心煩

BB呢幾日都唔肯食飯，一放入口就吐返出黎。昨晚仲嘔，將所有食左既嘢都嘔返出黎，肚仔又脹又實，又好扭計，成晚唔訓。做父母既當然擔心，但又唔知咩事。今日要帶佢睇醫生!!!
照顧小朋友，最怕真係佢病，佢又唔識講....淨係喊!!心都煩埋!!!

四連休

星期五補假，星期六短週，星期日再加星期一重陽節。好一個四連休!! 大家仲問我去邊度玩。玩? 仲辛苦個返工呀!!!
星期五，上午去個女社工。唉，我就覺得幫唔到D咩喇!! 一個社工睇幾十個學生，你同佢講過既佢都亂哂籠，個學生都唔會有咩信心!!! 下午同工人續約，又去驗身，仲要帶住BB周圍走，很累!! 晚上又要幫老婆去整電話。.....返到屋企都九點幾...!!
星期六，老婆叫我同佢行街，由上午九點幾行到下午六點幾仲要破財....返工好過!!
星期日，同BB返playgroup!! 由上午九點幾到下午三點幾，之後陪老婆去飲(但我冇份飲) ，之後飲完接老婆，零晨兩點至訓!!
星期一，老婆話同個女買衫，我已經冇力投降喇!! 唔去?? 結果係我一個人執屋!! 執左一個下午...!!
今日，返工!! 終於可以休息!! 原來真正既休息係四連休之後至開始。

繼續鬥

鬥完一個又一個。
個女週末上午11:00去學日文，跟著話去海洋公園!! 到晚上10:00，太太打電話俾佢，佢話11:00返。之後，再打唔通電話。到半夜3:00，再打到電話俾佢，佢話已經去左同學屋企訓，真係離哂普，我地唔打俾佢佢都唔打俾我地，講講下仲收線。真係將在外軍令有所不受，出得外就話之你，最多返黎鬧兩句!! 之後，又再打唔通電話。直至第二日下午4:00都搵唔到又唔打電話返黎。太太話由得佢死，唉!! 我就決定報警，到底佢係唔係真係去左同學屋企冇人知!! 因為已經超過24小時，警方受理，決定出逮捕令，但我冇帶佢證件相，返屋企搵...o 係屋企樓下見到佢兩個同學同佢一齊。等佢返左入大廈，問佢兩個同學，佢地初初話冇同 個女一齊，之後又話個女去左太古，跟著又話都冇講，太古都冇講過!! 古古怪怪!! 去警署銷案，警察鬧佢兩句，佢又覺得唔高興!! 唉!! 叫警方轉介去社會福利署搵社工幫手。佢見完社工，社工話佢覺得我地唔應該報警，佢點解唔可以去第二度訓? 亦覺得我地唔應該鬧佢夜返....
唉!! 我真係唔識教!! 呢個社會係點，原來係由D細既話事，又睇下一路做錯事一路贊賞佢點教好一個人?? 個個都話唔好迫唔好鬧...我都想呀，你估我好鐘意鬧人呀??
人根本天生有種劣根...你試下你唔做嘢但老細又贊賞你又加你人工，你仲做唔做嘢?
鬼唔知要守規則守承諾唔容易呀? 人人都想鐘意做乜就做乜囉!! 冇懲罰，邊個願意守規則?
冇規則，世界點運作???
唉!! …....
今日，今日賊仔又返黎偷嘢走，爸爸話D嘢你都唔用架喇!!哈.... 我唔用等於佢可以偷? 咩道理!!
呢個世界，好多人係你唔可以亦唔使同佢講道理!

香港人的英語水平

特首曾蔭權發表施政報告，期間泛民幾個人全程舉牌，標語如下：Bow Tie keep your election promise。特首指著標語牌說「文法錯了，英文單數動詞應該有s」。
香港人英語水準之底，真係可見一斑！！
我同你講野，我係第一身，你係第二身，加乜鬼野s呢？（第三身，他/她/它單數動詞 先加s嘛!)
我輩書讀得唔好，但小學都識！
唉！
另一例子(笑話only)：

