什麼都不知道

最近，有某屋村被連環爆竊。令老細醒覺要加強檢查大廈出入口推手bar是否正常運作。叫負責operation嘅officer去跟進。幾日後，開一疊單俾工程部跟進，一度門一張單，「推手bar損壞」，足足三十一張。好明顯，呢D單唔係去檢查完開出黎嘅，係坐o係度寫黎交功課嘅，張張一樣。開左單就交左功課，交俾工程部，之後去做「關人隱士」。
我問:「損壞? 點損壞? 撞爛?? 鎖唔到?? 開唔到??唔響警報??.......」
之後，聽到每日聽十數次嘅一句說話...
「我乜都唔識架，呢D工程嘢我點識呀?」
唉.....乜都係工程嘢， 開唔開到門都係工程嘢.......
我話:「咁多，我要出標書去做喎!」
同事話:「老細叫做嘅!」
我話:「做唔係問題，但咁出發就有D問題。一次過發現三十一度門有問題，老細會覺得，第一個可能性，昨晚被人惡意破壞，但大廈冇保安架咩?? 第二，從來都冇人巡查大廈出入口推手bar。兩樣都係你睇，你想死邊樣??」
同事話:「咁等我睇睇先!」
第二日，睇完返黎，三十一隻推手bar損壞變成..........三隻!!

唉!! ….............真的什麼都不知道嗎??

水平錶的創示

某同事負責公司高空工作車維修工作。一日，部高空工作車被駛去維修，返黎發覺唔見左 個水平錶。水平錶嘅作用係測部高空工作車係唔係o係水平位置，只有o係水平位置，升降臂先可以安全升起進行高空工作，如果工作車o係傾斜位置升起升降臂，全車有返轉危險。

負責嘅同事見唔見左個水平錶，竟然勞師動眾周圍去搵粒建築用嘅水平珠去代替唔見左嘅水平錶。

一時又話台灣水平珠，一時又話韓國水平珠，一時又歐洲.....唉!! 三個月過去，話仍然搵唔到適合嘅水平珠。三個月冇高空工作車用。
其實，按常理，部高空工作車嘅零件係唔係應該搵返原廠高空工作車供應者問呢?? 舉個例，你部Sony手機壞左，你竟然拿Sony手機去Nokia修理，人地話冇得修理，於是你好頭痛，覺得好煩，勞師動眾周圍去問Apple有冇得修理，Motorola有冇得修理，Samsung有冇得修理，就係偏偏唔識問返原廠Sony有冇得修理......死唔死??
最後，呢位同事離開左(當然唔係因為呢件事)，老細交左俾我，我問返原廠，幾日已經搵 到個水平錶，.......... 唉!!
係聰明定係蠢，往往唔可以只睇表面，............
你以為我聰明，我奇實可以係蠢，............
話搵唔到水平錶嘅同事最後要做D乜?? 係冇嘅!! 因為佢已經盡力，做唔到有咩辦法?? 樣樣事都係咁，仲有幾多嘢要做??
我呢?? 本來唔係我做唔關我嘅嘢變左由我做!! 樣樣事都係咁，你估下我有幾多嘢要做??
正是「做得嘅做死，唔做得嘅歎死!」
扮白癡?? 只係自己過唔到自己囉!!
聞說呢位同事離開公司係去做生意，我祝佢生意興隆，一本百利。

請指教

猶豫(hesitate) - 揸唔定主意。
游移(vagrant) - 擺動，位置上不定地移動。
兩個詞語，意思相同嗎?
昨日，睇蘋果日報，有標題<肥媽突棄選　白韻琴游移　巴士阿叔攞表 公投提名 余若薇：有冇對手都唔會鬆懈>
係唔係即係話白韻琴行黎行去，唔知去唔去攞表好呢??
文中說:「不斷狙擊社民連前主席黃毓民的白韻琴也未有明確表示一定去馬。」
應該係猶豫，定係游移?? 係唔係通用??
我中文差，今時今日先知有「游移」呢個詞語.....
請指教!

