一百萬人的故事

翡翠台【了解.關懷 一百萬人的故事】， 好多底下階層講出佢地既生活 苦況，現場大家都提議就最底工資最高工時立法，大家懇求現場既梁振英先生推動政府加速立法，梁先生當然答應，大家差點大叫梁特 首萬歲。
當然，我明白社會上有好多底下階層既生活好難過，但最底工資最高工時並冇在世界上任何地方有個成功例子，相反個個都係失敗例子，最底工資最高工時只會有兩個結果，一係更多底下階層喪失職位， 一係商家將成本轉嫁俾消費者，結果通脹上升，底下階層得不償失。
最衰係果Ｄ借底下階層達到政治目的既人，俾你做特首又點？
你安樂嘛？

Able to work under great pressure

最近，連寫Blog既時間都冇，連留意身邊既事同人既時間都冇，腦袋一片空白，只係不停做做做，做著一Ｄ唔多洗用腦既工作，好悶，好 空虛。
新同事話，呢度做野，３０﹪時間做野，７０﹪應付老細一Ｄ無聊既問題！！ 不停e-mail同report，煩多過忙！！
漸漸開始有同感！
公司想取消哂所有坐房Manager既電腦！下？？Manager房冇電腦？？冇得上網冇得玩接龍佢地會悶死架喎！！公司話改每人俾部 Blackberry電話佢地，等佢地可以２４小時用e-mail！
漸漸開始明白咩叫做 "able to work under great pressure"!
我呢世都唔想做Manager！

垃圾之王

搬屋已經完成，所匙都還番俾業主，大小姐明天正式開始番學地獄旅程。
搬屋，你會發覺屋企真係唔係野少！！
麻雀檯有三張，風扇有三把，開麻雀館？爸爸話全部都要！擺邊呢？爸爸話擺哂o係房！係我或者個女間房！
打開衣櫃，發覺爸爸有二十套西裝， 但西裝爸爸只係過年著一次！ 即係可以著二十年！爸爸話全部都要！
太太有三十對鞋。咁！！太太唔係全部都要．．．丟左兩對囉！！
個個既野都要， 咁唯有丟左自己既野囉！一次個丟左四箱書十箱衣服五對鞋，尤其丟書，好心痛！
更心痛既係，丟完自己既野之後，發覺爸爸原來仲有位擺多二十套西裝！我既野就擺哂係廳！爸爸話冇位擺就繼續丟我既野．．．
到底，我仲又幾多野可以丟呢？
屋企係一個垃圾房，邊個又係真正既垃圾之王呢？

玩具

買玩具俾B仔玩，醫生話有助B仔手腳同腦部發展喎。
本來朋友細路仔話俾D玩具B仔，但太太話可能B仔三歲都未見到D玩具…
於是同太太去Toy R`us買，搵D有益有既玩具(多彩色，especially紅色，會發聲，千祈唔好買公仔)。買左四件，用埋discount再用埋cash dollar都要$800，唔用要成$1000…. 都幾貴，呢D玩具，過左一歲又唔玩喎要買過…計落真係好貴!!
離開Toy R`us，太太同女女一齊問：「係邊個話唔好買玩具俾B仔架!!」
係邊個呢??
番到屋企，B仔玩得好開心喎!!! 貴D都值得!!!

