」等標語，隨着成年人反對正生書院遷入，小朋友是否知道事態的性質，若他們被蓄意「誤導」，則家長對於這些小朋友，會是很壞的示範。

一個政策，有份參與既三方(梅窩居民，政府，正生書院學生) 都輸哂!! 真係高難度!! 呢D咩官員黎架!? 共渡時間減得5%人工實在太少!! 人工同能力差距太大!!

百厭星

我個仔永強係個百厭星，好多人都知，但有幾百厭呢??
番到貴州，我個仔要坐電單車，要跳彈床，都算喇!!(我都估唔到佢識跳彈床)
去到太太二家姐屋企，唔知點解俾佢開左部蒸餾水機，水浸廚房。
丟左一部手機落煲湯度!!
丟左一部手機落垃圾桶!!
搵支煙同煙灰餵太太二家姐屋企隻龜…
打爛左太太二家姐屋企瓶泡菜，成地都係泡菜!!
唔著片去爺爺張床尿尿!!
丟左二家姐屋企自動麻雀機D雀機!!(搵唔到)
整壞左二家姐屋企部60吋電視!!(我個仔屋企係屋企識用remote架喎! 仲識用八達通!)
o係街追狗狗黎打…. 藥材店老細養左隻貓，個老細話隻貓狗都唔驚，但見到你個仔驚都震哂!!
請街上D小朋友食餅，跟著用暴力將小朋友個口打開，取回餅餅自己食!!
搶街上D小朋友D食物同玩具，搶完仲要打人，小朋友喊仲要鬧人!!
見到女BB就自己行去Kiss Kiss…..
爸爸打仲笑，伸隻手俾你打多幾下….
百厭到呢!!

睇電視

有線星期六晚既<王晶事變>幾好睇,節目係主持引導現場觀眾討論歷史問題。我覺得可以用一個更輕鬆同創發思考既態度去學歷史,比起為考試去讀歷史,真係有趣得多!!
我想同個女一齊睇,但佢完全冇興趣......
可惜......

人比人

「人比人,比死人 」
在人類群體生活裡面,人同人比較真係在所難免。自己比唔上別人,亦難免唔開心,...何況比唔上人既係自己兒子,心裡可能更加難受.....點樣去平衡呢種心態呢!?
太太朋友個仔,同BB一齊上堂o個個,....已經番左學兩個月,仲係冇乜進步,冇乜反應咁!!
基本上佢就係坐o係度唔郁,無論唱歌,跳舞,玩遊戲都唔郁!!老師都冇佢辦法,.....媽媽都冇佢辦法,...因為好重,真係拉都拉唔郁!!最叻就係食飯,...食好多飯(多過我),如果我B仔中碼,....佢就係加大碼!!醫生都叫佢減肥.....我睇到都好想幫佢!!但佢媽媽話每次都話:「佢其實好醒好叻,o係屋企!!...完全係另一個人黎!!」咁,我仲可以點呢??係唔係比唔上別人真係咁難接受???寧願選擇回避都唔選擇面對???
在東涌,都係咁,....有個BB,大過我B仔兩個月,....未識行!!其實冇咩大不了,每個人既成長階段都唔同,但佢媽媽周圍同人講:「 佢其實好醒好叻,行得好好,...不過我驚佢跌唔俾佢行之嘛!」....係唔係比唔上別人真係咁難接受???如果做父母都係咁要面唔輸得,孩子將來又會係點呢??
我自己都成日將B 仔同其它BB比較,....唔知自己既反應又係點呢??自己有時真係睇唔到自己...!!
所以,我覺得朋友係我自己一面鏡,讓我睇到自己既不是!!亦時常提醒自己,最重要唔係BB點樣贏,而係點樣面對輸.....

冇書讀既日子

好快又一個月,冇書讀冇學番既日子都好悶下。
永強(B仔)已經十五個月大,感覺佢既進步冇之前咁快。同比佢細三個月既BB差唔多。多左時間陪永強,感覺佢百厭同古惑左好0多。點解咁講呢??平日佢自己好鐘意入廚房玩,去垃圾筒玩垃圾,開櫃玩碗碗碟碟....但爸爸(我)o係屋企,佢就唔敢入廚房,企o係廚房門口大聲叫都唔入!!平日差不多到爸爸收工既時候佢就自己由廚房走番出黎!!屋企人都話佢「扮哂野」....我感覺原來太太係冇佢辦法,打,鬧,呢D衰野都係我呢個爸爸做,玩同食野就係媽媽做,...係唔係父母都係要一個做好人,一個做衰人??點解要我做衰人呢??
番工又唔會特別忙特別多野做,一份還原報價由二月玩到六月都未玩完,效率之底都真係聞所未聞,最難得老細仲話我做咁快為乜!!咁我得閒又買下股票囉,原來老細都係咁,...真係..
黎緊星期日,太太又要同永強番貴州一個月,.... 真係悶上加悶!!
咁苦悶既日子仲要維持幾耐呢??

二十年

林肯以故美國總統講過:「你可以欺騙一些人一時，永遠欺騙一些人，但是不能永遠欺騙所有人。」
二十年前的今日，中國政府以武力屠殺在天安門聚集的群眾，造成多人傷亡。
二十年後的今日，中國政府仍然沒有承認過錯。
政府仍然很腐敗....貪污仍然很嚴重。
沒有解決的問題，並不表示沒有問題!!!而且，要進步，必需把問題解決。
小小力認為作為中國人，應該正確認識歷史，面對問題。
作為父母，小小力認為自己應該教導下一代了解六四。
已故中共總書記趙紫陽生前錄音整理編輯的趙紫陽回憶錄《改革歷程》，或者可以幫助理解這一段歷史。

欺騙，是不能永遠的。

萬千寵愛在一身

朋友車人的BB一歲生日,好多好多節目。諗番起我B 仔一歲生日,只係一家人o係屋企食蛋糕,影影相咁。
太太既意思係B 仔咁細個乜都未知,唔好浪費!!
我既諗法係就算大個都唔攪!!唔想佢自小就有種萬千寵愛在一身既感覺,我生日所有人都要同我慶祝既感覺。我既小朋友只係普通小朋友,唔係乜公主/王子,生日簡簡單單過就得!!
一個經驗,我個女細細個太太就同佢攪生日會。如果有一年規模比唔上前一年,佢會唔開心!!禮物唔夠多唔夠貴又會唔開心!!得一個普普通通既生日蛋糕一份百幾蚊既禮物簡真係侮辱。有人送貴禮物俾佢,佢就感覺父母對佢唔好!!依家,佢生日,日日收禮品收足一個月,父母都冇咁好。
可能我個女只係special case.....我唔知!!
但生活簡簡單單就係好,物質咁豐富既年代,無法好好控制自己只會好辛苦!!
唔知道係唔係呢??

Body Check

Body Check結果終於出左!!小小力係二級肥胖(Body Mass Index > 30),血糖高少少!!膽固醇反而正常!!肝酵素偏高,有脂肪肝!!其實結果同四年前差唔多,不過真係要積極減肥!!我都擔心自己有糖尿病....

一針見血

網上見到一針見血的評論，教育局應該好好參考。我自己都去選擇D課外讀物同個女一齊睇，希望提升佢對中國語文既興趣!!求學不是求分數，但政府講一套，做一套。作為香港人，真係乜到要靠自己!!!

討論：《中國語文科》‧《中學通識科》
中文科的內容，近四十年來，跟四十年以前有很大的改變。近四十年，中文科走的是「語文純工具」路線：閱讀、書寫、聆聽、口講的訓練，用作溝通之外，再無其他目標。香港中學生的中文程度，四十年來的趨勢，是否漸走下坡？值得全面檢討！
思學並重，古有明訓。無論單獨強調「思」，或者單獨強調「學」，都顯得不夠全面。「學而不思則罔，思而不學則殆」。孔子以為：「光是讀書，卻不去思考，結果就會誣罔而被欺騙。只是空想，卻不去讀書，缺少學問根柢，思想上蕩而無根、無所依歸，結果就會疑惑而缺乏信心。」
蘇軾認為：「腹有詩書氣自華」。時下一般學習的人，在「學」與「思」之間，過份重思而輕學，於是認為：熟讀、朗誦、背誦，都是死記硬背，認為這都是扼殺智慧的事，結果「束書不觀，遊談無根」。而事實上，透過熟讀、朗誦、背誦，學養卻可因此而積聚，「熟讀唐詩三百首」與「不熟讀唐詩三百首」的兩個人，對《唐詩》的認識和鑒賞力，前者較勝。熟讀、朗誦、背誦不但沒有妨礙智慧，而且有助提升理解、分析、思考、創造的能力。
對於沒有興趣朗誦、背誦的，不必強迫。同樣道理，對於願意去嘗試朗誦詩文，願意去背誦名篇的，也不必制止。朗誦、背誦，都是一種可以自行決定的行為，不必視背誦為洪水猛獸，教師引導學生背誦名篇，也不要指責曰：「教師替學生注射『懵仔針』，罪大惡極！」譬如集郵：收集喜好的郵票，藏在郵票簿，細加欣賞，是自得其樂的事。同理：收集名篇，透過背誦，化為「長期記憶」，藏於腦中，融會貫通，寫作詩文，能自取其積學而靈活運用！整個背誦的過程，也是一件快樂的自我滿足的事。《詩經》《楚辭》，《孟子》《莊子》，《左傳》《史記》，以至《出師表》、《陳情表》、《滕王閣序》、《弔古戰場文》、《赤壁賦》……優美的篇章太多了，背誦之樂也多了！杜詩韓筆愁來讀，似倩麻姑癢處騷呀！
所以：應該「思學並重」，讀書和思考，不可偏廢。可是，香港中學中文科所走的「語文純工具」路線，卻造成學生在「思」與「學」兩方面，同感不足！
中國的文學藝術、哲學歷史、山河大地、民族文化，數十年來，已從香港中學中文科的教材中抽離了，中文科，固然變成一科只是認字、認詞、認句的純工具科目，連最基礎的一些文學藝術、文化哲理沒有了，課程內容貧乏，又團團轉於語法、修辭之間，學習趣味也全面減低了，學生學習的，是用「名詞、動詞、代詞、形容詞、副詞、介詞、連詞、助詞、歎詞」，去弄中文作品中的「字、詞」，一篇作品的段落、篇章，也不去好好理解一下，更遑論投入去欣賞美妙可愛的中文作品了。不透過「投入欣賞」去學習中文，卻透過「字詞工具」去學習中文，這是值得檢討、改進的呀！另外，應多閱讀優美的古今小說、詩歌（不是割裂小段的、細眉細眼的「閱讀理解字詞練習」），應該多寫作，多作「演講訓練」，這些也是要加強實幹的呀！
中一至中五的中文科，因「語文純工具」的學習路線，結果，中文科課程的「學習內容」被掏空了，至中六、中七的中文學習，補救一下：《中國語文及文化科》，加入六篇《文化範文》，又加入課內選讀的小說、文學藝術、歷史文化名著，可算是較佳學習中文的設計，可是公開試中：「文化部分」，只佔全科約25 % 而「選讀名著」，卻又不佔分數。在「公開試指導教學」的現實情況下，學生當然要爭取高分，要「爭佔五張試卷的得分高地」，結果，全科形成了被動式學習，形成了針對式學習、雞精書學習、雞精補習社學習。於是，「選讀名著」及「文化篇章」二項，都給架空了，這已是近十多年的情況，今天，課程設計當局，檢討課程，也應該仍有很大的改進空間的呀！

以上討論《中國語文科》，以下《中學通識科》

近日香港考評局的《通識科試題示範》，其「信度」、「效度」【注】，都受傳媒質疑。旁觀者的感覺是：中學通識科，因為是新開張，大多數教師都沒教此科的經驗，可能正醞釀一場「摸著瘀泥過河」的混亂！


【注】●「信度」（reliability），我的理解是：同一份《試題》，做多次測驗，其結果都可靠。考生不會因「符碌」而得高分的。同理，同一份《答卷》，由十個人閱卷，十個成績的差異越小，則這份《試題》的信度越高。●「效度」（validity），我的理解是：一份《試題》能準確測出不同考生的程度。透過這份《試題》，能準確把眾多的考生分等。●「信度」與「效度」的關係：我的理解：「信度」是「效度」的「必具條件」，但不是「充分條件」。即：a.「信度」高的《試題》，其「效度」不一定高。b.「效度」高的《試題》，其「信度」必高。（對不起，越解釋越糊塗！）
中學通識科，摸著石頭過河，教師面對教育當局定出的通識科「教學目標」、「教學內容」、「教學設計」，都沒有經驗，缺乏方向，只好各有解讀。有些重視愛國教育（認中、反殖、愛國、愛黨）。有些又過份強調「做中學習」、「自我摸索」、「自我發現」的學習方法，全程帶著學生，去追逐杜威和布魯納的一套，餖飣瑣碎，將是意料中事，不足為怪了。通識教學，如何實踐，相信結果又是回歸現實：紛紛瞄著考評局的《考卷評分示範》，預計又逃不了「公開試指導教學」之路。
據了解：美國的「通識教育」，已有超過四十年的歷史。香港中文大學的「通識教育」，行之已有三十多年，每學期的通識科目，超過一百科。香港大學的「通識教育」也約有二十年。中學的通識科，與大學的通識教育，理想相同，而內容與方法都不一樣，中學通識科，眼前的急務，應集中全力，把《官方通識科‧網頁資料庫》、《官方通識科‧工作坊》做好，先讓教師能摸著石頭過河，而不是摸著瘀泥過河！更應緊密連結的，是香港教育局、各大學及教育學院、課程發展議會科目委員會、香港考評局，集思廣益，而不是各行其是、各自為政，應該有效益地去為中學通識科教師提供具實效的《網頁資料庫》，提供多題材的《網頁〈教學設計〉》及《教學電視示例》，舉辦通識科教師即習即用的《工作坊》，使不同校的教師交流經驗、合製教材。另設《官方協調辦事處》，分配資源，協助安排各校學生參觀、考察、實習、製作……一系列的科內的需要。又可考慮參照《中國語文及文化科》的計分方法，把學生的「校內通識科成績」，納入「通識科公開試」，佔若干個百分比，則可減輕來自公開試的壓力，又能發揮學生校內學習的動力。

落雨天心情

星期六,一個要番工又落雨既星期六。外面天黑黑,同心情一樣!!唔知點解,好似有D野擔心,但又唔記得係咩事!!總之,腦海一片混亂,...組織唔到,諗唔到野!!
成個早上都呆呆地,都冇做過野....不停上網上網,.....到Youtube聽到D舊歌,都幾好聽....


大家最近點,心情好唔好?