奧斯卡電影

自己一向對奧斯卡得獎電影都冇乜好感，甚至係本來一套有興趣睇嘅電影，因為佢得左奧斯卡獎而最後放棄唔睇。或者，係因為我對奧斯卡嘅評審太過有信心，佢地認為好嘅電影，我多數睇唔明好左咩地方!
星期六，同友人Michael睇左第一次奧斯卡得獎電影《拆彈雄心》(The Hurt Locker )。睇完都唔知套戲想講乜，主角好似精神病，著哂保護衣去拆彈，但一埋到去拆彈就除哂佢，咁著黎 為乜呢? 自己扮哂Rambo，冇哂紀律但軍隊裡面可以冇人理，下下去拆彈去追擊敵人，三個打三十個都得。美軍比香港警察還要有禮貌有愛心，點解伊拉克人會咁憎美軍呢??
.......垃圾電影一套。

放飛劍

星期日，同仔仔返完學，去銅鑼灣探肥B!! 順便同肥B媽媽講下幫肥B搵幼稚園D嘢!! 因為年中佢地就搬去大角咀喇!! 港灣豪庭呀!! 真係富貴!! 太太話朋友好多都過千萬身家喇!! 係得你咁窮!! ....人地書又讀得少，又冇乜特別技能，你話你讀書有咩用呢??
哈哈，我真係唔識答喎。o係搵錢方面，讀書真係唔係一個保證黎喎!!
講返肥B，因為早一陣子佢地回鄉探親，已經有兩個月冇見喇!! 越黎越肥!! 兩歲小朋友(大我仔仔7日)，我估佢有接近50磅，小腳已經比我前臂還粗，我太太抱一抱佢，谷都面都紅哂，真辛苦佢媽媽。但佢媽媽仲話要加奶，Oh! My God!! 睇見肥B食飯，好似飼金魚咁，你俾咩佢都張大口照食，三大碗飯都食到，唔知飽!! (我食兩碗都食唔到，我仔仔更加一碗都食唔到!!)。 肥b又唔多郁，行十幾步就要坐車就要抱，又容易訓著，三分鐘唔使訓著。我太太話生仔生著肥B就好囉，容易照顧。我就覺得有個咁嘅仔都幾擔心。或者，男人同女人睇嘢唔同喇!!
肥B好自我，叫佢叫人佢唔叫，媽媽叫都唔叫，聲都唔出，見面七個鐘一句聲都唔出!! 真係大丈夫話唔出就唔出!! 但肥B事實上好聰明，佢小肌肉控制得好好，放碟播DVD機好靈活，說話已經可以成句講，我想我仔仔三個月後都做唔到!! 肥b媽媽話係因為睇得電視睇得DVD多喎，我就覺得係血統問題喇，畢竟仔仔嘅爸爸媽媽都較一般人蠢，所以仔仔大個真係要比別人加倍努力喇!!
記得上次見肥B，我覺得佢好粗魯，唔鐘意就打人。今次都冇變，而且變本加厲。打我仔仔不單只，搶其他人嘢搶到就開心，唔理大人定小朋友嘢都要搶。我等位食飯時靠著欄杆佢 都要推開我，我抱起佢話俾佢聽唔好，佢仲想揮拳打我，我用一隻手捉著佢兩隻手，佢同我鬥力，堅持要打我，當佢發覺唔夠我大力，竟然用口水吐我!! Oh!! 我咁大個人都未俾人用口水吐過!! 但肥B媽媽都冇鬧佢冇打佢，只係幫我抹返D口水!! 我估，肥B咁大個人都未俾人打過!!
有時想，不如你俾肥B我幫你教喇，好過浪費左一個咁聰明嘅小朋友!! 但想真，或者肥B媽媽覺得咁先係好呢?? 又或者，我根本都冇本事教好肥B呢，可能我教仲差呢!?
教仔真係一門學問!!

