B 仔病了

可能因為我傳染左俾B 仔，B仔咳流水鼻又唔食野，喊喇，又有Ｄ發燒！
太太帶B仔去睇醫生，醫生話B仔可能有小小病，開左七枝藥水俾B 仔， 好可憐。
希望B仔快Ｄ好番！
P.S.B仔16磅囉!! 大得幾快!!

貼錢買難受

公司派電話俾我地用，用黎收E-mail，咁即係24小時on-duty，幾分鐘響一響，都幾大壓力。好似放病假既一日，一個下晝收睇左三十幾E-mail，根本冇得休息。
點知，放完病假之後，公司話如果要用個電話可以隨時隨地check E-mail就要自己俾月費$185，如果唔係就冇得用。 嘩！要我貼錢買難受， 我第一時間俾番部機公司！感覺即刻輕鬆哂！！仲有一半同事都係咁做！
老細話，公司投資左好多錢落去，但我地竟然冇乜人想用？
竟然？？唔想用都好正常喎！邊個會想24小時on-duty?
怪只怪諗o個個底能囉！

節哀順變

已經咳左兩個月未好，去照肺結果都未出已經支持唔住發燒。燒足成晚，仲模模糊糊唔知點樣撞傷個頭。今日請病假在家休息，心情頗差。卻原來還可以更差....
病假既早上，收到舊同事既短信，原來上星期六遇車禍重創的奧運女義工鄧玉芬係舊同事鄧Sir個女，昨晚約八時二十五分離世。記憶中舊同事鄧Sir好錫呢個女，經常提起個女都見佢由心到笑出黎。當然，個女又乖又叻女，真係人見人贊。可惜天妒英才....
希望鄧Sir一家人都節哀順變，畢竟在天國既女兒都唔會想父母傷心難過!

下一 代

最近，都覺得自己好燥底，唔知係唔係生活同工作壓力大呢？所以都希望多Ｄ見 下朋友，吹下水，減下壓。
好快，Ｂ仔已經三個月大，太太有時抱佢都抱得好辛苦。呢個Ｂ仔呢，好醒。見到 爸爸同爺爺都識笑。見到陌生人都唔扭計。但食奶就唔聽話，一食唔哂媽媽鬧佢就 向叔叔求救，要叔叔抱抱！睡覺又要人抱實先訓．．．
真係呢．．．
但原來，親戚話小小力細個都係咁．．．
希望佢醒過小小力，健康過小小力就好喇！
P.S. 友人車人終於生左喇！！母子平安，恭禧恭禧！！另外身在外國既友人Angie 都應該生左喇！！都祝佢地母子平安。

唔知我地既下一 代將來長大會係點既呢？

主動

每日番工都冇乜心機，諗起又唔知有咩轉變，又要面對Ｄ咩新同事，好煩。
好快，差不多o係呢度番左三個月，差不多過試用期，同事們都好緊張黎問經理同 我做左appraisal未!!大家都覺得我唔夠主動，可能過唔到試用期咁！！唉！我自己 都唔擔心，過唔到就過唔到喇！！至於唔夠主動，我自己覺得冇問題，好似佢地 所講既主動先至係問題。
黎左呢度番工，作為一個工程人員，我睇最多既唔係圖唔係數唔係標書，係Tenancy Agreement。做最多唔係見判頭技術人員，係保安清潔同約客。我有時都唔知o係呢度做乜！成日叫我出通告，點解？因為應該出通告既又唔識寫，應該睇Tenancy Agreement既又唔識睇。所以大家都認為我應該主動Ｄ，做埋佢地果份！
昨日，去睇還原，我老細同我講係我表演既時候! 表演? 還原一個三百尺唔到既單位有乜好表演？唔係我個supervisor放假我都費事去。唯一可以表演既係天才表演，因為還原，你都要知原本係點先可以還「原」架！但呢個租客只係租左兩年， 但在場五個同事都係呢兩年係新同事，根本冇人知原本係點既，Tenancy File就更 加冇寫。所以天才表演，是但吹！點知去到，同個客做還原既判頭係舊公司既判頭，咁仲簡單，「自己執生喇」！
又一次唔得主動喇！
記得舊公司，做左八年老細都仲話我唔得主動！！係唔係即係我都冇做埋人地果份 咁解呢！？

