年輕人

公司請左好多讀完IVE既年輕人做初級技術員，目的係為公司培養年輕一代既接班人。呢個主意唔錯，但在現今忠誠度咁底既年代，訓練完有 料又唔走既你又認為有幾人？公司文化係又驚呢樣又驚o個樣，正是船頭驚鬼，船尾驚賊！又要training又驚投資太多落Ｄ年輕人身上。於是 又個個初級技術員每兩個月就走一個場，希望佢地短時間o係唔同既supervisor身上學到唔同既技能。你認為佢學到Ｄ咩呢？
今日，又一個初級技術員train完，個supervisor同佢做份appraisal，５分滿分俾佢２分！即係可以起身。咁我都問下佢，但無論問咩，佢都 冇乜意見冇乜反應。當問到佢有冇進修，有以下既對話：
小小力：「有冇自己進修下咁呀 ?」
年輕人：「都有既！」
小小力：「好呀！o係邊度讀呀 ?」
年輕人：「報左City」
小小力：「Degree黎架？」
年輕人：「係呀!」
小小力：「幾好呀！讀咩course呀 ?」
年輕人：「機電一體化！」
小小力：「新課程黎架？讀咩架？」
年輕人：「唔知架！」
小小力：「 下？ 咁你又報？」
年輕人：「咁有個課程，見佢又有機又有電咁就報左囉！」
小小力：「咁讀幾多年架？」
年輕人：「唔知架！」
小小力：「下？咁一個星期番幾多晚架？星期六洗唔洗番架？會唔會影響工作呢？」
年輕人：「唔知架！」
小小力：「咁你咩都唔知你唔想知架咩？你冇問City咩？」
年輕人：「冇問呀！我等佢地話我知架！」
死唔死！？同佢對話完我想同佢講等死會快Ｄ囉！真係想改佢份appraisal做１分！不過算喇！１分同２分都係起身架喇！
經理仲話，公司仲有好多呢Ｄ年輕初級技術員，過幾日又有個新架喇！
唉！我想死!

書展2008

又係一年一度既書展，睇番2007度小小力係咁寫既：
「又到一年一度既書展，今年好能夠睇到香港特色!! 即係興邊樣就全世界都賣o個樣，賣到死，賣到爛，賣到賣唔到唯止。咁，今年興D乜呢?? 書商都估因為股市熱，個個都會買投資書喇。於是，每個大欄你可以見到過數百本投資書，其他書就反且冇乜。連去到Page One都感覺冇乜書好買，比往年失色好多!! 」
至於今年既書展，多左好多人，但少左好多書！因為 多左既人都唔係去買書，而係去睇傅穎，睇Hot Cha， 睇AngelaBaby，睇江若琳...........！唉！！
今年冇乜主題，股市都死左囉，香港仲有乜主題呢！！
因為有B仔，所以第一次去兒童天地。嘩！！貴到呢！！我覺得幾萬蚊買套學英文單字既學習系列，洗 唔洗呀！
最後，買左D關於小朋友教育既書同ＢＢ玩具！今年係 咁多年黎逗留時間最短，洗錢最少既一年！

黑夜之神

星期六，睇左《蝙蝠俠 ﹣黑夜之神》 (Batman – The Dark Knight)。係今年到目前作止最好睇既三套戲之一（另外兩套 係《集結號》同《殺神特工》(wanted)) 。片長152分鐘，但故事主題好清澈，節奏好流暢。同係片長兩個幾鐘既《赤壁》根本冇得比。後者小小力睇左半個鐘已經放蚊想走，坐兩個幾鐘簡直係受罪，仲話有下集真係怕怕！
其實兩套都係有原著黎改編，兩套都改到同原著幾唔同！分別係《黑夜之神》著重故事，《赤壁》就著重大明星大場面囉！
至於故事就唔講咁多！但主題係：人性總有善惡兩面，就算你做既野啱都唔等於所有人會支持你，你做既野錯亦唔等於所有人會反對你!! 自己要清楚自己既目標，當立定左自己既目標就要努力堅持，甚至當別人唔支持你既時候就要孤軍作戰，唔好 咁易放棄。
如果10滿分，《集結號》同《殺神特工》係9分，《蝙蝠俠 ﹣黑夜之神》係9.5分，《赤壁》係 ...........Sorry,2分。