潮濕

有好多年天氣都冇試過咁潮濕，屋外走廊地面同牆身日日都濕哂，好似剛剛洗完咁!! 全屋牆身同天花都起哂黑色嘅發霉，真係好似鬼屋咁!! 於是星期六，同工人同稀釋左咁漂白水抹牆身同天花，清潔之後，屋企都光返好多!! 但用漂白水抹過，牆身同天花可能會開始爛，年尾可能要預返筆錢裝修一下，畢竟都已經住左十二年，而且仔仔都開始大喇!!
除左屋，人都周身唔舒服!! 訓又訓唔到，人又容易煩躁，仔仔個身同嘴都出左好多粒粒!!仔仔都發脾氣，要開冷氣先訓到覺。
希望潮濕日子盡快過喇!!

兒子的首次面試

星期六，連同太太同仔仔到東涌聖公會幼兒院面試邀請。其實本身唔打算俾仔仔讀幼兒院，就算幼稚園都唔係打算讀呢間。不過，俾仔仔去面試，睇下仔仔嘅表現同反應，好有個底線點樣教好仔仔，亦睇下面試雖要點準備，而且，多一個offer在手都冇壞。

去到面試，要等。見之前個小妹妹面試完出黎，叫佢同老師拜拜，唔講，叫佢錫老師，唔錫!! 唉，呢D小公主，唔知仔仔將來D同學係唔係咁架呢!! 我見我對面屋個小妹妹(同仔仔同年同月同日出世。)又係咁，佢媽媽叫佢叫人，佢答:「唔叫!!」。叻就好叻喇，講嘢字字好清楚，但D公主性格就真係難頂。原來佢爸爸都係咁，早上見到小妹妹爸爸，我地同佢打招呼講聲早晨，小妹妹爸爸望一望你，跟著轉眼望上天花板，當睇你唔到。唉!! 你想小妹妹有禮貌都幾難!!

講返面試，等候期間，要裝一份問答題。問答題全部係開放式問題(Open-Ended Question)，問嘅係家長對幼兒教育嘅理念(例如，幼兒教育應該以什麼型式進行，指導式?? 探索式??或者係其他?? 為什麼??)，家庭同學校嘅角色(例如，家長對老師嘅期望，為什麼??)，兒童品格嘅建立同重要性(例如，論守時)，社會共融(例如，幼兒與其他特別需要既小朋友，如學習障礙既小朋友嘅相處之道，怎樣影響幼兒未來發展，對社會影響，又怎麼教小朋友??)，家長嘅特殊知識/技術(例如，木工，電工等)怎樣可以協助校方/小朋友學習!?，論全日制與半日制之好壞等等三十幾條問題!! 難過我自己見工!! 但吹慣水嘅我通識都難我唔到嘅，但我在想如果太太一個帶仔仔黎面試，可以即刻返屋企喇!!

到真正面試，反而好簡單。老師叫仔仔自己坐o係度玩玩具，睇仔仔反應。問下我地仔仔D生活習慣咁。二十幾分鐘完成，時期老師叫仔仔俾D玩具老師，俾D玩具爸爸媽媽，玩完幫老師接返好D玩具，離開有冇同老師拜拜咁。仔仔全部都做到!! 面試順利完成，四月至六月有信通知，八月開學，但一定唔可以穿尿片先可以囉!!

