年結

06年快將完結，係時候回顧一下上年定下既目標同為新一年做計劃。
06年目標:
還債 - 早已完成，06年尾冇債在身，仲有錢左，目標完成。
減肥 ﹣由高峰198磅減到06年尾186磅，雖然仲未滿意而且表面睇 仲肥左，但總算目標完成。
轉工 ﹣徹底失敗。
讀書 - 完成左一個Advanced Diploma in Finance，再讀 degree，目標完成。

07年目標:
情況：由於媽媽有病，自己無啦啦又拍拖，讀既課程難度比想像中 高，加上投資環境會轉差，因此所有目標傾向保守。

家庭﹣希望能多一點時間照顧家庭，媽媽能出院，中藥已經初見成效。
進修 ﹣希望能考試過關， 唔洗repeat，繼續向夢想進發！
健康 ﹣希望能保持一星期做一次運動，保持身體健康，繼續冇sick leave，冇減肥目標！
投資 ﹣由於預感07年市場會有大災難，今年投資傾向保守，目標係分散投資風險，為長遠投資作準備，今年冇特訂投資回報 率，睇長線，會買入黃金股，鐵路股，銀行股，REITs(房地產信託基金)，新興市場基金。再有錢就買垃圾債券基金。
財富 ﹣今年要儲蓄，目標每月２０﹪儲蓄！唔好咁大洗！
工作 ﹣06年尾，要調走我既人最後兩日竟然被人調走！真係峰回路轉，睇黎可以睇下先，轉工暫不強求，因為太多事要兼顧。
感情 ﹣希望能夠同明繼續穩定發展，目標兩年內結婚！

恭禧恭禧

06年收到最後一個好消息，好朋友邦邦會於07年尾結婚，恭禧恭禧！！ＡＢＣ終於有人結婚，但係我地都仲未見過冰冰喎!! 仲有，請問係唔係07年夏天先至打邊爐呢？

多多得罪

從朋友既BLOG節錄左呢段出來 .........

「我人生既目標只是幸福的跟自己既男人生活下，去有一份穩定的工，久不久吵吵交, 鬥鬥咀。最後他總要輸給我，就是最初嬴了，後來也要故意輸給我，要服氣的~ 順氣的買禮物來哄我。就是這樣無論在甚麼地方, 無論在甚麼時候，就我們2個人吵吵鬧鬧的。
我病了，要吃藥，吃得慢, 不肯吃, 你都要罵我，我發脾4你要跟我一起發幾分鐘, 然後哄我。我做錯事, 你一定要罵我2句, 讓我良心好過一點, 然後一聲不響幫我執手尾 (<-呢個情況應該會經常發生)你做錯事, 要俾我打, 仲要俾我狠狠咁罵, 之後叫我原諒你, 仲要好誠心咁講對唔住」
除此之外, 每年生日都要有特別安排.唔一定要要非常隆重, 但至少要俾我見到你係花過心思去想我開心.另外, 生日禮物要花心思. 我唔介意價錢, 但唔可以求其 ~ 仲有, 得閒就要陪我出去四周圍食野. 我肥左你唔可以好直接咁話我知.同埋, 我好鐘意係條街度漫無目的咁行, 行都迷路. 你要陪住我, 然後係我想走返出去返屋企果時要識路.
我發脾氣果時唔可以阻住我發脾氣, 即使係我錯~發脾氣期間唔可以頂我咀. 唔可以走開, 直至我發完脾氣.之後你要糾正我都要係我條氣順哂先講.
仲有就係, 我唔識執屋同煮飯, 所以唔可以話我唔識呢兩樣野.但當我好俾心機咁煮左餐飯出來~好難食都要食哂佢.
我只係希望, 平平凡凡 ~有一個, 佢愛我多過我愛佢既人陪我一齊過.有自己既屋企, 收入stable.可以俾我一年去一次旅行 ~ 同埋得閒亂買下野.

我相信，說這段說話的，未夠三十歲！至少思想未夠！
我相信，如果大多數女士都有這種想法，她們會感覺現實多殘酷！
我相信，如果現實真的有這樣的一對男女，我感覺唔到這位女士有多幸福，但我感覺到這位男士有多「廢」，冇Ｄ性格，人生還只為 了一個女人而活嗎?你似奴隸多過似人!愛是這樣嗎?
各位女士，如果這真是你心中所想，請恕小小力多多得罪！

迪迪尼 - 明編

小小力自己影好唔好D呢?

迪迪尼 - 二人編

由於大多數人都唔識影相,無辦法喇...Sweet嗎?

迪迪尼

唔知係唔係因為去過日本既迪迪尼，感覺香港既迪迪尼冇咩野玩，好細（四個鐘就玩哂，行黎行去都係o個度），遊行花車唔多唔夠靚，玩 既唔夠投入，令表演者都唔夠投入。購物種類唔多（好彩！），聖誕節都冇咩特別（除左價錢!）。
至於酒店方面，由於策略錯誤（應該第一住日酒店第二日去迪迪尼 玩），結果冇咩用過酒店既設施。酒店okay靚 !!
總結，好開心好好玩，咁係因為有明同我一整！！
想俾哂Ｄ相你地睇，不過我一日影左三百幾張相，放唔哂上黎，精選Ｄ俾你地睇喇!
P.S.1: 小小力嚇到面青青，以後都唔坐過山車。
P.S.2: 總數用左大約七千，去泰國都冇咁貴。
P.S.3: 終於第一次用酒店既Room Services食野，好high咁，哈哈！！
唔講咁多喇，睇下相啦！！

窮

今個月超大洗，竟然洗左三萬幾蚊，得番千零蚊現金o係戶口。剩番 既日子都唔知點過。點解今日中現金獎o個個唔係我呀？？
一月冇雙糧出，又要交稅，又要交考試費(五千幾蚊)，又要飲兩餐，死得！！有冇人可以救下小小力？

近況

唔知係唔係十二月放得假多，真係冇乜心機做野。個腦成日諗住放假既節目安排。

讀書，打開D Past Paper黎做，竟然發覺完全唔識做做，仲話只要34分就合格，我驚我10分都冇呀!! 如果你好比心機上堂，跟足哂上堂教既野，咁，你一定唔合格。其實我有時都唔明上堂黎仲乜?

投資，好似選錯時間入市，日日睇住個股市升，但係我買既股票就日日跌，真係傷感。Anyway，近年尾投資都係少做少錯，做多D工課準備明年喇!!

媽媽情況穩定中轉好，相信離出院日子不遠。這是近期唯一高興既事。呀姨同舅父話等媽媽出院同佢開番個party開心下。我都贊成同媽媽開心下，但咁多人唔知會唔會影響媽媽個病呢??

聖誕禮物都仲未買，煩，我最怕諗買乜。但係明話佢相信呢個聖誕會係佢最開心既一個，好大壓力喎。我又唔想令佢失望…

今日公司開party，冇咩期望，拿拿臨完左佢算喇!!
P.S.1.:公司party又中獎，多士爐一個，冇鬼用，一百蚊賣左比老細，等佢用黎去第二度抽獎，一舉兩得。
P.S.2.:二十一號，我約她去迪士尼。
P.S.3.:二十六號，傻貓會茶聚。

最尷尬的場面

說話有日，小小力和明在街角情不自禁地在「嘴嘴」，突然有兩個 大約二十歲既小妹妹行過，其中小妹妹A行埋黎拍停在「嘴嘴」中的小小力和明，問．．．
小妹妹A：「先生，請問地鐵站o係邊呀？」
小小力：「下？．．．．」
小妹妹B對小妹妹A話：「喂！你有冇搞錯呀．．．！」
小妹妹A仲企o係度等我答佢。
小小力：「下!？地鐵站o係前面呀 !」
小妹妹A：「係喎！哈哈哈．．．」
小妹妹B對小小力話：「唔好意思呀 !」立即拉小妹妹A走．．．
明對小小力話：「你識佢地架？」
哈哈哈… 笑爆嘴!

感覺

原來，自己都有一段時間冇check e-mail，收到Kit既e-mail，佢要結婚 喇！！雖然已經分開左好多年，但感覺都仲係唔係幾好。佢仲話要請我 飲，我真係唔知點講。我唔知應唔應該，但都講左俾明聽。我記得佢 講過：「理解萬歲」，我都想佢明白我多Ｄ！明說理解我感受，佢 唔介意我同Kit食飯恭禧一聲，但就建議我唔好去飲喇，佢怕我唔開 心。

明，多謝你!

懷念

天氣轉冷，其實最好係一邊食火鍋/打邊爐，一邊飲下酒吹下水。不過，真係今時唔同往日。要搵三五知己食下飯原來都好難。依家打邊爐可能都係一個人去大家樂。So lonely! 好懷念以往既日子…

以往，天氣冷，在家也會打邊爐.. 依家，唔通我同工人打邊爐咩?? 那種「一家人」既溫暖感覺消失…

以往，自己很喜歡天冷，因為天氣雖冷，但內心還是暖暖的，感覺很好。依家，內外都感到冰冷。已經不太喜歡…

愛上斑點狗的貓

明家中隻貓，佢要同隻斑點狗一齊訓，真奇怪。

等死

早，我將將會發生既人事調動同手下講左，我唔想佢地好似我咁到最後一刻先至知道。起碼自己可以為自己作個打算。不過我相信無論點變，對於最基層始終影響有限。大家見步行步，又一日人做一日人。

昨夜係好唔開心，但反而好好訓，真奇怪!!

今日已經冇乜心機做野，有種等死既感覺。

衝動

知道了被調走，我第一時間向高層要求把頭馬留在身邊，好似衝動 了一點。

首先，既然有心郁我，亦步署左咁耐（高層說已經計劃左幾個 月），又點會放過我呢。相信已經計劃好將最新，最做唔到野，最 廢既人手交俾我。正如數年前有一日，當放完假返黎，我的前頭馬被 調走，留番Ｄ新人俾我。當我再練出一個精英，高層又不斷要求將佢 調走，再將更新，甚至未請既新人交俾我。我要求，係唔係蠢左Ｄ？
其次，我都冇問過頭馬，或者，佢都唔想跟著我呢個最冇前途既老細呢？

我講左，我唔係驚，亦唔係擔心。係唔開心。既然步署左咁耐，點解 老細都唔同我講聲？大家既互信在不知不覺間消失。我感到失望。 高層說，把同事Ｍ調來取代我，係想俾機會佢盡展所長，因為佢係讀呢一科。但我想講我都係讀呢一科架，將我調走又係唔係表示要 將我放棄呢？至於放我去做Ｄ我完全唔識既野，你話係一種挑戰， 咁點解唔叫我去做租務或者保險，叫做會計既去做工程，做清潔既去做設計， 咁就大家咩都唔識做，夠哂挑戰！咁仲要「經驗」黎做咩 呢？

灰到爆！

烹飯仔

明烹既飯，唔係廣東風味而係貴洲風味，咁咩係貴洲風味呢? 一個字「辣」，好辣。雖然佢話會學烹廣東菜，我都要慢慢適應。

被出賣

開大會，我被調走去另外一組，手下亦被抽起，感覺像被出賣。
我在這裡既時間還有幾多呢??
真正既Count Down開始。

聚舊

講起話想見下D朋友，跟手就收到舊同事「容祖兒」既電話，咁就同佢同另一個同事食個lunch。佢都幾好喎，份新工竟然有十八日大假，依家去邊度搵?? 真係妒忌呀!! 如果我都有十八日大假就好啦，如果我都有20%人工加就好啦，如果我都有錢唔洗擔心生活就好啦，如果我都有咁多時間就好啦，如果我都後生十年八年就好啦。

唉!! 發夢未有咁早啦!! 淨係想轉工，我都擔心唔見五萬蚊而唔敢走。點算?

By the way，走左既舊同事好似個個都幾好喎!! 我都替佢地高興。

遲到

今日番工遲到，係呢五年黎第一次。又再一次證明住得近，警覺性就會底，警覺性底就好容易遲到。
有D唔開心，我都會遲到??
有時覺得，突然轉變太大，自己都唔多適應。
兩個人一齊既時候，突然會有一種好空洞既感覺，好想離開…有咁遠，走咁遠。
我睇唔清前面既路，睇唔清自己，但…路…仍要繼續行。
我連自己係開心定唔開心都唔清楚…
人生既另一階段，我唔介意遲到。

…突然好想見下D朋友。

誤解

同另一同事「鉤仔」證實，辦公室裝修唔關我事，唔洗搬。正!! 碌葛仲以為辦公室會搬上去，上去?? 上去邊呢?? 唔通係神台!?

另外，CM原來係解作Center Management!! 好似大家都誤解左喎!!

有同事問我點解最近著西裝，平日都唔係咁!! 大家以為我係因為明。但實情係…加番條tie，係唔係隨時可以去見工呢??

媽媽對我說，愛情唔應該涉及錢，利益，權力或者其他。媽媽對我都有誤解。

買銀行股票

話說，有日同明行行下街，唔知點解佢同我講起買股票，佢叫我買建設銀行!! 下?? 四大國有銀行我最唔鐘意既就係建設銀行!! 點解叫我買呢?? 但係明話內地好多人都鐘意用建設銀行，做生意既都係，其次先係中國銀行!! 點解呢?? 我問明佢又話唔識，唔通我睇漏野?? 等我睇多次!!

神遊物外

返番工，超多野做。公司又話裝修執位，每次執位都唔見野，唔知今次又點呢?? 又會將我放去邊呢?? 最好搬我入廁所喇，唔洗行黎行去嘛!!