擔心

總覺得，自己唔係一個放工番屋企食飯跟著連睇三套劇集之後 訓覺既男人。咁並唔係話自己有咩個人之處又或者幾咁不平凡。只係覺得呢Ｄ劇集幾十年都係呢個模式，再睇真係浪費 時間同生命。我唔抗拒番屋企，但o係屋企都好多野好做。睇 下書，睇下報紙，同家人傾下，去散步，上網寫下野甚至聽 下音樂都得。偏偏呢Ｄ都被視為唔理太太既表現。只有好似中 邪咁坐o係度睇電視先至係最好！.......我.......好擔心個仔既將來.............日日o係度睇電視!
洗錢越黎越多，兩萬幾人工，但洗四到五萬蚊一個月。太太樣 樣都話係必要，大家一講到洗錢就有爭吵。好似今日，太太買 左兩隻ＢＢ匙俾B仔食野，睇個樣都唔平，屋企又唔係冇細匙，點解又買？太太話更窮都要買隻靚匙俾個仔食野？我唔明！？匙係要黎食野唔係要黎睇，要咁靚做咩！？樣樣都係咁，最後我真係會更窮喇！
到底，香港有幾多家庭可以支持洗四到五萬蚊一個月養ＢＢ 呢？佢地點生活既呢？
可幸，暫時都仲係食到我表面o個層，未入肉。但長遠真係唔係辦法，教壞小朋友！
我 .......真係好擔心個仔既將來！

恐懼

人的命運是什麼？
上天註定？……自己創造？……不！
人的命運只有一個---死亡！
死亡並不可怕。
人出生的目的，就是逐步邁向死亡。
可怕的是，在生與死之間……你．究．竟．做．了．什．麼？

世上有很多蠢才，專幹傻事的蠢才！
蠢才無處不在，壟斷了整個世界……導致每個時代都發生了可悲的傻事！
故此，上天製造了一批與眾不同的人來平衡這世界，稱之為天才。
天才有三種，
一種是蠢才認為的天才；
一種是自認天才的天才；
而最後一種是……天才公認的天才！

世上的蠢人多的是，人活著，只要幹出一件有意義的事，哪怕活著沒有價值？

我的身是躺下了，但是，我的心卻沒倒下，因為我知道，在逆境中如何保持冷靜，冷靜就會有計謀！但是……現在的我，卻是有心無力啊！

靜！我在思索中……

人的一生，絕不可能一帆風順。經一事長一智，人總會在失敗中長大。經歷的失敗越多，就能學習更多……現代人好像都明白這道理。可是，明白是一回事，肯學習卻是另一回事。遇上越大的挫折，能學會站起來的人越是偉大。

記住：
信心，可以主宰自己。恐懼，可以摧毀一切。

長大了

睇下,B仔大個左好多喇!!