過年影評

其實，電影院應該俾張VIP卡我喇，我睇咁多戲!
<阿凡達>
初二，終於同太太同個女到九龍灣MegaBox睇左iMax版嘅<阿凡達>。
失望!! 爛片一套!! 簡簡單單嘅故事，平鋪直敘，個半鐘乜都講哂，就係為左展示佢嘅3D拍攝技術，開個櫃都3D畫面轉轉轉，爬樹都爬左半個鐘，對故事發展毫無幫助，睇到頭暈眼花，太太睇到訓著左成個鐘，醒返都跟到個故事，個女直頭睇到嘔。個故事又幾奇怪，D生物生出黎有個好似USB咁嘅插頭俾D阿凡達插落去控制佢，一種生物活著嘅意義就係被另一種生物控制。阿凡達嘅世界似原始人，用弓箭，冇衣物，睡在樹上.....但佢地竟然能夠明白現代人咁高度發展嘅語言......呢套戲，我俾20分，俾最後o個段格鬥!! 講感動講環保，可能拍套<菜園村>更有意義。
<孔子之決戰春秋>
過年前睇!! 睇之前，你對<孔子>有乜印象?? 萬世師表??有教無類嘅精神?? 儒學學說?? 呢套戲裡面你乜都搵唔到!! 正如底B嘅IQ題話:孔子唔係咩思想家，係一個老人家。呢套戲裡面，孔子係一個毫無建樹，毫無思想，周圍流浪乞食等死嘅老人家。周迅嘅角色係多餘嘅，出場到死都係半個鐘，可有可無!! 戲裡嘅孔子話:「改變唔到人，就改變自己嘅想法。」如果孔子咁圓滑，仲使乜周圍流浪?? 呢套戲，我俾0分。
<波西傑克森:神火之賊>
類似<哈利波特>，<魔戒>，<魔幻王國>。前兩套睇左幾集都唔知想講乜。<神火之賊>講天神宙斯唔見左神火(閃電)，要海神之子波西傑克森搵返返黎。故事簡單，特技有創意格鬥精彩。我俾70分。
<72家租客>
太太話過年要睇笑片，在<72家租客>同<花田囍事2010>之間放棄左後者，黃百鳴同吳君如做嘅笑片，笑得最開心應該得佢兩個。今天有同事話睇左，垃圾片一套!! 笑都唔笑下喎!! 講返<72家租客>，算係幾多笑位，又唱又跳又多明星，幾熱鬧，冇乜特別劇情就預左。俾70分。
<蘇乞兒>
之前一晚睇過電視重播袁和平十幾年前拍嘅<英雄豪傑蘇乞兒>，無論故事同格鬥，感覺完全冇進步過!! 仍然停留o係1993!! 你話套戲好好睇就絕對唔係，你話好差又唔講得，但可唔可以唔好又講精神分裂(佢叫走火入魔)，一年睇幾套講精神分裂，我就黎精神分裂喇 ，俾50分。

平靜渡新歲

子曰：「吾十有五而志於學，三十而立，四十而不惑，五十而知天命，六十而耳順，七十而從心所欲、不逾矩。」
踏入虎年，我將進入不惑之年。30歲確立了自己平生志向，40歲經過10年見聞、經歷，更能確信自己當初所立志願是對的，而不會再迷惘，也不會再搖擺不定。我睇返自己行過嘅路，雖然唔平坦，但真係幫到自己累積人生經驗，心境都比以往平靜得多。好多事，就算係好簡單，唔係你想就做得到，依家得失都唔太重要囉!!
新年，天寒地凍，好有過年氣氛。經過一年忙碌，能夠一家人一齊坐埋食飯，我已經好滿足囉!!
今年，初一同情人節同一日，上一次係57年前，下一次係38年後。
但如果可以，我希望下一次初一同情人節相遇，我同太太都可以一齊見證。到時我地都係老公公老婆婆囉!! 哈哈!!