收到考試局既信叫我番學校交英國o個邊既考試費，然後先去考試局交本地考試費。煩，點知學校又叫我去番考試局交，我發覺次次都係咁架喎!! 左叫你去右，右叫番你去左，D指示/說明真係好有問題。

做野又突然好多新程序，D人仲要話一向都係咁架啦!! 唉!! 都底佢明唔明「一向都係」既意思呢??

申請Margin抽新股，唔批，原來都幾複雜。唯有又用自己錢抽，銀行戶口就黎見底!! 股票走勢屬意料之外，暫時竟然輸錢…唯有再等。

病又未好，未試過食三次抗生素都唔好!! 頂!!

仲係唔集中精神，神遊物外想某人。

PS1：命運說，今年年尾各方面都變動好大….. 準!!
PS2：都底我出年會唔會做爸爸呢?
PS3：匿名者2係唔係即係匿名者呢?? 唔係又會係邊個呢?

原來在此

唔知幾時會去呢？

繼續

我想問各位點解拍拖既男仔要「報到」？
有時打個電話真係冇咩野講，淨係話俾你知我健在!!
唔悶咩？

假期結束

連續九日假期結束，總結係一事無成。病左五日，玩左兩日，辦家 事兩日。書讀唔到，媽媽身體又冇好過，股票又未賺到錢，考試又 報唔到名，身體仲差過番工既時候。
唉!
終於，又番工 喇！！

仍在等匿名者現身．．．

匿名者

匿名者，會令所有人消失，包括我，好玩嗎？
匿名者，請參考本Blog第一章!!
我唔想大家擔心！！
如果匿名者唔現身，我只好再一次說再見!

神出鬼沒

衰仔有再次神出鬼沒，神神祕祕！一出糧就冇哂錢，同我借唔同父 母講，同父母借唔同我講，十問九唔應，又係出事先兆。
唉！ 到抵佢係唔係真係有得救？我總冇辦法二十四小時監視佢！
在醫院既媽媽話可以肯定佢出左事。媽媽亦因此情況又轉差。
點算？
又時諗，如果佢一早死左，大家都好！

轉變

去到在醫院，接力讓爸爸回家休息，爸爸問我有冇膠袋， 叫我帶個湯壺番屋企。我冇， 但我話個湯壺冇湯，放落背囊都得啦！ 佢點都話唔 得，一定要用個袋。於是周圍搵呀搵．．．最後搵個紙袋俾我。 唉！ 如果個湯壺漏水，個紙袋又唔係濕？咁又有咩用呢？係唔係多餘呢？我正準備鬧既時候，諗起明早兩日同我講：「你爸爸幾十歲人喇，你 仲想佢點？算啦！你要對佢好Ｄ呀！爸爸同你講野，o岩聽既同佢傾多兩 句，唔o岩聽既就笑下， 同佢講聲知道喇！ 咁就大家都好啦！」．．
最後，小小力同爸爸講：「得架喇！你交俾我得架喇， 自己休息下啦！」
小小力覺得自己慢慢改變中！

放假等於病假

每次放大假都會大病，好準，今日放大假既第六日病。醫生仲一定 要我打針。食左藥想訓一陣，樓下學校既老師就開Mic同學生講旅行注意事項。有冇病呀？我住二十三樓都聽得咁清楚。地面Ｄ學生聾都似。
開電腦睇睇銀行Ｄ錢，唉！冇乜進展，都係唔睇好過！！
不如快Ｄ番工喇！起碼番工洗錢洗慢Ｄ，身體又好Ｄ！
都係辛苦命架喇！
唔知會唔會一退休就死呢？
同呀姨講開，佢話佢既呀Sir話會為退休諗定Ｄ野做，有三樣退休都可以做，而且Ｄ人唔會介意你老，三樣分別係做中醫，教太極，同睇風水！！呀姨選擇左學中醫，問我？咁快打算退休？未諗喎！！ 不過我早已經講過 啦，將來 ﹣寫書！
你呢？

有人烹飯過我食

今日，明話烹飯過我食，咁真係烹左，佢話因為佢唔係廣東人，所以唔 識烹廣東菜，今次係第一次！試食．．．
明：「 點呀？」
小小力：「．．．．．」
明：「好難食呀？我都知烹得唔好食架喇！」
小小力：「咁你下次就俾多D心機喇!!」
有人烹飯過我食，其實我已經感覺好幸福，而且仲烹得幾好喎！不過 都係唔好話佢聽喇！

生仔

小小力：「我要生仔！」
明：「生一個喇!」
小小力：「唔得，至少要生五個！」
明：「 嘩！咁多點生呀?」
小小力：「我點知點生 呀，又唔係我生！！」
明：「生唔到呢 ？」
小小力：「唔得生唔到，生到生到為止！」
之後，小小力又被打面打心口。

壞孩子

夜晚放學同明食野，叫左一碗水餃，
明：「你鐘意食水餃架？」
小小力：「都鐘意架!」
明：「我都識整，我整俾你食!」
小小力：「唔食，我要食小籠包！」
明：「 我唔識整小籠包喎！！雲吞我都識整架！」
小小力：「唔食，你識整既我都唔食！我淨係食你唔識整既！！」
明：「．．．．．」
之後，小小力被打面打心口。

佛光初現

住大嶼山咁耐都未去過大佛，星期二終於同明去左！（佢同我講左唔知Ｎ次！）亦終於第一次坐吊車，更一如以往咁黑仔，壞吊車！！哈 哈！其實我開始轉運未呢？
上大佛，拜呀拜呀，都唔知拜Ｄ乜，係又拜，唔係又拜!! Anyway，明話最緊要誠心，唔識神 都唔會怪你！ 咁， 我只誠心希望媽媽身體健康。
搵人幫我地影相，竟然講廣東話係冇用既，搵洋人我講英文，搵中國人明講國語。 唔通真係要我學國語？

我的霸道

我係唔係一個好霸道既人呢？
明：「我剪矮頭髮好唔好？」
小小力：「唔好！」
明：「你鐘唔鐘意女仔曲頭髮？」
小小力：「唔鐘意！」
明：「咁我剪咩髮形好呀？」
小小力：「咩都唔好！我淨係鐘意長直髮既女仔，所以唔好諗，唔洗諗，唔准剪！呢世都係咁既髮形就最好。」
明：「知道啦！以後都係咁！」
我都覺得自己有Ｄ衰！

附屬卡

銀行打電話黎，
職員：「先生，依家我地有個優為俾你，只要用你張信用卡出張附 屬卡俾親人，簽一次帳，就可以有２００分額外積分。」
小小力：「但係我冇親人可以簽卡喎！」
職員：「只要年滿十六歲就可以架喇！」
小小力：「但係我都冇喎！」
職員：「朋友都得架喎！」
小小力：「下？朋友都出張附屬卡過佢？咁出張俾你得唔得架? 」

社署一日遊

收到電話要到社署幫媽媽申請傷殘津貼，先要到醫院取媽媽身份 證，到社署俾D職員睇一睇，佢俾份表格我，由我帶份表格到醫院俾 媽媽簽個名，再將簽左名既表格又帶番去社署俾D職員睇一睇，然後番 屋企等消息。如是者社署又醫院，醫院又社署，來來回回，等上等 落，咁，就用左一日假期喇。

計劃告吹

放假讀書計劃應該可以告吹，放左假三日都未讀過書。好多野做， 又病！！煩！！家事，感情事比我想像中複雜。
唔讀書，我唔想平平凡凡過一生呀！
世界電信展，咁近，想睇，但都冇時間！
唔多開心！

真的放大假

真正開始放大假，但聽公司電話由早上十點聽到夜晚十一點都有得聽，到底有冇人當我放緊大假呢？

夜晚仲要同明行左番公司，多掃興！

早上，代媽媽睇中醫，冇乜大進展，始終睇中醫都係慢慢黎，起碼食中藥後，媽媽感覺舒服左！！

睇完中醫，帶左明番屋企，屋企又冇人！！ 咁睇下相啦， 佢係第一個話我同衰仔似樣既人！！似咩？
由於夜晚要番學， 剩底既時間又唔多！咁，帶左明去迪迪尼附近行下影下相！！ 星期六既迪迪尼，超靜！！在迪迪尼附近行下，吹下海風，都幾舒服！！行成個鐘，鬼影都冇隻， 想搵人影下相都冇！！唯有我自己幫佢影喇！ 不過咁都好，佢對住其他人真係唔笑架喎！奇！！我好好笑咩？

番學前同明去食野，發覺佢真係好抵養，我食半餐既野佢一日都食唔 哂！！

番學，總算仲集中到精神！俾心機呀！！

放學，又係同明一齊，好似成日癡實咁！！ 其實好似唔係咁好，但okay 喇！！ 當我就番佢一次！！佢問我同佢Ｄ朋友一齊食野好唔好，我拒絕！！我接受唔到佢Ｄ朋友，起碼依家唔可以！！

最後，我地兩個去飲酒，這個係我地兩個最似既地方，亦係更了解對方既時間！唔知點解，飲左酒佢就好多野講！！It's fine! 但飲酒對我係享受，唔係飲得多就好！亦唔需要飲醉為止！！次次佢都飲醉，醉左就失控，失控就．．． 唉！！ 自己講過Ｄ乜做過Ｄ乜都唔記得，你話飲酒幾累事呢！

我番到自己屋企，已經係星期日早上十點半！！ 諗番佢同我講過既野，發覺我地既距離真係好遠．．．好遠！！我唔想令佢傷心．．！

Anyway， 睇相喇！

放大假

放大假，約左女朋友先黎病，真係老土。

臨放假，Ｄ人仲有五分鐘放工先係咁將Ｄ野放落你個in-tray…. 頂!!

放工，遲左五分鐘去醫院，媽媽已經打電話問我係唔係唔想黎？到醫院，媽媽已經黑口黑面。電話又響，明 (=女朋友)又問我幾點可以出到黎，媽媽聽到又唔高興，叫我有事就走唔洗理佢！．．． 唉！最後唯有在媽媽面前，說自己有病（我冇講大話）唔出黎，然後留底陪媽媽，等媽媽安心Ｄ！

自己都覺得有Ｄ衰，但我始終會先照顧媽媽。還在醫院，收到明的ＳＭＳ， 她總能體諒我的心情，還叫我自己小心身體，多休息！
這是我最欣賞她的優點！！

找不同

我地都一齊一段時間，發覺有Ｄ地方幾唔同：
生活：
小小力：忙到死，好多野想做，但冇乜時間做！
明 ：閒到死，冇乜野想做，好多時間諗下有咩好做，但諗完都係唔做!
說話:
小小力：慢，柔！
明 ：快，急，但講完都唔知講乜？
食：
小小力：唔食辣，鐘意食日本野（魚生）。
明 ：無辣不歡，唔鐘意食日本野，唔食生野。
寵物：
小小力：唔鐘意！除左人，小小力唔多鐘意Ｄ會郁既野！
明 ： 勁鐘意！（貓，狗，鼠， 魚，龜）
興趣：
小小力：睇另類小品電影，聽日本歌，睇書唔睇雜誌！
明 ： 睇恐怖片，港產片，聽廣東歌，睇八掛雜誌唔睇書！
天氣：
小小力：愛冷！（我依家都仲開冷氣）
明：愛熱！
化妝：
小小力：唔鐘意人化妝！！
明：勁化妝！！落左妝小小力都唔認得佢！
抽煙：
小小力：唔鐘意人抽煙！！
明：每日一支煙，快活過神仙！
旅行：
小小力：勁鐘意去日本！
明：勁唔鐘意去日本！！勁憎恨日本人！

遊手好閒

有時覺得，妳雖然唔係好等錢洗！！ 但日日淨係咁睇下電視，睇下DVD，睇下雜誌，做下facial，做下瑜珈，玩下貓，行下街買下野咁．．． 呢Ｄ咁既生活我可能六十歲都唔會過！！日日遊手好閒，都唔係辦法架喎！
點算好呢？

虛脫

又一晚冇訓覺，能量都消耗盡，再係咁好快玩完。要好好休息一下!!
十二月二至十日放大假，得閒就搵下我喇!!
咁，睇相喇…小小力與他的夏蕙姨。

工程師

連續三日會同專程由荷蘭飛黎既工程師一齊睇大鐘修補。咁講，真係學到野。人地一個人整大鐘，個鐘由頭到尾每一個部份都清澈理解，連音樂都識，勁!! 睇番本地D工程師，我地對於手上既工程大多數都係一知半解，最叻就係做document，諗下邊D野可以推比人做，同埋點樣可以靠識D乜人黎上位。

係制度問題? 定係性格問題?

命

天氣突然轉涼，但媽媽既情況仍舊平穩。希望一如我所料聖誕前可以出院番屋企喇!! 衰仔終於似番個人，做下part-time賺錢，希望佢可以keep住，生生性性做番個人!!
一切都從平穩中轉好，有時真係唔到你唔信命。

又，如果真係信命，咁…. 到底，大家既真命天子係唔係已經出現左呢??