工事私事

以為讀完書考完試會得閒D可以休息下,原來都唔係喎!!之前原來擠壓左好多工事私事,一次過做番哂都幾係....
工事, 唉!! 有時我都好怕呢間公司做既果種混亂同底效率!!講真,呢個場冇乜野做都咁,出面D場真係唔知點算!!出一張單,淨係等scanner用都等左一個月!!所有野要儲埋儲埋一次過做,直頭係八十年代初初有電腦既時候用既Batch Processing。今時今日物業管理講既係customer services,整個水喉換個座廁都要成個月咁既效率真係被人鬧到死....成日仲自誇行業龍頭,.... 唉!!母公司係本地最大地產發展商,淨係做呀媽生意都可以本地龍頭喇,但係論質數都可以講應該近龍尾..!!正如舊老細講既舊式管理。階級觀念好重!!上級講既野係唔會錯既,開會只係聽指令,底級既無資格提出意見,只有高級先識用腦諗野!!晉升唔係睇能力係睇年資,好似政府,坐到夠就有得升!!擦鞋文化極嚴重,大老細開大會,要扮民主,各個manager要搵定D「平民」員工作定問題!!好難想像一個月得五六千既清潔工會關心公司既內地策略,為公司o係內地某城市接到一個盤既管理而感到驕傲同興奮,...又冇你份做,錢你又冇得分,難聽D講,「關你鬼事咩!」。山頭/大佬文化,跟到個有power大佬唔洗做,辦公時間可以訓覺!!.....對工作還有少少熱誠o係度簡直係浪費時間,幸好,小小力已經唔係年輕人,...目標亦唔係放o係工作既成就上面.....當休養生息囉!!
私事!! 出年九月BB開始要讀幼稚園,今年九月已經要報名,所以,開始要搵定幼稚園!!我唔想BB讀東涌既幼稚園,係因為上小學既問題。東涌既中小學程度比市區底兩!!但去得太遠我都擔心BB太累,....初步選定馬灣/青衣/荃灣/白田!!都要D時間諗諗!!
期間,都有睇住個女D學習進度!!唉!!日日睇住就okay囉,睇少眼都都即刻回落!!都唔知係佢讀書定我讀書!!而且,okay既意思都只係同校內學生比!!我俾D市區學校既題目佢做,根本唔合格!!期間佢參加左一個全港學生公開評估試,竟然係全港頭20%,...我反而懷疑全港頭20%既學生根本冇參加呢個試!!!如果佢咁既成績同態度都可以係全港頭20%,咁真係香港人既悲哀....
另外,想同兩個小朋友買番份保險,初初睇都幾貴,人壽加危疾/意外/住院要成八百蚊一個月
,間間保險公司都差唔多!!間間保險公司都差唔多!!睇下睇下,cut下cut下cut到五百蚊幾一個月,兩個要一千,供二十年,......唉!!
你地收到報稅表未??我就未,打電話去稅局問,原來稅局話check過我人工底到唔洗交稅,連報稅表都唔洗填,所以稅局唔會發報稅表俾我,....諗諗下,我都幾窮幾可憐喎!!
爸爸同太太成日叫我去做Body Check,終於做左!!詳情report未有,初步話我有脂肪肝,要戒食甜(糖)同戒食肥(肉),....成210磅我都擔心自己身體,為左屋企我都開始減食.....又睇下點!!
講過跟著想讀哲學,於是搵D有關既material睇睇,發覺幾大問題....係我英文差,...理/工科出身既我睇哲學書可能要比人慢,日日要用四個鐘頭睇書我暫時真係冇咁多時間,....睇黎都係要暫時放棄...

十年

「人生有幾多個十年,最緊要活得痛快」最近成日聽....
你個左幾多個十年??仲有幾多個十年??痛快不??
小小力第一個十年,雖然窮,仲成日被批評為蠢,...成日被鬧,被打(唔係頑皮被打,係蠢被打),但仍然開心,起碼媽媽體諒我蠢,冇理會其他人 ,仍然用心教我!!養成我行我素既性格!!
小小力第二個十年,自己開始幼年得志,再冇人會睇少我,....但父親開始大病,屋企人死下一個,死下又一個,....屋企比十年前還要窮,.....好harsh既日子....
小小力第三個十年,迷失既十年,浪費時間既十年(黃金十年)!!唔清楚自己想點,有一日過一日!!
小小力第四個十年,開始醒覺,開始明白,...好多事想係幾咁美好,現實又係幾咁差!!開始接受同適應呢種差異,...開始從以前既失敗中計劃剩下既日子!!媽媽患病既日子令我更堅強,...雖然媽媽最後都離去!!第四個十年,我既兒子出生...
即將踏入第五個十年,希望睇住兒子長大,...希望唔好似我,第四個十年先醒覺!!
人生有幾多個十年,最緊要活得痛快,....定係死而無憾!!??

下一步

終於考完試,由自己決定讀金融到考完呢次試,已經有五年喇!!好開心呢五年雖然有好困難既時候,但最後都堅持到完成!!唔開心既係o係學習既目的只係達到一半....半知半解!!不竟呢個course(本地)太雞精,本地既師資又麻麻,....過到只可以話我好識考試,就算係公開試,我都估中佢會出乜!!
考完試,會休息下,見下朋友,然後再想下一步.....

極限

考試將近,書好似讀極都唔入腦,早三個月已經開始準備,但讀完又唔記得,再讀完又唔記得!!
感覺隨著年紀漸大,開始接近極限....或者,係時候諗下用另外一D方法去繼續學習...
期間,番學校溫習室,...見到牆上寫著:
“We must learn our limits. We are all of something, but none of us are everything.”
往後既路到底要點走呢??有點猶豫....

贏在起跑線

作為父母,未必一定要子女贏在起跑線!!相反,只怕子女輸在起跑線!!
我BB都有上閃咭(唔係龍珠o個D),....但只係睇圖(閃咭),玩下遊戲,聽下音樂咁!!好似片中咁谷法都好似好可憐!!在家,我就冇再俾佢學文字/認數字.....又係玩下積木,玩下波,玩下水咁!!我覺得仔仔冇人地咁醒,但起碼開心!!

錯

日日來自各個行頭既判頭都做錯野,叫A換隻門,隻門黎到短左!!叫B換隻門框,門框黎到窄左!!等等等等......!!總之,一日安排十樣工程,十樣都做錯哂!!質數咁差既判頭點生存??答案係:判頭公司既老細,即刻我老細既老細!!水喉,Builder,冷氣,保安系統,清潔,等等等等既判頭公司都同我地同一間母公司!!咁既制度下,呢D判頭公司無論做得幾差都有生意,佢地多勞又唔會多得,..做得差又唔會冇左份工,....做得差又照收錢(大老細將D錢左手交過右手),.... 唉!!仲有咩質數可講!!

讀哲學

今年會讀完Banking and Finance,之後打算讀哲學!!
點解我想讀哲學??
或者,我想對人生都問個點解!!
哲學唔係一個理論(theory),係一個活動(activity),...一個思考問題既活動!!因為世界上大部份問題都係冇答案,....通過問題,你會知道更多,令生命更完滿(complete)
所以我想讀哲學!!
期間,聽左個哲學課程既talk。發覺大部份有興趣既都係年紀比較大既,或者因為年輕都會認為選擇讀一個課程會考慮會唔會為工作帶黎好處...讀哲學冇乜直接利益,所以,大家都冇興趣!!
對我,讀完大學只係一個起步.........
talk上,有一個較年輕既問:「讀完呢個課程算唔算係一個哲學家??」
或者,佢對哲學有好大誤解,....讀唔讀哲學你都可以係哲學家,....你需要被確定嗎??冇人請哲學家架喎!
另外有一個最大問題,....幾多人先至開班!!(因為我估都唔多),....講者話學校承諾夠十個一定開班,不過舊年上完課又有信心到最後去考試既,得三個!!
希望可以開班喇!!

代理問題

最近,B仔番學改左番星期六,咁我每隔兩個星期就可以同B仔去番學!!親子活動,我覺得對BB成長同智力發展好重要!!眼見D由工人帶去番學既BB,真係個個歲幾都呆呆 咁,....真係可惜!!錢真係代替唔到愛!!D工人掛住同鄉里聊天,邊會同個小朋友玩呢!!
我太太唔信,工人好錫BB既表現只會o係雇主面前出現!!等我太太仲成日話出去番工...唉!!我就覺得唔好為小小錢犧牲左BB既將來囉!!
不過,太太都係個任性既人,你越叫佢唔好佢越係去做,....有咩辦法!!??又睇下點!!
經濟學上有代理問題(Principal-agent problem)
Principal : 雇主
Agent : 代理 (工人)
雇主請工人做野(act for the principal),但雙方既期望有出入!!
雇主當然想工人在工作時間內盡心盡力盡做,但工人當然想收左人工,在觀察不出(unobservable)的情況下,在工作時間內盡量唔做野(enjoy on-the-job leisure)!!
呢個問題永遠存在,...問題亦只可以減少(reduce),不可以消除(eliminate)。
點樣減少??最有效方法就係雇主睇住(monitor)工人做野囉!!
問題不可以消除因為你冇可能樣樣睇住工人做嘛!咁o米選擇重要既野去監視(monitor) 囉!!
例如,BB學習你o米睇住囉!!落街買野你o米唔睇囉!!
你都係打工冇理由唔明架!?老細放假你會唔會hea??

Family Man?

覺唔覺,轉左工之後,Blog好少再講公事!!因為冇咩好講,一個好祥和既地方...每日都好快樂!!你仲可以有咩suggestion!?連火都收埋,真係好...
在家既時間多左,睇電視既時間都多左!!睇<桌球天王>,好想再打打桌球!!自己已經打桌球打左有二十年!覺得呢個運動雖然運動量唔大,但就好能夠訓練你控制情緒,同計劃。係一個好好既娛樂!本來我都好想教BB打桌球,可惜你依家要搵地方練習就真係難!!女仔唔玩既遊戲好快會消失!!
太太以前老板因為生仔,搵左太太幫佢睇美容院,沒有太太在家既日子,我發覺我冇能力照顧BB!!佢喊我都stop唔到佢,...佢唔食我又冇辦法,你話媽媽幾重要呢!母親節又到喇.......:(
反而,BB照顧番我!!我大傷風,流鼻水,...BB見到,即刻走去拉紙巾俾爸爸,....真係病都快D好番!!
講開個仔,人人都話似我!!仲話只要將我縮細,就係個仔咁樣喇!!樣,...我就唔覺得似喇,但壞習慣就似哂喇,鐘意咬手指(咬埋同一個位),咬衫( 咬埋同一個位),坐o係度冇腰骨,訓覺成頭汗,鼻敏感... 唉!!
女女終於默書有100分!!點解呢??上次默書得37分,我罰佢將錯既抄50次,抄左一晚到零晨三點!!今次默書前,我叫佢讀書,佢又話要睇電視!!我同佢講今次錯就抄100次,再錯就抄200次,...一路加上去,...咁終於就100分囉!!人就係咁喇!!
日子就係咁一日一日過去........What a family man!!

停一停,玩遊戲

身為中國人,你能夠認得出幾多個省,省會和別稱呢??
例:19.廣東省,省會-廣州,別稱「粵」

蹉跎歲月

個女放復活節假,放十幾日!!十幾日假,已經差唔多過左一半!!除左做幾樣工課,書就一頁都冇睇過!!日日坐o係度叫悶!!工課未做哂,我一定唔會俾佢去玩,冇得去玩,坐o係度都唔會睇書,坐到夠就訓.....有種蹉跎歲月既感覺!!
求學問呢樣野,你冇興趣,唔想學,邊個迫到你???
只係自己都試過,失敗過,唔想子女重複犯錯!!
我相信,人,總有醒覺既一日!!
但,只怕呢一日黎得太遲!!
《今日詩》
今日復今日，今日何其少！人生百年幾今日，今日不為真可惜！ 若言姑待明朝至， 明朝又有明朝事。 為君聊賦《今日詩》， 努力請從今日始。
《明日歌》
明日復明日，明日何其多！我生待明日，萬事成蹉跎。世人若被明日累，春去秋來老將至。 朝看水東流，暮看日西墜。百年明日能幾何？ 請君聽我《明日歌》！

中國不高興

一本名為《中國不高興》的新書最近在中國大陸面市，引起坊間熱議，媒體熱捧。
此書的全名是《中國不高興：大時代、大目標及我們的內憂外患》。這本揚揚三十四萬字的新書之所以搶人眼球是因為它對中國的外交政策提出了大膽，甚至有些偏激的建言。

小小力認為,不錯,中國開始富強,在國際間,可以表示不高興,可以說不,...但前車可鑑...!

日本可以說不 (日文：‘“ NO”と言える日本 ’)，出版於1989年，作者是日本索尼公司創始人盛田昭夫和右翼政客石原慎慎太郎 。 這本書因鼓吹日本應該在包括經濟和外交的各個領域提高自主地位，尤其是相對美國的自主地位而著名。 在日本經濟增長的大氣候下，該書迅速成為討論熱點，許多未被授權的版本被翻譯成英文並在美國流通。

但之後,日本經濟開始沈侖,....日本仍舊可以說不,但冇人理咁解囉!!

有d野可以講唔可以做,相反,有d野可以做但唔可以做講!!

《中國不高興》 呢本書小小力都有,你想唔想睇??

打假波

香港有打假波,其實係都已經係早知而又係公開既祕密!!但今次竟然有落場球員忍唔住叫出黎!!原來o係呢個金錢掛帥,道德侖亡年代,仲有人知道/尊重體育精神!!
小小力想對呢位球員講:「離開球場吧!!足球已死,而且天下烏鴉一樣黑,...唔係香港足球已死,係全世界都死!!」
自從賭波普及化,波已經唔係用黎踢,係用黎賭!!
足球比賽再冇咩觀賞價值,.....我都好耐冇睇波喇!!
真係悲哀....

60分狀態

我經常提醒自己比上不足(保持推動力),比下有餘(唔好咁灰)
總覺得應該時常保持住60分既狀態(100分係超興奮,0分係超灰)
不管發生任何事都一樣,
控制自己既情緒,唔好俾情緒控制自己!!
你覺得我做得到嘛??
你又係經常幾多分既狀態呢??

Deviation

作為爸爸,好容易將自己BB同別的BB比較!!
在家,我覺得自己B仔好醒!! (至少比起其他表弟妹我都覺得係!!)
外面,番學,...同其他BB比較!!仍然覺得係!!至少,...老師都話係比其他BB醒same有天份!!(唔知咩天份!!)
去探太太朋友個仔肥B!!...肥B早我個B仔 十日出世!!好大份,亦好大力!!一歲大,已經可以拿起8公斤米,仲做可以引體上升!!佢食野比小小力還要多!!呢種天份,小小力既B仔 肯定冇!話唔定肥B將來會係世界級舉重運動員....呢種天份,小小力既B仔 肯定點學都學唔到!!
但除左大力,其他就差好遠!! 記得幾個月前肥B識爬B仔都未識坐,...我覺得肥B好醒,..我覺得唔好浪費左個咁好既小朋友!!於是建議佢俾肥B同B仔一齊番學!!!但唔知係唔係我說話冇乜話服力,...佢認為咁早番學係冇用!! 唉....好可惜!!
今日,B仔唔只識行,仲識跑!! 大家爭玩具,你唔好以為肥B咁大力會爭到,...我睇佢地十次爭玩具B仔十次都爭贏....有次爭贏仲要打肥B個頭一下先走,......再好耐,...先見到肥B喊!!
見到肥B,...我覺得好可憐,.....考完試,一定要多D帶肥B去玩!!
上網,睇朋友車人個仔.....感覺又好唔同,....鈞鈞9個月做識既野我B仔一歲都未識,...今次輪到我覺得我B仔好唔得,...好可憐!!
真係人比人,比死人...

