原來,又一段時間冇寫Blog喇!!
生活變得平淡,思想越黎越狹窄....結婚之後睇少左好多書,...整個人覺得好枯燥乏味,..睇番自己寫既Blog,好似寫日記咁,....真係冇乜意義!
情人節,一如其他西方節日,小小力都冇咩好感!!呢D節日,都只係用唔同既理由叫你消費!!唉!!o係小小力既心目中,愛唔係用物質去衡量!!所以,情人節小小力從來都冇送個花俾人(包括我太太),....太太都話:「你不如將買花D錢俾我!!」,...我都係咁話!!
情人節,同太太,爸爸番左大陸!!發現好多地方都好少人好冷清!!金融海嘯對大陸冇影響你真係唔好信!照我睇,影響仲俾香港深遠!!到大陸食晚飯,又魚翅又鵝肝又海鮮,...食到飽飽都係四百幾,...o係香港,好D既花都買唔到一束!!
數日後,爸爸生日又食晚飯,o係香港,原來俾千幾蚊都係好食垃圾咁.....生活真艱難!!
冇寫Blog期間,又去睇左個兒童教育展!!期間有BB爬行比賽,可惜B仔病左冇得參加,佢一定好鐘意玩!!見其他BB爬短短既路都要爬12秒,...我同太太都諗如果B仔有參加比賽一定係冠軍,佢爬o個段路都唔洗7秒!!Anyway,贏唔贏冠軍唔重要,最重要係B仔開心!!我B仔依家都唔滿足於爬平路囉,...佢去爬滑梯架!!(o係滑梯下面爬上去再滑番落黎!!)
講番個展覽,真係浪費我時間!!個個Sales都sale你買一套o個D英語學習套裝,...最平都四萬幾蚊一套,...嘩!!四萬幾蚊一套,..有幾多家庭負擔得起!!仲講到D父母唔買就害左小朋友一生,個小朋友即刻變成底能兒童咁!!真係想問佢細個父母有冇買一套俾佢,定佢根本就係底能!!我覺得佢地好cheap!
我覺得最好都係身教,父母唔願意去教,...套套裝幾好都死(個Sales話有左套套裝,父母可以唔洗教,叫工人俾佢睇DVD就得架喇,....咁懶,生黎做咩呢?)
講開B仔,自從由床跌過落地,依家醒好多,...一去床邊/沙發邊呢D高位,佢自己會轉身用腿同pat pat落先,咁就算跌都冇咁痛喇!! 呢d野,我地都冇教佢喎!!
明唔明??
期間,又同朋友食晚飯(我飯局仲多過陳志雲),同朋友討論(其實都唔講得上討論)開小朋友教育,..佢地都覺得現今教育制好好,..D小朋友好醒,好識兜(做錯事唔認),唔洗學自然科學/健康教育咁老土,細細個已經識用電腦....等等!!小小力100%唔認同,...但發覺連討論都冇興趣,....只感覺大家層次唔同,話不投機半句多!!一年見一次我都覺得好夠!!
朋友們覺得小小力好串,小小力覺得越黎越少朋友,生活越黎越枯燥乏味...!!!
朋友們,你點睇小小力?點睇自己?
5 則留言:
關於英文教材，唔買都係一個明智的決定。
1.一來唔值四萬，大部份利潤都係去左推銷公司個老闆到。佢地梗係話唔買唔得！+ 唔買就低B.
2.內容一係OUTDATED，一係粗製濫造，讀者自求多福。
3.買黎好多都係擺係度。
4.其實真係好多家長買，大家都抱人有我有，唔買就執輸，直情輸O係起跑點上，幾驚呀。但其實若用呢四萬元，去幫阿仔女搵個好的啟蒙語文老師，分分鐘成效好得多。
5. 好多廣告字眼不盡不實。打個三折就差唔多。
去下圖書館好過。
丸好pro!!
我好同意第四點,尤其係D讀書唔多既家長,驚仔女輸起步,...所以多多錢都願意俾!!
所以我覺得佢地(Sales)好cheap!!
Sales都係為生活而已，佢地既推銷只不過係為左做好佢份工。
為人父母做什麼也只是為了兒女好而已，自己不懂希望用其他東西幫助，有智識的又為生活忙碌，最後還只是用時間換錢，然後又用錢補償時間。
任何事物都有高低，如果個個咁識野，個世界就唔會咁喇！或者反而唔平衡添！
反正就是各有各立場，各自有難處，就像家家有難唸經一樣，你也會有不被了解的難處。
對事對人，就算看不還眼又如何，還不是只有乾著急？
放開一點，不輪對人對已都會比較好過！ -迷人(就是迷糊才能好好生活)
To 迷人:
或者,....世界就是欠缺呢小小執著!!
為生活,為搵食,...不等於可以顛倒黑白!!
故事係我是銷售迷債的。為生活,為搵食,我當然叫你買迷債(我只不過係為左做好佢份工)。至於迷債適唔適合你,係唔係高風險, I don't care!!
作為購買者,你當然要為你既投資負責。但在資訊不對稱既情況下,我賣迷債既當然比你更理解迷債有乜問題,就算你係專業投資者,我唔講(我冇主動騙你)你根本唔知有問題!!
或者,...係法律上我真係冇事,...但咁樣真係會令世界更平衡嗎?
定係,...鼓勵左更多人去欺騙,鼓勵左更多人去避免被騙!!
迷債事件之後,投資者都對銀行投資產品興趣大減,因為人人都知道你要騙我一定騙到,唯一方法係乜投資產品都唔買!!結果,銀行就算有好好既投資產品都賣唔出,因為一般人根本唔知有冇問題,佢地都係選擇乜都唔買!! 冇
世界又冇更平衡!!??
賣兒童教育產品既,就算有隻真係work既產品,但如果兒童教育產品行業都被認為係騙人行業,再work既產品都都冇用,人人都選擇乜都唔買!! 最後,連從事兒童教育產品研究同開發既都唔洗做,乜研究結果都冇人信!!
對兒童教育產品有幫助嗎?對兒童教育有幫助嗎??對世界更會好嗎??
但,在個人立場,你選擇乜都唔理乜都唔知,.....我又冇乜意見!!
只知我唔可以囉!!唔去面對問題唔等於冇問題.....
迷人選擇迷糊地過也算是消極逃避的一種不好的選擇。不過我就是覺得反正各有各立場，我選擇了什麼別人耐我咩何，就正如我去勸人唔理我也沒辦法一樣。有時情願迷一點讓自己好過一點。
我好欣賞小小力既執著，因為就算是消極面對世人世事的我，都會有積極一面。就算知道冇用，我都會去講，盡力去做點事希望令事情向好，最後點都好至少我都有盡過力，情願後悔自己自作多情去緊張總好過後悔沒去施援手。
盡力而為吧！不過唔好令自己太難受，盡了力，之後的事，就放開點吧！
發佈留言