病情嚴重

各位，其實都冇人見過我女朋友，到底係唔係真有其人？定係我既精神分裂越黎越嚴重？成日幻想自己有一個咁好既女朋友？？我寫ＢＬＯＧ寫到好似寫愛情小說 咁？ 係唔係睇得韓日劇太多呢？？到底邊個我先係真我呢？？
死喇！！ 我仲同自己個仔改左名喇．．．

本星期六，有電視節目專訪夏蕙姨！！唔好錯過喇！！

夜，訓唔著，病情嚴重，後腦(小腦) 隱隱作痛… 越諗越暈，睇電視，美股大跌， 油價大升，金價將有支持．．．就快有錢睇心理醫生！！

再訓過，希望繼續精神分裂！

怎麼辦

其一
最近冇乜心機讀書，又唔集中精神做野，怎麼辦? 好煩又好驚衰收尾! 唉!!

其二
原來，o係香港租屋住係咁鬼貴架!! 四百幾尺要七千幾蚊租…怎麼辦?

其三
講左俾媽媽聽(抽起煙，酒，離婚部份) ，媽媽開心又擔心，擔心我離開唔理爸爸，怎麼辦?

其四
點解個個都唔信佢似夏蕙姨?? 我好客觀下架喎!! 唔影相唔俾你地睇係為你地好，唔想嚇親你地!! 淨係嚇我好喇 !!

其五
「鹹蟲」兩個字係唔係寫左o係我塊面上面?? 我聽日本歌，睇日本電影唔代表我鐘意日本妹。我屋企有女工人唔代表我會咩咩咩!! 咁唔通我公司有女同事我又咩咩!! 妳唔好傻喇 !! 妳叫我怎麼辦!!

火樹銀花賀聖誕

聖誕，當然要有火樹去賀一賀佢喇！！唔係點叫「火樹銀花賀聖誕」 呀？ 舊同事「容祖兒」真係有我心，一知道有火樹即刻打電話俾我贈慶!! 真係多謝哂喎！！雖然唔關我事，但都係入我數架喇！！Well，it's fine。入喇入喇！！我心情好!

形容

由於冇相睇，大家又咁想知，咁就等我形容一下喇！
面孔：奇實我覺得佢好似年紀大左既夏蕙姨。
身高：五尺三。
身形：稍肥
年紀：我同佢加埋七十歲，我大佢兩年。
頭髮：長黑直髮。
化妝：勁化妝，似豬姐。
衣著：好ＭＫfeel
說話：就係一個北姑咁，唔鹹唔淡既廣東話。講電話我有一半唔知佢講乜！（知我都可以話唔知）
職業：唉！！現在又待業！！不過佢唔等錢洗！
背景：來自貴州，黎香港主要為離婚（屋企反對）。屋企有Ｄ權力，同黨委書記關係密切，有酒店，渡假村！！奇實佢自細都唔多洗做！佢自己都曾經開酒店同Karaoke!!不過唔識打理執哂！！今次黎係要讀美容同英語course!! 番深圳開美容院＋賣化妝品！！
性格：唔多講野，好慳家，但好…好咩呢？（佢間房仲亂過我間房！！好怕執野！！）成日好似黑口黑面咁！好好勝，相信自己係唔係咁差既！！個人好直！！唔應該講既都講哂！！
其他：路黐！大煙引，大酒引 (飲酒飲得仲快過我!!)

點解我會有咁既女朋友架？

失望電影

「 鐵道凶靈」係唔好睇既一齣戲，唔恐怖，唔合理，冇故事。我唔係 因為鐘意澤尻繪里香而去睇，如果係就仲失望。

「墨攻」，未睇，未失望。但原作故事主題好似唔係講「非攻」同「兼愛」喎！ Anyway，廣告都好勁下架？ 點解咁多人叫齣戲做「黑攻」（定係黑工呢？）

理解萬歲

點解？
妳話呢個係兩個人一起最重要既事！
要了解我．．．一個精神病人，好難喎！
Good Luck!

媽媽的問題

媽媽問：「成晚冇番屋企去左邊？」
當然又係老竇做既好事喇！！
小小力答：「我冇同人打牌，唔係又同成班男人一齊。」
媽媽：「咁都好，唔係遲早變基佬!! 」
下？ 咁都過到骨！！
唉！！ 我總唔能夠同媽媽講我尋晚o係佢屋企訓！！媽媽咁保守， 我咁講實激死媽媽。
以後點算？
媽媽的問題，變成小小力的難題。

續

但我冇想過…
一句說話，為妳帶黎唔大震陷．．．
我兩一起既時間咁短，傷害唔係有限咩．．．
這夜，
我說出我所想，我既難處．．．
我冇想過妳能體諒我既感受／難處。
冇想過妳會這讓說．．．
妳願意給我更多時間去工作，去進修，去照料家人。妳唔介意我冇 錢，唔介意我冇時間陪妳，唔介意我唔識講野令妳開心，唔介意我唔 同妳去玩。唔介意我唔想結婚，唔介意我既朋友點睇妳，願意為我家人改變，妳願意為我戒煙．．．
妳要的，只是要做小小力唯一的女人。
就這麼簡單？
男女之間，One-on-one既遊戲，妳一開始就俾左小小力一個 absolute advantage(絕對優勢) 。
妳呢個傻瓜！！

雖然妳冇正眼望我，亦唔俾我望妳，但我係睇到架！
眼紅紅的妳，
令小小力初次感覺到被寵的幸福，
講過分手的說話，我暫時收番喇！！
以後既事，以後先算．．．

謎

到抵我有乜好??
我又冇錢，又冇事業，又唔細心，又唔靚仔，又唔識講野，又唔玩得。
我又冇時間，家庭負擔又重…
我有乜值得妳喜歡………
點解??

其實，我害怕有一日，我會令妳失望，傷心…
日子越耐，我會越怕…
所以我這麼快便提出分手…

但我冇想過…

百感交雜

友人「大口」既婚宴，百感交雜…
結婚，係唔係女人既夢想，男人既墳墓呢?
聞話，舊男同學，大部份已婚的，都係被迫既…..
結婚代表D咩呢?
我又迷失…….

舊同學見面，打招呼既說話..
再唔係：「你o係邊度做野呀? 」
而係：「你結左婚未呀? 幾時輪到你呀? 」
無奈……

「大口」係我中學同學，亦係大學同學。
原以為會見番好多舊同學，但出席者僅三數人…
是因為婚宴安排左星期三?
定係「甚少閒人如吾耳」?
又或是….

大約，十點，大家都忙於講電話「報到」.. 準到呢…
十點，有乜可能飲完呢??
「報到」又係咩心態呢??
我唔明!! 又乜咁多野講…..
男仔都無一倖免…
小小力電話十二點響………so tired!

婚宴，世俗既儀式，
結婚，唔一定需要婚宴架….
或者，有一天，小小力只在BLOG留下”Married”

點解，身邊舊同學冇一個令我妒忌/羨慕...
點解，身邊都好似係好平凡好平凡既人….?
番工，放工，番屋企，買樓，結婚，生仔…
有冇D人有傳奇D既生活??
常常夢見，我既五個仔仔，將來改變左世界…

出奇地，我同條「大粉腸」既思想越黎越接近...
要做壞人，我都要做「大盜」唔做「小偷」

做工程既，差不多死哂…
在做的，唔會發達但又餓你唔死…
當初的夢想去左邊…
現在，又係唔係因為Job satisfaction??
係唔係應該越做越做專科呢??
大粉腸做玻璃幕牆，專唔專呢??
我做幕牆電視，舞臺燈光/音響，係唔係更專呢??

問題

飲宴馬拉松，由今晚開始。
連日來都冇好好休息過，首要解決既問題原來係時間分配同語言障礙。
天氣轉涼，室外冷，室內又好悶熱。好容易又病，打左流感針都冇乜用。加上天生鼻敏感，一有鼻水就頭痛到爆…好小問題。但我始終唔想做手術..!!
生活有D改變，好似唔係好適應….
And,…好耐冇睇戲，原來銅鑼灣既戲院所剩無幾。
好多好多小問題，加埋都幾頭痛!!

解迷

我發覺，原來，我應該，係唔想拍拖架。
但偏偏又開始左…….
一個吸煙，飲酒，愛玩，又離左婚既大陸女仔….
大家開始明白D未呀!?
我唔怕亦唔介意別人點睇我…
因為我本身都係咩好人!!
但我好擔心媽媽…. 佢知道實激死!!

碌葛講得好!!
「D野唔變/唔郁開，你就唔好郁佢啦!! 」
煩惱自招，活該!!

To be, or not to be

生存或毀滅, 這是個必答之問題:
是否應默默的忍受坎苛命運之無情打擊,
還是應與深如大海之無涯苦難奮然為敵, 並將其克服。
此二抉擇, 究竟是哪個較崇高?

精進

以「 精進」為目標既三星期閉關開始!

夢

發夢執到錢，跟著中埋六合彩！！

因此現實中立即停止所有投資！！
因為如媽媽所言，發夢執到錢，現實就必有損失。
萬試萬靈。

攬仁的故事

攬核：「好心你正正經經搵番粒攬仁啦！」
攬仁：「但我天生就係粒不羈的攬仁，正經，其實我唔係好識！」

攬仁係唔會變成粒攬核之類既物體架，除非粒攬仁死左。
攬仁最正經既時候大約係仲未離開樹的時候！！

攬仁的生命如常，但點解妳會send短信比我?
攬仁話短信收唔到．．．攬仁亦從電話聽到妳失望的聲線，但攬仁唔識回應．．
「只想用不打擾你的方式，輕輕的告訴你，我在想你，希望你看到這個短信的時候嘴角總是那麼燦爛的一笑，讓你身邊的人知道，“你是幸福的，我就是快樂的。”」

如果，我猶豫

如果，十二月遞信，我仲可唔可以有雙糧呢??
但點都會冇左MPFo個幾萬蚊，咁又值唔值得等落去呢??
小桃子又幫唔幫到手呢??
我，身家/事業/愛情又會唔會有突破呢??

交叉點上我猶豫了!!

人物關係表

由於人物太多，關係複雜，身份又神祕，令大家覺得我越寫越迷。咁，係唔係有需要寫番個人物關係表交代一下呢!?

崇光 - 決戰自由行

崇光三十週年紀念大減價，小小力本來已經上夠彈藥準備瘋狂購物。但就算你係戰無不勝既戰士，你都要落到戰場先有用武之地。 呢個戰場 ﹣ 崇光，真係 people mountain people sea (人山人海) 。仲要多數係講國語既自由行！！ 點解呢Ｄ時間都咁多自由行？？佢地擠滿左整個 戰場既入口。小小力好辛苦入到去，見到Ｄ貨物但觸摸唔到！點買 ?唉！！結果乜都冇買！！

購物季節

依家係唔係購物既季節呢? 好多地方都有Discount!! 好多好多野想買，昨日買左件Casual Jacket，兩條褲，一個銀包!! 有八折!! 正!! 我都幾鐘意Durban D衫，不過下次買野真係要睇睇價錢。

仲想買衫，鞋，袋，西裝，錶…
今日SOGO又有Discount，唔知又有冇收獲呢??
唔知用一兩萬買唔買得哂呢??

Delay No More

今日先知，Delay No More原來係中文黎架!!
當人地D野遲左(delay)比你，你就應該同佢講
「Delay No More!!」

他和她的故事

其實辦公室(或者叫公司) 真係多戀事，大家工作時間咁長，又有幾多時間o係出面識男仔/女仔? 好正常，我唔明點解要反對。

十二月。
工作非常繁忙，安排他放假既日子都有困難。
她，打電話比他上司，詢問並為他安排放假既事。
是幸福，還是失自由??

愛情 - 得之我幸，失之我命。
嘿嘿嘿嘿……

紅色炸彈

又黎，紅色炸彈，雖然早知，但真係驚，成個月唔食飯都唔夠做「人情」。
Anyway，恭禧哂「精叻」!!

應該冇喇掛，彈盡糧絕喇，冇哂錢喇!!

迷

大家係唔係開始唔知我寫乜呢?
我既精神分裂係唔係越黎越嚴重呢?
係唔係真係要睇醫生??

哈哈!!

時間流失

發覺，上網令時間流失得好快。每次上網可能只係想check e-mail，但一開左機，睇下一樣，睇下又一樣。再加上MSN下同寫下BLOG，不知不覺間就冇左四五個鐘，仲要係冇乜得著之餘又令到自己好疲倦!!

所以，開始減少網上活動。

上堂，唔知個亞Sir講乜，講下東，又講下西!! 講完仲要話你地暫時都係唔明架喇，遲D慢慢就會唔架喇!! 遲D? 遲到幾時?? 越黎越多唔明，積積下個人會冇心機繼續落去架!! 避免聽多左D唔明又複雜既野影響思考，堂冇上哂就走左。番屋企自己睇書既成效可能更大。

小小力既一日，會唔會有七十二小時呢?

壞孩子

「愛唔等於鐘意，鐘意亦唔等於喜歡!! 如果要定，我會話愛>>鐘意>喜歡。 」
壞孩子又話：
「妳唔會係我女朋友，永遠都唔會係。」
至於妳係邊個，那一刻之後，已經變得唔重要…

我…夠壞未?

追

終於，有一晚夠訓，今日感覺唔錯。
可能係太耐冇做運動，上星期做完GYM肩膀痛到依家...

手下亦終於放哂假番哂黎，齊人!!
要o係自己放大假前完成手上既工作，真係好多好多…
要再努力D先至得!!

讀書，完全冇進展，心情唔好又唔集中!!
Accounting開波到依家都未睇過，要到第一次九日大假先至有時間追!!

為著壞孩子的理想，加油呀!!