見家長

星期日，個女派成績表兼見家長，自從上次個女去街去到唔返屋企訓，已經又四個月喇！我地又聽社工講，唔好迫唔好鬧！咁又過左四個月，又睇下點！見家長時，社工都在場!
約早上8:15見家長，我同太太同個女8:00到，老師同社工都遲到！你教學生守時，結果3個都遲到！唉！
未開始，大家坐底，但個女竟然踎o係張凳上面! 奇唔奇？更奇既係，兩個老師一個社工都見到，但冇一個話佢架喎! 係唔係咁先係正常? 平日上堂都係咁?我地家長係唔係都應該踎o係張凳上面黎開呢個家長會呢?
開始，老師話個女其實應該值得贊，數學有94分！
我睇睇張成績表，好attractive，有科social studies個分數得個位，８分！
我問老師：「老師呢科咩黎，幾多分滿分!?」
老師答：「係Ｄ時事常識之類，滿分係１００分!?」
唔係掛! １００分滿分得８分呢個學生你仲贊乜野呀！？ 係唔係咁先係正常? 個個學生本身應該食蛋架!?
睇落去，平均成績由上次Band 1跌到落Band 3，即係可以踢出佢讀緊既精華班!
跟著，3次缺席，５次冇交功課，9次校服不整齊！
老師話，其實真實數字係冇交二十幾次功課！！
Shit!! 點解老師要幫學生教學生講大話? 冇交二十幾次就寫二十幾次囉！點解冇交咁多次功課學校都唔話俾家長知?
我都未問，我個女已經用高八度既聲線去話老師: 「咩二十幾次呀，十幾次呀！」
咁冇禮貌同老師講野，老師竟然冇反應 .....
我問佢: 「十幾次夠衰未？咁照寫返十幾次冇交功課落成績表囉！你係應該冇交功課架嘛！」
個女唔出聲，黑口黑面咁囉！ 公主可以俾人鬧架咩！
我問老師: 「我個女，日日夜晚7:00至放學返到屋企，由學校到屋企3分鐘行到，即係差不多7:00至放學，返到屋企就訓，食飯都三催四請，食完飯就講電話，每日平均講150分鐘電話，我一問佢佢就話問同學功課，點解同學會知做咩功課但我個女乜都唔知架呢? 乜好多功課咩?? 日日問150分鐘喎? 真係全日發生過既事講兩次都得喇! 」
我繼續講: 「又奇喎！問150分鐘問得咁清楚，但佢可以半年冇交二十幾次功課架喎，點解呢」
我繼續問老師: 「9次校服不整齊又係咩呢!? 」
老師: 「係D校服唔合規格，又帶耳環，又化妝咁喇! 」
我繼續講: 「點唔合規格？」
個女講: 「我對鞋有個銀扣又話唔得要我油黑，人地又得」
老師: 「你唔好再俾藉口自己喇! 」
化妝返學，返學係唔係應該化妝？我有次在樓下見到個女，化哂妝，我問佢去邊，佢話買杯麵返屋企食....... 化得妝黎麵都食埋喇!! 我話佢，佢就怒視我囉！ 想殺我咁！
臨到考試，連每日返學用既書都唔見埋!
其他仲有好多好多問題，但都係咁喇，老師社工唔得閒聽！
書讀唔讀得到都冇辦法，但人既性格/本質先係至命!
回家，爸爸要我同佢返大陸，晚上從大陸返黎，發覺個女帶人返屋企玩啤！早上同佢講既已經忘記哂， 叫佢唔好帶人返屋企佢當你唱歌！」
唉！書，我肯定佢讀唔成，可能中三已經被踢出校！至於人格，如果我冇睇錯，佢應該仲衰仲自私過我細佬!
一個人衰到連自己父母都放棄你，真係唔死都冇用架喇！

大笨象和七個小孩

昨晚睇電視劇，劇中講左一個<大笨象和七個小孩>的故事...

很久之前有隻年輕的大笨像在原野上看到有七個被人遺棄的小孩，大笨象含辛茹苦地把他們帶大後來這七個小孩長大後各自成家都離開了大象養母，但是每次一遇到挫折失敗這七個小孩就會回家找大象媽媽伸手要糧，象媽媽總是竭盡所能將僅有的糧食全部奉上，後來七個孩子再次向象媽媽要糧食大象為了幫助他們將她自己最寶貴的象牙折斷，交給這些他最疼愛的孩子們去變賣，最後象媽媽因為失去象牙無力保護自己被其他猛獸攻擊而死，幾個孩子也因此後悔莫及...