廢人

睇返最近既post，似乎怒/惱氣掩蓋左理智，Blog漸漸變成左一個發洩工具，好不智。希望自己能夠冷靜下來，唔好再俾呢D事影響，寫返D嘢同大家分享。
自從返左呢份hea工之後，人較以前懶散，思考能力都好似一下子慢左落黎。人生真係需要不停地戰鬥(或者只係我係咁)。一停落黎，好似等死咁……
夜晚去讀哲學，可能因為太平既關係，同學既質數真係好差。討論問題既時候，發覺大家講既嘢都係冇point，一味吋嘴一味大聲，好似街市講價咁。對我，真係冇乜得著。淨係知道以後報course原來考慮下有D咩人讀都好重要!!
咁，最近冇咩嘢好做喇……..
唔知幾時變廢人呢?

鬼

真係好煩!!
o係屋企，太太又話見到鬼，話訓教既時候見到一男一女，想叫我，但俾對鬼男女壓住動彈不能。仲話已經唔係第一次!! 唉!! 好煩!! 由新屋入伙到依家我住左呢度十一年，真係乜鬼都未見過，呢度又冇死過人，何來鬼?? 自己又話小小光都訓唔到，用黑色畫紙封哂所有窗，成間黑房咁，陰陰沈沈，自己都嚇死自己!! 又話工人都見過!! 唉!! 個工人又係，自己D嘢唔記得擺左o係邊，又話隻鬼偷左!! 底能!!
問我點?? 唉!! 已經好煩，唔通仲要做埋捉鬼?? 下次見到鬼，叫佢直接搵我喇!!
我就黎精神錯亂架喇!!

休克

或者因為感冒，又或者係其他原因，昨晚o係屋企行下行下，突然眼前一黑，雙腳無力，暈到跌落地。可能太大份，跌落地太大聲，嚇親工人。醒過來，又好似冇事咁架喎!!又冇跌傷，Body Check又乜事都冇架喎!! 唔知會唔會有日行行下下路死鬼左呢??
今日返工，都仲係呆呆地，可能需要放鬆休息下!!

榮譽

「光纖之父」高錕，昨日終於獲得「遲來的肯定」(現年七十五歲的高錕,患有老人癡呆症)，獲頒諾貝爾物理學獎。睇返光纖既出現，真係改變左世界，唔單只係科學技術既突破，仲改變左文化同人類既生活模式。至於呢種改變係好定壞，就視乎人類點樣利用，但一個諾貝爾物理學獎真係實至名歸。
小小力覺得，最令華人感榮譽既係，英國科學界最有地位的皇家學會邀請高錕成為會員，並且和300多年前發現萬有引力的科學家——牛頓，用「中文」在同一本會員名冊上簽。唔知仲有冇第二個中國人做得到呢?