這就是人性

http://www.youtube.com/watch?v=8oGj-FCfVjY
十個救火的少年

曲:黃耀明 詞:潘源良

在某午夜火警鐘聲響遍 城?志願灌救部隊發現
集合在橋邊 十個決定去救火的少年 其中一位想起他少鍛鍊
實在是危險 報了名便算 另有別個勇敢的成員
為了要共愛侶一起更甜 靜悄靜悄 便決定轉身竄
又有為了母親的勸勉 在這社會最怕走得太前 罷了罷了
便歸家往後轉 十個決定去救火的少年 來到這段落
祇得七勇士 集合在橋邊 為了決定去救火的主見
其中三位竟終於反了臉 謾罵著離開 這生不願見
尚有共四個穩健成員 又有個願說卻不肯向前
在理論裡 沒法滅火跟煙 被撇下這三位成員
沒法去令這猛火不再燃 瞬息之間
葬身於這巨變 在這夜這猛火像燎原
大眾議論到這三位少年
就似在怨 用處沒有一點
在這夜這猛火像燎原
大眾議論到這三位少年 亂說亂說
愈說祇有愈遠 十減一得九 九減一得八
八減一的七 七減一得六

時間，停下來好嗎?

夜，
相對無言，
但原來，
讓我最寧靜，最放鬆的，就是這一刻，
抱著妳的這一刻！！
我自私地希望：「 時間，停下來好嗎? 讓我永遠抱著妳，好嗎？」

我喜歡妳!!

活著

星期日o係醫院睇到一個香港電台電視節目「十本好書」，介紹《活著》。我冇睇哂整個節目，但其中一段覺得有D啟發。

《活著》是余華的成名作，內容講述一個孤獨老人- 福貴的一生。福貴含著金鎖匙出生，卻不知道珍惜。最後把祖先留下的財產都在賭桌上輸光了的時候，才知道後悔，可惜一切已經無可挽回了。福貴的父親因此鬱鬱而死，成為了事中第一個死去的角色。

後來，福貴跟母親、懷孕的妻子和女兒搬到城外鄉下居住。有一次福貴上城裡找醫生為母親看病，無端端的給抓了去當兵，一當就是兩年的光景，看著同伴死去，戰場上的殘酷，長期的飢餓，他都一一忍下去，為的只是 - 回家。

福貴在戰亂中幸存了下來，遇上了解放軍，也就回家去了。幾年的光陰，回到家中，孩子都長大了不小。但是他的母親卻在他被抓去當兵後不久死去了，剩下來的就只是他一家四口。他自己、妻子、兒子還有因病又聾又啞的女兒。

兒子要準備要去上學了，家中又貧困得很，於是他們決定把女兒送了給別人。女兒走了之後每每都是偷偷的跑回來，兒子又因為不見了姐姐而哭個不停，福貴看在眼裡還是不忍心，於是也就把女兒接了回來，說了一句：「一家人餓死也要在一起」。

一家人雖是在一起了，但妻子生了軟骨病，不能干活了，後來又遇上糧食失收，一家人生活得很艱難。好景不常，福貴的兒子因為到醫院捐血救一個孕婦，血給白白的抽乾了，人就死了在醫院。女兒難得嫁了一個好人，卻也在產子的時候失血過多死了，妻子在女兒死後不久也都跟著離開了。

福貴身邊的人一個個的死去，只剩下他的女婿和孫兒 - 苦根。可是幾年後，女婿在一次給掉下來的石屎壓死了。福貴也就帶著苦根一起生活，豈料有一次苦根生病了，福貴心想孫兒一生也沒有吃過什麼好東西，於是就煮了一些豆給他然後就出門去田裡工作，回來只見他生命中最後一個親人給豆啃死了。

身邊的人都一個一個死去，福貴身邊只剩下了一只也叫福貴的老牛。

小小力既啟發係：「人在失去時學懂珍惜，卻往往在學懂珍惜後再失去。人生總是充滿無奈，你懂得珍惜唔代表唔會失去。故事主角一生將自己至親去送葬，睇住親人一個一個離開，雖然他懂得珍惜，要失去的仍舊全失去，最後只獨自一人活著。在以為痛苦的時候，主角臨終時卻能感受到輕鬆/幸福。因為在離開的時候，佢再唔需要為身邊既擔心，可以安心上路。是得? 是失? 你永遠唔知道，最重要係以豁達的心去面對人生一切起伏。」

作者說「人是為了活著本身而活著，而不是為了活著之外的任何事物而活著」。人生總會做了很多自以為錯的事，但事實上，事情的本身也許是沒有對錯之分，今天的錯誤，可能拯救了你的明天 ，就好像福貴的敗家卻救了他一命，哪麼到底這件事是錯還是對，人生不只黑和白，更多的反而是中間的灰色地帶世事多變，也許到你死的一天，才能夠評價你的人生。

又有人結婚

一番到公司，check e-mail，又有同事結婚。唉~~!!我唔係因為同事結婚唔高興，而係好似今年周圍既人好多好多人結婚，好似淨番我一個咁。好孤單既感覺!!

邊個話三十幾歲歲男仔未結婚都冇問題架? 人地唔迫我自己都覺有壓力。

買 CD

一唔開心，又亂買野！小小力既購物模式真係唔可以用作市場分析，因為小小力絕對係一個非理性消費者。
今次買CD：
1. 「 太陽之歌Single」 by 澤尻繪里香
2. 「 Zard Golden Best 15th Anniversary」 by ZARD
3. 「 黃河之子」 by 郎朗
咁就買左成五百蚊．．． 唉！！（雖然三隻都好鐘意，但都格下價呀，死蠢！！）

此路不通

睇報紙新聞「狂父劈死三母女」，有以下一段：「．．．警方趕至發覺疑兇出奇地冷靜，並曾沖涼及洗刷血漬，將其拘捕。」
唔係想批評事件，只係睇完報紙既寫法，突然想起以下一句：
「 此路不通行，不得在此小便。」
變成
「此路不通，行不得，在此小便。」

新碼頭

冇諗過今日會座天星小輪，正好係新碼頭第一日使用。可能已經係夜晚，人唔算太多。
對於搬碼頭，我冇乜感覺。雖然本身我都係喜歡坐船既人，吹下海風，寧靜地漂浮著既感覺係最寫意不過。但香港，就是欠缺左寧靜，連坐船都嘈過人。每次headphone有咁大聲開咁大聲，唔想聽人講野，隱藏在自己既空間，希望盡快落船。
舊碼頭，對媽媽可能比較有感覺，至少媽媽睇著佢起。

當落船，人群聚集在路口，唔係有野睇，而係大家差口同聲問：「點樣行番去中環呀？」

意志消沈

突然，感覺抑鬱，意志消沈．．．．
明白要做的事，只要生存，仍需繼續，
不過，依家，連講野都唔想。

大家一齊訓醫院吧

放假，日子比平日過得更繁忙。媽媽總希望我多留在醫院，結果我放假就變成住醫院，在醫院休息，在醫院食。也可以！！但媽媽同時亦希望我多休息，多進修，多運動，多拍拖，多照顧家人／親戚．．．

佢永遠唔明白，或者唔願意明白，我同一時間只可以做一樣野。當我做其中一樣既時間，媽媽會為我做唔到其餘的事而唔高興。

我真係好辛苦，精神上還可強迫自己去做，但體力開始漸漸不支。

我有想過，不如將所有事／人（家人，親戚，朋友，女朋友）都帶進醫院．．． 多好！

分拆

思想太多，空間太少。
Blog分拆中，「壞孩子基金」成立。
以後將會逐步分拆。

你份糧全球排第幾

打工仔永遠唔會滿意自己份人工，無論老闆每年加幾多成，都只會嫌少！但你有冇諗過每年收入，同世界其他角落人相 比，究竟係屬於高定 低？自己算有錢抑或貧窮呢 ?
家陣，你只需click入Global Rich List 網站 ，輸入你每年總收入，網站內的「世界財富排名計算器」便會計出你世界財富排名 ─ ─ 如果每 年收入有20萬港元，你便屬於全世界人口最有錢10%；如果收入達30萬銀，恭喜你，成功躋身世界尖子4%以內；相反，如果每年收入只有 3120元，便是全世界最貧窮的10%人口。以香港低收入階層每年約7萬蚊人工計算，仍算是全世界14%人口中高收入的一群。
身在福中要知福

當然，有人批評此計算方法有誤導成份，因為只計收入，唔計資產，更不考慮不同地方的生活水平高低有別，唔可以充份反映你是否真正屬於 有錢一族，不過，這個財富排名最少講你知，全世界仲有好多人每年只賺取非常微薄的收入。
講左咁耐，呢個網站成立的目的，其實係希望你捐錢，幫助貧窮階層。有興趣的讀者不妨click入以下網址http://www.globalrichlist.com ， check下自己究竟幾有米。

資料 提供 - abc 既c
P.S.小小力用1美元兌7.8港元(即年薪除7.8)輸入,小小力全球排574,640,230!

金句

竟然睇本地漫畫書都有金句，不過我都覺得唔錯。
「人生就如時鐘，成功的人生不在於走得快，而在於走得準！」

女子無材便是德？

我冇心去輕視女性，亦唔知你內心點諗！！
但連小小力都覺得你得，叻女，相信市面上大部份available既男士都會被大走。
當中可能包括小小力。
定係香港既男仔太過唔得呢？（也包括小小力）
你話點算呢？

有兩個人話將相張俾媽媽睇，媽媽會好開心！我將呢兩個人既主意 講俾媽媽聽，估唔到媽媽真係笑，真係想睇！！女性既思想模式真複雜。都係唔好俾媽媽睇，費事佢失望（對小小力），費事我咁大壓力。

轉機

經過連串抗生素/藥物注射，媽媽今日終於退燒，亦可以再靠儀器 呼吸。希望病情有轉機。

有時發覺自己真係幾難集中精神讀書．．．點算？

媽媽該走的時候

媽媽情況急轉直下，一下子氧氣用到最大，改用鬼面罩幫助呼吸， 發高燒，發冷，不停嘔吐，全身抽蓄。點解醫院咁都冇人理佢？又唔 通知我！！經一輪投訴，終於有人理媽媽。情況慢慢穩定下來，但呼吸冇大改進，仍需依靠鬼面罩。我都感覺唔樂觀。
媽媽：「仔！亞媽今次真係要走喇．．．．」
小小力：「．．．．．．！」

暫時一切節目都要取消。對不起！

入會

無啦啦入左會，一個唔知做乜，又冇福利，又冇著數既神祕組織．．． 「牛奶妹基金會」。

難以啟齒

有Ｄ野真係好難同你地講架喎．．．！！
遲Ｄ時機成熟你地就會知架喇！！

到時一個都走唔甩！！
繼續沈默！

最佳服裝獎

本年度小小力最佳服裝獎俾左晚上教Economics既Tracy，Miss唔單 只人靚，著衫又好睇。著suit裡面係著紅色白花邊既tube-top…. 性感又 迷人!!

性感係唔需要暴露，美麗亦唔需要修飾。

壓力

日有所思，夜有所夢。唔好俾自己咁大壓力，唔好成日諗住同一樣野，就唔會咁容易發惡夢喇!!

下晝去睇醫生，等睇醫生既時候，大堂播放戴輕音樂，又有小擺設既流水聲，係一個好relax既環境。位o係度等睇醫生都訓著。正!! o係屋企整番個都唔錯!!

溝通

我知我係一個唔係好識講野既人，固然唔識講Ｄ野令人開心，有時講 野上司或者同事會誤解，連講野俾手下聽佢地都好似唔明咁！！要 寫同畫佢地先至明！
不過，我始終相信，溝通係相互的！你問我問題，我答！我問你問題，你唔答！你再問，我再答。我再問，你再唔答。我就算有再高 既溝通技巧都冇辦法再繼續．．．

我相信，只要你想講，想我明白，．．．我一定會聽得懂！

死罪

今朝，老細叫我入房，同我講：「你死喇！」
突然嚇一嚇，唔通又大大鑊？
老細跟著話：「你睇下？．．．你寫o個編野串錯字！」
下？．．．．
如果串錯字係死罪，小小力罪該萬死。

賽後檢討

今日都唔知做乜，要做既野都做錯哂。錯得既都衰到貼地，大大鑊。又成日集中唔到精神．．．
今日犯錯，到底係唔好運，定係平日準備不足，計劃唔周詳？
雖然冇乜心機，但路總要繼續行。放工時寫底今日所犯既錯，真係要 好好檢討一下。

亂

因為要就碌葛十二月考試，我既十五日大假要分開放。咁，仲可唔可以去伊豆浸溫泉呢? 仲可唔可過我既白色聖誕呢? 依家分開左，十二月頭放九日，十二月中後放七日，另外十二月仲有五日唔洗番工!! 三十一日裡有二十一日唔洗番工? 係唔係應該好開心呢?? 我就絕對唔係喇，我好討厭人地打亂我既計劃。

心驚

又見到信用卡個帳單，差不多每兩個月就要找一次過萬既卡數…見到真係有D驚.. 到底幾時先學識洗錢有節制呢?? 咁，仲有冇錢十二月去日本呢??

冬天來到，聖誕將臨

未有咁快有咁既感覺~~
不過都希望黎緊既係浪漫又與別不同...

一切睇你喇!!