搬屋

本來，計劃左26日星期六搬屋，但姑姐突然話搵到人唔洗錢幫我搬屋，不過改左星期五。咁都好既，…. 但我乜都未執喎。
番新工，第一次打風，以為會好多野做，但原來冇…. 冇野好做，又唔洗當風更，因為個萬能手下乜都做哂，連電話都唔會俾我…真係好，冇乜事唔好煩我。
今日，我個長氣partner放假，即刻靜哂。但唔係冇野做，相反仲多野做過平時，但可以靜靜地做野，已經係一種福氣。我好討厭一日九十幾個電話問埋D廢話。
有策劃部，負責做大project，做隻風櫃，日日滴水，我黎左九日滴足九日。佢又唔多理，判頭又真接report同交貨俾佢，所以又唔多理我。咁，我唯有日日e-mail俾佢俾埋老細問個status係點囉!!唔好以為係我冇做野囉!!點知，呢位策劃部同事即刻俾電話我，話我好出咁多e-mail，有咩事電話講就得喇!!下??電話講冇人知你知架喎!! 有乜事我咪食哂囉??唔好玩喇!! 係咪叫Roy既脾氣都唔多好架呢??
呢度呢個場technical officer得我一個，雖然我係機電出身，但連起樓structural圖都要識睇識解同室內設計都要做…我學都冇學過，馬死落地行，有咩辦法呀!!
我既上手，filing做到亂哂龍，如果我冇黎，做死其他同事，D有用既文件佢當垃圾放係D廢紙到，你話做死唔做死??
今日，連warning letter都要出埋，呢度冇tenancy services呢樣野，一個leasing officer，一個maintenance officer，一個estate officer(保安&清潔)，最唔好做係做technical，因為連tenancy services都做埋，派通告都要我去!!點解??我都唔知!! 最好做leasing，有地產代理搵埋客黎睇樓，唔鐘意就唔租，唔洗煩!!
點解會咁架….
搬屋既同日，仲要搬寫字樓，…. 煩!!搬一搬，D文件咪仲亂…..
搬新寫字樓，個個位大到可以放張床….. 真係同一般物業管理公司好唔同，有咁多地方實租俾人喇!!
搬咩呢!!

年輕人問

有年輕人問:
如果，你可以搵到份比現在人工低少少，但無乜壓力的工，準時出糧，五天工作，你會唔會離開工程界?
記得，你係要重頭開始...
仲有，你要放下數年的相關經驗
在工程界碌緊的你地，會唔會接受新的offer?

有前輩答:
100% yes. even less 10% salary. More time that I can
put in my family/health/habit/interest. That's very
worthing & valuable.

What's new starting? everyday is a new starting.

Experience means nothing if it brings you
unhappy/trouble/annoying. I've near 20 years
experience in engineering and I've few registrations
as well, but I don't find such experience &
qualifications are useful if they can't let you feel
satisfy & comfortable on the life.

Young people in engineering field, please don't think
your few years experience is valuable, it's rubbish at
all if compared to many brothers here. Don't waste the
chance and accept the new job and enjoy the new life
immediately. Otherwise you will become the one of us
after 10 years later and can't leave the engineering
field due to age.

多悲哀,可惜小小力唔中唔間,走又唔係,唔走又唔係...
我唔想生命只有工作....

波係圓嘅

波係圓嘅 - Der Ball ist rund, 原文係德文，出自德國名教練Josef (Sepp) Herberger (1897-1977)。

1954年，在瑞士舉行的世界杯決賽，由西德對匈牙利，西德面對以球王普斯卡什為靈魂人物的匈牙利，當時匈牙利隊還有像柯奇士、希代格庫蒂和博日克這樣的出色球員，在這場决賽之前4年以來匈牙利隊所向披靡，31場國際賽不敗，大家認為冠軍非該隊莫屬。匈牙利在晉级過程中曾以8-3擊敗西德隊；9-0大勝朝鮮隊；4-2勝巴西隊及4-2勝烏拉圭隊。可以用催枯拉朽來形容匈牙利的晉级過程。
決賽在傾盆大雨中進行，開始時一切似乎都在大家意料之中，匈牙利隊很快便以2-0領先在不久前是其手下敗將的西德。但西德隊竟在半場前就扳平了2:2。
由於傾盆大雨，西德隊穿了由Adidas 供應當時史無前例可換鞋釘的球鞋，西德球員半場換釘，也不知是否這原因，下半場形勢扭轉，84分鐘，西德隊的拉恩接隊友傳球後射入，結果西德第一次捧走世界杯。西德教練靴貝加1954年8月20日接受訪問，描述這場被世人形容為經典的Mircale of Bern 球賽時，就講了這句明言:”Der Ball ist rund ,Das Spiel dauert neunzig Minuten” 意思係球場上除左波一定係圓之外，九十分鐘嘅比賽未完，任何事都可以發生。
其他Josef (Sepp) Herberger嘅明句仲有:
• Nach dem Spiel ist vor dem Spiel" ("After the game is before the game.") That is, as soon as the match is over, it's time to concentrate on the next one.
• "Der Ball ist rund" ("The ball is round.") Meaning, that's the only sure thing, and anything can happen during a game.
• "Das Spiel dauert neunzig Minuten" ("The game lasts 90 minutes.") In other words, "It ain't over till it's over."
小小力最喜歡第一句!!
特首曾蔭權話波係圓嘅係伍晃榮講所講，應該係錯嘅!!