港女

有日番大陸按摩,聽到有幾個港女同按摩場職員口角,...事情係咁既..
話說按摩最少要做兩個鐘,最底消費就係兩個鐘錢。呢位幾個港女,做左一個鐘要走人(相信佢地早打算做一個鐘,因為當時已經十一點,再唔走過唔到關!!)
到俾錢既時候,佢地只係俾兩個鐘既一半錢!!咁職員同佢地理論,話有最底消費兩個鐘...
港女既第一句係乜?? 大家都應該諗到....
港女:「叫你經理既見我!!」
小小力心想:「真係呀豬呀狗都話要見經理!!」
經理黎到...
港女:「我按摩左一個鐘,點解要我俾兩個鐘錢!!」
經理:「因為我地按摩最底消費係兩個鐘!!」
港女:「點解你地唔早講!!」
經理:「我地門口有寫!!」
港女:「我唔識字!!」
經理:「你咁講我地冇辦法」(似暗示報公安)
港女好大聲講:「我唔識中文,淨係識英文。」
小小力心想:「你話唔識簡體字都仲好D,身為中國人,o係中國人既地方,用中文(廣東話),大大聲好proud咁講自己唔識中文淨係識英文!!幾咁羞恥!!」
經理:「我地門口有用英文寫!!」
小小力心想:「經理好野!!」
港女:「我要睇日文!!」
小小力心想:「正仆街!!」
經理:「你咁講我地冇辦法!!」
港女:「我地唔係唔俾錢,你俾個合理既理由我我o米俾錢囉!!」
小小力心想:「消費完俾錢都唔合理??下次我o係香港外出食完飯,叫個經理俾個合理既我我o米俾錢囉!!不過要我俾錢所有理由都會變得唔合理!!」
經理:「小姐你咁講唔通喎!!」
港女:「好!我俾!!我識上網架,番到香港我唱衰你地,以後都冇香港人黎!!」
小小力都係香港人,都感覺憤怒同羞恥!!太太話唔係趕時間,實走埋去打佢兩巴。

我竟然會忙

依家,能夠保持一星期寫一篇Blog已經好好。因為最近我竟然會忙....
公司考乜鬼野<職業健康及安全管理體系 18000> (類似ISO),....做文件做到死,OT到半夜兩點!!唉!!其實我覺得呢D咁既standard考黎真係多餘,所有員工根本上都唔根個standard
做,平時要做既文件都只係考前一星期補做番,大量浪費人力物力,大量製造垃圾,大量浪費紙張!!最後o個一星期,我日日簽幾百個名.....有乜辦法唔忙!?? 最冇心機既係呢D努力只係為補償某D人既偷懶,半點都冇為公司增值,公司亦半點都不欣賞。
另一方面,又就黎考試!!唔經唔覺已經係呢個degree既最後一年,雖然科目最少,但難度係最高既一年。早兩個月開始溫書我都覺得讀唔哂!!個lecturer又差,99%既同學都唔明佢講乜,最差係有好多人講到邊都未知,....過唔過到,我自己都係五五波!!
家庭方面,好彩BB身體健康又聽話,...但個女就煩喇!!入左間底水平既學校,人又懶左,....剛剛派既成績表只係中下,....以學校只有40%人入到大學黎睇,...佢都應該讀唔到大學喇!!派完成績表,我同老師都比左target同鼓勵佢,...但成績仲好似越黎越差,...!!除左追明星睇明星,冇野進步過!! 佢唔想讀,我有咩辦法??最怕係有o個D咩「公主病」,以為自己係公主,生出黎就唔洗做,由父母或者丈夫養到佢死....!!

一歲

3月7日,B仔已經一歲喇!!冇乜特別慶祝,B仔自己又唔多識!!俾生日佢食下咁喇!!之前買左學行車,B仔學左好耐都唔識行!!都係o個句喇,太過保護就乜都學唔識架喇!!太太同工人成日驚佢跌,拉住佢行,..學左2 個月 都唔識行!!呢幾日,小小力得閒教B行。冇架,我只係俾B仔企穩,之後行後兩步,叫B仔行過黎, 佢行兩步我行兩步,..雖然有跌,但行 左4 至5次就已經識行喇!!2日 佢已經可以行30幾步.....太太同工人覺得好奇,我覺得佢地咁教都識行先至奇!!
但到第3日,小小力又要番工,...到太太同工人睇番B仔,...佢地一係好緊張,一係睇都唔睇, 俾B仔 o係商場走呀走,...結果一頭撞落D商場玻璃度,又起左個高樓,... 唉!!
太太成日話我都冇乜同B仔玩,又冇乜照顧B仔(換片餵奶),但B仔就好錫爸爸,爸爸一番黎就大聲叫爸爸爸爸,有野有淨係俾爸爸唔俾媽媽,...佢都唔明點解!!
我覺得,重質不重量 囉!!同BB玩,唔洗要乜特別玩具 既,...我同B仔玩,都係D日用品,
奶粉罐,匙,毛巾,紙,飲管,遙控器,雜誌,盒紙,等等!! 咁多咁新奇,BB玩得好開心喎,...佢俾咩爸爸,爸爸都可以同佢玩得好開心喎!!明唔明?就算玩手指,扮神探伽俐略, BB玩得好開心喎!! 同BB玩自己都諗過架!!
太太都有D唔開心,但有日,B仔打開爸爸銀包,將D錢俾哂媽媽唔俾爸爸 ,太太即刻開心番哂!!

大個仔

BB大個仔左好多喇!!
九個月

一歲

隱蔽老人

一套好有意義既動畫,值得大家反思!!
上半集

下半集

又或者,大家都知問題所在,....只係知到又點呢??
你又會點呢??
做少少改變??定係繼續隨波逐流??

冇衣食

唔想食,食唔晒,掉晒佢,...叫做冇衣食,好折墮!!
同親太太同個女出街食飯,都有種好難受既感覺!!見佢地成食唔晒掉晒D食物,...真係好折墮!!好似昨日同個女去食扒,佢叫左個什扒,咬左啖腸就唔食,成份什扒唔食掉晒佢!!(95%掉晒).....我想死!!
好折墮!!
以前太太會話食唔哂點食呀!!
咁,食唔哂咪唔好叫咁多囉......
依家太太見我話佢掉晒D野,一係乜都唔食,一係食剩俾哂我食...我唔知佢邊餐鐘意食多D邊餐鐘意食少D,....於是我餐餐食兩三個人份量...食到我呢!!
好彩B仔有衣食,餐餐都食哂,病都食九成,....有樣樣都食...:)
真係好怕見人浪費食物!!

投鼠忌器

日防夜防,家賊難防。爸爸又話擺o係屋企既錢唔見左!! 唉!!....我可以點?叫佢收好D錢,佢又唔收!!叫佢唔好擺咁多錢o係屋企,佢又唔理!!好似故意俾D錢佢偷咁!!次次唔見錢就叫我同賊仔講...真係搵我呢煩!!講有咩用??冇證據賊仔一定話冇偷,就算有證據事主都唔介意我仲可以講D乜??我又唔係釋迦牟尼,講野可以導人向善,...再者都講左咁多次囉,..次次都冇用今次又點會例外呢???
於是爸爸有次自己問佢,結果工人話見到爸爸仲俾個賊仔鬧,......有時見到幾十歲咁,被個仔偷左錢都仲要俾佢鬧,...好可憐!!但佢一方面叫我做一方面又叫我唔好做,我都唔知可以點...!!太太話日日咁生活都好煩好唔開心,...又驚被偷野又驚爸爸唔開心...!!
但....投鼠忌器.....又可以點??
親戚朋友已經唔當佢係人咁看代,但又點?? 或者只要有著數,佢都唔介意自己係唔係人!!
又可以點??
有人有辦法不如教教我喇!!

枯燥乏味

原來,又一段時間冇寫Blog喇!!
生活變得平淡,思想越黎越狹窄....結婚之後睇少左好多書,...整個人覺得好枯燥乏味,..睇番自己寫既Blog,好似寫日記咁,....真係冇乜意義!
情人節,一如其他西方節日,小小力都冇咩好感!!呢D節日,都只係用唔同既理由叫你消費!!唉!!o係小小力既心目中,愛唔係用物質去衡量!!所以,情人節小小力從來都冇送個花俾人(包括我太太),....太太都話:「你不如將買花D錢俾我!!」,...我都係咁話!!
情人節,同太太,爸爸番左大陸!!發現好多地方都好少人好冷清!!金融海嘯對大陸冇影響你真係唔好信!照我睇,影響仲俾香港深遠!!到大陸食晚飯,又魚翅又鵝肝又海鮮,...食到飽飽都係四百幾,...o係香港,好D既花都買唔到一束!!
數日後,爸爸生日又食晚飯,o係香港,原來俾千幾蚊都係好食垃圾咁.....生活真艱難!!
冇寫Blog期間,又去睇左個兒童教育展!!期間有BB爬行比賽,可惜B仔病左冇得參加,佢一定好鐘意玩!!見其他BB爬短短既路都要爬12秒,...我同太太都諗如果B仔有參加比賽一定係冠軍,佢爬o個段路都唔洗7秒!!Anyway,贏唔贏冠軍唔重要,最重要係B仔開心!!我B仔依家都唔滿足於爬平路囉,...佢去爬滑梯架!!(o係滑梯下面爬上去再滑番落黎!!)
講番個展覽,真係浪費我時間!!個個Sales都sale你買一套o個D英語學習套裝,...最平都四萬幾蚊一套,...嘩!!四萬幾蚊一套,..有幾多家庭負擔得起!!仲講到D父母唔買就害左小朋友一生,個小朋友即刻變成底能兒童咁!!真係想問佢細個父母有冇買一套俾佢,定佢根本就係底能!!我覺得佢地好cheap!
我覺得最好都係身教,父母唔願意去教,...套套裝幾好都死(個Sales話有左套套裝,父母可以唔洗教,叫工人俾佢睇DVD就得架喇,....咁懶,生黎做咩呢?)
講開B仔,自從由床跌過落地,依家醒好多,...一去床邊/沙發邊呢D高位,佢自己會轉身用腿同pat pat落先,咁就算跌都冇咁痛喇!! 呢d野,我地都冇教佢喎!!
明唔明??
期間,又同朋友食晚飯(我飯局仲多過陳志雲),同朋友討論(其實都唔講得上討論)開小朋友教育,..佢地都覺得現今教育制好好,..D小朋友好醒,好識兜(做錯事唔認),唔洗學自然科學/健康教育咁老土,細細個已經識用電腦....等等!!小小力100%唔認同,...但發覺連討論都冇興趣,....只感覺大家層次唔同,話不投機半句多!!一年見一次我都覺得好夠!!
朋友們覺得小小力好串,小小力覺得越黎越少朋友,生活越黎越枯燥乏味...!!!
朋友們,你點睇小小力?點睇自己?

牛年希望

新既一年,希望減肥,減債,減支出!!
希望一家人和和氣氣,身體健康!!
對於財富,今年完全冇特別希望....只希望唔好減少得太多!!
希望簡簡單單又過一年喇!!

恭喜

初六,到朋友邦邦屋企拜年,睇下新屋同睇下邦邦既Baby!!Baby好得意!!我太太就好鐘意,成日抱著唔放!!太太話好鐘意咁細個既Baby,因為唔識反抗!!我諗,邦邦既Baby大個都冇我仔仔咁頑皮,信唔信??
邦邦新屋好大,...同係三個房,但人地一個房等於我兩個房!!工人房大過我主人房,..又唔似我有D五角形既房,..四四正正,地方好好用!!但成四百幾萬,...唔中六合彩睇怕都冇乜機會買..真係羨慕!!期間,朋友們都講緊打算買樓....依家,我真係冇能力再買樓,我真係要努力D至得喇!!
媽媽講過,只要唔好放棄,我終有一日夢想會成真!!媽媽信我得,我都相信自己一定得!!
本來打算叫埋大學同學師兄一整黎,但唔講唔知原來師兄太太都有左!!咁都叫佢陪太太休息下喇,...點知同日師兄既BB女都出埋世囉!!真係恭喜晒!!
睇番,...邦邦個仔一月頭出世,師兄個女一月尾,我個仔三月頭,Jason個女四月尾,....個Pattern好似係頭尾頭尾,仔女仔女咁去,....下一個到Jason既,...唔知係唔係仔呢?

進退失據

最近,買賣股票,感覺進退失據。
無論用咩策略買賣都輸。
15%止蝕!輸多過15%就計數離場,....但好邪,我一放,佢未到15.5%就反彈倒升!!我將止蝕定20%,佢就20.5%反彈倒升,..20.5%止蝕,佢就21%反彈。我唔放咩,佢就一直跌,跌70-80%都仲得!!
我細佬話我賣股票好似放紙鳶,一放就升!!
買呢?仲衰!!我一買就有壞消息.....
完全洩氣!!

幸運號碼

我個人有時都幾迷信!!!
從來都以為自己既lucky number係7或者9,...其實冇乜統計,只因自己唔知點解好喜歡呢兩個數字...但原來,呢兩個數字亦冇為我帶黎咩幸運....
最近,睇番自己既投資同博彩活動,...原來凡係有6既都有為我帶黎或多或少既幸運。股票號碼有6字,或者買賣股數有6(例如6手,6000股)等通常都有盈利,...連六合彩,打牌都係....
幾神奇,...
你有發現自己既lucky number未?

三人行必有我師

「三人行必有我師」出自《論語‧述而》
孔子認為：「三人行，必有我師焉，擇其善者而從之，其不善者而改之。」三人同行，其餘二人必有值得學習的地方。看到別人的優點，我們學習；看到別人的缺點，我們引以為戒。求學問時，凡遇到不明白的地方，都要虛心求教，學問才會有進步。
睇完陸東既新書《智者傲行》,我好認同佢所講,「三人行必有我師」呢句說話基本上o係呢個社會係錯既,....三人行,多數都只會係三個傻仔,冇咩好學!!甚至,三人行,必有白癡!!
越多同群眾走埋一齊越底能。蠢既兩位唔會從較精明既o個一位身上學得聰明,相反,較精明既o個一位會被同化,變得更蠢,....正是,「癡癡呆呆,坐埋一枱」
因此,喜歡成日坐埋一齊吹水既,叻極有限!!
推薦大家睇陸東既《智者傲行》!

兒子的笑聲

其實,我同屋企人既衝突好多!! 好多我覺得一個正常人應該做到既佢地都唔會,.....所有野你一個人受哂囉,...頂唔順你好似媽媽咁死左佢囉,...我地唔會改,...至於你死唔死,..who cares!?
一家人有一個自私已經好大問題,仲有幾個真係好難頂....唉!!
再加埋對現實既不滿(環境,工作),但又冇力去改變或者逃避(係,連避都冇得避,硬食!!),....
好多時都好沮喪!!
我太太問我點解成日都好似好唔開心,....唉!!你話呢!!
依家,最令我開心既,係每次聽到兒子的笑聲,...我都覺得生命仍然充滿希望!!
我相信,仔仔既性格,正如我幫佢改既英文名一樣,會用笑去面對一切困難...
真的,我仔仔好小喊,...就算跌倒,撞倒(仔仔平均一日撞倒頭三次...),喊一兩聲,又再黎過,...就算病,打針都係咁哈哈哈!!
我相信,仔仔比爸爸聰明,....教佢野,一教就識!!!我呢個爸爸呢,我媽媽話我係一個蠢人,...好多野.教十次都唔識!!
所以,我相信仔仔會俾爸爸成功,...亦希望睇到佢成功既一日!!
呢個就係我既希望,我既動力!!
後記
好多人,仲係D三九唔識七既人,都埋黎同我講仔仔好聰明!!仲有個好認真叫我一定要好好栽培佢 .....!!點解呢???
仔仔笑得最大聲, 係當我叫佢做「豬扒」.....點解呢???