中秋節的四天

中秋節假期，國慶假期，加上一日補假，有連續四天日假期。節目，由30日晚開始....
30日，約左三個小學同學打雀局。因為第二日係假期，雀局好爆都已經預左，未齊人我已經走去開定抬，但都已經係最後一間房。呢間房，自動麻雀抬冇，廁所又冇，電視又壞，.....真係!!! 我問呀姐乜都冇有冇得收平D，答案都係冇!! 約8點鐘，9點先至齊人，冇辦法，咁既日子，人多車多，由澳門趕返黎既朋友塞車又塞船，9點到已經算快!! 其實咁既日子，周圍又多人，價錢又貴，服務又差最好都係留o係屋企。但唔係咁既日子，你又點可以一次過見到三個朋友呢?? 真矛盾!!!
食飯期間，朋友太太追殺令(電話)又到，報告都不在話下。要朋友俾個合理解釋點解電話收得唔清楚。要為一唔合理既問題俾個合理解釋，唉!! 掛斷線，朋友大力拍左個電話落抬。唉!! 何必呢?? 拍爛個電話都於事無補，而且.....個電話都好貴架!!
朋友唔知係唔係耐冇見，冇乜嘢講，大部份時間dead air.....最後都打左16圈到天光，今年第二次!! 打麻雀，慣常冇運的我都係輸，最後8圈食得2手，唯有死守，一個守三個，和左二十幾手，悶死哂!!
天光去飲早茶，澳門趕返黎既朋友已經訓左o係抬!!
1日，回家，冇乜訓!! 本來打算約朋友睇戲，但朋友唔得閒，再約囉!! 下午，去左行街!! 返屋企，個女話返深圳同生父過節，要去三日!! 三日?? 過年咩?? 我已經講左第二日做節，咁即係唔o係屋企做節!! 佢堅持。唉 !! 去陪生父三日，佢生父都冇三日時間陪佢喇!! 陪生父係假，自己去玩就真!! 我本來可以唔俾佢去，但諗返起每次家庭聚會，佢都令到全家唔開心，包括我太太在內都冇人想見到佢，於是由得佢去!! 但咁就出事!! 爸爸可以借題發揮，話做節都唔齊人!! 又話今日爺爺死忌都冇人o係屋企冇人拜!! Oh!! 我今日係o係屋企架!!但佢從來都冇同我講今日拜爺爺，到我話出門口都冇講!! 返黎就話我唔拜爺爺!! 佢係有馬賭老豆姓乜老婆死都唔記得既人，我下午出門口佢都冇打算拜，根本冇打算拜!! 只係一種發洩，因為我迫走佢個仔嘛!!!
2日，早上佢再鬧，話我冇做老豆既威嚴，個女話乜就乜!! 我想，作為一個老豆，我點都比你好，我唔會俾錢個仔偷!! 全世界都有資格話我冇做老豆既威嚴，但你冇!! 再鬧喇!! 要發脾氣你行遠D!! 我係一個孝順母親既仔，但唔係一個孝順父親既仔!! 結果，又冇再鬧，我都冇乜心機!
下午，中秋節，去探婆婆!! 爸爸話，佢又冇病唔使探佢!! 唉!! 我好好彩一D都唔似佢，佢個仔就似佢喇，老豆唔死都唔使探佢，冇著數既嘢就唔使預我做!! 結果冇理爸爸去探婆婆，婆婆好開心!! 晚上同太太睇<建國大業>，比想像中差好遠!!
3日，留o係屋企做節，我訓足一日，到晚上食飯，本來都冇事，但我都講過，每次家庭聚會，個女都令到全家唔開心，次次中!! 飯後，佢又發脾氣，鬧工人好洗左佢件衫，全屋最細但脾氣最大態度最差衰格，結果爸爸又鬧!! 太太都唔頂順，揮剪刀剪爛哂佢D衫，剩下一件，佢仲可以話:「車!! 一件就一件囉，我都冇乜衫架喇!」
唉!! 有時正如我同事所講，一個人係善係惡，路係只有自己可以選擇，環境父母朋友都只係引導!! 我地做父母已經做左引導工作，你要執意墮落，又可以怪邊個??
4日，爸爸去打麻雀，BB細個照顧佢既表姐黎探我地，佢同個女講道理!! ….唉!! 再好再有 理既道理我都講過喇，唔係我冇道理，係佢覺得唔需要聽啫!! 可惜!!
陪BB玩左一日，假期最開心既一日!!

差少少

歲半，BB又要去健康院打針。佢真係叻仔，打針完全冇喊! 之後，做過成長評估。護士話BB既成長進展理想。肥瘦適中，而且智力既進展比較一般BB快!! 護士已經俾左3歲BB既進度我參考。睇返3歲BB應該做到既，我BB有一半已經做到!!
其實，我BB雖然未識講嘢，但係佢明哂我說既嘢喎!!
BB打完針返屋企，
我問:「BB去左邊呀??」
BB:「吉...吉....吉!!」
我問:「係呀!!打針!!吉邊度呀!?」
BB摸住隻手臂:「呀....呀....呀...呀!!」
我問:「打手臂呀!! 痛唔痛呀!!」
BB點頭好大聲:「呀....呀....呀...呀!!」
我問:「痛呀!! 咁重打唔打呀??」
BB大力搖頭 :「呀....呀....呀...呀!!」
係囉!! 佢完全明哂架喎!! ...講嘢可能只差少少!!

卸

老細叫我叫某B君(高級過我)做嘢，某B君想完一輪，同我講:「 Okay，冇問題架喇，你可以做架喇!!」，點解變左我做?? 某b君係唔係理解力有問題?? 老細叫佢做，佢卸俾我做，不如大家估下我做唔做??
老細叫我叫某K君(同我同級,唔同部門)聯絡邊個邊個，我在大家面前同某K君講，某K君在大家面前唔回應我，返到位打電話俾我，同我講:「我唔會聯絡邊個邊個架喇!! 要做你自己做喇!!」不如大家估下我做唔做??
我唔明，點解要叫我叫其他人做乜做乜呢?? 我又唔係佢地上司，我叫救命都冇人理架喎!!
我又想起某B君同某K君既孩子，有一個卸膀既父親，又會點，又可以點!?