食穀種

(星島) 06月 17日 星期二 04:06PM
律政司今日入稟高等法院指，銅鑼灣時代廣場將地面公眾休憩用地出租，違反批地條款，要求賠償。入稟狀指出，根據屋宇署與九倉附屬所訂立的契約，時代廣場地面路段為公眾通道及休憩用途，若出租，租金只可收取水、電費，但資料顯示，時代廣場將公用地方租出的周一至周五期間，平均每周收取94.4萬元，超出「水電費」，得到未經批准的利潤，要求向政府賠償。

小小力計一計，時代廣場開左14年，每周收取94.4萬元，時代廣場應該賠償6.8億!!唔摺埋都應該有幾年食穀種。

不斷在變

變-係新公司既同特色。可能害怕員工起飛腳，又或者好理想咁希望每個人一埋位，無論咩工種咩場所咩職位都應付自如！！因此，公司既結構／ 職位每兩年會 大執位，每年會小執位，而且唔同層既同事會唔同時間執位，結果係每個同事都 要面對不斷在變既拍檔。
舉個例子，星期五公司宣佈小執位，今次執經理同副經理。原來我老細既副經理 同我講佢又「歸位」喇！！點解呢？佢三月先調過黎，七月就要調番去原來既東九 龍辦公室喇！另一個請我既經理，我試用期都未過佢又調走喇！都唔知邊個同我做 appraisal!
另一個例子，有日突然間有個技工調黎跟我，第七日老細叫我同佢做appraisal!人都 未睇清楚就做appraisal!唔係嘛！！Okay!! 第七日我同佢做左appraisal! 點知第八日呢個技工已經被調走!! 唉！！ 個個場既officer都話唔會教新人，因為個個人都未認 得已經被調走！！
唉！！ 咁既制度之下，公司根本冇辦法培育新人，大家既工作效率亦極底，我每個星期都要對新同事，點做？
當做左十年以上，走哂咁多個場既老員工離去，公司就會青黃不接！
至於我呢Ｄ半路加入既，更加唔留得耐喇！！ 所以點解我呢個位兩年走五個囉！

快樂生活相

係唔係家長都鐘意小朋友著扮動物呢??你睇唔睇得出B仔著咩動物衫呢??

一個光頭的誕生

B仔滿一百日，太太話跟據佢地習俗，要剪頭髮同做胎毛筆。但香港做胎毛筆太貴喇，要過千蚊一支。於是只係帶佢剪頭髮，希望佢聰明 伶俐，身體健康。初初擔心B仔坐唔定，但原來係咁聽話既，真低錫。 睇片同睇相喇！！

公司旅行團

公司去瀋陽既旅行團，o係上星期黑色暴雨當日出發。四日既旅程o係昨天完結。今 日見番Ｄ同事，大部份人都死下死下。點解？原來公司旅行團唔係坐直航機，來回 都要到廣州轉機。四日既行程有三日o係度搭車又搭船。剩餘既一日去左參觀公司o係瀋陽既發展項目- 兩塊爛地，坐左一程觀光船，行左一轉supermarket，係咁多。瀋陽有咩睇有咩玩有咩食相信佢地完全唔知！！
好彩小小力堅持唔去，o係屋企訓三日好過。

放暑假

放暑假，唔係我既小朋友，係我!! 終於考完試，今年都算考得差!! 完全唔夠時間prepare，考mock都未教完三份二，講師輪住病，自己又忙，都冇咩好講!! 個人好似冇哂動力咁!!
但，路仍然要繼續，或者好讓呢個暑假見見朋友，休息下，做點修正，再從新上路!

考完試，番左舊公司，其實最想睇下舊老細同舊手下講既四月會有D轉變係咩轉變，值得大家留底!! 舊老細我見唔到，舊手下就見到! 轉變??好似乜都冇發生過!! 好彩冇信!!

舊大老細迫所有舊手下上山同大老板清潔，唔係做工程係做清潔，結果舊手下一齊同人事部complaint同辭職。當然又唔成事喇!!大老細第日變哂好聲好氣，唉!! 唔好以為會有好日子過喇 ，佢咁記仇，除非佢死左喇!! (唔係離開左或者辭職，係死左!!)
舊公司靜哂，空缺仍然係空缺，如果有變，只會越黎越衰!!

唉!! 我相信...有一日，天會收佢，可能要俾死更難受!等佢試下所有親人都離開佢既感覺!!

同舊同事打牌，好開心，但好耐冇打，好屎!!

星期五，又約左Jason食飯,唔知又會唔會被放飛機呢??

口水王

一個小朋友， 點會有咁多口水架！