狗噏

呢個咩政府黎架!!
一時又狗噏,又一時條條fing,....唔夠你講就唔同你講!!
我都可以做特首!!

問題

「即使你的問題解答了,亦不會有人開心,那麼就忘記它吧...」

問題唔係你有冇能力去解決問題,而係你想唔想去解決,....因為你知道答案會令你或者你身邊既人唔開心,那麼又何必執著呢?
或者,有更大既理由,即使所有唔人開心,都一定要將問題解決!!
或者,一個問題,其實唔只一個答案呢??
又或者,世界上真係有十全十美,眥大歡喜既答案呢!!!

報紙

有睇香港報紙既你,覺得香港報紙同世界各地既報紙有咩唔同??或者,同以前既報紙有咩唔同呢??我現在都有睇大陸既報紙,有時有睇下美國日本報紙。發覺香港報紙好多圖,好多相,好多廣告,但好少字!!一份大陸報紙既字,可能多過一份香港報紙一星期既字!!係唔係寫香港報紙既人唔多識字,定係睇香港報紙既人唔多識字?例如發生一件兇殺案,香港報紙會畫左事件既發生過程出黎....再加D血淋淋相,唔識寫咩?睇唔明咩??學校老師叫學生多D睇報紙改善寫作,可以咩??我覺得唔得囉!!
曾經有個識中文既日本朋友話,香港既報紙好血淋淋.....
但係作為一個香港市民,份份報紙都係咁, 你又可以點呢??

團拜

又一年,又差不多到農曆新年,...我呢D老野其實幾喜歡過年!!可以有時間見下D成年冇見既朋友,家人亦好少可以一齊放假。但唔知從幾時開始,....朋友都好似對一年一度既gathering都提唔起興趣!!真係咁忙??
定係人年紀越大,會越放多D時間o係屋企呢??
身邊既同事,有年輕既原來大部份都唔喜歡過年....又冇地方好去,去旅行又貴!!佢地會選擇o係屋企訓三日....
大家都冇乜興趣拜年...
團拜...out喇!!
或者,o係facebook同大家拜年囉!!

最愛

正因為是如夢一般的人
才會如夢一般地消失

知道著這樣的命運
季節又翻過了一頁

如同才剛落下便融化的雪一般
無法阻止的思念

不被愛也沒關係
只要從遠處守護著你
很逞強吧
但還是想和你有所連繫
因為我還喜歡著你

若能再多哭一點就好了
若能再多笑一些就好了
對我說「你真傻啊」
對我說「別介意」啊
只是好想　見你一面

這是第一次覺得　自己的人生
至今沒有走錯

你那如同　陽光一般的笑容
照亮了我的生存之道

為我心中的雨撐起傘的
只有你一個人…

不能愛也沒關係
我在這裡守護著你
很逞強吧
但還是想和你有所連繫
因為我　還喜歡著你

在同樣的月光下
流著同樣的眼淚
「這樣不行哪」
「不想和你分開」
僅僅一句話　卻只是說不口

當生命的旅程
走到盡頭時
我還是會為你祈禱吧

憧憬著你
「你」的存在本身
願那笑容　能夠幸福

不被愛也沒關係
只要從遠處守護著你
很逞強吧
但還是想和你有所連繫
因為我還喜歡著你

若能再多哭一點就好了
若能再多笑一些就好了嗎
對我說「你真傻」啊
對我說「別介意」啊
只是好想　見你一面

只是好想　見你一面

Ti Amo

Ti Amo,意大利語,我愛你

EXILE
作詞　：　Kiyoshi Matsuo
作曲　：　Jin.Nakamura・Kiyoshi Matsuo

日曜日の夜は　ベッドが広い
眠らない想い　抱いたまま　朝を待つ

帰る場所がある　あなたのこと
好きになってはいけない　わかってた　初めから

どれだけの想いならば　愛と呼んでいいのでしょうか
この胸をしめつけてる気持ちに名前をください

キスをするたびに　目を閉じてるのは　未来(あした)を見たくないから
抱きしめられると　ときめく心は　あなたをまだ信じてる
声に出さないまま　「愛してる」と叫ぶの

おきまりの台詞　なぞるだけの
遊びのような恋には向いてない　むかしから

誰ひとり傷つけない恋を　人は愛と呼ぶけど
この罪を背負いながら　生きてく覚悟はできてる

部屋を出るときは　「さよなら」じゃなくて「おやすみ」と言ってほしい
終止符(しゅうしふ)くらいは私に打たせて　それが最後のわがまま
ひとりきりではもう　ラブソング歌えない

もっと早く会えたら　あなたと知り合えたら
ふたりの歩幅(ほはば)も合わせられたのに

もっと長く会えたら　あなたと向きあえたら
ふたりは心も重ねてた　（Ｔｉ　Ａｍｏ）

キスをするたびに　目を閉じてるのは　未来(あした)を見たくないから!
抱きしめられると　ときめく心は　あなたをまだ信じてる
声に出さないまま　「愛してる」と叫ぶの

「僕を弱いね」と　自分から告げた　ずるい人だわ　あなたは
時計をはずして　微笑んでくれる　優しい人ね　あなたは
笑顔くずさないで　嘘を見抜きたくない

新的一年

新的一年,唔知好唔好, 但斷估都衰唔過2008年掛??
2008年,又雪災,又地震,又金融海嘯,....真係死得人多!!
人年長了,發覺好多事都係求不得,亦真係半點不由人 !!越多希望,越多失望,....令自己越唔開心!!
所以,2009年,只希望一家人都身體健康,無風無浪,平平淡淡咁過每一日!!
Anyway,剛踏入2009,已經有好消息!!
好朋友細路仔(Jason)太太又有左BB,而邦邦既BB仔仲o係2009年1月1 日出生,....真係好事陸續有黎!

倒數

2008年過去,除夕番左去時代廣場倒數。點解?周圍都咁多人,去到我都唔知睇唔睇到,入唔入到場,但起碼去時代廣場我知我一定入到場,....即使我冇入場券。
原先估計銅鑼灣會好多人,又唔係喎!!我同太太o係駱克道食完野行到時代廣場入口都只係3分鐘,人龍完全唔見!!
去到廣場入口,我問個保安點行入會場, 佢竟然答我:「唔知喎!」,D指示牌又冇指示,果然係全港最top既商場,真係估唔到Ray既target,一年內已經達成,睇怕佢都可以(或者係應該)功成身退喇!
我同太太8 點幾入到場,已經坐到最尾,...之後,有入場券既都冇得入,點解?你唔派入場券俾員工親屬,結果唔係佢地唔黎,係好多人冇入場券都入左黎。有入場券一人只可以帶兩個,冇入場券一人帶夠十個。見到個個都帶,做保安既都帶幾個入黎,死唔死??
第一次坐觀眾席,原來好辛苦,坐到最尾又乜都睇唔到,於是同太太起身行去前面,見番好多舊同事,
好開心。大家都別來無恙。其實做乜都唔緊要喇,最緊要身體健康!!原來,工程部多左個officer,.....叫咩名唔重要(好似叫Jeff),最重要又係隱形人一個,同碌葛差不多!!
去到前面,見到舊同事Gary(Well,當然唔係Centre Manager喇),係工程部一個officer,但係我估佢真係當左自己係Centre Manager,帶住成班朋友(6至7個妹妹仔)o係舞臺前影相,企得仲前過D做燈光音響工作人員,可以話阻住地球轉!!見到現場做燈光音響既總監黑哂面,...心諗:「你大檸樂喇!!」呢位總監問小小力仲有冇o係度做,有叫佢地行開喇!!咁,事實係我已經冇o係度做嘛(雖然煙花師父都仲問我D煙花點擺!!)呢位總監笑一笑話:「咁你叫D friend唔好行埋黎喇!!」....我既理解係:「小心殺錯好人!!」其實,公司好多人都知唔可以企邊D位,但都冇人提醒佢,只能夠講句:「七到冇朋友!!」
轉頭,見到推廣部經理馬公子單挑Gary,...手指指住佢塊面黎鬧!!都幾有face架!!
再轉個頭,公司竟然下逐客令,將冇入場券既趕走!!阻住地球轉既當然趕走喇,但舊同事Ivan都趕走 埋,真係一D面都唔俾囉!!
有判頭問點解我俾人趕走......哈哈,乜要趕人走咩?
終於見到個新經理(Victor),個樣好似雷頌德,...by the way,佢同Ray都差不多全場隱形,呢兩個都真係高手!!
講番個show,氣氛真係麻麻!!好多歌手都冇黎!!頒D咩五強歌手獎,一個都冇到!!倒數一刻都係DJ帶領,...講真我一個都唔識!!離職時代之前,有高層提議過唔再做倒數,..如果再係咁差,真係做唔做都罷!!
我個女成話洪卓立好靚仔,太太現場見過話麻麻,佢話我舊同事仲靚仔,成晚講左十次都有....可惜Lucas唔得閒影相...
完show之後,有高層話立即要睇番哂playback!!整俾佢睇要三個鐘,睇番哂又三個鐘,我死唔信佢留底睇到晨早7點!!樣樣都話Urgent,死性不改!!
結果,兩點幾散band(都話唔會睇到晨早7點),....一班舊同事好俾面一齊食消夜!!

假期影評

聖誕期間,睇左四部戲!!
<證人>,50分。點解部戲叫證人,全套戲都冇一個係證人!!謝霆鋒做戲得兩個表情,笑同唔笑,....其他怒,悲,擔心等等都入於唔笑,因為分別真係唔係好大!!話佢好博唔用替身,咁又點??同套戲好唔好睇有咩關係??張靜初... 呢個都係唔識做戲,...做律師同做道友做到差唔多!!張家輝,...o係套戲係扮演「未來戰士」,一個一隻眼係玻璃,打極都唔死既殺手!! 唉!! 呢d戲,本來冇打算睇,....不過我太太好鐘意睇張家輝,.... 冇計!!
<葉問>,50分。甄子丹唔識做戲預左,...但打都唔見得精彩,俾佢打既好似沙包咁,唔多會歸手!!...不過呢D「愛國」「打日本仔 」電影,叫葉問又好,叫張三又好, 都有一定市場。
<神探伽俐略>,70分。只要你忘記係電視睇既湯川學,忘記廣告睇既物理學天才對數學天才,咁係一套唔錯既電影。電影裡面,同物理數學完全冇關,甚至同科學都冇關係!!偵探片用倒序法一開始就話你邊個係兇手同點死法令追看性大減!!堤真一扮演既數學天才其實做得好好,但現場觀眾竟然嘲笑,真係底B!!
<吸血新世紀>,10分。套戲完左我都唔知佢講乜!!悶足兩個鐘! 10分俾乜?男女主角囉!!

弱點

B仔出左名惡，未至於話全東涌都知，但至少全大廈都出哂名!一
搭Lift就整喊人地D小朋友，去到邊都兇人。做父母成要同人say sorry!! 真係.......
番學又係咁，老師玩遊戲叫佢玩就冇問題,叫第二個小朋友出去玩??佢不單只大聲兇人，仲試過走去將人地小朋友壓o係地!!老師都話......哈哈,佢真係好活躍呀!.....哈哈!
父母都唔易做,你抱佢咩,佢一唔鐘意就叉你頸,轉身,踢你心口,咬人,...等等。你放佢落BB床,佢出盡力搖同咬張床,........BB床都就散!! 但你又唔好以為佢得牛力喎,佢搖唔散床,就將D玩具枕頭疊高,一踏就爬出黎,我地眼慢D都跌佢落床!!
人人都話:「湊你個仔真係辛苦!」,我完全同意,星期日工人放假,我同太太好似打左一日摔角咁!! 好似鬥智鬥力我兩個加埋都鬥佢唔過!!
!
以為一個咁既BB,會冇咩弱點, 冇野怕!!原來又唔係喎!!俾佢叔叔發現左佢既弱點..... 原來B仔好怕撕魔術貼D聲!!一撕魔術貼,佢即刻嚇到變番一個好需要媽媽抱抱既小Baby.....
唉!!
其實,有時都幾擔心,老師話B仔好心散,幾難教!!唔通下下手執魔術貼黎教咩??我估佢大大下都唔驚喇!!

聖誕

聖誕期間, 大家有咩節目?
踏入呢個星期,公司已經好有聖誕氣氛!!星期一,未放工已經開始o係公司BBQ....我都係第一次見o係公司BBQ!不過同D業主老細一齊食,我就冇乜興趣。但公司個個同事都好熱烈參與,我就冇參加,真係唔識做人!!
聖誕,都係BBQ,一家人去消防局!! 都係第一次!!
唔知會點呢?

高清電視

一日開二十個鐘頭,終於屋企部電視都頂唔順死左。亦終於要買高清電視。
一直聽人講同睇書都以為高清電視用好多電,原來又唔係喎!! 好似我買 既samsung32吋高清電視,一日開二十個鐘,開足三十一日,一個月電費 都係$92。咁,是但喇!!
自己安裝完,第一個睇既節目係無記既「東張西望」。嘩!!呀雷頌德塊面爛到呢....呀陳志雲塊面D皮鬆到呢.....呀鄭秀文塊面D墨屎多到呢.....高清其實都幾恐怖。
至於話好多野睇,我又唔係好覺喎!!
無記高唔高清都係睇o個D劇集!!亞視高清就即係睇中央電視臺!!
唉!!高清....
我諗起我免息分期個個月要供三部電視,三部電腦,一部電話,一部攝錄機就頭痛喇!!

LEB

乜野係LEB??
今日業主問我乜野係LEB?? 係o係廁所既工程項目!
佢話有某公司工程部寫左句野俾佢。
「廁所冇LEB??」
LEB係乜??我真係唔知!!LED,LCD我就聽過!!咁,唔識就問人囉!!點知公司做工程既冇人知,做判頭既又冇人知!!打電話問舊公司既同事,只有舊同事Roy好醒咁幫我上網搵到D提示!!
真係醒!!o係時代真係浪費左佢!!
佢俾到既提示係有兩個解釋,一個係heater既散熱,一個係bonding....
冇錯,最後我搵到,LEB係Local Equipotential Bonding.局部等電位聯結接駁。
香港仲有人咁做架咩!?

playgroup

生活好平淡，有時開部電腦想寫Blog都諗唔到寫乜!!
B仔已經開始番學，去銅鑼灣上D類似playgroup既班。我唔係想佢學D 咩語言文字o個D，(太早學D其他語言會令小朋友語言混亂), 只係覺得o係屋企， 一日開成20個鐘電視，對得多人都蠢D!!無論你對電視講乜做乜，佢都唔會俾反應你!!
番呢d班, 都係唱下歌(老師唱)玩下遊戲咁!!一班3個小朋友!!老師話B仔好活躍,性格好好, 成日笑， 但就好唔集中!!
希望遲D好D喇!!