聚舊

轉左去旺角做野，當然搵下附近既舊同事食下飯。今日搵左「大力」食飯，…真係好耐冇見。大力都冇乜變，但小小力已經變左大件小小力!!! 大力仲好奇怪小小力已經結左婚仲做埋爸爸!! 不過，過去一年小小力真係變化好大，連小小力自己都冇諗過，何況大力呢。聚舊，大家走左都唔錯，真係好!!大力話佢公司都有位，問我去唔去??雖然再高兩級，但好似人工都唔及依家!!都係唔好囉!!如果係既，之前王同事叫我去佢公司都去左囉!!人工唔高升咁高做乜??
本來，下星期二我都有第二個offer，都諗住去睇下，但大力既意見話間公司麻麻，再聽埋其他人講workload大，人工底，番五日半(呢樣野我同大力都好抗拒)，得十日annual leave，縮骨到呢…. 都係算把喇!!
依家呢間公司雖然workload大辛苦D，但正如大力所講，都算係間「良心企業」，福利不斷改善，人工都比市場高D!! 又多假期，手下都有二十幾日假期，我假期都仲有得加，算係咁…
希望做耐D睇下點喇!!
放工，舊同事「運來」黎探我同睇BB，仲o係屋企同我一家食飯….
今日真係開心!!

市價

有人對物業管理呢個行業做左一個薪金調查，得出以下既結果，問過好多人仲話好準喎!!!
官階
1. ED 上將 100k +
2. GM 中將 80k +
3. AGM 少將 60k +
4. CPM 准將 50k +
5. SPM 上校 40k +
6. PM 中校 30k+
7. APM 少校 22k +
8. SPO 上尉 17k +
9. PO 中尉 14k +
10. APO 少尉 10k +
文職
11. PA 一等准尉 8k +
12. CLK 二等准尉 7k +
士級
13. SBS 上士 12k +
14. BS 中士 9.5k +
15. ABS 下士 8.5k +
兵級
16. SBA 上等兵 7.8k +
17. BA 列兵 7k +
技術兵種
1. SMM 工程上校 45k +
2. MM 工程中校 35k +
3. AMM 工程少校 26k +
4. SMO 工程上尉 19k +
5. MO 工程中尉 16k +
6. AMO 工程少尉 13k +
7. Supr 工程士官長 15k +
8. ST 工程上士 13k +
9. T1 工程中士 11k +
10. T2 工程下士 9k +
小小力係技術兵種，之前o係舊公司係工程少尉(Assistant Maintenance Officer)，薪金都唔只呢個數(13+)，但新黎既同事真係得呢個數，都幾準!! 依家轉左公司，官階係工程中尉(Maintenance Officer)，但薪金已經高過工程上尉(Senior Maintenance Officer) 既市價…可以見到舊公司薪金真係底，而物業管理呢個行業薪金都普片偏底!!