近況

今日，終於收到公司既通知小小力過左試用期。同事們都恭禧我，但小小力冇佢地想像中咁開心。心想，又睇多一年睇下點喇！
買股票賺左，加埋派息，又中六合彩（少少咁喇！），執番萬幾蚊，諗著鬆動番少少喇。點知突然電話壞左要買，意外地打爛眼鏡又要買，女女買書又幾千，Ｂ仔打預防針又幾千，跟著電腦又壞，錄影機又要買(好似約埋咁 )，英國又提早左寄信黎叫註冊又幾千，訂機票(六張)又 加左價！唉！！減左賺既萬幾蚊都仲要洗幾萬蚊！唯有同自己講，如果冇呢萬幾蚊，仲死呀！
朋友車人既Ｂ仔小車車滿月去飲，見番Ｄ離開左時代既舊同事，好似大 家都唔錯，反而留番既好似真係麻麻喇！小車車好得意，好似爸爸，頭髮好長，長過我，仲可以 Gel頭 呀！
小小力既Ｂ仔，越黎越噪，去親公眾場所實大叫，見到人地ＤＢ仔就兇 人，真係呢。姨話Ｂ仔個面相似媽媽，將來係好惡既人，唔知呢！我覺得得過惡字有鬼用咩！
同太太去左睇「赤壁」，其實應該叫「赤壁前傳」，因為仲有下集，但無論叫乜都好，都拍唔出三國既氣勢／氣氛。今年已經睇第二套三國既電影，兩套都咁差。估唔到幾百年前既小說，今時今日都冇人拍得好！
最近，總係提唔起勁做任何野，唔知點解呢？可能又係時間差差電喇！

真的這麼差？

上星期，公司請左個技術員，第一日番工就打電話黎話唔番！ Fine! 點知中午十二點幾佢又走黎番工，原來佢話打電話黎係話遲D番，冇講明原因係因為心急要帶個女去睇醫生! Okay! 為 人父親，我都明白，咁問清楚佢係有心做，當佢有事請半日假 囉！點知第二日番工，番左上晝，下晝食lunch既時候已經打電話黎話辭職喇，因為太古請左佢喎！唔係嘛！咁我相信佢之前 咩帶個女去睇醫生都係假囉，根本一直就騎牛搵馬。但真係一 日就睇到公司有問題咁勁？定係公司真的這麼差呢？上個月又係咁，請左個人，番左幾日就消失左，連電話都冇個，搵又搵唔到！
小小力黎左呢間公司都三個月喇，日日都見有人見工，成間agent公司咁，大大話話都有百幾人，但真係番工過一個星期 既都唔夠五個，到底有咩問題呢？

中一派位

以小小力既經驗，都話女女一定派到第一志願架喇。有乜好擔心呢？問題係，女女應該可以去更好既Band 1學校，今日可以去「叩門」考其他學校，但女女都話唔去喇，佢話去到咩學校讀書都係靠自己。
見女女唔單只學業成積進步，思想都進步左喇！
諗住同女女去自助餐獎下佢喇！點知四圍自助餐都full哂，唔通多人派到第一志願要慶祝？
(星島日報 報道)逾七萬小六生的升中派位結果今日揭盅，由於今年升中學生人數較去年大減五千人，加上家長更熟悉新派位機制，令今年派位滿意率創十二年新高；七成三學生獲派首志願中學，較去年增加五個百分點，獲派首三志願的學生亦上升至八成八，較去年增加四個百分點。

考起

有個客要租個大單位，經理要我準備好開會。咁，我係做工程既，我當然準備有關既野，例如我地俾到幾多電，幾多水，幾 多冷氣，天地牆有Ｄ乜，有Ｄ咩法例要跟等等。準備好哂，開 會，經理第一個問題係.....商場門口支燈開幾點？“O”哂嘴，完全冇諗過佢會問呢個問題，考起! 唔識答！幾點開燈關個客 租唔租個單位咩事？關工程咩事?? 個天好黑門口支燈開唔開？於是俾人插左成半個鐘，至於其他我認為關工程既事呢？？.....完全唔問囉！