冇料到

有時,自己都懷疑自己做左咁多年工程,但都真係冇乜料到!
我發覺日日都有野唔識,但其他人又好似樣樣都識咁!
我太太都話, 人地做工程我又做工程, 我好似乜都唔識咁!車又唔識整,冷氣又唔識整,電視又唔識整, 電腦又唔識整,電話又唔識整,屋企替洗手盆又唔識,裝修又唔識,樓又唔識起!!
….不過呢,我太太個細佬,佢自己屋企水電裝修都係自己一個做哂...但佢只係做殯儀館!
你話呢?
某日,同老細同事去食飯,揸同事架車既老細突然話:「聽唔聽到呀?個brake 有聲,有D問題!!」,....之後,背後既同事話D聲係個brake個disc有問題!!另一同事話其實D聲係黎自架車既右後輪避震條彈弓有問題!! 之後,做文員既女同事都話聽到係車既右後輪避震條彈弓有問題!! 但,....全程我乜都聽唔到!!
又一日,同一眾唔係做工程既幾位同事巡樓!!老遠(100米),幾位同事話fan room把扇有問題,個bearing聲怪怪地,一定有問題!(奇實我覺得冇問題,18把扇,把把架van仔咁大,冇聲先有問題)咁,我呢個唔識工程既更係叫專業既冷氣去檢查喇!!檢查完又話冇問題!!
唉!!
工程真係奇怪,你做,就發覺你乜都唔識!你唔做,就乜都識!
定係,奇實我真係冇乜料到!乜都唔識呢?

遊手好閒

今日，舊同事Roy打電話俾我，問我o係時代既時候單冷氣工程既進度同 個file放o係邊。一場同事，其實我真係想幫佢，但單冷氣工程已經o係２００７年完左，文件做到咩stage，個file放o係邊，我真係唔記得！
打到電話黎，大家都問下近況。Roy冇詳細講，只係好長咁「唉！」 左一聲。我都o係時代做過，management有幾廢大家都心裡有數喇！！
至於我，我真係好開心喎！搵到間好公司，雖然福利麻麻，但呢度辦公室做野既同事都好開心，每日都討論去旅行，諗定幾時放假！！
我呢？一個字，「遊」 囉！
遊手好閒個遊！
每日，八點半至出門口番工，慢慢行，坐公司車番到公司都未夠九點。Anyway，who care? 我番到公司老細都未到！！同事要拍card我又唔洗，我張staff card到依家成個月都未有，又冇人問又冇人理，唔通皇帝唔急太監急咩！？
工作呢？九點零鐘去workshop聽下D手下講佢地會做D咩，唔係我叫佢地做D咩！咁上午既工作就完架喇！跟判頭做既野?........判頭有咩做呀？跟 都係睇下啫！公司電腦系統我都未有password，冇得做架喎！老細話就有架喇！下？唔洗咁快喎！
年尾要做既appraisal同budget planning，都唔係我呢個grade既人做既！真係好！
話一點食飯，但十二點九我已經行去坐公司車番屋企食飯，係唔係好過 份？但我既同事同老細十二點半已經食緊飯喇！話食到兩點，但辦公室兩點三至開，你咁早冇門口入架喎！
下午，又係去workshop聽下D手下講佢地會做D咩，咁下午既工作就完架喇！ 老細 都係咁得閒行黎行去! 最重要係佢o係office行我就去個場行，佢去個場行我就番office坐! 費事佢問我有咩做，陣間我問番佢有咩俾我做，大家dead air就唔好喇！
放工，會唔會俾人話準時走？唔會喇！放六點鐘，五點十Ｄ老細都走哂喇！
我發覺，原來睇住架飛機由起飛到飛到好遠睇都唔睇到，雖然睇好耐， 但都幾得意架！
我又發覺，點會冇時間讀書呢？讀多兩個master都仲得喇！仲可以諗下charter喎！
估唔到咁快已經可以享受人生！
你地又點呢？

幸福

一個月好快又過左，黎呢度番工好似好習慣咁!
野係多左D野做，一日三幾樣野做咁囉! 都係D芝麻綠豆既小事! 係多左 好多人搵我，但係都係D人事衝突爭執!!counselling工作多過engineering!!
日日番屋企食飯，成個月除左去飲同番學都冇出過市區。 咁多年都未試過咁平靜!!假日，仲有時間睇下東涌既景色，踏下單車。(實在太耐冇踏單車，第一次載太太就炒車)
多左時間o係屋企,BB真係多左跟我,依家仲日日叫「爸爸」唔叫「媽媽」!
呢d係唔係叫做幸福呢?
有人話當你感覺到幸福既時候,你就得到幸福，因為幸福其實一直在你身邊,只 係你冇時間去留意同珍惜!!





朋友,你幸福快樂嗎??

孤寒

今日， 問番公司D同事，原來公司既員福利同我見工時個manager講 既好有出入。我呢個post根本冇每日$15既meal allowance， 都唔緊要喇!!最衰 係medical都好孤寒。員工既家人係完全冇，就算係員工自己都係每次claim得$100，最多每年claim20次，唔怪得之冇乜人sick leave去睇醫生!
呢間公司，除左呢個場，其實都好多人走!!見到D文件，老板都叫D經理對D員工好D，盡可能唔好鬧人，等佢地開心D，唔好諗著走!!另外會接觸番D離開左既同事，睇下佢地近況點，有冇興趣番黎做!!
因為以呢間公司既要求，都幾難請人!!

一年

媽媽:
好快，你已經離開左接近一年上你幾好嗎?
我開始明白你生前點解咁勞氣!屋企人，個個要求多多，但叫幫手就個個企o係度批評，呢樣唔得o個樣唔好，但冇人會幫你!
算喇!!我都係冇得選擇!!哈哈!!
你生前希望我離開時代呢間公司，我終於都離開左!而且o係機場搵到份工，人工高左，時間多左， 仲冇D仆街大老細，真係好!最近聽聞之前大老細開始折墮，估唔到咁快!好開心!
你離開以後,你個孫永強出世喇!!你唔使擔心，BB唔似我身體咁差, 佢好健康, 好活潑!早兩日仲學郭晶晶跳水，不過跳落地.....
放心喇!冇事既!俾D相你睇下......!!





雖然你已經離開左我地， 但你永遠都o係我地心中!
兒子上

貧窮

以為做左呢份工，可以洗少D錢，儲番D錢喇！
點知計計下，原來都係冇錢剩！
最主要係個女讀書間學校，日日都有D乜費物費乜捐錢，日日一百幾十，多到我自己都計唔到，唔記得。真係估唔到又唔係D咩明校，都要用咁多錢！o係東涌到底有幾多家庭支持到！？
朋友細路仔(Jason)打電話俾我，問我幫個仔搵幼稚園未！？ 佢話要搵間好既幼稚園(Playgroup) ，要早早搵定，影定相，早一年send定小朋友份C.V.去等面試!真係誇張.....
睇下D幼稚園，普普通通o個D，一年學費加埋D雜費差唔多要四萬蚊，仲貴過讀大學！減番D咩學券都要成三萬蚊。哈哈，政府仲鼓勵D人生三個，五萬蚊一個月人工或者得!
今日，公司業主既經理同我吹水，佢話好既幼稚園好重要，話可以幫我個仔介紹入銅鑼灣一間好既幼稚園，呢間幼稚園有埋小學同中學，唔洗再煩，師資環境又好等等。聽落都吸引，但聽完D學費，成六萬蚊一年，唉！
貧窮既人，真係好似冇乜希望咁！

事非多 煩

番工，最怕事非多，估唔到呢度都有！
有人將以下post上討論區，引起總公司留意，大家周身唔得閒！
赤蠟角新紅機-AFF屍管理公司奇聞
各位請留意"機場空運中心AFFC"有一個極之仆街的PO（Property Officer),就是PO"徐XX"他真是人間敗類中的敗類.人有小氣又記仇,你如果一時不慎得罪了他,你一定無運行.還有兩個左右護法.一個叫"睡成"一個叫"澤西".佢兩個見到自己的主人可管晒整個行動組,就成日借意玩D伙計.D伙計現在都俾佢地玩到殘晒.而又做得的伙計已經俾佢玩走晒.攪到成個行動組亂七八糟.過時過節又收埋佢堆的伙計重禮,例如鮑心翅肚及大利是(四位數字){特別是春節).D伙計咁做都係為了好過D.佢就實在有受賄的嫌疑.佢每日都向經理篤個D無埋堆的人,最慘是他們根本就不是那麼差.經理慘被他洗腦,又信晒佢無得救,佢兩個護法又要應酬佢同佢上大陸叫雞.如果無錢去就四處借都要借回來.咁都得.無晒個人的專嚴.仲之有他一日,我地呢班低級的人就無好日子過.
小小力唔知實情,只係覺得, PO既手下得大約 $8000人工, 竟然可以送鮑心翅肚及四位數大利是, 借錢應酬上司上大陸叫雞, 為既只係為了好過D, 真係幾難理解！
衰就衰左總公司信！
唉！

求其

已經番左工七日，仍然感覺無所適從。
小小力已經o係工程界打滾左十多年，唔想好似新仔咁坐o係度睇一個月manual!
想行熟個場，但竟然小小力呢個level係冇匙，去邊都要搵技師帶。唉，邊鬼個會帶我日日咁行！
睇番D舊文件，真係好舊，又唔多開會，D文件舊到睇黎都冇用！隨便睇份fitout文件都係十年前，仲睇黎仲乜！
有日，竟然要睇還原，政府部門租少個單位！真係難得發市！咁，我都睇睇個D十年前既文件喇！個senior property officer話佢已經睇過哂喇，冇問題，叫我唔洗睇 !
去到睇還原，一個一千多尺既寫字樓單位竟然十九幾人去睇，真係奇景。個單位D燈盤同天花紙都同業主標準唔同，係個客自己既design ！senior property officer要個客還原番！但我地個leasing manager話都係燈盤同天花紙啫，可唔可以唔還原！ 唉，到底佢知唔知咩叫還原呢？還原， 我俾咩你，你俾番咩我囉！
結果個senior property officer堅持要個客還原！本來okay喎！但點解我要睇番以前既文件? 還原﹣我俾咩你，你俾番咩我嘛！唔睇，我點知以前俾咩你呢！？原來個file第一頁已經寫明交樓o個日，我地根本冇交燈盤同天花紙俾個客！咁，還咩原呢！？ 個senior property officer根本睇都冇睇過，個客如果搵個file同你對，你仲唔俾老細插！？
但又負負得正，個客又係睇都唔睇就同意「還原」，畢竟政府錢真係「關人隱士」！
一個問題錯幾次變成冇問題！
senior property officer叫我唔好出聲！ 咁，對公司又冇損失，對我又冇損失，我樂得清閒！
呢度做野，求求其其得喇！

聚會

星期五，舊同事盈約埋一班時代既舊同事食飯，原因係派帖！恭禧哂！大貓，光仔，精叻，榮哥，車人，迷人，運來.....等等十四人!
真係時光飛逝，大家一齊工作左咁耐，原來在場十四個人得番兩個仲未離開！唉！希望再下次見連呢兩個都走埋喇！
講番大家，其實外表都好似冇乜變！最佩服榮哥，竟然睇落仲後生左！ 精叻都勁，膨脹速度仲快過我。
可惜冇帶相機喇！
原來都打算帶埋B仔黎俾大家見下，不過突然B仔外婆有病，太太帶埋B仔番大陸。 咁，下次喇！
放番B仔D近照俾大家睇下喇！

我的打算

好似大家都覺得我份工係份好工，但係咁單調咁乏味既工就真係唔係好適合我，好似被世界離棄咁！
無耐，依家個市咁差，出面仲邊有好工！要搵有前途既工都唔係呢個時候！
依家呢間話哂都係大公司，大樹好遮蔭呀！好等呢段時間休息下，再upgrade下自己，順便儲下錢(呢份工真係儲 到錢！) 。等一兩年金融海嘯過左，再出外睇下點囉！
我冇想過呢份工做一世！
經過今年轉兩次工，我發覺留o係一間公司太耐真係冇乜意思！又唔會升得快又冇獎，不如見多Ｄ世界吸收多Ｄ唔同經驗喇！
我相信魚唔過塘唔會肥！

與世無爭

新工番左三日，有種與世無爭既感覺！
都係物業管理，但感覺悠閒得多！但同事話我遲Ｄ會好忙，好多人會搵 我會好忙！但我靠我呢幾日睇到既，估計都唔會喇！可能佢地太過與世無爭，唔知咩叫忙！
首先，我又係冇電腦既，唔只，仲連電話都冇！老細話電腦安排緊，好 快會有。我旁邊既助理主任話佢黎左兩年都仲安排緊電腦！高級主任話安排個password入公司個系統佢都三個月，等下囉！至於電話，每位同事都冇直線，冇自己e-mail! 不過唔緊要，公司電話，成個鐘都唔響一次！
工作方面，做工程都係裝修維修咁喇！裝修方面，呢度得九層寫字 樓，分別係民航署，DHL，UPS等等大物流公司，咁多年都冇乜改過，所以根本上冇裝修工程做！維修呢，九成係Ｄ換下燈或者油下油既工作，一兩個師父仔都得喇！大既工程有個建築部做！平日既order多過 $50000要到managing director簽名! 因為真係唔多！
公司仲有一間工程公司，有乜大大小小工程搵佢做就得！我地連見判 頭既機會都冇乜，卡片，我都未見過有同事有！
手下高級技師話，得閒上天臺睇下飛機，睇下風景，都唔錯架！
你話忙唔忙？
番工有免費話穿梭巴士到東涌，我連lunch都番屋企食！每日番工唯一既消費只係買份報紙睇！公司仲每日俾番＄１５津貼我，真係錢都唔洗使！
幾與世無爭，好似就退休咁！

道德風險

香港政府為銀行存戶提供100%存款保障，即係銀行倒閉政府會賠番哂你既存款俾你！咁就引發左道德風險(Moral Hazard)既問題！
簡單Ｄ講，我叫你去賭場賭錢，然後同你講，輸左我俾番你，贏就歸你。 咁，你仲去唔去賭大細（ 輸左我俾番你所以冇風險，但底回報，最多贏一倍）？ 係都買圍骰喇（輸左我俾番你所以一樣冇風險，但高回報，最多贏二百五十倍）。
細銀行存款利息高，因為佢地流動資金少，投資回報同風險亦高，所以願意以補償存戶！相反，大銀行存款利息底，風險亦底。但現在因為有100%存款保障，作為存戶，當然應該選擇高利息既細銀行。結果，大銀行為左爭生意，會放棄較安全投資，選擇高回報項目。
變相，政府鼓勵銀行從事高風險活動，o係呢個咁既時候，有必要嗎？

心涼感覺

唔使番工，去旺角同舊同事飲茶，吹左好耐。原來大家都好喜歡去日本，相約來年兩家人一齊去日本，哈哈，諗起都興奮！
之後，同太太番時代廣場行街。商場既商店變左好多，但都係o個種感覺﹣買野唔會黎時代廣場，無論平定貴！
帶埋B仔見下舊同事。哈哈！點解B仔會飛身去舊同事度呢？我呢個爸爸要抱，B仔即刻叉我頸推開我，正衰仔！
聽舊同事講，公司最近請左個Centre Manager，咁即係話舊大老細呀Centre Technical and Operation Manager冇得升！哈哈！等你以為老板真係咁支持你，你自己真係咁有料囉喎！有冇聽過冇狗拉貓黎食屎？講真，以佢既料子，出去底兩級（底一級係Technical Manager，係兩級係Controller) 都未必有人請，仲巴屎閉鬧人呢樣鬧人o個樣!
我相信每一個因為佢而走既同事聽到都心涼！