地獄

本來有三日時間用「小畫家」畫既圖，最後下午高層一個e-mail叫我放工前畫好俾佢。連埋行睇位度尺同畫再加一個開左兩個半鐘頭既會，有幾多時間畫?? 點畫?? 同事話：「佢叫你放工前畫好俾佢嘛!!你唔放工咪夠時間囉!! 」
哈哈………呢個笑話幾好笑!!!
今日同D保安開會，發覺係唔係每間公司都有D「碌葛」咁既人架呢?? 有個supervisor，你問佢東，佢答你西，問得兩問你就知佢連自己係做乜都唔知。或者我同事對得碌葛呢類人少，結果，佢繼續問繼續問，問左兩個半鐘頭，都唔知個supervisor答左D乜!!.... 我差D訓著!!!
求求其其交左幅圖俾高層，佢終於知道之前計既數係錯既，仲話之前個同事係教IVE…真係嚇死人，五千幾呎既單位計出八千幾呎…. 唉!! 之後，佢叫我用「小畫家」畫番幅比例百份百正確既圖…. 乜得既咩!!
提起呢位高層，個個同事都唉唉聲…. 我覺得佢既能力同性格都有D似之前個大老細!!
果然係由一個地獄跳去另一個地獄!!

替死鬼

點解要行ISO呢??
公司因為要行ISO，所以好多文件，好多report，狗屎垃圾都report一餐，report俾全世界，為乜呢??
但，我知道公司係冇行緊ISO架喎!!
咁，點解呢??
有同事話，公司曾經洗左好多錢行ISO，但行左一陣就冇再行喇!!
行左一陣就冇行??行ISO定行街呢??
公司研究寫字樓安裝高清電視，我既計劃係預計有一半單位會安裝，但根據過往經驗，寫字樓係唔會有太多單位會安裝電視，一半已經有多，有幾多人會在寫字樓睇電視呢?? 但同事話我錯哂，差不多所有單位都要求裝電視接收，點解呢??原來呢度好多人放左工會住o係寫字樓!!...
計GFA(Gross Floor Area)租俾客，發覺好多數，好多圖都係錯既，佢地連對GFA同lettable area既概念都有問題，佢地話佢地既計法只適用於旺角…聽都未聽過有D咁既事!! 聽佢講左半個鐘都唔知佢講乜，唔知佢自己知唔知呢??叫我計番哂D數執番哂D圖，都冇問題，但連AutoCAD都冇，唔通用手畫??唔係!! 係用「小畫家」!!三日時間，唔好玩我喇!!
成三十年樓，好多野唔得或者冇做，
漏水既水喉，收貨，跟著我執手尾!!
漏水既風櫃，又收貨，跟著又係我執手尾!!
判頭做得慢做得唔好做錯，可以warn，但唔可以換判頭，唔可以唔收貨，唔可以唔俾錢!!
我黎到立即推哂D問題俾我!!我似做替死鬼多個做野。

工作

其實，你覺得工作應該佔據你生活既幾多時間呢??
現實，又佔據你生活既幾多時間呢??
係唔係長時間工作就一定有成就既呢??
依家，升唔升你就睇你能夠做到幾長時間….!!!
如果每日做到十六個鐘，你至少可以做到經理!!
二十個鐘可以做董事….
係唔係咁呢??
星期一，早上番到公司，開電腦，發覺同事星期六日都番工，仲send左好多e-mail俾我…!! 大家唔係番shift架喎!! 咁即係一個星期七日，日日都番工??
Oh…my God!!
睇番D舊文件，原來我之前講我呢個位，五年黎我已經係第三個，係錯架!!! 應該係一年黎我已經係第三個!!2007到2008已經轉左三個人!!.....
為乜!!!??
冇乜心機，上intranet click下個staff directory黎下D同事個樣(有相)，竟然見到大學舊同學「曾公子」。人地已經係副總經理…….
小小力呢D，仲係基層打滾…唉!!
係唔係態度有問題唔適應社會呢!!

番工衣著

今日，番工開會，入到meeting room，見到連大老細都唔打tie…又衰左!!
原來公司係行Causal Friday既…. 好鬼樣衰!!
記得八年前第一日到時代番工，係星期五，我著得好Casual，但見個個著得好formal，仲俾王同事串話呢度番工係唔可以著得咁Casual既。第二日，星期六，我著番formal，但又見個個著得好Casual，再俾王同事串多次，乜你唔知呢度番工星期六係可以著得好Casual既咩!?
好鬼樣衰!!
但，你問人番工既衣著咩?係冇人會問你架喎!!
呢D係咩心態呢???

