笑爆嘴之旅

24，25日同明去深圳，因為我已經好多年冇返大陸，一心諗著靠明帶路，話哂佢都話自己o係深圳住過幾年兼又成日話返去深圳，點知….
話說下午我地去到深圳，明帶左我去酒店先登記，然後佢話..
明：「呢間叫廬山酒店，後面係廬山花園，我以前o係廬山花園住過幾年架，呢度D路我好熟架，我依家帶你去食野.. 」
於是明帶我離開酒店，行左幾條街，又轉左幾個圈，我見佢兩頭望，於是問..
小小力：「我地去食乜野架? 」
明：「o個度好多野食架，你去到可以自己諗食乜野! 」
小小力：「咁，你o係度搵咩呀?? 」
明：「我搵緊春風路呀，食野o個度o係春風路呀!! 」
小小力：「下?? 你搵緊春風路?? 」
明：「係呀!!」
小小力：「….. 頭先o個間廬山酒店咪o係春風路lor…」
明：「下?? 係咩? 」
小小力：「係呀!! 你又話o係度住過幾年D路好熟既….. 」
我開始有D驚。
食完野，行完書城…
明：「你依家想去邊呀? 」
小小力：「下?? 深圳我都唔識路，唔知有咩地方好去bor.. ，咁，不如去華強北路睇下啦，你識唔識去架? 」
明：「我識架!! 」
小小力：「咁點去?? 」
明：「坐的士lor!! 」
小小力：「車!!……坐的士我夠識啦!! 」
最後帶明坐地鐵去…
第二日，明又話要帶我去食野…
明：「呢次我真係識，又好近，不過我唔記得點行過去，不如坐的士啦!! 」
小小力：「好!! 坐啦坐啦!! 」
明：「司機，國風路XX餐館!! 」
小小力有D驚，點解? 因為我地上車既地方…. 就係國風路啦!!..Anyway，或者國風路好似彌敦道咁長，行都有排行呢。
上左車，司機開車，行左唔夠20米停車，因為…. 到喇!!
明：「下?? 」
小小力笑到收唔到聲。