走馬看花東遊記

我太太跟團去日本玩七日。太太第一次去，想帶佢睇多Ｄ野，去多Ｄ地方，於是選擇跟團！七日由大阪，去神戶，到京都，去富士山，最後到東京。走馬看花式旅遊，原來唔係好適合太太！因為太太對睇景色睇新事物既興趣都不太大！太太說：「冇野買既地方你唔好叫我去！」早講，去四日銀座加原宿夠哂，唔使咁辛苦！
其實我對個團都幾滿意，食住都算okay，人小小得十二個，行程又唔太趕，幾好！但團友都幾多不滿，又話冇黑毛和牛食（你俾幾錢團費呀？），又話溫泉酒店冇野玩冇街行（溫泉酒店o係富士山上，你想行 咩街呢？去溫泉酒店係浸溫泉嘛，去酒店玩海盜船好唔好？）又話日本Ｄ野貴（你自己黎日本Ｄ野都一樣貴，貴就唔好買囉！）又話Disneyland 多人，根本玩唔到要投訴！唉！！
其實我okay，將Ｄ錢俾左太太買野! 我周圍睇下野hea下囉！太太買咩呢？ 唔係日本先有既野，係香港都有既 LV，Shiseido等等!!點解呢？ 因為 呀邊個上次去日本都買左！
我都開心，有話：「風吹雞蛋殼，財散人安落」，買左四萬蚊野！番香港成個人鬆弛哂，至少唔洗再諗買乜野再聽到話買乜野！

下一站……赤鱲角

前幾日，鷹Ｘ見second interview。 唉，個廣告登旺角朗Ｘ坊，但係其實係中環工商銀行大廈番工，要番shift又唔講，係contractor又唔講，浪費大家時間。仲話有third interview，真係得你咁得閒！
前日同o係鷹Ｘ工作既大力食lunch，佢話有人入呢間公司做個助理主任interview左五次!五次??五次都仲去？係唔係有D問題!
昨日，o係公司既last day! 唔知點解，只係做左半年，但都有Ｄ唔捨得！反而之前做左八年既公司就冇！或者真係心死喇！
今日，驗身兼簽約，下一站……赤鱲角，公司係「新紅Ａ」！
下星期，同太太去玩一個星期，玩完休息一個星期先番工，希望順順利利喇！

新學期

等左咁耐終於又放榜，三科得2C1D，咁惡劣既情況下算唔錯。新學期十月二日開始，今年讀兩科，Microeconomics & Macroeconomics，番星期三同四。約食飯既請注意！

見工見工又見工

星期一，見工，地點係串燒三兄弟位於沙田既大型商場。原來自己都 冇去呢個商場好耐囉！感覺好新好唔同。
要見既Manager我識人識佢，連佢會問乜都知，感覺輕鬆好多！雖然有時 知問乜都未必識答，但起碼人地會尊重番見工既人囉！唔似D縮得o係個龜殼耐既十九chartered既Manager，串人串唔切！
其實呢行都好細，每次見工D人都識我時代既舊大老細咖喱甚至CM，而 我又識番佢地公司既人！感覺只係大家執位走黎走去，黎黎去去都係熟識既面孔！
Interview左兩個鐘，風火水電乜都問過。呢位Manager話應該冇乜問題，遲Ｄ會通知驗身！
不過，做串燒三兄弟公司都幾harsh，番五日半，朝九晚六（佢期望係晚 七至八），十日annual leave，十二個月糧加最多一個月bouns。（比依家公司番五日，十六日annual leave，十三個月糧加平均兩個月bouns 差好遠！），仲要著制服！雖然人工高左5%又番機場，但我興趣真係唔大！
睇下點先喇，黎緊星期五又有second interview，見埋先算喇！
完左呢份工，打算同太太去日本玩下先！

又換電話

換左電話唔夠兩個月，又換電話。因為部Sony Ericssion C902真係唔得。除左影相好，樣樣都唔好！成仲日hang機，我同太太兩部C902都係 咁。 唉！Sony Ericssion既機越黎越差，於是見佢仲賣得錢賣左佢換電話！賣左1900蚊換左部sharp sx862!
希望頂到兩年喇！

秋老虎

Plan左星期六同太太去盤龍峽，結果唔成團。原來多數人去盤龍峽都去3日，去2日團既得我地兩個。唯有另外搵地方。結果去左森波拉森林酒店，目的只係打算離開平日充滿壓力既生活，悠悠閒閒，去行下訓下，浸下水食下野，完完全全休息兩日。
結果，星期六當日，早上七點到紅磡集合，坐旅遊巴士去酒店目的地﹣清遠。原來清遠真係好遠好遠。開始問自己，要relax洗唔洗去咁遠！？
到目的地，酒店又冇想象中好。宣傳單話五星級酒店，應該冇！環境亦冇想象中好，宣傳單話森林，應該係草叢。都唔多緊要！最衰係熱，秋老虎，地面溫度成38度，點行？晚上浸溫泉，算係最滿意既，好relax！但好多團友選擇留o係酒店睇「家好月圓」！
結論，如果唔係太熱，平平地都係一個唔錯既選擇！

又搞我

計算過股市差不多反彈，於是星期四放左手上一D較弱既二線股，準備星期五放假o係屋企慢慢入番D平價一線貨。星期四在公司上午放貨，同事問我有咩好買，叫佢買中國銀行，佢鬼咁聽話即刻買！
點知，下午食完lunch番黎，全世界中央銀行一齊救市。唉！！次次都黎搞我既！？遲唔救早唔救。次次都係我一買，就宣佈壞消息，我一賣，就救市！星期四底位到星期五，足足升左3000點！問我有咩好買既同事就咁兩日執左成萬蚊！
So frustrated!!
星期五生日，Plan左星期六同太太去盤龍峽，錢都俾哂！星期四下午旅行社先打俾我唔成團！唉！！咁急，我仲可以去邊呢！？
So frustrated!! x 2
太太話: 「你成日都係咁既，唉！」
............

又見工

上次見完工，音信全無，我又唔係覺得咁差，連second interview都冇？ Anyway，再send左兩封。今日，又見工，銅鑼灣大地主。
一上去唔係見人事部係見工程部。
三個男人見我一個，好大陣象。
第一句就問：「乜你冇charter架? (工程師牌咁喇！)」
…… 唉！你請咩post呀？你個ad有講要咩呀？咁講，係唔係想俾個下馬威 呢 ！？
再問：「點解你要離開之前間公司? 」
因為我唔適應那種不停要有變動既公司文化！呢位manager話所有華資公司都係唔架喎！
…… 唉！慳Ｄ喇！所有華資公司你做過哂呀？我再之前間公司都係華資公司黎架！邊有Ｄ咁既公司文化呀扮哂野！係唔係縮得o係個龜殼耐唔知出面世界係點呢？
跟著一大輪串你冇料既說話！之後，問：「你點解認為你值呢個人工呀？你點justify呀！？」
…… 唉！
同理，你買橙，一個$2，一個$3! 你點解認為$3個橙值$3唔係$2?? 甜Ｄ？ 大Ｄ？ 多水Ｄ？你點justify$3個橙比$2個橙甜左大左或者多水左既值$1，而唔係值$0.5!?
真係七到冇人有！
到我問：「你地工程部既架構係點？」
答：「你更係冇上網做定功課喇！」
…… 唉！工程部既架構上網都有得睇？
續答：「我地公司大多數物業係寫字樓，仲有Ｄ小規模商場，多數位於銅鑼灣！」
…… 唉！知唔知咩叫九唔答八！呢個都算經典喇！聽唔明或者聽唔清楚叫我講多次喇！
問我仲又冇問題！…… 唉！你咁勁，chartered喎！仲點咁問呀！
全個interview30分鐘，三個男人見，有兩個冇講過野！下次叫夠十個人入黎interview喇，冇咁驚架！ 唔驚講野會正常Ｄ架！
…… 唉！下星期又有interview，串燒三兄弟，希望正常Ｄ喇！

中秋雜談

上一個中秋，同媽媽一齊過左一個好開心既中秋節。當時，仲諗下一個中秋有埋Ｂ仔，媽媽一Ｄ更加開心，............ 可惜，媽媽睇唔到下一個中秋。同家人一齊既時間，應該好好珍惜！
今個中秋節，快將失業，屋企開支又唔細，雖然暫時生活冇影響，但心情都唔多好！！自己又腸胃炎，中秋都只可以食粥，冇乜心機！
星期六，見太太成日冇覺好訓，於是同佢番深圳按摩住一晚，等佢可以暫時放底Ｂ仔俾工人休息番一日（Ｂ仔晚晚半夜起身玩，我兩晚晚都冇覺好訓！）
到深圳，去左萬象城行下，因為聽同事講佢地只去萬象城！！坐地鐵到大劇院站直接到萬象城！感覺係同九龍塘又一城差唔多，賣既牌子 同價錢都差唔多。要行咁既商場，洗唔洗去深圳呢？同太太o係萬象城既意粉屋食個下午茶，要百幾蚊人民幣，仲貴過香港！
去到按摩既地方，太太爭取時間訓覺，我就爭取時間睇波。冇睇波好 耐，原來依家Ｄ英國波咁屎！
星期日，番香港帶埋Ｂ仔探Ｂ仔太婆（我媽媽的媽媽）！太婆見到Ｂ仔好開心，見到佢身體健康，我都好放心！
其實，最重要都係一家人齊齊整整，開開心心，身體健康！

BB半歲生活片段

做節的心情

中秋，一家做節出街食飯。想象中一家人傾下食下笑下。
但，去到酒樓，坐底，一開電視，一家人五個睇住電視已經聽唔到我講野！冇哂mood!
做唔做節，都要問過無線!!

勝利得來不易

轉載:原刊於8月2日信報<最後勝利黃毓民>

訪問於7月初進行，黃毓民其後於本星期二正式宣布與李偉儀參選立法會九龍西選區的席位，並於同日報名。該選區其他候選人還包括西九新動力梁美芬名單、民建聯李慧名單、民協馮檢基名單、民主黨涂謹申名單、環保觸覺譚凱邦、南方民主同盟龍緯汶名單、自由黨田北辰名單、公民黨毛孟靜名單、獨立劉千石、莊永燦、林依麗、王紹爾。

無序之序

我仰望天上的星座 不知道還可以相信什麼

四年前，發生「封咪事件」，「十點前特首」聲淚俱下，「六點後癲狗」身心俱疲，我在一本黑色硬皮記事簿上寫下這兩句話。 　　

四年就這樣過去，為未來的，我願訪問鄭經翰，而且早已約定；但為逝去的，我更想訪問黃毓民，何況已改了兩次期。 　　

四年來，毓民戒了煙、抱了孫、參了選、胖了兩個圈、少了十三年前初見面時的極端自戀。

　　一九九五年的秋天，相約於尖沙咀凱悅酒店凱悅軒。二人各據卡座一方，穿了Versace大花西裝外套的毓民叫我幫手搞《癲狗日報》，邊說邊瞄我背後的一面仿古鏡子，邊說邊撥弄髮端，讓我覺得他在自說自話。但我還是答應了，因為，他叫黃毓民，一個在當時來說等於「正義」、「敢言」的名字。然後就是一段「不堪回首月明中」的日子。那時，他心雄，「三字經」比現在多十倍高一百分貝。我極速「身心俱疲，需要休息」，留下字條不顧而去，從此欠下一筆心債。 　　

二○○三年的秋天，相約於尖沙咀美麗華酒店十五樓商務中心。他在紅館搞棟篤笑，叫我幫手度橋。雖然當時的黃毓民隱隱然散發o個陣陣難逃「十個大哥，九個坎坷」的異味，但我還是答應了。出得黎行，預左要還！一年不夠，輪到他「身心俱疲，需要休息」。 　　
輾轉回到目前，像他這樣的一個男人，自嘲「食軟飯」，自喻「住家男」，自嘆一生奔波，自傷半世坎坷，卻毅然決然參選，「博埋最後呢一鋪」。立法會變成他的葡京。 　　
而訪問也是在奔波步伐中、坎坷路途上邊走邊做的，彷彿應了他的命。 　　也許，當我再一次仰望天上的星座，還可以相信，他會得到最後勝利。

3pm 廟街美都餐室

我到美都的時候，毓民已到了，背影縮成一團，有點像忍者龜。可能，那是因為他穿了深藍色襯衣的關係。總之少了一點昔日的氣勢。

　　攝影師瘦版岳少正想拍照，有個中年肥師奶走過來，說這裏不准拍照。我說已經約好。她說沒聽過，一張臉黑得像女包公。毓民好聲好氣說，「只是拍兩張照片而已，通融一下吧。」女包公沒有理會。我只好致電負責同事吳文正，然後把電話遞給女包公。

　　「哦！原來是吳文正，為何不早說？……嗯……嗯……嗯。」女包公眼尾也沒有睄我一眼，就把電話遞回給我。

　　毓民問女侍應，美都有什麼名菜。「炒粉啦，炒麵啦。」「那好，給我一碟星洲炒米！」這就是毓民。

　　毓民吃星洲米吃得好急，老一輩見到事必會罵他「餓鬼投胎」。他大口大口的吃，還吃到嘴角不時掛住三幾條星洲米。

　　毓民從襯衣口袋裏拎出一張「香港調景嶺營廣東省同鄉會會員證」給我看，「我是拎這張證去輪米的，民國四十三年，即是一九五四年，當時我未夠三歲，無啦啦就畀人踢入國民黨。我個孫個樣同我當時個樣差不多。我現在個銀包只會放他的相片，其他都要靠邊站，哈哈！」他邊說邊指證件上那個小不點，「這個就是毓民喇，真係恍如隔世，五十幾年前，我個樣似我阿媽。我阿媽個樣幾有氣質o架！揚眉女子黎o架！可以好惡死o架！」人老了，就愛細說從頭，「那時，我在調景嶺，叫難民營，準備反攻大陸。我細個時好奔波，出世住鑽石山，後來去調景嶺，跟住去九龍城寨，住街邊福老村道，在冷巷搭屋住，就在第一間毓民牛肉麵的後欄，你話幾悲涼！」

　　話題就這樣在「我的前半生」裏面兜兜轉轉，一直講到上個世紀九十年初在亞視主持《龍門陣》，「真正搵大錢是在那時，大約是九七、九八年的時候吧，當時炒股票亦都賺了很多錢，總之係最@@的時候最全盛，然後輸了很多股票，跟住《癲狗》執笠。我找你做《癲狗》的時候，我將一舊錢啄開兩邊，半舊用來搞《癲狗》，半舊畀我老婆拎去美國。我三個仔就是這樣養大的。我老婆又慳，全靠她節衣縮食，現在才可以靠她養我，讓我『咬老軟』。」

　　講完孫兒，講完妻子，自然會講到三個兒子（他的嘴角恰好掛住三條星洲米）。

　　「我個大仔在香港；二仔在三藩市工作，自己搞掂，就快結婚；細仔今年去拉斯維加斯讀酒店管理，他眨下眼就二十歲，你（毓民指住我個鼻）估你仲細呀？我比較憂心我個大仔，他現在好了一點，因為他自己也有個仔嘛，但是他有病，有躁鬱症。（這時毓民降低聲線）他當初不肯食藥，他不食藥就搞到濫藥，跟住就被人搞囉。當時我又不在香港，他真係好淒涼！你知這些?仔，當時老竇不在身邊，老母又跟他不咬弦，這就搞到亂晒籠，真係好淒涼！所以當時我好憎肥佬黎，原因是我已經家剷啦，你還派人去美國『追殺』（追訪）我另外兩個仔，問他們我在哪裏？（下刪二百字）……個仇就是在這樣種下的，沒可能清到的了！（再刪一百字）……喂！做人如果不是這樣恩怨分明，就不用做人了！（再刪四百字）……喂！大佬，你玩到咁盡，擺明老屈，仲搞到他們兩母子不和，跟住兩個都有精神病，媽的，如果他們是但一個『窗口當門口』，我就殺你全家！」