戒

首先要戒「嗔」，再戒「貪」。

戒急用忍，上善如水！

心願

星期六，雖然媽媽唔可以出院，但醫生安排左媽媽放假三個鐘去睇 中醫。至少還左媽媽既心願。多謝哂鄺醫生！
中醫黃教授話媽媽皮肌炎既情況唔算嚴重，反而肺既情況比較大影響。教授開左五服藥俾媽媽，得唔得我未知，但媽媽好開心，充滿希望咁！！

晚上番學，個亞Sir 將份notes照讀，?著幾次！！為乜要讀notes? 我自己都識睇！！而且份notes係照抄本study guide，咁我自己睇書都得 喇！！用三個鐘聽你讀一次？三個鐘我可以做好多? 啦！！?時間！上左一個鐘我走左，不過o係街hea左兩個鐘先番屋企。

我既心願唔知幾時先可以達成呢？
還有漫長既要路走，唔好因為一時失意而放棄！
小小力，努力呀！

突發事件

今早媽媽突然呼吸困難，缺氧。氧氣用量用大一倍， 但現在情況 又穩定落黎。如果佢係o係屋企，咁既情況已經好危險，因為屋企既氧氣機根本唔可以供應大一倍既氧氣量。

天氣對病人／長者影響好大，小心照顧佢地呀！

有驚無險

星期四晚上，有工程要鑽穿停車場地台，由地庫三層鑽到地庫四 層。之前有擔心地台裡面有電線等等．．．鑽穿左就會冇電供應， 同判頭商量過就算用儀器都冇辦法清楚地台電線既位置。咁，唯有 照做！！
星期五早上，有報地庫四層停車場有部份光管熄！初時都冇乜留 意，叫手下睇睇乜事（小事已經冇時間睇！）。幾分鐘後收到電話， 原來噚晚真係出左事，鑽穿左一組電線，令地庫四層半層冇左照明（這是部份光管熄嗎?)，鑽地時既水仲沿燈喉整濕左一架車。 唉！！好彩耳目眾多！！於是要親自指揮維修（都冇乜幾可喇!)，一 小時後，老細發現前，一切回復正常。有驚無險。
番黎見到碌葛，佢話停車場冇左燈要搵我幫手睇．．．

服務態度

媽媽已經退燒，可能延遲一星期出院。但屋村貼出通告，十一月 三十號停電一整日。如果媽媽o係屋企咁點？氧氣機冇電就俾唔到氧氣媽媽，我係唔係要買定一個可以頂一整日既UPS?
作為一間負責任既管理公司，係唔係應該對有緊急需要既住戶供給 後備電源呢？？通告寫，如果有緊急需要如呼吸儀器／救命鐘等， 請自己想辦法！！
今時今日，仲有咁既服務態度．．．． 唉！！

jack-of-all-trades

或者，我就係一個咁樣既人，工作亦需要我係一個咁樣既！！ 其實係 好相配。已經講過自己係一個唔容易集中精神做一樣野既人（心散），所以讀書唔叻！！但工作算okay，至少我因為見得古怪野多，腦根轉得快。我會將Ｄ唔關係既野crossover，有時都幾得意！！

我相信我會係好既管理人，但唔會係出息既學者。

jack-of-all-trades=周身刀，冇張利。

小病是福

小病又開始轉趨嚴重，病真係浪費左我好多時間。又話小病是福，可以休息下。但我暫時好似冇呢種福份….

計劃有變

預計明天出院既媽媽，今早打電話俾我話發燒。咁，相信明天都唔可以出院喇!! 其實我反而覺得安心D。唔係我唔想媽媽番屋企，而係我一直都覺得媽媽既狀態係未適合番屋企。加上依家天氣轉兼流感高峰期，屋企所有人都流感，咁既環境對媽媽黎講真係好危險。雖然係唔開心，但醫院始終比較安全。

所有計劃又再改變。

不知所為

不知所為，呢D咩講師，呢D咩學生，講D咩英文....理大....大學生.....唉!!
自己以為自己英文差....咁睇，我應該好過大學講師喇!!

認祖歸宗

同同事講開，同小小力同姓既同事話我地既姓氏o係本地祭祖，我地如果去祭祖查族譜，查到如果係同同宗祭既就每人有五百蚊利是。(可惜同事話佢原來同本地族人係唔同一脈)。
小小力想起，我家中都有族譜，記錄左好多代之前既人同事。但過多次遷移同戰亂，族譜已經殘缺不全。但爸爸媽媽小時間叫我拿族譜跟佢地番鄉下點燈(因小小力係長子嫡孫) ，認祖歸宗，話唔定有得分。
我覺得我唔想分，我唔知祖先點解要訂「有得分」既制度!! 祖先係想子孫生活好? 想通過「有得分」黎連繫子孫? 想佢地看守祖業?? 定或者係其他?? 我見過族人子孫，大學畢業就唔做野，因為亞公有屋分，有地分，仲個個月有錢分。於是就日日遊手好閒，玩雀打牌。盡快結婚生仔，因為生仔又有得分，生多幾個分多D，咁就由大約二十歲開始成世人唔洗做。…. 但呢D就係祖先想見到既結果嗎??
人生在世，我覺得，我能夠成為人，已經比其他動物植物優勝。有思想有能力做好多野，所以應該好好把握呢一次亦係唯一次既機會，好好地活一次。我覺得o係「有得分」既環境下，不勞而獲，人會失去鬥心，自己亦應該避唔過!! 所以我拒絕「有得分」。如果要分，就分比冇能力既子孫(例如有病…) 。我始終希望靠自己。我係唔係好蠢?? 或者喇!! 但這就是我!!
媽媽亦同意我既講法，冇再同我講認祖歸宗既事。

認祖歸宗，回歸族人…相信有一種溫暖既感覺，有生之年亦希望做到。不過我希望….
認祖歸宗之日，亦係光宗耀祖之時。

涼親

今朝早唔知做乜鬼公司個位鬼咁凍（我個位應該全公司最凍，叫 Ｄ手下教番個溫度掣，佢竟然走去老細個位度教．．），冷一冷親，成日都唔係幾舒服!!夜晚走既時候仲手軟腳軟。意志力一唔夠就好易病!!Ｔake care!!

十一月十二日開始做番ＧＹＭ！ 希望改善番體質！

噚日收到「車人」既請帖，恭喜哂！！車人今晚仲親自打電話俾我！咁，如果媽媽身體冇乜大外我都一定到喇！！

來年運程

小小力屬狗喎

12 生 肖 豬 年 發 財 運 【 狗 　 勁 多 人 錫 】

發 財 第 2 位
桃 花 旺 人 緣 好 ， 自 然 多 人 幫 ， 事 業 肯 定 順 風 順 水 。
出 生 年 份
1934 、 1946 、 1958 、 1970 、 1982 、 1994


性 格 　 難 服 侍
狗 狗 為 人 富 正 義 感 ， 事 事 追 求 完 美 ， 而 且 喜 怒 形 於 色 ， 不 懂 溝 通 與 表 達 ， 容 易 被 人 誤 解 ， 難 以 捉 摸 ， 做 事 愛 斤 斤 計 較 ， 疑 心 大 ， 所 以 通 常 是 個 難 服 侍 的 老 闆 ， 員 工 勁 憎 。
相 反 ， 作 為 打 工 仔 的 狗 狗 性 格 忠 心 、 率 直 ， 做 事 從 不 三 心 兩 意 ， 態 度 認 真 ， 老 闆 放 心 。 惟 狗 狗 勁 迷 信 ， 終 日 疑 神 疑 鬼 。
狗 狗 愛 迷 信 ， 適 宜 做 跟 宗 教 或 玄 學 有 關 工 作 ， 如 玄 學 家 或 殯 儀 事 業 ， 另 外 ， 從 事 地 產 亦 不 妨 。
一 生 成 功 運 ： ☆ ☆ ☆ （ 5 ☆ 爆 燈 ！ ）


整 體 運 　 事 業 大 好
綜 合 蘇 民 峰 、 麥 玲 玲 同 楊 天 命 三 位 師 傅 所 言 ， 一 致 認 為 肖 狗 今 年 有 天 喜 桃 花 ， 人 際 關 係 好 ， 是 非 遠 離 諸 事 順 利 ， 事 業 運 必 定 好 。 最 重 要 是 容 易 遇 貴 人 助 力 ， 地 位 權 力 均 有 所 提 升 ， 工 作 量 大 增 ， 而 且 完 全 沒 有 影 響 事 業 或 財 運 的 凶 星 。 整 體 而 言 ， 可 一 洗 去 年 犯 太 歲 停 滯 不 前 之 衰 氣 。 麥 師 傅 還 補 充 ， 今 年 易 有 到 外 地 工 幹 機 會 ， 而 且 在 他 鄉 發 展 頗 不 俗 。

宜 勤 做 Gym
今 年 易 患 傷 風 感 冒 小 毛 病 ， 平 日 宜 多 運 動 做 gym ， 強 身 健 體 。

忌 隱 蔽
今 年 人 緣 好 ， 容 易 遇 貴 人 ， 切 忌 隱 蔽 少 出 門 ， 白 白 浪 費 機 會 。


發 財 運
蘇 民 峰 　 生 意 臨 門
肖 狗 今 年 有 桃 花 ， 人 緣 好 ， 間 接 對 事 業 有 幫 助 ， 尤 其 從 事 經 常 要 與 陌 生 人 接 觸 行 業 的 肖 狗 者 ， 如 地 產 經 紀 、 保 險 、 售 貨 員 ， 甚 至 藝 人 ， 最 為 有 利 。 今 年 工 作 亦 忙 碌 ， 故 對 多 勞 多 得 收 入 不 穩 定 人 士 或 從 商 亦 有 利 ， 客 戶 會 主 動 送 上 門 。 打 工 仔 在 農 曆 一 月 有 地 位 提 升 之 象 。 總 結 ， 今 年 熱 命 、 平 命 人 發 展 最 順 ， 寒 命 人 下 半 年 氣 勢 轉 弱 ， 事 業 相 對 平 穩 ， 但 農 曆 九 月 ， 連 寒 命 人 都 有 進 步 。
財 運 方 面 ， 今 年 亦 大 好 ， 尤 其 利 專 業 人 士 或 收 入 不 穩 定 肖 狗 。 另 外 ， 農 曆 一 、 三 月 會 有 偏 財 運 ， 但 金 額 不 大 。 若 想 豬 年 發 上 發 ， 肖 狗 可 在 北 面 ， 擺 放 一 杯 清 水 ， 即 可 催 財 。


麥 玲 玲 　 意 外 之 財
今 年 除 了 地 位 權 力 有 所 提 升 外 ， 今 年 公 司 將 有 機 會 委 派 你 到 外 地 工 作 ， 初 期 可 能 不 習 慣 而 情 緒 不 安 ， 但 過 後 發 展 順 利 。 而 且 ， 今 年 受 天 喜 星 影 響 ， 諸 事 順 境 ， 並 可 獲 意 外 之 財 ， 今 年 可 略 作 投 資 ， 但 切 記 小 賭 怡 情 ， 凡 事 適 可 而 止 。 不 過 ， 因 今 年 小 病 頗 頻 密 ， 會 為 醫 療 開 支 而 破 財 。

楊 天 命 　 投 資 運 旺
今 年 肖 狗 受 天 喜 扶 持 ， 容 易 喜 事 臨 門 ， 有 機 會 升 職 加 薪 ， 甚 至 中 彩 票 。 如 遇 良 好 又 穩 陣 的 計 劃 ， 不 妨 大 膽 投 資 ， 將 有 不 錯 收 成 。 總 括 今 年 事 業 與 財 運 皆 旺 。


人 緣 運 　 桃 花 勁 旺
綜 合 三 位 師 傅 意 見 所 得 ， 一 致 認 為 肖 狗 今 年 桃 花 旺 ， 人 緣 好 是 非 遠 離 。 即 使 有 ， 都 只 屬 兒 女 感 情 是 非 ， 已 有 伴 侶 肖 狗 者 桃 花 太 盛 ， 容 易 忽 略 伴 侶 而 影 響 感 情 。 蘇 師 傅 更 補 充 話 要 特 別 留 意 農 曆 三 月 及 九 月 ， 是 非 較 多 ， 要 化 解 可 多 佩 帶 蛇 形 飾 物 ， 或 在 家 中 東 南 位 擺 放 任 何 蛇 形 擺 設 ， 則 問 題 不 大 。


健 康 運 　 流 感 傷 風
健 康 第 5 位
綜 合 三 位 師 傅 意 見 ， 不 約 而 同 認 為 肖 狗 今 年 容 易 出 現 小 毛 病 ， 頻 頻 睇 醫 生 ， 但 情 況 並 不 嚴 重 。 首 先 蘇 師 傅 認 為 ， 肖 狗 仍 受 去 年 犯 太 歲 所 影 響 ， 上 半 年 容 易 有 腸 胃 問 題 ， 尤 其 是 農 曆 三 及 六 月 ， 要 小 心 飲 食 ， 或 可 在 今 年 南 面 放 置 紅 色 物 件 催 旺 健 康 。 麥 師 傅 同 楊 師 傅 就 認 為 ， 今 年 有 「 病 符 」 凶 星 ， 容 易 患 傷 風 感 冒 ， 而 且 有 「 藩 星 」 ， 容 易 因 工 作 而 帶 來 壓 力 ， 引 致 失 眠 ， 宜 多 運 動 放 鬆 。 另 楊 師 傅 還 補 充 ， 今 年 要 避 免 探 病 ， 以 免 沾 上 衰 氣 。

70 年 出 生 ： 可 放 長 假
受 去 年 犯 太 歲 影 響 ， 心 情 仍 未 能 好 轉 ， 以 至 工 作 總 提 不 起 勁 。 既 然 如 此 ， 大 可 趁 機 放 一 個 長 假 旅 遊 輕 鬆 一 下 ， 或 者 對 日 後 事 業 會 有 幫 助 。

熱鬥小馬

熱鬥小馬小小力被扣十四分，降落第三班，同碌葛同班。被編入垃圾級別。由於行為失控，需要連番試閘合格，並黑布幪頭扮乜都唔知乜都唔見先可以出賽。

沈默的羔羊

上Accounting堂，教得超快。連學過既我都有D吃力，跟唔切!! 亦相信大部份同學未學過Account更加係全程發緊夢。我隔黎個同學仔訓到流哂口水!! 但當講師問有冇同學覺得教得太快，唔知講乜，跟唔上? 竟然…得靚靚cutie肥妹仔同學一個舉手。睇見佢等待支援既眼光，多可憐!!!
如果問題係問：「覺得冇問題既請舉手! 」
大家都會繼續唔舉手，咁就okay啦!!
香港學生都係習慣做「沈默的羔羊」!!