影評

二日睇左兩套戲。
第一套，港產片<意外>。全片最精彩就係頭十分鐘，亦即係預告片!! 其餘時間真係又悶故事又唔合理。但我學會左一樣嘢。講故事，無論個故事幾唔合理都好，你只要話講故事既人係有精神病既，咁一切都會變得合理。因為一個精神病人講嘢唔合理係好合理!!
套片我俾10分，係俾頭十分鐘既.....
第二套，西片<求婚的惡魔>。冇乜故事，但幾多笑位，輕輕鬆鬆笑下都係唔錯既選擇!!
套片我俾70分，不過sandra bullock真係老左好多.....
黎緊仲會睇<建國大業>同<偽能叛變>。

哲學第一課

想讀哲學，但一來進收既課程都係以搵食課程為主，要讀哲學真係冇乜選擇。二來時間唔許可，要照顧仔仔，唔可以再一個星期返幾晚學。三來冇乜錢!! 最後，搵左志蓮淨苑一個哲學課程(整個哲學學位讀四年，我只讀一科讀一年，冇證書，但，我唔再需要用證書去證明D咩俾人睇喇!! )，一個星期返一晚。$900讀一年，完全適合我!!
志蓮淨苑只係辦兩個學位課程，哲學同佛學。但課程內容同教師質數都不比其他本地大學差，只係大家感覺「志蓮淨苑」加埋咁平學費好似唔係好認真咁。
哲學第一課，都係D介紹咁喇!! 唔知係唔係學費平，好多auntie報讀。
哲學既過程，都係經過思考同發問去找真理。auntie好多問題，又好多答案，但都係唔中pointc，一味港女式「串嘴」「有佢講冇你講」咁囉!! 都幾破壞學習氣氛架!!
但我興趣不減，希望遲D佢地投入D，或者頂唔順消失喇!! (因為要寫兩份3000字英文既Essay，我覺得佢地寫唔到架喎!! )

北上讀書

轉貼
【明報專訊】摒棄香港教育制度 北上讀小學

香港的教育制度果真如此不濟？
一群在香港土生土長的中產父母，寧願忍受離別之苦，部分甚至放棄本地傳統名校的學位，也要安排子女遠赴廣東省西部上學，投奔祖國懷抱。這所學校，究竟魅力何在？
這天，記者來到位於羅定的喜耀粵西學校，接觸過師生後，心中謎團逐一解開。
早上十時，黃達強夫婦帶着九歲的么女與她的三個同學，提着大包小包跨境上學。先在羅湖集合，由深圳坐火車到廣州，從流花火車站步行十分鐘到省汽車站，轉乘巴士到粵西的羅定，再搭的士抵達學校，全程約需七個小時。

教師心碎 社會功利
為何返大陸？
他們都摒棄了香港的教育制度。
黃達強是一間洗衣連鎖店的老闆，大女在港島區一間傳統名校完成中四後，便前往美國當交換生，讀完中五快人一步進入大學，沒有參加香港中學會考。么女黃盈盈原在香港讀書，今年二月開始北上，降級讀三年班。黃太解釋﹕「內地的程度，除了英文外，全部高過香港，尤其是中文。」
黃太選校，向來重品德多於成績。她說﹕「香港的教育制度令有心做教育的教師也心碎，忙於做行政工作，還要設法令學校出名。教育改革，改完又改，夜晚也要進修，教師也有家庭，有子女的。」
夫婦二人也不認同香港社會的功利文化。黃太說﹕「我們已被訓練成搵錢的工具，整體的大氣候不會培養到好的孩子，我不想自己的小朋友如此，希望她做個有情義的人。」黃先生補充﹕「單單改革教育制度沒有用，要改變的是整個社會的消費文化、電腦文化和投訴文化。」