　　毓民含住一撮星洲米續說，「我個人是將家庭放在第一位的，否則我當時（二○○四年）就不用封咪啦，不用『草』啦，你估我真係驚你黑社會同共產黨有牙咩！我當時同那些人說，十月立法會選舉完結之後，我一定會返來。他們說，等到那時就沒問題。總之，我跟他們說，你不要搞我屋企人！至於人家話我忽然出走，其實個決定並非好倉卒，一早就有做準備工夫，鋪排好晒。你問我點解一定要不在香港？你人在香港點都會出街，傳媒就會追問你，所以最好不在香港。我不是逃亡。共產黨只是要你不做電台，不會殺你。但是我要製造一個震撼性效果，那就是人間蒸發。跟住聯合國人權委員會就會講呢個問題，美國國務院就會講呢個問題，英國外交部都會講呢個問題，這樣，我就可以保住條命。」

　　很多人都不知道當時毓民蒸發到哪裏去，我可以告訴大家，其中一站是泰國，因為他愈說愈興奮，恍如複述一齣荷里活間諜片，「曾經有個共產黨的說客去到泰國曼谷，同我在一間酒店談了兩個鐘頭。總之，成件事好複雜，不過呢，所有人、地、時、事我都記低，有些更錄了音，你如果在今次選舉搞抹黑呢，我就反擊！那些人說我欠下一屁股債，那你就拿出證據來。至於話我收過人錢？梗係冇啦！但是他們又真的是有 offer（出價），個 offer 好勁，而且不是一個，而是兩個。一個是某商人開的價（下刪一千字），……差佬後來去查，我就同那些○記講，我話呢件事不是你們可以做到什麼的，我話政治呢回事關你叉事咩！至於第二個 offer，就是向我老婆提出的，他代表『上面』某個部門，個講法是，阿嫂，拿些錢去做下生意啦，我們會支持的。」

　　那碟星洲米差不多給他真人表演「羅通掃北」，一掃而空，他的一張鐵嘴變成一張油嘴，卻沒有打算去抹，「綜合這些情況，我們覺得好危險。收錢你又死，你從此宣布玩完；不收你也死，你不識抬舉。媽的，那我就唯有用人間蒸發這個方法！」毓民終於肯抹嘴了，用他的衫袖，「不過呢，我睇政治睇得好通，此一時彼一時，過了這個浪又是另一回事。他們現在又要統戰我啦，哈哈！」

3:34pm 廟街與甘肅街口

　　廟街有一個牌坊，疑似台北華西街，異常適合讓毓民這個「台灣姑爺」立此存照。

　　當日，廟街的檔口大部分仍未開工，但見零星南亞裔男人開始在搭建檔口，一個二個都像喬寶寶，就像鬼佬看黃面佬一樣。

　　我叫毓民在「大發麻雀娛樂公司」的廣告招牌下留影，認為這樣「十分毓民」。他打趣說我一直都在醜化他，而他現在已是一名「他媽的好乜虔誠的基督徒」。由於他要拍照，所以話不多，較為有意思的是我問他信不信命，有沒有看過相？

　　「我不信睇相佬的！不過，他說我好長命，還說我的人生上上落落好犀利。我問他，我可不可以彈番起身，他說梗係可以啦，跟住就話我五十八歲行大運。嘩！我今年五十七，即係就快啦。但最弊的是，他講這番話時，我只得三十幾歲。當時，我聽到他這樣說，真係想打佢咁滯。媽的，等得來頸都長啦。點不知，眨下眼就到。」

3:48pm 彌敦道大華酒店門前

　　攝影師瘦版岳少要趕去港島香格里拉影習近平，三爬兩撥影呀影，然後揮一揮衣袖。

　　想是受夠了美都女包公的氣，毓民建議坐十五元的士到美麗華酒店十五樓的商務中心再做訪問。有一段時間，毓民的妻兒都搬了去三藩市，他就住在那裏。他說那裏有免費咖啡飲。

　　等的士期間，毓民憶述二○○四年三月他在美麗華酒店門外的遇襲經過。

　　「當時有六七個人圍住我，對面街也有人盯得緊緊的。我看，他們應該是負責『收貨』，睇住那六七個人有沒有『做好呢份工』。他們來兇我，我就一邊用手作勢『行』住他們，大叫『唔好郁呀！』，一邊靠向牆邊，慢慢縮入酒店lobby（大堂）。我還哄到其中一條友將他的手提電話給我，好讓我聯絡他，跟住我就憑那部電話報警拉他們。不過，他們也沒有什麼，還跟我說，毓民哥，我地都係?，都係打工唧。我問其中一條?收了多少錢。他沒有答，我就話你咪最多收幾千蚊，我話你大佬肯定呃你，你大佬起碼收幾皮，你被人食了夾棍都不知，正懵炳！嘿！我由細到大都見慣呢種場面，想兇我？好難囉！」

　　由等的士到上的士，毓民都捉緊我的上臂，等到我潛入的士車廂中，上臂還是隱隱作痛。

3:59pm 尖沙咀美麗華酒店十五樓商務中心

　　美麗華酒店花了幾億元「裝身」，感覺有點似染了一頭金毛的林燕妮。

　　至於那個商務中心，很容易令人想起白天鵝賓館變成中國大酒店。我同毓民做訪問當日，商務中心仍在進行裝修工程，隱約聞到木糠味，則讓我想起家鄉的茶山賓館，那裏永遠都會有未完的工程。

　　那裏果然曾是毓民的「家」，他大刺刺攤在沙發上，不用出聲，女侍應已經知道他要咖啡。而他就一邊吃青瓜條、紅蘿蔔條，一邊繼續做訪問。

「我是陸豐人，即是鶴佬人，鶴佬人最鍾意打架，不是做軍佬就是做賊佬，我算特別的了，做到文人，這是很少見的，不多見的啊。

　　「香港好多女仔都不鍾意嫁鶴佬人，因為鶴佬人會打老婆。我老竇那時同我講，話女人你一個禮拜打佢六日好喇，禮拜日就唔好再打，never on Sunday！那樣，她就會貼貼服服，覺得你對她好的了！

　　「我不打老婆，可能畢竟叫做讀過下書啦！不過，我有打過我個大仔，我是指他細個的時候，嚴師出高徒，棒打出孝子，我對個大仔的要求自然會高些少。跟住兩個仔我都冇打，因為我發覺唔work。結果他們兩個最乖，完全不用我擔心，大仔因為有個情緒病就更加難搞，但現在已經好了些少……。」　　話題就此重複，講完三個仔，再講老婆，再講個孫仔，說他的凝聚力如何如何的大，然後又忍不住再講他的大仔，恍如迴文詩。也許，人老了，想當年；人窮了，則返本。

　　「講番我大仔被拉呢件事，現在回想還是覺得好詭異。你想想，一個?仔躺在公寓，有個壞朋友給他一些何濟公同食鹽，講明畀我個大仔聽係『流點黎架』，還說是用來呃人的。沒多久，差人就到。後來發現，原來那個壞朋友是差人條『針』，而個operation（行動）是來拉我的大仔。本來，所謂的operation是suppose（設想）先派狗仔隊跟個大毒梟一段不短的時間，等到時機成熟就大舉採取行動，但竟然用來捉一個o靚仔，你話係咪好笑話？那時，主持其事的差佬，就是盧奕基（現任保安局局長政治助理），就算不是他，起碼都是他的直系馬仔。我九五年在紅隧出事（涉嫌傷人），也是盧奕基揸fit，嘿，這個人……（下刪二百字）。」

　　終於，「結案陳詞」：「真係叫做『妻離子散』o架我畀共產黨搞到！我抗壓能力強，還好。但是我的家人就真係好淒涼，看不到個前景，這個才是最要命的，亦都可以話是我感到最內疚的一件事。（此時毓民開始眼泛淚光）外間的人點樣批評我，我都無所謂……（他說不下去，我問：「你老婆有沒有怨過你？」）唉！我老婆梗係有怨過我啦！……她認為，家人四散都是我搞出來的。她拋低三個字：『嫁、錯、郎！』（毓民哽咽，眼淚幾欲破眶而出）我話，……嫁錯郎都三十年啦，咁點唧？（說不下去）……『嫁、錯、郎！』佢真係咁樣呻過。但是，她真是好堅強、好 strong！不過，說真的，聽到「嫁錯郎」呢三個字，對一個男人來講，的確好 hurt……好 hurt……好hurt……。」毓民愈講愈細聲，彷彿只想講給自己聽，然後一下子塞了一條紅蘿蔔條入口，吞了一啖口水，才繼續說：「後來，我由美國返港，我個二仔開車送我去機場，途中，他說，他這一生中，這幾個月同我最close（親近）。我聽到這句說話，悲從中來！（毓民索鼻水）那一刻，我在想，唉，退出江湖啦，專心搵錢啦，可是，有時人真係好難講，好似現在又試搞這趟渾水（參選立法會），係嘛？（索鼻水）」　　面前的一杯青瓜條、紅蘿蔔條就這樣被毓民吃光，只剩下一個空杯（當然，和咖啡一樣，這些也是免費的）。

　　當時，我想起「半杯水」這個小故事。話說悲觀主義者會說那個杯是半空的，樂觀主義者會說那個杯是半滿的，但理性主義者卻會說，換過另外一個較細的、剛好夠載那些水的杯子吧，這就好了。

　　「有沒有羨慕過大班？」

　　「沒有！我點解要羨慕他呢？大家個價值觀都不一樣。從我搞社民連你就可以知道，我同大班信奉的自由市場資本主義不同，他那種真是搵銀嘛！我搞社民連，相信的那套理念，根本不是他的那一套。再說，我出身本來就是『斗零』都冇啦，現在已經好好的了，上帝好照顧我的啊大佬！有名有利住過大屋，有車有司機，我現在仍有司機喎，不過是社民連的司機咁解唧。做人你要求什麼呢？世界上好多地方我都去過，全部都是物質東西，有了信仰的人就會覺得，這些東西又真係好無謂，就快又會瓜老襯，這幾年同班老友去殯儀館多過飲喜酒，你還不化？這樣說吧，我不會再諗這些東西的了，最緊要屋企好。我最細個仔都就快大學畢業，我就快冇晒野煩啦！大班個人係好人黎架，佢搵錢真係有佢既辦法，呢方面我都服既佢！」

　　訪問就此打住，因為毓民要坐車去東方報業集團做網上節目，「每個月有幾皮 野架大佬！我都唔想拎綜援架大佬！你估我好想乞咩！」

　　我目送毓民潛入「東方」專車，然後鬆一口氣，就像地鐵列車到站，總算可以從車廂中擠出來一樣。

　　我仰望。由於日長夜短，天空還是像個死魚肚。

只好低頭。這就想起，四年前，我寫下「我仰望天上的星座，不知道還可以相信什麼」。事到如今，或可續上另外兩句：

　　我窺望當下的心窩

　　只知道還可以鑽木取火

試試我的胸脯

不如選我喇！…. 起碼講到try my best(盡我能力!)喇!!
try my breast喎!!( 試試我的胸脯喎！)議員喎！！

新相

做爸爸，只係負責影相，但多數冇份影相！

何去何從

公司終於繼調高層調底層之後，今次輪到調我呢Ｄ中層！
變，不斷在變，為變而變，全因為一個底能既director!! 佢每次黎辦公室都要見到變!!
於是，部printer由放o係辦公室中間，搬左去pantry。水機由辦公室中間搬左去filing房，再搬左去廁所門口。放o係admin同事既tray，今日係 send俾Human Resources，聽日變左send俾finance，過兩日成個tray搬左去pantry。出部手機俾同事，唔夠一個月又收番！得閒又拆左你部電腦！今日收貨叫簽名唔給印，聽日叫全公司同事開三個鐘頭大會改左收貨給印唔簽名，點知後日又突然變左收貨要簽名又要給印！所以，做 左十年既都唔知OT點計，打風有咩安排！各人都無所適從！
講番今次調位，已經係我呢team人呢兩個月第三次有人調位！！我被調去觀塘。唉！冇哂mood!! 你叫我plan黎緊一年個場要做Ｄ乜！一年？？一年我可能走左四個場喇！點Plan呀？去到第二個場，我仲做唔做planning!? 要做我都有短Plan咁短喇！
真係冇引！頂唔順遞信辭職，跟著sick leave，連休四日，放鬆下！日日 咁樣，人都精神錯亂！
再番工，老細同我傾，佢話如果因為調位佢可以同我fight，佢話公司覺得我能力唔止做細場所以調我去大場！但如果我唔想可以暫時留底! 暫時??兩個月又調位唔通我又遞信咩？下次可能調我去山頂喎！呢個係公司文化，老細你又幫得我幾多次？遲又走早又走，老細既好意，多謝喇！
遞信之後，有同事們走黎搵我食飯，原來大家都準備好走喇，只係我遞信比較快!!
sick leave四日，見左一份工喇，唔知之後去邊呢？

皮膚敏感

B仔唔知食過Ｄ乜，皮膚敏感。面上好多紅色點點，B仔又成日喊，一定係好唔舒服。好擔心！！明天要帶B仔睇醫生！
我自己食蟹有皮膚敏感，太太曬太陽先有皮膚敏感，點解B仔會皮膚敏感呢？？係食物敏感定係其他呢？

爆血管

上星期中，有一晚，訓訓下覺，被爸爸叫醒。爸爸話：「流血呀！！」見到爸爸足踝位置流血，爸爸已經用手按住流血既位置，但都止唔到血。血，將半個飯廳染紅！
我問爸爸係唔係撞到或者跌到，爸爸話冇，只係坐o係度突然間覺得隻腳濕濕地，跟著就見到成地都係血。我嘗試將爸爸隻手移開，見到血原來唔係流出黎，係噴出黎！於是即刻報警.....
打999報警，話有人流血不止要call白車，報案中心既小姐問因乜事會流血不止。我都唔知點解一個人好地地坐o係度會流血不止！於是我答 番佢唔知喇！點知呢位小姐話我唔可以答唔知，答唔知係落唔到call叫白車架！Shit!!呢D咩邏輯黎架！咁如果我見到有人暈o係街我係唔係唔可以call白車呢？我都唔知點解佢會暈底！係唔係要叫醒佢問左佢因咩事暈底先叫白車呢？咁有病係唔係要先知到係咩病先可以睇醫生呢？我 冇時間鬧佢喇！求其答佢：「意外呀！」.....咁，就可以call白車喇！意外﹣你 又知咩意外咩？意外兩個字又俾到Ｄ咩information你呢？
白車車到去醫院，我幫爸爸登記左，救護員推左爸爸去分流檯等！
白車司機一行人就走左。跟著有個醫護人員到分流檯去睇我爸爸，佢問我個司機呢？我點知個司機去左邊？眼前個傷者仲不停咁流血？係唔係又搵唔到個司機你又唔會睇佢呢？我都好想知俾搵到個司機又點呢？呢個救護員好驚又好唔願意咁用塊沙布按住噴血既位置，跟著o係檯面個膠紙座撕左兩條膠紙黎黏住塊沙布！頂!真係火都黎埋！你有冇常識架，Ｄ血有壓力咁噴出黎，你用兩條膠紙黏得住我地仲洗乜黎醫院？血繼續咁流，我都未鬧佢，佢已經大叫：「嘩！好多血呀！快Ｄ搵人黎.........抹地呀！」原來抹地比幫傷者止血更重要，你唔個幫傷者止血，你點抹都冇用，除非個傷者再冇血流喇！
再三催促下，終於推左入去急救室，但都唔係即刻幫你止血，將你由急救室一號推去七號，等左一陣，由七號推去十號，再等左一陣，又由十號推去十一號，再等左一陣，再想由十一號推去第二度。頂! 當時急症室得兩個醫生，你一係睇佢，一係由得佢，你將佢推黎推去仲咩呢？ 我話俾個Ｄ醫護人員聽，我爸爸差不多去哂所有急救室喇，你地到底睇唔睇佢？答我！！
最後，咁先有人睇爸爸幫佢止血！由出事到止血，成三個鐘，爸爸都變得面青口唇白，唔死已經好好彩，原來係靜脈血管爆左！
媽媽入得急症室多，佢講得好，你入急症室按程序等，等到死都冇人會理你！你應該等左一陣冇人理你，就可以開始鬧人，見人就鬧，關唔關事 都鬧，連佢地祖宗十八代都鬧埋。再冇人理，你就大大聲話：「同我打電話俾XX日報，話佢地收買人命。」
我初初覺得咁好底能，但次次都work，只有兩次講到打俾XX日報先有人理你！
唉！..... 香港真係死得架喇！