我在想，幾個孩子到底後悔什麼?? 自己令媽媽死左?? 定係自己要糧要得太盡，咁快就冇得食? 呢個世代嘅孩子，又會點諗?

故事嘅總結，來自《紅樓夢》第二回裏「智通寺」門傍的一副對聯。
「身後有餘忘縮手，眼前無路想回頭。」
比喻人貪得無厭........

咁，貪得黎識「縮手」係唔係就係好事 ?? 幾個孩子問媽媽伸手要糧唔要得太盡係唔係就係好??

我反而覺得... 眼前無路想回頭....係真!!

人好多時做錯事，唔會反醒唔會認，用好多理由/藉口為自己開脫，或者做一件更大嘅錯事去掩飾，結果一錯再錯，錯到無法「回頭」，後悔已經太遲。

《左傳》有話:
「人非聖賢，誰能無過，知錯能改，善莫大焉。」
《論語》又有話:
「過而不改，是謂過矣。」
有了錯誤而不改正，這便真是錯誤了。

孩子，希望你好好記著。
「凡有錯處，隨覺即改，如飾非文過便一生無長進處矣。」
「人有過失，非其父兄，孰肯誨責？非其契愛，孰肯諫諭？泛然相識，不過背後竊議之耳。」

笑唔出

好唔好笑?? 普通人睇可能覺得好好笑!! 但如果你係佢父母我估你笑唔出!!如果你好似我咁，屋企有個90後嘅子女，你都應該笑唔出!! 因為佢地就係咁，死不認錯，不繼為自己為事件找藉口!! 點解年輕人會變成咁??
不如問下我地自己，係唔係將商業世界嘅生存之道帶左返屋企，禍延下一代。

失憶

人腦，真係要經常鍛鍊，唔係好易生鏽。
自從讀完個學位課程之後，好似冇咩嘢做冇咩嘢諗。工作都係一樣，日日都係D瑣碎事，呆呆地。回家，同仔仔玩，訓教，又一日!! 放假， 同仔仔玩，同仔仔返學，又一日!! 個人好似懶洋洋提唔起勁咁!! 出面(東涌以外)嘅世界，離我越黎越遠，我什麼都不知道，亦冇乜興趣知。出街，帶住太太帶住仔仔，都係消費消費再消費，不如同仔仔o係東涌玩，我真係冇嘢想買，冇嘢想要，冇嘢想食。睇戲? 我更加唔想離開東涌喇，呢度從不滿座，訓o係度睇都得!!
去讀哲學，唔知係我層次低定哲學太高深。上左半年堂都唔知點咁，你問我學左D乜我真係完全答你唔到。
現時嘅狀態，真係難以形容!!
太太話我成日有幻覺，脾氣好差，叫我睇精神科醫生!!
我又覺得冇咁嚴重，只係成日好似失憶咁，幾分鐘前嘅嘢都唔記得!!
呆下呆下咁囉!!

奶敏感

仔仔連續四日嘔奶，而且嘔得好緊要，成支奶嘔哂！！
帶仔仔去睇醫生， 醫生話仔仔係對奶類敏感！！即係一飲奶胃就產生大量胃酸，好容易嘔！！所以仔仔將來大個左都唔食得奶類食物，例如奶，奶茶，朱古力，乳酪，芝士，雪糕，益力多（乳酸）。每次有感冒都會先嘔，而且將來壓力大都好容易嘔。
我唔奇怪，因為我自己都係，我係唔飲奶唔飲奶茶，但我覺得唔開心。好野又俾唔到個仔．．．
還有，醫生話小朋友每年十月都要打流感針，唔好話冇乜事唔打。醫生話佢幾個孫仔都打哂，至於豬流感針，醫生話千祈唔好打。