增廣見聞 立品立志
黃太說﹕「內地與香港要慢慢接軌，我們要與內地多點連繫，互相學習對方的文化。」黃先生則說﹕「在交通過程中她會增廣見識，知道羅定附近有雲浮；知道內地道路沒那麼安全，出入要謹慎一點；知道地域之廣，眼光擴闊，心志也會遠大。」
○七年，夫婦倆一起修讀由法住機構開辦、霍韜晦教授主持的喜耀生命課程後，對人生有所頓悟，促成了讓女兒北上讀書的決定。喜耀粵西學校同為霍韜晦創辦，二人深深認同性情教育的辦學理念，即主張面對自己的心性，念天地之恩情，尊師重道，孝順父母，不怕艱辛追求理想等傳統觀念。黃先生說﹕「這學校先開發性情，然後讓孩子立志，做個有用的人。」

校園整潔 飯後午休
乾淨整潔，空間開闊，是記者對這間學校的第一印象。然後發現牆壁上到處貼上標語﹕「注意安全，才是孝順父母的好孩子。」「勿自暴勿自棄，聖與賢可馴致。」
「阿姨好！」小學生非常有禮，逐一上前問好，記者既忙於採訪，也忙於打招呼。在飯堂用膳完畢，還有同學主動幫我們執拾碗筷。
吃過飯後，吵鬧的校園突然變得非常寧靜，充滿悠閒感覺，奇怪教師和學生都往哪裏去了？ 原來是午睡時間，上下午課堂之間有三個小時休息！教師和學生更多課堂以外的相處時間。

簡樸宿舍 不設電腦
除了校長，師生都是內地人，課程內容受國家教育部規管，孩子會受到內地文化的薰陶。
寄宿生活很有規律，每天六時多起牀，九點半前睡覺。「生活阿姨」負責催促吃飯、洗衫，但同學要自己摺衫、收拾牀鋪。用水桶冲涼，沒有小食部，平日不可用手提電話，宿舍沒有電腦，指定時間才可以看電視。總之，生活回歸簡樸。

黃太曾到學校參觀過數次，觀察教師的為人和校長的作風。她說見過副校長因為一個學生「扭計」而輔導了他三個半小時；也聽過校長不少講座，教導夫妻相處和教養孩子之道，對學校充滿信心。

負笈美國 毋懼銜接
縱然學校有百般好，但俗世眼光仍是對父母的決定充滿疑問。
黃太也明白，「整個圈子都變了，她接觸的是內地同學，我接觸的是內地的家長」。但她不怕女兒跟香港社會脫節，因為一個月會回港一次。她也無懼環境衛生較落後，「學校以外的確是，但校內好乾淨」。
雖然北上前已跟女兒做了一年心理準備，但頭十天，母女都非常不捨。「原來我很掛念她，坐下來也會掉眼淚；『生活阿姨』告訴我，女兒天天拿着家庭照，對着照片說話。」黃太也曾懷疑自己做錯了，但後來見她日漸進步，慢慢克服普通話和簡體字的語言障礙，才覺安心。

關於英文，黃先生說﹕「英文基礎打得好，其實不難學，中文不好卻很難追。」如無意外，盈盈在內地完成中三後會到美國做交換生，銜接也就不再是問題。
對答大方 愛交朋友
短短兩個多月，黃太見女兒已有轉變。
從前總要催促女兒做功課，現在變得用功和集中，也較明白父母想她怎麼樣。大家也較從前更珍惜對方。
盈盈非常懂事，雖然不太願意，仍非常合作地接受訪問，對答成熟。
校園生活開心嗎？「開心，因為有朋友。這裏好大，可以周圍走。」

在這裏讀書有什麼好處？「學懂獨立，和接受性情教育。」什麼是性情教育？她想了一會說﹕「即是如何與人相處，要勤力，尊重老師。」覺得自己有沒有轉變？「以前我不太懂得和同學傾偈，別人稍微碰到我，我即問她做乜撞我，現在我則會說：唔緊要啦！」
記者在上學日逗留短短數小時，對教育成效不敢妄下斷語，但約十對香港父母逆流而上，北望神州，卻是鐵一般的事實。

後記 :
小小力都係一個對香港教育制度好失望既人，政府仲話做咩教育產業，根本上已經忘記左教育既本質同意義。但生活o係香港住o係香港，我地又可以點?? 文中講既學校佢講既教學方法我都幾認同。但太細個長時間同父母分開，缺少左家庭我又覺得唔係幾好!! 再者，用簡體字學中文我一向反對。再加上路程實在太遙遠......
針冇兩頭利!!
真係替仔仔擔心.....