教育制度

從來，都覺得香港既教育制度同學習氣氛好有問題。求學求知求真既態度o係香港係唔存在架！Ｄ咩「３３４」改制根本冇用！考到咩資格，入到咩名牌大學先至係家長最關心既！其實呢種心態，o係整個華 人社會都根深蒂固！中國同台灣都係咁！ 唔知世界其他地方係唔係咁呢？ 如果唔係，咩地方比較好呢？
你又有冇聽過芬蘭既教育制度？
被譽為全球教育體系最成功國家之一的芬蘭，該國的學生無論是在語文還是數理方面的表現，在全球都是名列前茅。
芬蘭的學校不只沒有精英班，甚至沒有考試制度，小孩都是在輕鬆愉悅的氣氛下上課的，老師是以靈活的游戲方式授課，每上完45分鐘課后，小孩就可以有15分鐘玩耍的時間，放鬆情緒以准備上下一堂課。
芬蘭採用的是“一貫式”的教育制度，所謂的“一貫式”教育制度就是沒有分小學、初中，高中，小孩從 7歲到16歲都是在同一所學校，接受相同的基礎教育。
在這 9年的時間里，學校不會區分哪些學生表現良好，那些學生表現不佳，給予每個學生同樣的學習機會，完全不需擔心爭奪排位的問題。
芬蘭的小孩雖有家庭作業，可是低年級的學生每天做作業的時間不會超過半小時，高年級不超過一個小時，週末和寒暑假則屬于休假，老師完全不會給學生任何作業。
另外芬蘭的學校假期也非常長，比如暑假就長達十週，那是因為希望家長可以對孩子負起更大責任，塑造家長在家教育小孩或陪伴小孩上圖書館的文化。
多次獲得《世界合作發展組織》頒發全球最佳學校冠軍的芬蘭，證明了不考試、少作業，多假期的教育方式也可以教育出全球最憂秀的精英。該國在教育領域所取得的成功，吸引了世界各國的教育專家前去“取經”，成為了許多國家效法的楷模。
我都想Ｂ仔有一個正確既求學態度，唔重視考試結果既學習環境，但o係香港，可以嗎？
我又可以點呢??

長毛

以前，成日諗，選長毛入立法會既人都係錯既。佢又唔做野，淨係示下威，抗議下，燒下車太咁，為乜呢？
最近，發覺可能我至係錯架喎！選其他人同選長毛一樣 ﹣都係做唔到野。選其他人，連小小反對既聲音都冇埋！香港呢個「大政府」做事已經唔需要理民意，做錯事又唔需要解釋，你再問佢可以答你「我覺得應該到此為止喇！」其他按規則做事既人根本乜都做唔到！咁，不如叫長毛呢Ｄ去破壞佢定既規則喇！
呢次選舉，你有決定未？

成功在嘗試

BB仔正常應該六個月先出門牙，六個月開始會轉身。但我B仔四個月已經出左門牙，五個出大牙，六個月出虎牙。真係奇怪。可能都係因為佢太為食喇！但係呢，人地六個月開始會轉身，我個B仔都唔識，點解呢？我太太朋友個仔，大B仔幾日，呆呆的咁既（因為佢父母都冇乜理佢冇乜同佢玩，發展可能比較慢，你叫佢佢幾秒後先識反應)，一睇都知冇B仔咁醒，未出牙但都識轉身，點解呢？
我發覺，我將件玩具放o係將床遠少少既地方等佢試下伸手或者轉身去觸摸佢想要既玩具，但佢連少少伸手或者轉身去件玩具既意圖都冇，只係訓o係度大聲叫！點解呢？佢一叫，工人即刻黎拿起件玩具俾佢。我叫工人行開，B仔再叫，我叫工人唔好拿件玩具俾佢，點知工人抱起佢去件玩具度！Ｅ？你係唔係當我底能呢？我叫你唔好你係要同我作對？唔怪得知我個仔淨係識得訓o係度叫，轉身又唔識，坐又坐唔到！原來工人成日抱，一叫就黎抱，玩都幫埋佢玩！Ｄ玩具係要黎刺激佢手腳活動，你幫佢玩埋仲有咩用？最衰係我叫你唔好你仲黎？太太平日又冇留意呢Ｄ小事！日日如事，結果就係咁囉！當日，我都忍唔住鬧過工人，再係咁，B仔一歲都唔識轉身！！
之後，叫太太日日俾B仔試下伸手或者轉身去觸摸佢想要既玩具，唔到十日，B仔已經初步識轉身，開始坐到啦！
一個人怕跌倒，永遠都唔識行！
怕失敗，永遠都唔成功！
照顧得太周到就會乜都唔識！
冇危險既事，唔怕試多幾試喎！

420億

今次北京奧運，用左420億美元去建造北京，每樣都盡善盡美是必然的！（420億美元唔係一個預算，係最後洗費，因為最初洗費係冇上限，最重要係完美！）
你看過北京奧運會開幕式，你感覺係點？
北京奧運會開幕期間，小小力身在內地，貴州﹣中國最貧窮的省份之一。當日，參加左當地一個旅行團到當地名勝「大小七孔」遊覽。其間，旅行團安排在當地一間餐館食飯(其實，當地冇乜餐館，因此，早午晚三餐都係o係呢間餐館食，你既選擇只係得食同唔食！) 。坦白講，食物質素真係好差，好難食。o係冇選擇既情況下，我食左少少就準備走。正準備離開，有當地人走入黎問我地食完未。我冇諗過點解佢地咁問就答佢地食完。當我答佢地食完，佢地就即刻坐落去食我地食剩既食物，食得津津有味，餐館老板亦未有阻止。原來當地農民收入 好底，好努力工作一個月都冇一百蚊人民幣收入，根本冇可能食到我地食剩咁「豐富」既食物，於是當到食飯時間，佢地都到餐館等食別人食剩既食物。
大家都係中國人，你感覺係點？
咁貧窮既人，中國至少有二千萬。420億美元，大約三千億人民幣，分 俾二千萬最貧窮既人，每人有15000人民幣，相當於佢地十年收入，可以讓二千萬人得到溫飽。
2012倫敦奧運會，預算洗費係180億美元，你感覺係點？

沈重的背負 沈重的心

背負十三億人民的期望，實在太沈重。
要知道受傷本來就是比賽既一部份，因傷退出比賽係好平常既事。
但「欄王」劉翔在奧運因傷退出比賽，竟然被一些（其實都唔少）民智未開既國民形容為逃避既行為（因為劉翔既世界記錄被破，大家認為佢驚輸）！失禮中國人（因不戰而敗）.....等等！
但呢一刻，最傷既應該係劉翔！
對一個中國運動員黎講，不論贏負，相信冇野俾參加北京奧運更重要（相信今年有份參加比賽既中國運動員，呢世都再冇機會o係中國參加多一次奧運）。每個中國運動員都希望o係北京奧運有好表現（除左中國足球員），佢地負出既努力，承受既壓力同對比賽既期望都俾我地呢D坐o係度叫「中國加油」既人大得多！相信非不得義都唔會想退出（ 除左中國足球員）！連比賽既對手／外國人都信佢，偏偏就係中國人自己唔信，一沈百踩！
觀整個世界，相信只有中國既民智咁落後！
二十年前，背負中國人民期望既體操王子李寧88年漢城奧運連番失誤，國民即時落井下石，一沈百踩，甚至要殺死佢，令李寧連銀行都唔敢去！
你成功大家爭著拜你，識同你一樣係中國人！當你失敗，你最好快Ｄ消失！
二十年黎，中國已經成為世界第三大經濟體系，但民智既步速好似跟唔上！
更悲哀既係，香港人既民智都好似倒退咁，你睇下！
陶傑短評：劉翔臨陣劈炮正確
劉翔以「腳傷」為理由，臨時退場，即招致愛國憤青責罵，指是扮傷作假，官方即時高調問候，壓抑了一場民族情緒大風暴。劉翔其實肩負百年千鈞重擔，吹雞在即，以腳傷為由，棄甲曳兵，誰都知道是心理壓力居多。雖然劉某早已把奧運降格為「一場遊戲」，為臨陣脫逃放出心戰煙幕，但劉某視之如一場遊戲，十三億中國人卻視奧運為一場百年民族聖戰。中國官方如果不把憤青情緒硬下去，劉翔的生命安全，實令人憂慮。
劉翔腳傷不容質疑，即使大陸造假成風。前董伯「腳痛」下台，香港人體諒，並祝他老人家多多休息。董伯「腳痛」，其實是政治壓力病，香港人態度成熟許多，只會歡送「好行夾唔送」，絕 不盲目憤慨。
太大的精神壓力，十三億人的情緒加在劉翔一人身上，豈止腳傷，正常人也會癲狂，劉翔臨陣劈炮，絕對是明智之舉。因為中國民族情緒已陷入高潮狀態，有關方面已發出「 今屆無金牌，已往成績一風吹」的警告，一旦只奪銀牌，劉翔或遭憤青暗殺威脅。劉翔不同郎平，郎平有美國政府撐腰，不怕憤青暴力襲擊，但願中國政府以人道理由，必要時，宣佈予以軍事庇護，加重解放軍二十四小時防衞，為期半年，保護國寶，也是挽一條無辜生命，以免黃牛黨損失金錢，惱羞成怒，聯同全國憤青追殺。
呢D咁底能既小人，香港人叫才子 ........... 唉！
正如毓民所講：陶傑正仆街黎架！
沈重的心，為劉翔，為中國人，為香港人..........

要工作的星期天

今日第一日番星期日！小小力呢個職位，要輪流番星期日。番星期日，整間公司辦公室得你一個，仲係要番第二個場，到底做到Ｄ乜？又有幾大作用呢？同小小力同post既同事話從來都冇人知星期日番黎做乜，為乜？大家番黎就行下坐下夠鐘走人，跟著第二日又放番假，為乜？有Ｄ人仲拉完card走人。唉！我唔明咁既公司點解賺到咁多錢！？

沒有電腦的日子

星期二，公司拆走小小力既desktop電腦。沒有電腦的日子，人好像很空虛，但原來感覺又唔太差。
同事問我擔唔擔心！當然唔擔心，公司拆得我部電腦，當然係認為我冇咁既需要喇！公司會明白亦預左喇！
今日，老細問我有冇睇到e-mail，關於乜乜乜！小小力答「冇」！我檯頭又冇電腦，我點知你幾時send e-mail俾我？唔通我長時間login-in住部公家work-station咩？我每日只check兩次e-mail，一次番工，一次飯後!其他時間我都唔會login-in，如果係緊要事，不如你e-mail俾我既時候話聲過我知喇！
同事叫我幫手打兩張order，我o係個位同work-station之間行黎行去，再行成分鐘先去到睇print out!打兩張order都用左半日喇，我諗你自己打快D囉！
有客打電話黎問野！Sorry，我冇電腦睇唔到所以幫唔到你，有電腦既地方冇電話，有電話既地方冇電腦，不如你打去D又有電話又有電腦既 同事到睇下幫唔幫到你喇！邊個同事又有電腦又有電話？Sorry，Staff Directory放o係公司intranet，我都睇唔到佢地電話，不如你打去總機試下喇！
老細叫我check下測師D圖得唔得先e俾個客！測師send左個AutoCAD File俾我，公家部work-station都冇AutoCAD，點check呀？不如你自己睇喇！老細話咁叫我scan我地個hard copy俾個客喇！Sorry，我冇左自己部電腦，scan左D野都去唔到我手，不如你叫D有電腦既同事做喇！公司拆得我地呢個grade部電腦，當然係認為我冇咁既需要喇，right?
如此，雖然有點空虛，但清閒左好多，準時收工，再冇Urgent事件，因為我乜都唔知！仲有製造大量費紙，唔驚冇草稿紙用。

與佛有緣

今次回鄉，除左探親，主要係還神！去年回鄉，外母叫我去求神， 話好靈驗，小小力就求佛祖俾我一個B仔！外母話B仔係佛祖俾我既，所以一定要還神！
還神後，參加左個當地旅行團去遊覽。一日，去到當地一間佛寺，本來在睡覺 既B仔突然醒來，眼定定望著牆上既經文。有位大師見到B仔，對我地講你呢個小朋友係「與佛有緣」，跟隨同B仔講左D佛理! B仔識聽咩？仲係講普通話！點知當大師講完，B仔竟然點頭.....真係信不信 由你！
最後，大師用符按著B仔個頭，為B仔頌經祝福，B仔移一動也不動在接受祝福！旁邊既善信都在笑，聲聲稱奇！

自我感覺良好

同太太回鄉，三家姐個仔第一次見B仔，佢話B仔係「自我感覺良好」！？咩叫自我感覺良好？佢叫我睇下，佢帶B仔去照鏡，當B仔見到自己，好開心，笑到哈哈聲！好似好滿意自己咁！
原來，身心是一個整體，自感精力旺盛，神清氣爽，身心愉悅，自我健康的心理需要基本上能得到滿足，是心理健康的表現。當今，「煩死喇！」 「好累呀！」，「好難頂呀！」，「好討厭呀！」等成了不少人的口頭禪！ 很難想像，一個自我感覺很差，百般難受的人是心理健康的。 自我感覺是否良好，是判斷個體心理健康與否的基本要件之一。
一個人就算好聰明，如果個體心理唔健康，都好難有大成就！
偏偏，小小力係一個自我感覺奇差既人！睇呢個Blog你都知！
希望B仔真係一個自我感覺良好既人！

辛苦

放假一星期，同爸爸，太太，仔女，姑姐， 姑姐 個孫一齊番貴州探親。唉！真係幾辛苦。尤其係姑姐個孫，簡直失控。帶小朋友同老人家， 辛苦過番工！
一番黎，立即病到。放假根本唔係充電，係放電。放完假仲死過冇放！
Check番公司e-mail，公司終於決定取消員工既桌上電腦。真係好難想像現今社會，仲有公司員工檯頭冇電腦！！明天番工，都唔知點！？
再睇公司e-mail，原來小小力被派左去睇住宅！唉！呢間咩公司黎架？跟著就係一連串公司政策改變既e-mail!
唔知係唔係自己既問題呢？真係好唔適應日日咁變！
好辛苦！
再睇番股市，一星期跌成千點，有冇病呀？
幾時先轉順呢？