反高鐵

廣深港高速鐵路，又稱廣深港客運專線，是中國一條建設中的高速鐵路，連接廣東省的廣州、東莞和深圳，以及香港特別行政區，也是中國「四縱四橫」客運專線中，京港客運專線（京港高速鐵路）的組成部分，亦為珠三角城際快速軌道交通網的骨幹部分。鐵路將主要提供廣深港之間的客運服務，並計劃發展長途高速鐵路客運業務。列車時速可達350公里，由廣州至香港行車距離142公里，全程行車時間為48分鐘。

廣深港高速鐵路香港段，將經過落馬州、米埔地底、牛潭尾、雞公嶺、八鄉、石崗、大帽山，再經西九龍填海區至西九龍總站，途中不設分站，路線放棄與港鐵西鐵線共用路軌，採專用路軌，香港段全長二十六公里。政府表示，乘客將來由西九龍往來深圳及廣州，分別只需十五及四十八分鐘，而往來上海及北京的時間，則可縮短至八小時及十小時。政府表示建造期及營運期可分別創造五千五百個及一萬個職位，經濟效益為八百三十億元。
我認為，以香港政府以往起機場快線同西鐵嘅經驗，建造嘅時候通常超支，經濟效益亦通常被誇大，你睇睇機場快線?? 真係未見過有空得咁緊要嘅列車。為左建造期及營運期可分別創造五千五百個及一萬個職位?? 660億我相信可以做更多嘅嘢，製造更大經濟效益。
往來上海及北京的時間，則可縮短至八小時及十小時。如果要去上海及北京，你會坐八至十小時火車嗎?? 深圳到上海坐飛機兩個多小時，機票二百幾蚊，你會為左小小錢浪費五六個小時嗎?? 廣深港高速鐵路，地理位置上唔會幫到香港，只會幫到廣州。
再者， 仲要破壞大自然環境，要鐵路，可唔可以利用現時西鐵線及東涌線均有大量的剩餘運載能力呢? (東涌線成日十幾二十分鐘先一班，高鐵會唔會兩三分鐘一班??) 香港已經過度建設喇!!
我就諗唔點解要咁貴起高鐵喇!!

小孩子大脾氣

最近發覺仔仔好大脾氣，佢要嘅嘢得唔到就喊/大叫/打人/倒亂/扭計，一定要我出現先制止到佢。一個做好人一個做衰人? 錯哂!! 仔仔眼中全世界應該得一個做衰人 – 就係爸爸。因為玩就個個玩，打/鬧/教都係得爸爸一個。好似仔仔倒亂做錯左，媽媽同爺爺都會話:「爸爸打!!」。就算爸爸返左工都仲係得爸爸一個打，媽媽同爺爺都唔打!! 咁得唔得?? 我驚將來仔仔好驚我，但我又可以點呢??

十月圍城

同太太睇左<十月圍城>，故事講一班人保護孫中山先生。呢套電影好睇在有值得我地反思嘅空間。
正如孫中山先生講:「行醫只能治少數人，革命則能救多數人，醫國比醫人更為重要。」在當時，為左救國救民，革命係必需嘅，革命亦必需要犧牲，但呢種犧牲係唔係需求出於自願呢?? 為左達到革命嘅目的，係唔係可以不擇手段去犧牲別人嘅生命呢?? 片中呢班保護孫中山先生嘅人，有D根本唔知自己要保護嘅係咩人，更加唔知自己係必死!! 如果知道，佢地仲會唔會咁做??
革命係改革舊有嘅思想/制度/個人核心價值，但唔代表舊有嘅全部都錯。信守承諾係唔係唔再需要?? 社長承諾支持革命嘅朋友唔會將朋友嘅獨子涉及事件中，但最後朋友嘅獨子代替孫中山先生被殺，社長如何面對呢個朋友?? 一個冇信用嘅人仲有咩資格講革命。如果呢個決定係朋友嘅獨子自願嘅，咁又點呢?
保護孫中山先生呢班人，根本上大部份都唔係為左革命事業，佢地係唔係做左好事呢?係唔係做左一件好事，應該用結果去介定，定係以動機去衡量呢?
<十月圍城>我俾80分。