DVD+/-R分別

去買DVD燒碟，見到盒DVD+R同DVD-R既價錢一樣，咁問下個售貨員有乜分別? 佢話你部機係用DVD+R就買DVD+R囉，用DVD-R就買DVD-R喇!!
今時今日咁既服務態度係唔得架，點先算得?

DVD-R
DVD-R的使用方式如同CD-R一般，可以用來記錄 DVD 影像及資料，除了 PC 用燒錄機外， Pioneer 也同時推出採用 DVD-R 儲存媒介的家庭影音用的錄影機，例如DVR-2000， DVR-7000這些家用設備，使得DVD-R/RW可以完全取代過去的影帶式錄影機,得到高畫質，搜尋快速，攜帶方便，相容性高的影片不再是難事。

DVD+R
DVD+R些微改進了原DVD-R系統的光碟片架構，以及雷射頭的記錄/播放方式，讓DVD+R的光碟片採用和DVD+RW系統相同的分散式物理位址架構，這麼一來，就可以實現讓使用者在記錄「一次」資料之後，還有可以繼續使用剩餘的光碟片資料記錄空間！換句話說DVD+R系統是允許使用者用「多次」的方式來「分批」記錄資料的, 與 DVD-R 同樣屬於一次寫入的系統架構。

所以DVD-R與DVD+R系統兩者是互不相容的！一般光碟機以使用DVD-R為主,
兩者用途的不同處是 :
DVD+R大多用來 - 備份或儲存資料 (DVD+R系統可多次"分批"記錄資料)
DVD-R大多用來 - 錄製影音DVD

唔知o岩唔o岩呢?

迷惘

迷惘，只因此刻清醒。
我…剛愎自用，恃才傲物??
卻更似故步自封。
怎樣?
我到抵想怎樣?
…………繼續沈默。

飯局

又約飯局，今次多D人喎！！abc個b，abc個c，卵，師兄同小小力。好耐冇咁多人一齊傾下啦！！Miss you so much!!

By the way， 點解大家有睇都唔留下言而e-mail覆我呢？？係唔係一個月 總有Ｄ日子唔方便呢？？留言畫隻龜都好oY!

P.S. 卵，你個Blog好多相睇， 但你同我講既野有欠說服力喎！！

期待那一天！

意想不到

估唔到o係番工既地方都見到靚女，o係走廊見到隔黎公司既女仔，幾靚喎，仲有一陣好吸引人既香氣…正!! 精神為之一震!!

龜速

休息三日，用左一日黎讀書，但係進度超慢，接近龜速。十課書睇得三課，如果要再加快，真係要閉關先至得喇。另外發覺自己英文真係好差，查字典查到冇乜心機。放假三日之後番返工，holiday mood依然好重，冇乜精神同心機!! 加上老細唔知仲乜黑口黑面對著我。有D down down地。

突然間好想打snooker!!

時機成熟

相信大市接近回吐，以下幾隻股票可以開始留意：
長線：渣兜銀行(2888)，交通銀行(3328) ，中國海洋石油(883)
矮線：西王糖業(2088) ，上海復地(2337)
註：長線既投資年期長過一年。

現實&期望的difference

到醫院探媽媽，佢話介紹個女仔過我識！媽媽真係利害，o係醫院 都有女仔可以介紹過我！睇黎真係可以出得院。佢話醫院原來好多 護士都未拍拖／結婚！下？唔通．．係．．
媽媽話不過佢想介紹既唔係護士！（失望）下？驚驚．．．唔通係Ｄ 呀姐？媽媽係唔係好似我咁精神分裂呢？媽媽跟著話佢人工高過你 喎！下？唔通係女醫生？社工？（但社工人工未必高得過我架喎！） 人工高過我喎，好值得考慮喎．．．哈哈哈！！
講笑！！冇女朋友只係因為現實同期望好有出入！（我唔係講外表！）

回貓仔問

貓仔問小小力班上有冇Ｄ「好」同學！
小小力既結論係：「 我會專心讀書。」
不過有Ｄ好奇，send e-mail比我問野o個位同學係點既樣既呢？
點解佢從來都唔上堂既呢？
又點解要問我呢？

一生無憾

全國政協副主席霍英東前晚終因急性感染在北京協和醫院病逝。報紙寫霍老先生一生無憾，我自己覺得，有冇遺憾，只有霍老先生自己知道。但對愛國既霍老先生黎講，一生至力貢獻國家，晚年能夠見到國家發展起黎。自己既心血並冇白費， 至少可以講無悔。

霍老先生最值得我尊敬既地方係低調既作風，堅定既意志，和那一份豁達與包容。
Ｐ．Ｓ．
韓戰時，聯合國對中國禁運，主要係對軍需包括藥物，汽車輪胎配件，電油．．等戰略物質。英國為韓戰主要參與國，當然?香港進行對大陸最嚴厲?禁運，而傳聞霍英東通過走私偷運電油，抗生素回國而發大財。對國家來?，雖然走私買賣係有償，但霍老先生無論出於任何居心，肯以身犯險，解決國家短決問題，讓前方將士能夠繼續作戰，居功不少。

太陽之歌

冇乜野講，繼續聽歌啦 。
澤尻繪里香 ﹣太陽之歌


當你第一次碰觸我顫抖的手
透過手溫　我終於體會到你的溫柔
一打開久閉的窗戶　迎面吹來清新的風

微笑　哭泣　自從我和你相遇
我的世界開始充滿著光輝
在向日葵搖曳的太陽下
感受風　感受你

所有　深信不疑　不知所措　躊躇不已的事
也許就是我生存的答案
將黑白的?天　繪上色彩

微笑　哭泣　自從我和你相遇
未來也都充滿著光輝
在向日葵搖曳的太陽下
任憑我　高歌明日

在有限的日子　無法停住的時間裡
能讓你多愛我呢
讓你愛我吧？　只要有你
連天空的光都不會消失

微笑　哭泣　自從我和你相遇
未來也都充滿著光輝
在向日葵搖曳的太陽下
任憑我　朝著明天…

好想對你說「謝謝」 如果是現在就說的出口
別忘記一同共度的季節
如同向日葵的太陽般
用我的歌聲 來照耀你
任憑我　照顧你　照耀你

你邊度架

你點樣知道自己係高定係矮？
在人群中，你睇到既人全部都高過你，你會覺得自己高嗎? 相反，全部都矮過你，你應該唔會覺得自己矮吧！！
人類都無可避免同身邊既人作比較，去更加認識自己，確認自己。 咁，你話比人聽你係由邊間名校出身，係唔係代表左你係得？？ o個 度出個幾個精英，係唔係代表你都係？又或者你只係高人中既矮仔？
點解見到Ｄ大學生，同Ｄ新同學見面，第一句，好似黑社會咁問：「 你邊度架？」．．你問黎做咩呢？ 我邊度黎代表左我係咩呢？我邊度黎關你咩事呢？
我係我亞媽個肚黎架！我係一個蠢仔！我係我， 咁多年都冇變！

失憶

昨日，諗左好多好多題目想寫，但係冇時間寫。當夜晚可以坐底寫既 時候，就咩都唔記得哂。

又一日腦海一片空白。

短訊

Blogger壞左成日,post唔到野...比個"粉雪"既MTV大家睇住先!
(P.S.我覺得好浪漫既歌/歌詞/畫面)
今日番學,仲由朝番到晚,辛苦過番工...所以今日休息!!

and...醫生已經決定下星期六比媽媽出院!!
我....返而有D擔心......一切太順利,也太快!!

媽媽話感覺自己係我既重擔...
我就唔覺得....
要比媽媽睇"一公升眼淚"!!
要堅強地生存落去!!...

粉雪

雪花紛飛的季節與平時交錯而過
即使交織在人群裡 卻也同時望著相同的天空
被寒風如此吹著 卻以近乎相同的樣子結霜

我完全不清楚妳的一切
但我仍會在一億人群中找到妳
即使沒有證據 我仍是認真地這樣想著

連些許的小爭吵都沒發生過 也無法生活在相同的時間裡
如果無法變得坦率點 那麼歡喜和悲傷也只是虛幻

雪花啊 心都被染白的話
還能一起分享兩個人的孤單嗎

我將耳朵貼在妳的心房上
傾聽那聲音的深處
好希望下雪 接著與妳再度邂逅

想明白彼此 輕撫著妳的臉蛋的我
卻也只能握著妳冰冷的雙手做為我們之間的連繫

雪花啊 在「永遠」的面前 妳是如此脆弱
成為了粗糙柏油路上的班點

雪花啊 有時我會沒有依靠 心情激盪不定
即使如此我仍會繼續保護妳

雪花啊 心都被染白的話
將圍繞在兩人之間的孤獨還給天空吧

風險

有風險唔等於輸錢！肯定贏既固然無風險，但肯定輸都冇。肯定輸 你都買o個Ｄ叫「抵死」！ 唔係高風險。風險係一件事出現既機會 率，機會率越高，風險越低。做任何事都會有風險，呢樣野冇得完全消除。風險最好係通過風險管理去分散。

精華

Part I

Part II

難以至信

你信有人睇「一公升眼淚」一路睇一路笑，由頭笑到尾嗎？？
那個人，在家中我稱呼做「細佬」。

很難想像，我地係同父同母既親兄弟，性格咁極端。

沒有媽媽的家，我感覺好冷。

遠方、流盡淚水的地方

終於，睇完「一公升眼淚」，再冇用紙巾。因為唔夠用。今晚淚流滿面。 我相信在世界上有人在痛苦的環境下從沒有放棄過生命，請送給他們最真誠的祝福。

脊髓小腦突變症(小腦萎縮症)
小腦萎縮症的正式醫學名稱是脊髓小腦運動失調症 (spinocerebellar ataxia,SCA) ，患者的小腦、腦幹和脊髓會產生退化性萎縮，這與 基因變異有關 。致病原因大多數是自體顯性遺傳， 少數為基因突變。 一般患者在成年期發病，發病年齡大部份從二十至四十歲開始。

病徵
初期 ：走路時 步履不穩，肢體搖晃；動作反應遲緩及準確性變差；
中期 ：說話時發音含糊不清，無法控制音調；眼球轉動不平順，影像容易產生「 重疊 」；肌肉不協調感加重，無法寫字 ；有時感到吞嚥困難，進食時容易嗆咳 。
晚期 ：說話極不清楚，甚至無法語言；肢體乏力，不能站立，需靠輪椅代步。

確診方法
醫生會先依據腦神經系統臨床檢查的程序來判斷病人是否存在 小腦及脊髓 神經失調的病態，然後會查問他的 家族史（包括已故的親人），最後透過核磁共振（ MRI ）及基因測試 ，才能判斷 病人是否患上小腦萎縮症。

遺傳方式
因為這是自體顯性遺傳疾病，所以若父母一方有小腦萎縮症，則其子女不分性別都將有 50% 機率罹患此病。若其子女未受遺傳，則其下一代也不會因遺傳而罹患此病。

治療方法
這是屬於退化性疾病，目前未有可以根治的藥物，治療的重點在復健治療，使患者 盡 可能維持最高的生活自理能力。

醫療研究近況
現時全球對基因疾病的研究興趣很大， 隨著醫學的進步，近年在這方面的研究已有了一些突破性的發展。靠著分子生物學的方法，可以對患者作更詳細的分類與診斷，而對於其致病機制的研究也有了許多發現。 日後的 發展是無法預測的，醫學上的發現不一定是循序漸進的，有時候一個突破已能破解難題。現時美國、台灣、日本、中國內地都正積極研究。近年提出的「幹細胞移植」 方法，也可能是一條出路。

復健治療建議
雖然目前還沒有藥物可以治療此症，但假如能重視身體的保養，注意飲食、起居，定期做運動，配合小腦萎縮症需要的復健訓練，持之以恆地練習，將有助延緩病情惡化的速度。以下是一些復健治療的建議： 盡量保持與社會接觸，爭取生活平衡；選擇適合自己的工作和生活方式， 盡可能與別人多交往，保持愉悅的心理狀態；培養運動習慣。選擇適合自己體能狀態的運動，以維持心肺耐力、肌力，使身體的柔軟度處於最佳狀態；注意生活起居。不要固定在相同的姿勢太久，常常活動手腳；接受物理治療、職業治療或言語治療，用以舒緩病情。
在患者親人的愛心照顧下，可增強患者的生命力。

每日一字

尻
haau1
同音字
敲, 哮, 嘐, 尻, 烋, 猇, 虓, 磽, 髐
參考資料:
http://humanum.arts.cuhk.edu.hk/Lexis/Canton/
〈名〉
臀部 [buttocks]
典藉出處: 身已半入,止露尻尾。　　《聊齋志异?狼三則》
〈動〉
指男子對女子發生性行為 [penetrate]

消息

大醫生話媽媽o係一星期內可以出院，爸爸就話o係媽媽出院前返工。之前就話工人乜都唔識，突然就話工人乜都識。到底想點?? 又唔係趕著開飯?? 咁邊個同媽媽出院?? 又係我??