試用期

試用期就滿，老細副經理同我做份appraisal，份野當然係我自己寫俾佢 改喇。Okay喇，間間公司都係咁！佢大至上講既係：小小力你好唔掂，o係老細（經理）既心目中你根本上唔 合格，比起其他同事你太靜喇，又唔夠主動，我問過你Ｄ手下 佢都覺得你唔係好得。咁有邊個你可以學下呢？ .... 咁又冇喎，因為基本上呢度所有同事o係老細（經理）既心目中都係唔合格既，只不過佢請唔到適合既冇辦法喇，如果唔係佢實解雇哂你地，總之你自己諗下，小心Ｄ喇！Anyway，試用期你就一定過冇問題架喇！
你知唔知佢想表達Ｄ乜？我理解既係......
我既表現原來我手下要負責同評分，唔知我老細份appraisal我有冇份俾分呢？再者，我唔掂根本上唔係我既問題。一個人覺得全世界既人都有問題，咁好明顯問題係出o係佢身上，唔係我。佢連面對現實既能力都冇，仲講咩management?最後，我 根本上冇野好做，冇野需要改善，因為根本冇可能達標。改 唔改善都隨大圍一齊！咩主動唔主動都係多餘既！
咁多人同我做過appraisal，呢個都算差得緊要囉！

尋找快樂的泉源

一項國際大型調查顯示，世界近年「愈來愈快樂」。在98個國家及地區中，最快樂的是丹麥，最不快樂的是非洲津巴布韋。中國大陸排名54，香港則為63，在東亞國家及地區中排名最低....
到抵，點先至快樂？首先，其實應該從不快樂開始！想一想，點解會 唔快樂？好多時都係因為現實同我地所想所期望有差異，簡單Ｄ講即 係失望。要解決不快樂，減少你既慾望，降低你所希望。冇希望，就 冇失望，自然就冇咁多不快樂 喇！咁樣，人都會開心Ｄ！
呢項國際大型調查顯示 丹麥 是全球國民最快樂的國家。
丹麥﹕人均GDP為37,400，全球排第24。該國有完善福利制度；過去30年來長期被評為全歐洲最快樂國家；有丹麥專家認為，這是因為丹麥人對未來期望較低。
所以，想快樂，唔好成日話我想點我想點，我想要乜要乜喇！

天下無不是之父母

宋人應俊在《琴堂諭俗編》卷上《孝父母》的《續編》中說，“父母慈愛而子孝，此常事也，唯父母不慈愛而子孝，乃可稱耳”；“蓋天下無不是底父母，父有不慈而子不可以不孝”。
我相信，時代變，但真理不變！
我相信有唔好既父母，但我亦相信更唔好既父母都係想自己既子女好。
當你有一日終於能夠體會到天下無不是之父母既時候，希望唔會太遲喇！

沈思錄的沈思

最近，睇左瑪克斯·奧瑞利斯（Marcus Aurelius Antoninus）的《沈思錄》（Meditations）。這是西洋斯托亞派哲學既書。作者寫這本書是在做反省，反省人生在世，應該自強不息，不應沈迷於享樂，富貴，名聲等等之中。作者本身係一國之君，仍然能夠在榮華 富貴中自省，極之難能可貴。現今社會，相信大多數人都沈迷於追逐富貴名聲，當中為求真理學問的又有幾多呢？在富貴後仍會自省既，追求既又係咩呢？榮華富貴，得到又點呢？
「天行健，君子以自強不息」希望我可以教B仔將來都做得到！自己亦在努力中！

小霸王

朋友既ＢＢ都相繼出世，大家都好順利健康，恭禧哂。睇番朋友ＢＢ既相，覺得我Ｂ仔真係好細粒。而且，可能係遺傳，人地個Ｂ仔好多頭髮咁 既！
初初Ｂ仔出世，家人都以為佢好文靜，唔多喊架，就算喊都細聲過人。 咁就錯哂喇。嘩！依家幾鬼大聲，唔係喊，係叫，叫得好大聲， 唔知乜得佢咁開心呢？ 而且仲好惡，又大力！太太帶佢落街同其他師 奶吹水，佢一手捉住人地個Ｂ仔件衫抽起唔放，怒啤人地，好似黑社會咁，人地個Ｂ仔既家姐成五六歲都拉佢唔開，喊住叫媽媽。唉！！ 真係小霸王！
人地話佢似我，我覺得佢似我媽媽。