父子騎驢

有一天，一對父子趕著驢子，要到附近的市場把驢子賣掉。走著走著，看見一群婦女在井邊聊天。其中一個婦女說：「你們看！居然有人放著驢子不騎，兩個人都用走的，真是愚蠢啊！」父親聽到這番話，想了想，就讓他兒子騎在驢子上。
　　
父子倆繼續往市場走，遇到一群老人家，老人家看見他們倆，其中一位說：「大家看看，那個孩子真是不孝，居然叫父親走路，自己卻坐在驢上。」父親一聽，便讓兒子下來，自己騎在驢上。又走了沒多遠，遇到一群婦女和小孩，他們大喊：「真是殘忍的老頭啊！自己騎在驢上，卻不知道可憐的孩子已經走到沒力氣了！」父親聽了，覺得很不好意思，趕緊讓出一些位子，讓兒子也騎上驢子。
　　
終於快到市場了，這時又有人說：「這隻驢子真可憐，竟然一次要載兩個人！」父親想了一下，便和兒子下來，用木棍架起驢子用抬的 。大家看了都開始取笑這對父子。在這混亂當中，驢子不斷掙扎，掙斷木棍與繩索後，「撲通」一聲，跳進了河裡。

這故事在提醒我們沒有一件事可以讓每個人滿意。
現實中，有幾多人能夠唔受別人影響，堅持自己立場!?

小白的最後

永遠懷念《蠟筆小新》的作者臼井儀人

量入量出

管理上， 咩叫做「量入」，咩叫做「量出」?
簡單D講，「量入」睇結果，即係你做唔做到!!「量出」睇輸出，即係你有冇做!!
「量出」好多時唔等於「量入」，有做唔等於做到!!
舉過例，任志剛在雷曼事件上，佢做左嘢喇，文件提過結構性產品有風險，呢個係「量出」。但邊D產品有問題，如雷曼債券係自己保自己既保險產品，雷曼倒閉邊個賠俾你，把關呢方面任志剛做唔到， 呢個係「量出」。
再舉過例，某公司叫判頭黎做嘢，做好收貨先俾錢係「量入」!! 黎左做就算做唔到都俾錢係「量出」。
你會問，呢個世界邊有做唔到嘢要俾錢架!!
錯!! 係有架!! 小小力初黎步到，人人都笑我，「邊有做到先俾錢架!! 實做到架!!? 」
無錯!! 呢度係行「量出」既!! 於是由「唔一定做到」變成「一定做唔到」!! 錢又照收，who care?
管理學上，行「量出」既公司質數一般都比較差!!

找不同

看看我個女呢五張相，搵下佢個pose有乜大分別!!?





我再睇多一百張，發覺基本上姿勢表情角度都分別不大，最大分別係背景!!!

世界繞著誰來轉

終於過左生日，唔係講笑，我真係希望以後自己冇生日，日日平平淡淡既過!! 或者，生日俾我自己靜靜地過!! 唔好煩我!!
生日，火都黎埋既唔知鬧左幾多次人既情況下終於迫哂一家人去迪士尼樂園食自助餐!! 係要迫架!! 因為每一個人心目中，世界都係繞著自己來轉。你就下我，我就下你，係唔會出現既!! 今次你就我，下次都係你就我，再下次都係你就我，永遠都只有你就我!! 結果，連順得人既(如我太太)都覺得頂唔順。最後，演變成極權，由大獨裁者(我)話事，我唔再問大家意見，我話係咁就係咁，橫掂咩意見你都唔高興，唔高興就消失喇!!
你問我高興唔高興 ?? 我當然唔高興喇!! 因為我都係被迫架!!

選擇男朋友的條件

各位女士:
我見到個冇拍拖既人，突然想起以下問題。
如果你選擇男朋友，佢只有以下一個優點，你會點選擇??
A. 好有風度，但冇乜錢，又唔靚仔;
B. 好有錢，但冇乜風度，又唔靚仔;
C. 好靚仔，但冇乜錢，又冇乜風度;
其他條件一樣。