留言

大家最近點呢?? 忙唔忙呀?? 有冇乜事發生呢??
又一次十個零喇!!
想借個Blog同大家分享同Keep in touch!!
但，好似大家都唔多願意留個言咁….
點解呢??
轉左公司，call機冇左，我都唔用留言信箱喇…..
咁，就咁喇!!

比較

我當然知道大場同細場既分別喇!!
但，有D基本野，無論公司大定細，都應該差唔多…
何況新公司都唔係咁細…
但例如，一張O-chart，你睇完都應該知道個公司/部門既結構，邊個report俾邊個咁呢D簡單喇!! 新公司張O-chart，有圈，圈住一D人名，冇title，冇department，唔知佢地係唔係夠四個就埋一檯打牌，我o個個，我只係識一個，我既partner (EO…我都唔知乜係EO，淨係知佢係一個高級打雜，乜都做。我title係MO，Maintenance Officer，但都係一個打雜)，佢教我做野，我以為我report俾佢，但原來佢話我高級過佢。咁我report俾邊個呢?? 番左兩日工我都唔知我老細係邊個!! 可能我係冇老細…個個狗屎垃圾都e俾我report俾我，其實我係唔係manager黎架? 我既partner好心急交哂D工作俾我，…唉!!我明白佢好多野做，我都好想幫下佢，但我又唔係記憶王，兩日要我記哂個場所有野，唔好玩喇!! 由於冇老細，明天開會要講出年budget俾大老細聽…乜都未知點做budgeting呀!! 講咩呀?? 呢份工真係幾challenging，下下要無中生有!!!
同下面既Maintenance Supervisor吹下水，佢都識好多野做好多野，比起舊公司既Supervisor(…呀!!升左喇) 高幾班，唔怪得知佢唔敢走!! 呢過Maintenance Supervisor基本上幫我做左90%工程既野，唔係D政策咁亂，其實我好得閒呢!! 呢過Maintenance Supervisor話其實呢間公司人工俾market高，所以多野做囉!!
係咩??

好人難做

點解，唔好既野總係唔肯離我而去既呢??
唔係講緊番工，我從來冇諗過番工係會好開心，所以平日儲埋D錢去唔洗，希望盡快退休唔做。香港呢個社會，我從來冇希望過!!
今日，最唔開心既，係連結婚戒指都唔見埋!!
得番個空盒。
對結婚戒指值得幾多錢呢??
但對我同太太…………真係好又記憶價值!!
唔通屋企真係唔擺得野?? 唔通所以野都要放保險箱!!
……好唔開心!!! 好想好想報警………
今日，個死人地產經紀打電話俾我太太，叫我地4月20日好搬走，明明講好左30日我搬走，傢私等都訂好日期黎，租又計到26日，點解又無啦啦要20日走呢?? 最後佢話俾我地26日走…俾??? 我就打算30日先走喇!! 你收唔到樓就報警拉我啦!! 我打算上報紙架!!
點解要做好人呢?? 好人既下場就係咁喇…比人一步一步咁踩過黎!!

可愛無罪

雖然我B仔係可愛，但大家都唔好咁「狼」!! 一見到B仔就「非禮」佢…
今日，太太帶家姐同B仔去Shopping…嘩!! 太太話去到邊人人都走黎睇B仔and非禮B仔，Sales係咁，D客又係咁!! 下下七八個人圍住B仔…嚇親喇!!太太唯有叫工人抱B仔走…..
大家唔好咁喇!!

新公司

或者，舊老細留o係舊公司太耐喇!!
出面既世界係點佢已經唔係好清楚!!
呢間公司都好demanding..
小小力既新公司並唔係好似舊老細所講行咩舊制!!
冇乜人因為結構精簡(但怪怪地，有D亂)
冇乜野做就更加唔係喇!!
我出黎做野十幾年，未試過第一日番工已經做到散哂…

坦白講，有D失望!!
公司既制度有D亂，D位成日轉人，好多新同事!!
番工三日後要我做出年budget….乜都未知點做???
公司對員工既support又唔多夠!!Admin, IT, Clerical同Logistic都唔係好得!!
我連Clerk既野都要做!! 保安清潔都要睇埋!!
濕濕碎咁…

又睇下點喇!!
舊老細都係應該留番o係舊公司，做呢D公司可以提早退休，未到退休已經精力耗盡!!