Anyway，媽媽出左院，十二月或者可以去日本。

濫收費用

終止左有線寬頻，一個月後先cut到，但e-mail account立即被炸爆，收到statement話我用多左quota，要收我 $380! 我覺得好P.K.!! Anyway，轉左card，佢過唔到數，又可以點呢??

戰略石油儲備

戰略石油儲備Strategic Petroleum Reserve (SPR)概念係由於八十年代既石油危機，令好多國家擔心一旦石油輸出國政局不穩或者戰亂影響國際石油供應。能源缺短絕對影響民生，經濟以至地區安全。戰略石油儲備係國家既油庫，係o係國際石油供應出現問題既時候用作緊急支持援，通常可以支持國家三個月以上。所以強國都有戰略石油儲備已經建立戰略石油儲備的美日德法等國家，政府儲備加上民間儲備，可分別滿足其158天、161天、117天和96天的石油消費。偏偏中國就冇足夠戰略石油儲備。

中國的石油儲備工作從1993年開始醞釀，到2003年中央正式批准，前期工作一共花了10年的時間。國家戰略石油儲備基地規劃了三期：第一期儲量1000萬至1200萬噸；第二期2800萬噸；第三期2800萬噸。
2004年，首批四個國家戰略石油儲備基地正式圈定，主要集中在沿海地區：分別是鎮海（浙江省寧波市）、黃島（山東省青島市）、岱山（浙江省舟山市）、大連（遼寧省大連市）。
2004年6月，中國石油戰略儲備的基地開始建設。中石化、中石油和中化這三大石油集團受國家委託，負責工程總體建設。目前在首批四個國家戰略石油儲備基地中，鎮海和黃島項目的建設由中石化負責，岱山項目由中化負責，大連則由中石油負責。
預計2007年至2008年，大連、黃島、舟山其他三大石油儲備基地將陸續竣工。四大基地建成後，總共能形成約10餘天消費量的石油戰略儲備能力，再加上全國石油系統內部的商用石油儲備能力，中國總的石油儲備能力將超過30天。
目前，中國的戰略石油儲備狀況並不樂觀。以中石油、中石化兩大石油公司為主進行的商用儲備，總數量不超過使用21天。因此，每當石油價格回落，中國都會從市場大手買入石油作戰略儲備。亦令國際石油價格有好大支持，個人相信55美元係一個強大支持位，中國石油股亦睇好!!

精神分裂與思覺失調

思覺失調 (Early Psychosis)

思覺失調是一系列認知、感官、情緒症狀的統稱，通常在青少年及早期成年期發病的一種精神症狀，主要症狀包括幻覺和妄想。如不及早醫治，可能發展成精神分裂症或其他重性精神病。思覺失調患者的特徵如下：

反常的情緒反應。包括長期或嚴重抑鬱，情緒高漲、反覆或變得冷淡和遲鈍， 部分患者會有暴力或自殺念頭

認知上有偏差。包括妄想，（如被迫害、自大、思想被入侵等）、思想凌亂、欠缺組織、語言貧乏

感官功能上的混亂。即聽覺、視覺、觸覺上出現幻覺

生活習慣失調。如飲食習慣失調、失眠或睡眠時間混亂、疏於自理、失去動力以至學業倒退

社交能力降低。如退縮、難以跟別人溝通、感到被孤立

精神分裂

精神分裂症，屬於重型精神病，是精神病里最嚴重的一種。病因未明，多青壯年發病，隱匿起病，臨床上表現為思維、情感、行為等多方面障礙以及精神活動不協調。患者一般意識清楚，智能基本正常。
精神分裂症是一種精神科疾病，是一種持續、通常慢性的重大精神疾病。主要影響的心智功能包含思考及對現實世界的感知能力，並進而影響行為及情感。精神分裂這個名詞是由希臘文 σχ?ζω (schizo：分裂、隔開)以及 φρεν?? (phronos：思想)組合而成。
精神分裂症之主要徵兆被認為是基本的思考結構及認知發生碎裂。這種解離現象據信會造成思考形式障礙並導致無法分辨內在及外在的經驗。罹患精神分裂症的人可能會自己表示有幻覺，或者，旁人可以發現他們的表現受幻覺影響。患者也可能表達明顯妄想信念。社交或職業功能退化、一些次要的症狀、沒有器質性腦病，可以是確立診斷的條件。

我應該係屬於精神分裂喎。

感動落淚

繼續睇「一公升眼淚」DVD，好耐好耐冇試過睇戲集喊足成晚，喊濕幾包紙巾。點解大家覺得我唔會喊?? 反而我覺得自己係一個幾易喊既人。男仔喊又有乜咁奇??我地都係人，都有感覺，如果我唔識喊我先至驚呀!! 喊亦唔需要隱藏，我自己面對到自己，唔需要理會別人既眼光。

喊係一種好好既發洩，喊完近日既壓力都感覺釋放左!! 好好咁訓左一晚。

P.S. 對長期病患者/殘障人士，有時歧視既眼光比病魔傷害更大。放低歧視，社會更和諧!!

自制能力

發覺自己既自制能力越黎越差，話要定時間表讀書又未做，進度越黎越落後。要多D時間休息好好調節身體，卻變成越黎越夜訓，身體越黎越差。要好好計劃用錢，睇一睇D錢，好似洗得好快咁。再係咁就快散哂。

想放假去休息一下，靜靜地想下以後既路要點走。

澤尻繪里香

我鐘意呢幾張相，你地認唔認得佢??

權責

內地經濟學教授梁小民曾經講過一個故事。渡輪碼頭上有數隻渡輪停靠著，有人問怎樣分別出邊一隻係官船，邊一隻私人營辦呢?? 佢話最爛最失修o個一隻就係官船，果然命中。點解呢?? 教授話呢個係權責既問題。在政府架構內，權責總是分不清，一樣工作到抵由邊個做邊個監控都冇人知!! 你唔做冇人知係你責任。你做左，以後會由你責任，而且如果有功冇人欣賞，有錯就有人指責。o係你推我讓既情況下大家都小做小錯，唔做唔錯。全世界政府都有同樣毛病。私人機構，資源所限，架構比較簡單，權責一般亦分得比較清。

在商場，雖然我已經覺得管理得唔好，做得唔好。但十個消毒酒精機都有八個用得。在醫院，一個咁講求衛生既地方，消毒酒精機十個十個都唔用得。

同樣道理，選擇內地銀行股，我會優先選擇私人銀行。

等著你回來

各位，新Blog已經正式開張，等緊你地黎簽名，仲唔快Ｄ支持下？？
唔想用真名既，可以學「肥田」咁架，我會知你係邊個架！！

哈哈．．．連「肥田」都有！！
但係我想要「亞也」多Ｄ喎！

往日情懷之Close舊Blog

Close Blog 24 October 2006

由於大大老細叫我唔好再寫Blog，有人將我既Blog傳左比佢，話我出賣公司...所以Blog又停喇!!

Bye-bye!

往日情懷之小道消息

小道消息 24 October 2006

百佳同惠康將會合併。合併前百佳同惠康係寡頭壟斷(Oligopoly)，即市場由少數售賣者支配。其他超級市場因為規模細，議價能力(Bargain Power)低，根本上難以進入市場。百佳既對手係惠康，惠康既對手就只有百佳，佢地只會參考對手作定價。對我地一般市民冇利益可言。合併後，新公司變成壟斷(Monopoly)，市場上再冇其他對手，佢地亦可以對貨物自行定價。例如佢地將米價提升，咁你唔去超級市場買又可以去邊度買?? 壟斷係公司暴利既開始，增加左既收入就係市民損失既社會福利(Social Welfare) 。即你既錢。

往日情懷之日本郵政改革

日本郵政改革 23 October 2006

之前聽聞有關日本前首相小泉純一郎為挽救日本經濟而提出日本郵政改革，將日本郵政私有化。當時冇深入睇過報導，只係諗郵政私有化都挽救到日本經濟?? 香港郵政夠私有化左喇，又唔見挽救到香港經濟?? 最多o米救到政府減少支出!! 唔通日本人好鐘意寄野比人??

星期六上堂，介紹下世界各地既金融體系，之後我有D興趣想知多D，於是去搵下料，卻有另外一D發現...

日本經濟增長停頓，主要由於出口競爭力削弱(日本人人工高企)，又冇辦法刺激內在消費同投資(這也是一般亞洲國家既問題，人民既消費模式傾向保守，儲蓄率則偏高!!) ，做成日本經濟十五年零增長。

日本郵政除了郵遞服務，原來還有儲蓄和保險業務，總資產達24萬億港元。若成功私有化，將變成全球最大銀行。小泉的郵政改革，指在2007年將日本郵政拆成4間公司，管轄郵遞、銀行、保險和僱員薪酬物業事務，再成立1間控股公司統轄4間公司，控股公司將于2017年前，出售銀行和保險和股份。

日本郵政坐擁總值24萬億港元存款和保險。小泉推動私有化改革，是希望將龐大儲蓄存款更有效投資。現時日本郵政大部份投資在債券上。

咁小泉既目的好明顯，日本郵政如果由政府管理，效率固然低，最大問題係第一佢將會成為日本其他私人銀行既最大競爭對手。第二，政府銀行只可以投資海外國庫債券，對刺激國內經濟一D幫助都冇。改革後會令大量資金流入國內投資市場，對刺激國內經濟有正面作用。

小泉為落實其改革，不惜押上自己的仕途，更冒著自民黨四分五裂的危機。自民黨是郵政服務的既得利益者；因郵政局有部龐大存款，而該黨藉此在地方大興土木、從事基礎建設、籠絡民心。但小泉卻決定放棄既有利益，決心改革龐大並且低效益的郵政服務，並釋放現金流，刺激經濟。雖然小小力覺得小泉純一郎絕對係鷹派既代表，唔係好鐘意佢，但係o係呢件事上佢絕對表現出一位領導者應有既責任感。

可惜我地既特首只係一個有道無術既「偽人」。

往日情懷之Misson Impossible

Misson Impossible 23 October 2006

星期六晚既課堂上，講師講番佢自己既體驗。
「我本身之前都係讀倫敦大學呢個degree course既。Anyway，恭禧你地，你地選o岩左course。倫敦大學呢個係一個世界級既學位，係世界性承認既。但係讀呢個course會非常之辛苦，呢個course要睇好多好多書，佢講既野範圍好大好大，呢個學位既內容大約等於2.5個香港大學既degree，建議你地每科每星期用番五個鐘黎睇書囉。仲有，我想問在座有冇人今年報考四科架? 如果有就千祈要諗清楚，因為從來冇part-time既同學一年報考四科而能夠全部及格!! 我自己呢個course都讀左五年!! 」

……我…..今年報左考四科喎….
哈哈哈……點算呢?
我唔鐘意Impossible呢個字，要o係我既字典中刪除!!

往日情懷之醒世明言

醒世明言 20 October 2006

小事唔洗我理，大事唔到我理，返工既真正意義係出糧！

往日情懷之失敗的大清洗

失敗的大清洗 21 October 2006

因為要迎接新裝修而執房，發現左好多令人懷念既舊野。 遲Ｄ擺 上黎同大家分享。（ 有Ｄ野係你地送比我但好耐冇見！！）

拋左好多垃圾，舊袋二十幾個，舊書幾十本（全部都係電腦書，Ｄ科技同software進步得咁快，電腦書真係唔好買！！），舊既舊公司文件三箱(都唔明點解屋企會有公司文件)，舊信件一箱，龍虎門畫千幾本（貓仔，你可以拋左我借比你果百幾本喇!），舊衫四大袋， 舊玩具一袋，壞playstation2一部（連跳舞毯＋沙鎚），老番遊戲成百隻，電腦配件一箱（原來我自己係有card-reader同無線mouse架，and電腦speaker都有三對)，壞翻譯機一部，舊時跟財經演員上堂既垃圾筆記一大堆（原來佢地講既野好多都係錯架！）。

我發現自己原來咁多年都係住o係垃圾房架！！

卻尋回．．．朋友畫在紙巾既公 仔， Kit寫比我既字條，Kit送比我既銀包，拳套一對，大口仔公仔一大個，去韓國既相，仲有．．． 搵番寢邊愛書《 三國演義》（o係部playstation2 度!) ，同埋十七年前學日文既筆記！

拋左好多垃圾，卻發現仲有好多垃圾．．．繼續住o係垃圾房！

唉 ~~~失敗！

往日情懷之圖書館漂流記

圖書館漂流記 20 October 2006

講開圖書館，你有冇試過去圖書館搵書，o係電腦度見到有o個本書，但去到書架就搵唔到？

讀大學的時候，試過借了有用的書去用，本來如果冇人request （要求借閱）你係可以不停續借半年！但o係大學通常你有用 既書 好多人都想用，於是 一到期圖書館就send信追你還書!! 而由於 request人數眾多，還左你呢一年都可能再借唔到。所以最後在下 用左一個好卑鄙既方法（小朋友千祈唔好學！），就係唔將本書借 出圖書館，o係圖書館睇，不過睇完就唔放番o係原來既書架，而係 放o係同本書完全冇關係既科目既書架上面！！例如我睇完一本工程 科目既書之後將本書放o係日本文學既書架上面！咁，你o係電腦度見到有o個本書但就借唔到 !!圖書館十萬藏書，你點搵？只要配合 到圖書館員執書既時間，本書就會在圖書館各處漂流，永遠o係電腦度出現，卻在圖書館消失！！