人生可以很無聊

什麼是「無聊」，我覺得很難下定義。每人心中都有一個定義，每人都有自己認為的「無聊」，只係好難去解釋。可能你會認為我寫Blog好「無聊」，或者睇呢個Blog好「無聊」。有人甚至覺得你做一D佢自己唔識既嘢就係好「無聊」。舉個例，你入大學讀書，你覺得好有意義，但你個朋友冇乜讀過書可能會認為你好「無聊」。相反，你個朋友日日好享受在家打機賭馬睇波，雖然唔憂食唔憂住，佢可以日日咁做你都覺得佢好「無聊」。
我呢?? 我覺得成日只係諗著點去玩點去打扮點去消費既生活好「無聊」。
當然，你可以唔認同，就算認同你都可以選擇繼續過你既「無聊」生活，你既生命屬於你自己，誰能左右你呢?? 人生係可以很無聊咁過架喎!
但，你有冇想過，生命有乜意義??
生命有乜意義?? 有待你自己去找，去定義。但，生命最有意義既地方係在於 – 生命不可以重來，亦有盡頭。如果你既生命事事可以重來，亦沒有盡頭。咁，所有事物你都會試得到，你再冇嘢想，你唔會再有衝動，你係神呀!!
正因生命不可以重來，亦有盡頭。所以人就要把握時間，珍惜生命，浪費左一次，就再冇第二次喇!!
有人說:「人生真的很無聊 ... 如果人生可以重來該有多好!!」對一個自覺很無聊嘅人，如果人生可以重來，可能會更無聊。
新嘅一年，希望大家把握時間，珍惜生命，珍惜你身邊嘅人，尋找自己生命的意義!!

海洋公園

少說已經有二十五年冇去過海洋公園。那個時候，海洋公園只係俾你睇海洋生物，係冇機動遊戲架。亦因此，當時o既海洋公園好冷清，冇乜人去!! 叫香港人為求知去睇海洋生物，你慳返啖氣喇!!
今年聖誕，決定左一家人去海洋公園。因為如果去迪士尼，仔仔就好悶!! 去海洋公園，仔仔起碼可以去睇下貓熊睇下魚。
聖誕日，未到十點已經到海洋公園，無論搭車買票都唔多人，可能因為大多數人平安夜玩得太夜未起身，整個上午都冇乜人!!
依家o既海洋公園真係大，尤其係佢依山而建，一個場地去另一個場地又冇交通工具接駁，o係個山度行上行落你都幾係嘢，再加上帶住BB，半日已經散哂!!
太太被個女帶去玩過山車，嚇到喊!! 唉!! 你估仲年紀細咩，嚇一嚇，我驚冇命落返黎呀!!
結果我玩左D乜?? 我乜都冇玩過!! 咁係唔係好唔開心?? 唔係喎!! 我見到佢地咁開心我就好開心架喇!!
除左玩機動遊戲，就係睇動物。仔仔見到大貓熊小貓熊就好開心，不停叫「貓貓」，俾佢睇下真正o既大貓熊，唔係仲好過睇相睇圖睇電視咩?? 至於海洋生物，太多人唔係睇得好多，但睇到仔仔都好開心!!
最後，睇左個冰上匯演，好精彩!! 但開始冇幾耐，BB已經訓著囉!! 希望下次可以再去喇!

普通話

我笑左好耐，想問，係唔係唔講得廣東話架呢?? 就算係!!背o個一分鐘誓詞有幾難呀?