下一站……旺角

今日簽約，明日番新工，地點係旺角!!
工作性質同以前差唔多，小咁D function做!!
人工，比以前多10%到喇!!
Benefits又俾以前好少少咁喇!!
唔知跟著係點呢??
舊老細話我新公司行舊制，人工高，福利好，冇乜人，又冇乜野做，個個staff幾十歲唔多願走咁喇!!
….. 最後，老細話如果有位帶埋佢過去喎!!
你見過手下帶老細走未呢???
又幾有創意喎!!

睇相

番大陸接家姐既時候，太太要修甲，期間有個女人行埋黎話同我太太睇相，只係幾十蚊，好準咁話，仲話人人都知佢好得咁話。太太於是俾佢睇(當時，我冇同太太講過野，個女人應該唔知我地係夫妻!!)
個女人話：你自細就唔洗點做，脾氣唔好但心地善良，有好多幫到手既朋友。細個應該曾經破個相!! 二十幾歲結過婚，但呢段婚姻好快會破裂，之後要三十六歲之後再結婚先可以到尾，你丈夫會係一個身形肥大既人，越肥越好!! 你做事完全唔得，做生意一定失敗，但你只要結左第二次婚就唔洗再做，你丈夫會越黎越有錢，越做越大，打工都會打到做老板。
太太話：但我丈夫依家都失業冇野做…
個女人話：唔緊要架!!佢唔做都會好有錢…. 另外，你有兩個仔女，第一個係女，第二個係仔，仔女都比你聰明，你有八十三歲命，一路會好到尾。
…..
嘩!!! 未發生既我唔知，但發生左既100%準….
之後，個女人周圍行，行到埋黎問我睇唔睇…. 嘩!!! 咁準!! 更係唔睇喇!! 我好驚呀!

滿月

B仔滿月喇!! 希望B仔身體健康!!
滿月當晚，B仔都好聽話，俾咁多人抱黎影相都冇扭計!!
…睇相喇!!(Blogger限upload五張相，想睇更多要去我Facebook啦!!)

顛倒黑白

顛倒黑白是非,乜自由大哂架咩??我可唔可以屙尿射o個個咩MC仁架??D尿好天然架喎!!冇害架喎!!
佢唔舒服??咁我有尿唔屙出黎都好唔舒服喎!!我成家都有尿唔屙出黎既唔舒服當然比你MC仁一個人既唔舒服大喇!!咁我成家唔舒服D計先!!
MC仁：「佢唔舒服？我地舒服點計先？」
香港有MC仁呢D廢物想好都幾難!!

拖地...


咁得閒番屋企拖地喇,...D年青人真係食飽飯等屎屙....世界上好多人死,偏偏食飽飯等屎屙既唔死...

出城

太太兩個家姐話黎飲B仔既滿月酒，三家姐都冇乜問題。二家姐第一次話不如滿月酒改到五一勞動節之後等佢放假先至黎，結果被佢媽媽我外母鬧到飛起，死死氣話四月二日黎。我都計劃好去深圳接佢，結果到四月一日佢簽證都未有，原來三家姐去申請簽證既時候佢又掛住打牌冇去申請(佢就係我o係貴州捉住我打足一個星期牌唔准出街o個個)，諗著靠關係可以即要即有，點知衰左，話要四月三日先有。我唯有改四月三日去深圳接佢地。到四月三日，再打電話黎，話個簽證要四月七日先至有，叫我地不如將滿月酒改到四月七日之後先擺，…. 唉!! 如果我屋企有個咁既成員，我都覺得幾失禮，成日叫人地主人家改期就自己，結果被佢媽媽同老公再鬧次勁既!! 三家姐都唔理佢，自己一個人落黎，佢仲叫三家姐幫佢帶埋D行李落黎，佢自己繼續去打牌…. 唉!! 三家姐又答應佢…. 咁就大件事喇，佢將黎香港十日，每日三餐既食糧都放哂入去一個冇得拉既行李袋度，我估個行李袋至少都有150磅，三家姐都深圳，我幫佢搬行李…. 嘩!! 真係呢….. 我都好佩服三家姐!咁重都拉到上車(咁重，冇得拉都要拉喇，話之佢死喇!!) ，我行樓梯想一腳踢個行李袋落去呀!!番到香港，太太仲話去坐巴士，搬佢個袋行李行幾條街，不如叫救護車送我去醫院仲好喇!!