但咁做真係唔好，因為有好多人真係要用書但冇錢買！！試過一次 之後，以後都冇再咁做，亦自此以後屋企有小小力圖書館。

往日情懷之唔明

講起澳門同大陸，有話：
「香港早就應該學澳門開賭喇，人地澳門呀何特首話依家澳門係全中國唯一可以合法賭錢既地方，你睇下人地依家幾好?? 如果我地都開賭就咩問題都解決哂喇!! 」
又話：
「依家呀，o係大陸買樓就真係發達喇，D樓又平，買左樓又可以租出去，層樓升值又可以賣出去。真係唔買就笨喇。」
我係有幾樣野唔係幾明:
1. 香港同澳門，其實都分別因為先天或後天所限，冇辦法依靠第一產業(原材料供應) 或第二產業(製造業) 生存。(兩地都冇豐富天然資源。澳門人口少，技術落後，運輸設備不足。香港則租金同人工貴) 。所以唯一出路係發展第三產業(服務業) 。澳門由於早已經有賭業存在，所以加強發展賭業係最低成本最有效。賭業既特色係高利潤，高稅收。但連鎖效應低(即唔能夠帶起其他行業，如旅遊業可帶動運輸業，飲食業同零售業，但賭業基本上唔能夠帶動其他行業) ，對於一個人口少既地面係冇問題既。但對香港，一個從來冇賭業存在既地方去發展賭業，成本會較高(起賭場，引入技術人材同向世界各地宣傳)，而且附近已經有一個成熟既競爭對手，再加上低連鎖效應，經濟效益成疑!! 要靠賭業支撐七百萬人口既經濟，真係得?? 香港既優勢，係全中國法律制度同金融體系最健全既地方，亦係全中國企業對外集資既最佳窗口!!! 香港作為世界第七大金融體系，點解唔集中發展金融服務業?( 當然轉型既過程係會痛苦，但好過大家位o係度希望社會走番轉頭黎遷就你!!) 。如果香港真係發展賭業，等於肚餓既時候有個蛋糕你唔食走去同人爭粒糖!! 我看著王先生，發覺佢有著前特首既智慧(今日數碼港，聽日物流港，後日中藥港，主題公園城市，賭城……….)
2. 大陸樓平，賣左咁多年都咁平(依家樓價貴左，但唔好忘記利率，物價同人工都大幅提高左，實際樓價其實冇咩點升過!!) 。原因係供過於求，大把空置單位!! 租務市場唔成熟(你既樓好容易租出但好難保證你收齊租)，投資成本高(做買賣有多種各式各樣費用)，二手市場亦唔成熟(成交量低，交收期長) 令資金流動性超低…等等。自住都仲冇問題，但以投資角度睇就真係好有問題!!

往日情懷之武術的奧義

武術的奧義 19 October 2006

人，最容易受傷既，係當身體失去平衡既時候，身體本能地用盡力量去保持平衡，但最後因為身體某些部份抵受唔著呢種「無情力」而受傷。

一種中國武術，「異拳」，就係利用這個原理，先為對手製造失去平衡既環境，再為對手自己本能既「無情力」加上一把，使力度擴大，傷害亦加大。

這種拳術，收練者唔需要訓練肌肉，亦唔需要訓練招式，重要既係訓練對陣時既反應，短時間準確找出對手死點加上一把!!

師傅，八十幾歲既時候，又瘦又細粒，曾經以一敵十，打倒十個強壯既洋人青年。

你睇到什麼?? 明白嗎??

這個武術的奧義，也是個做人路理….

往日情懷之投資心得

投資心得 19 October 2006

今日睇報紙，寫著一些投資心得，現在將筆者的大意加上自己既心得同大家分享下:
1) 財不入急門：越想賺快錢，死得越快 。(因為你冇咩位走，時間越短，風險越大，而且你唔係專業投資者，資訊/消息都冇專業機構咁快，睇錯市既機會好大。)
2) 永不貸款炒股：欠債時心理壓力大，影響決定 。(呢點對我黎講唔係好同意，借唔借錢要睇借貸成本，即係利息!! 唔通零息都唔借咩? 用過多自己既資本，會影響現金流，影響生活! 過少自己既資本又太危險!! 至於借幾多最終都係睇利息!! 我當自己係一間公司，通常投資貸款唔過30%喇!!)
3) 永不炒warrant：依據讀書時學習 (Black Scholes Model) warrant 的定價及計法去炒賣，最終發覺 warrant 的巿場價根本不是根據公式，而是受到街貨量及 warrant 商加印等不公平條款影響。 (同意唔好炒warrant，因為warrant 商睇住你黎食，但唔係唔好買warrant。用番warrant黎做對沖係冇問題既，仲可以減低熱錢令股市大上大落既情況下對現貨做成既損失!)
4) 先認知，再投資：不買不熟的股票。(其實要至富你唔需要好似電視D財經演員咁，你一講個number佢就即刻講得出係邊隻股票仲比埋分析過你!! o個D係佢專業演員既表演! 你只要熟識十數隻股票，集中研究幾時買，幾時賣，已經可以至富!!)
5) 小食多知味，多食壞肚皮：從不同一時間持有超過5隻股票。 學 Warren Buffett 話，好好看管籃子中的雞蛋好過。(絕對同意，持有過多股票只會減低你既回報，因為股票與股票之間係有交互作用(correlation) 。例如石油股同航空股，當石油價格升，石油股升但航空股就跌，反之亦然! 咁如果你同時持有石油股同航空股，不管石油價格升跌，對你投資既影響將會被抵消，但回報同時亦降低!! 咁 持有多隻股票係唔係可以抵消風險呢? 係!! 但係數目係有限，限數係大約三十三! 即係你持有三十三隻股票既抵消風險能力同你持有一百隻股票既抵消風險能力基本上係一樣。不斷增加股票只會降低回報!!)
6) 長線 vs 短炒：兩者都有其好處，不宜同錢鬥氣。 買入任何股票前，先要決定長線或短線， 切記不可在買入後長轉短或短轉長，此乃小股民大忌。(即係原本你打算買入某隻股票作短炒，輸左你就持有當長線，最後通常只會越輸越多!! 要知道一隻股票由10蚊跌到落5蚊，你輸左50%! 但要由5蚊升番到10蚊，你要贏100%!! 要知道選擇長線同短線既方法係唔同既，短線睇資金流向同經濟數據，長線就睇個別公司盈利能力!!)
7) 貪字得過貧：定下止蝕並嚴守止蝕。(但唔需要定止賺!!)
8) 高位出貨計數：股市像人生一樣，有起亦有跌。 若大市在高位，應出貨計數， 通常清貨後有約半年時間慢慢在低位再選新貨。(同意，但問題係你識唔識何為高位?? 建議比較相同行業既市帳率 。
市帳率是Price to Book ratio (P/B ratio) ，price 是 share price(股價) ，book 是 book value.( 帳面值)
計算方式: Market Capitalisation (No. of shares X Share price) ÷ Book net asset
(即市值除帳面值)
這是用來衡量一家公司帳面值與share price之間的關係， P/B ratio 用?個別行業公司?分析，例如銀行等，因為銀行的主要『生財公具』是共其貸出之款項，佔資產的主要部份。但注意P/B ratio何謂高低係同同業比較。
唔用市盈率(Price to Earning Ratio) 因為會計制度改變下，盈利已經冇咩參考價值)
9) 目標要踏實: 筆者每年的投資回報目標為本金之15%，不要以為很低，在複利息的計算下，每年平均回報15%已很可觀了(五年一個double)。 再者，大部份基金長線都不能達到每年平均15%回報率。(睇報紙有廣告話教你半年回報率300%既投資方法。半年回報率300%，一年即900%!! 我當你將D錢半年過大海買一次大細，贏左半年後連本帶利買多一次，再贏你一年既回報率都係得400%! 你敢唔敢將你投資既錢放哂落去買兩次大細呢?? 如果唔敢，你又點會考慮900%年回報既投資呢?? 佢既風險仲大過買兩次大細喎!!)

往日情懷之生物科技

生物科技 9 October 2006

今日睇報紙，筆者話未來既經濟火車頭將會由生物科技帶動!! 其實我亦認同。記得五年前初初去學投資，最後一份功課係搵三隻你認為值得投資既美國股票同解釋原因!! 當時所學亦係好基礎既知識，好多野都未識， 連股價貴定平都唔知，所以只從較長遠既方向選擇左呢三隻!! 今日分享一下!!

首先，我相信能源係帶動經濟既火車頭，由於能源不足，人類會積極研究其他能源取代石油。但由於研究成本相當高，如果由非能源機構去做，技術同資源都會產生問題，你唔係做開突然間去做好難會有成果。所以就算有新能源取代石油，技術都會由石油公司去開發。但石油公司已經係超級大企業，投資價值唔大。(如果問目係中國股票我會選石油公司，所以我買亦建議朋友買中國海洋石油[883]，呢幾年升左幾倍)我再諗，跟隨能源問題既就係人類既醫藥衛生問題!! 眼見近幾十年不斷有世紀病出現(愛滋病,SARS, 禽流感.. 等等),.. 加上急速經濟發展造成既污染對人類生命構成威脅，令人類對藥物既需求越黎越大!! 試想如果有間公司研究到治癒愛滋病藥物，股價將會暴升!! 但研究工作成本相當高，需要大量資金支援。所以應該選擇實力雄厚既公司，當時選擇左輝瑞(Pfizer)，相信你地都聽過輝瑞旗下產品 - 偉哥/李施德林。之後兩年，輝瑞市值已經超越微軟成為美國第二大市值公司。

往日情懷之raison d'etre

raison d'etre 9 October 2006

其實，有幾多人諗過呢個問題，當中又有幾多人能夠給自己一個答案!!?
又或者係呢個問題根本唔重要，知同唔知都好，我地已經在體會，在演譯!!

不斷思索，卻越見謎失。

往日情懷之女王的教室

女王的教室 24 September 2006
看罷電視戲,發覺觀點和自己非常相似!自少已經有這種想方,但我卻未遇見過類似的老師!!

(這是你見我好學的原因,而且學的和工作大多無關係!!)
我們為什麼要讀書？
學生：老師上次說過吧，就算我們讀再多的書，進好大學和好公司，這樣根本沒有意義，那為什麼還要讀書呢？
老師：你們也該覺醒了！你們還不懂嗎？讀書不是非做不可的事，而是想做的事，往後你們會遇到很多不懂和無法理解的事，也會遇到很多覺得很美好、很快樂或不可思議的事物，那時會自然而然想多去了解，想多讀一些書的那才是人，沒有好奇心和探究心的根本不是人，比猴子還不如。對自己生活的世界連了解都不想去了解的人，你們說他還能做什麼呢？就算讀再多的書，人只要活著就會有許多不懂的事，世上有許多大人一副好像什麼都懂的樣子，那些大人根本就是騙子，不管是不是進好大學或好公司，也不管你們到了幾歲，想求學時隨時都可以學，但是人在失去了好奇心的那一瞬間，就跟死了沒兩樣，讀書不是為了考試，而是為了成為了不起的大人才讀的。

(這是我的信念,世界上欺負你的人永遠存在,要靠自己解決問題!)
學生：老師，老師為什麼要對我們這麼嚴厲？為什麼老是做一些像欺負我們一樣的事呢？
老師：你們可以想像嗎？世上多的是比我對你們所做的還要殘酷的事，人只要活著，欺負的問題就永遠存在，因為人是能從欺負弱小這件事當中得到喜悅的動物，感對抗壞人和強悍的人，只有在連續劇或漫畫中看的到，現實社會中幾乎找不到，重要的是你們要學會將來遇到這樣的欺負時，該如何去忍受或解決的方法，這裡面或許已經有人學會這個方法了。

往日情懷之狼顧

狼顧 23 September 2006

所謂「狼顧」之相，是因為狼在吃東西時怕別的動物搶它的食物，故要不時回頭看看。
人若反顧有如狼的動作，頭部可以扭轉超過九十度而身體不動，就是有狼顧之相。說起來。人若這樣，不過是為人機警而多疑忌的人，是有雄心豪志的貴人。

狼頭能環顧前後，前可進攻，退可反噬。

Only Human - Live

新張啟示

先讓我說聲：「對不起!」

Blog已經係第五度搬家，對各位朋友/支持者做成既不便，真的對不起。
被出賣既感覺當然唔好受，但衝動亦無補於事。
找出出賣者又點??殺死佢??
「唔係你清醒D啦!!!」
世界上根本上就充滿著這種人，要生存o係呢個世界，你每日就要面對佢地，唔通我要殺哂佢地??
你訓醒未呀!!
問題本身就係o係自己度。
我對朋友既信任，係唔係天真得有點過份呢?
經一事，長一智。多謝你提醒我!!
興幸千奇百怪既事不斷發生o係我身上，更高興身邊有你地既支持/鼓勵/提點!!
請繼續支持!!
多謝!

小小力