撐下去

日防夜防又家居失竊，今次唔見電話，我老婆新買左兩個星期既Sony Ericsson W995!!夜晚，放o係檯面。訓醒就唔見左喇!!今朝個賊仔一早就出門口，九點返工平日八點半出門口但今朝七點幾已經唔見人。我老婆就走去話俾爸爸聽，唉!!真係蠢!!! 我爸爸當然第一時間打電話俾賊仔，「問」佢見唔見部電話，當然又係話唔見喇!!「 問」?? 問係假，通知就真!!賊仔知道我地咁快發現左，相信部電話已經唔o係佢手上，報警都冇用!!我老婆再問爸爸點!!點??我爸爸即刻出街扮聽唔到!!我仲點同佢地生活落去....

下午，返到屋企，反轉間屋再搵，當然亦搵唔到。我打電話俾賊仔
我:「我依家問你最後一次，你有冇攞部電話!」
賊仔:「................冇!」
我:「得!!我依家去報警，你依家係唔o係局?」
賊仔:「..............o係.....」
我:「o係就得!!我依家去報警，叫差佬搜完屋企去搜你局!!」
賊仔:「......你報囉!!」
我收線，兩分鐘後，賊仔打返俾我
賊仔:「你依家真係報警?」
我:「你話冇攞嘛，我報唔報警關你咩事!」
賊仔:「你報警差佬黎搜我死梗!!」
我:「你話冇攞嘛!!!」
賊仔:「..................」
我:「點呀!!唔出聲，我冇你咁得閒!!」
賊仔:「俾人見到我我個Locker既野我死梗!!」
我:「你偷左人好多野咩!?」
賊仔:「...................」
我:「喂 !! 出聲喇........」
賊仔:「我個Locker有好多去澳門既欠單，俾人見到我實冇左份工!!」
我:「你冇左份工關我咩事??」
賊仔:「...................」
我:「喂 !! 你成日唔出聲，我冇你咁得閒!!」
賊仔:「我俾返個差價你!!」
我:「差咩價，我部電話新架!!」(我估佢話賣左部電話D錢!!)
賊仔:「........咁幾多錢!?」
我:「$3800」
賊仔:「............咁我俾返你!!」
我:「好，咁你聽日俾返我!!」
賊仔:「我聽日邊有錢!!」
我:「咁你幾時俾返我呀!?等我死左o個陣?」
賊仔:「.............遲D!!」
我:「你慳D喇，你夠話俾返錢屋企囉，呀媽都死左差唔多兩年喇，你俾條毛咩!!」
賊仔:「咁你迫我都冇......」
我:「好!!你下個月俾返我，你唔俾我丟哂你D野出街，制服都燒埋你，你到時唔好話我絕!!」
賊仔:「.......... 係!」
我:「 係咁!!」
收線之後，我同爸爸講:「呀媽臨死叫你趕佢走，你就叫佢返黎住，依家成日唔見野，你話喇!!」
爸爸:「我冇叫趕返黎住架喎!!」
Oh!! 陳世間最不負責任既說話莫過於此!! 佢冇叫賊仔返黎住，但冇叫佢走，仲買埋床俾佢.....
媽媽生前講過:「你爸爸係過不敢負責任既人，最叻賣面光!!」(賣面光 – 夾埋做大戯，當面極力討好)....當時已經知，但今時今日先感受到........
好孤單，好唔開心，我有冇做錯呢??
見到出疹出到個頭似豬頭既仔仔，好可憐!!
無論其他人點對我，我都會撐下去!!