唔敢想二家姐落到黎會點!!
仲話七月去貴州帶我地一家去玩，我驚爸爸被迫打一個星期牌呀!!

重回時代

又重回時代

今日，第一日「失業」，上午去見工，地點係旺角，整個過程大約一個鐘，係同行。奇怪既係打電話俾我叫我見工既並唔係人事部，而係經理!整個過程冇written test，冇oral test，冇考我knowledge，只係吹下水咁。發覺呢個經理比我更了解時代既運作，有咩人加入咁，連舊大老細走左，去左邊，新大老細點改組都幾清楚…唔通呢度有人識我….?? 見左大約四十五分鐘，跟著做埋second interview，見個高級經理，問左D technical野，仲簡單，十五分鐘完成，佢話等人事部D同事做埋D document就okay…咁，係唔係請我架喇??

之後，同B仔去申請出世紙，原來申請出世紙，只要父母有結婚證明書，咁，只要父母是但一個去就得，連B仔都唔洗去!! 之後，帶左B仔番時代見下D舊同事，…. 靚唔靚仔呢!!嘩!!好熱鐘喎!!個個圍住我B仔，又話抱，又話摸，驚親人地小朋友嘛!! B仔咁少喊都喊喇!!為有快快走喇!! 遲D再睇過喇!!

離開時代

終於，離開時代。

原來我o係呢個時代真係幾多朋友，請大家食「散水餅」，一人一件，七打都唔夠食。

舊同事Michael打電話俾我，原來佢走既時候，大老細o係走廊捉往佢「鬧」，仲講左D好侮辱既說話，….. 咩請左你即係廢既…. 等等。山水有相逄，佢真係小氣兼小家。Michael問佢有冇鬧我，…又冇喎，自從遞信之後佢都冇再鬧我喎…我都想睇下last day佢點鬧我….

不過，舊同事「鉤仔」走左，佢都要開個會黎力數人地既不事，真係好底能又無聊。依家小小力又走左喇，唔知佢又點將我鞭屍呢!!?

臨走，終於有同事搵我影相，我以為冇人想同影相喎…




夜晚，本來有舊大老細既飯局，結果舊大老細放飛機，本來有舊同事「大力」，結果話大力要留o係旺角捉老鼠，本來仲有同事「體育健將」。最後，飯局得番五個人，兩個判頭，我老細CM，舊同事鉤仔。咁仲好，咁多唔多熟既人做咩呢!! 呢個飯局都冇乜特別目標既，至在吹下水回憶一番。整個飯局，好鬼「智能飯局」feel，食下好野，飲下靚酒，好鬼relax好鬼正!! 由兩個舊老細送我走，算係幾唔錯。

不過，好多人都好想知我既下一站o係邊，…. 其實答案好快就有架喇!!

在時代的最後一日

這是在時代的最後一日，

終於，我要離開這個工作了八年既地方，

最後既感覺係……..浪費時間，

足足浪費左自己八年時間。

走前，依家既老細問我佢舊公司有位去唔去….

我拒絕了!!

走前，有舊同事打電話俾我問去唔去佢新公司…

我感謝但亦拒絕了!!

這刻…

我想靜一靜，休息一下，

繼續自己走自己應該走既路。