如是我聞

外父上星期過身，和太太回鄉辦喪事。

各處鄉村各處例
貴州辦的喪事，同我地既好唔同。首先佢地要辦足七日七夜，每晚都要有人守夜。法事不停做，半夜四點幾仍在做。法事唔係淨係法師做，家人都要參加，很累。親友到場，飲酒打牌，食飯吹水，要場面熱鬧。親友送花牌，買了，要自己親自送上殯儀館，剛恰殯儀館在半山，都幾係架。收花牌，要放砲仗，主人家子弟要跪地接收，送花牌既親友 唔扶唔可以起身。儀式或者混有苗人色彩，要搵Ｄ當地女性好似唱山歌咁叫喊，喊乜我就唔知，連我太太都唔知!! 七日儀式完後，火化。火化好恐怖，唔係放o係棺木內燒，係就咁燒屍，親人要睇住條屍燒剩骨(不是灰)，我就冇睇喇! 之後，將燒剩既骨放入棺木（大約二尺長的細小棺木），然後由男性子弟親自送上山放入墓，我在想，如果唔係火化都幾大件事。
還有，很奇怪，殯儀館內寫的都是繁體字，佢地都唔識睇，但點解呢！？

求其
今次，係我第三次返去，發覺佢地做事好求其。佢地唔係單指我太太家人，係指全城人。
以前見佢地打牌都係用自動麻雀機，今次要用手疊牌。因為當地打牌唔打「番子」，我都想知疊幾多棟。點知，我見一個疊二十棟，一個疊得八棟，很奇怪！ 我問點解， 得到既答案係「求其喇」！ 真奇怪！我想，打兩粒骰，如果係十，得八棟既中左點開? 原來，開牌開邊度，求其得喇！ 是但伸手摸到邊度開邊度，打骰打到十，佢可以開對面第四棟，完全同粒骰冇關，咁，做乜要打骰呢?........ 求其喇！！ 又問！！
以前去次次有車接，今次坐左幾次的士!! 的士冇錶，上車又冇講價，咁點收錢？試過由酒店去殯儀館，一次收三蚊，一次收五蚊，一次收十蚊，任佢收。收既冇問題，最奇怪係俾既都冇問題，點解呢？ 得到既答案係「 求其喇」！
做法事，諗佛經，叫個主人家子弟去敲木魚諗佛經。我睇一睇，經文全部繁體字，而且佛經Ｄ字好深，我相信佢唔識睇，我問佢點諗，得到既答案係「求其喇」，就開始鬼食泥咁諗，佢諗緊乜自己都唔知！
見外父生前住屋很殘舊，我問起左幾耐，答案係兩年！！我答「那一定是新起的舊房子 喇! 」，問我點解？「求其喇」！
想想下，我太太都係咁既人，記得上次從貴州回來，在機場取行李包裹，佢求其取了件包裹就走，返到屋企先知取錯了包裹，佢睇都唔睇架！我既包裹係價值近萬既中藥材，人地既係一鍋家鄉豬肉，我正在想點樣追番D中藥材，太太已經食緊人地鍋家鄉豬肉…….. 唉！
求求其其既人，大事物用！

憶外父
我之前見過外父兩次，知道外父係解放軍老兵，打過日本仔打過韓戰。印象中係一個親切和藹身體健康又勇敢既人！
記得第一次我見外父，佢摸著我的手，摸著摸著，然後說：「你好多肉呀！」， 可能佢未見過咁肥既人，之後佢就唔叫我名喇!! 叫「肥仔！」，那種感覺很親切！
外父身體好健康，八十幾歲日走三十仲可以公里路，其實到死佢都冇病！！
可能打過仗喇，佢身體好多槍傷，腳久唔久要做手術。但佢好「勇」，做手術唔使麻醉！睇o個個都驚，但佢話「被日本仔用槍打都未怕痛，小小手術使乜打麻醉 」，很有關雲長刮骨療毒既豪氣...
子女之中，外父最愛錫我太太！今次太太回去探佢，正準備離開的當日，早上陪佢食飽早餐，讓佢小睡片刻，就在小睡既時候佢就好安靜咁離開左!!
死 - 人生總有一次，你我都避不了！離開既時候，能夠有自己最愛錫既女陪伴在旁，食飽飽，無病無痛咁離開，離開既時候仲可以面帶笑容，善終係好大既福氣！！
作為子女，應該高興架！

土豪惡霸
其實，太太外家並唔係咩大戶，幾個兄弟姐妹亦冇咩才能，大家能有今時今日，全靠二姐夫，一個都係冇咩才能，但父親係老幹部既纨绔子弟，貪官一個！！
我好討厭呢個人，佢每次都以戲弄我為樂！我讀過香港大學，代表著香港精英，佢能夠戲弄我，感覺自己比精英更精英，很優越！
但玩還玩，在做法事既時候，佢都不忘戲弄我！！
我係外地人，唔識貴州辦的喪事既禮數，太太叫我跟著佢做，但佢就戲弄我，叫我在大堂左一巴右一巴打自己，然後笑一笑，咁就做完法事喇！！有可能嘛? 我冇見過一個人咁做，擺明戲弄我，而且對死者亦大不敬！我太太見到，竟然扮睇唔到！哈！我唔做！其他受過佢錢既男人，竟然走黎兇我：「X哥叫你做，快D做！」做? 做就真係其恥大辱，我死左冇面見媽媽！如果唔係辦喪事，我即場問候你母親！我唔做，亦唔答你，點呢？ 於是，大家冇癮行開！
再黎，過幾分鐘，又搵人叫我出去，話有D乜總乜總要我敬酒！我衰過做小姐！那個乜總乜總關我屁事，人人唔叫係要叫個唔飲酒既敬酒？我唔飲，點呢？
太太發我脾氣，話我小氣，話二姐夫照顧佢地一家，話我俾人玩下都唔得! 話我唔尊敬外父！真係氣頂，但為左外父喪事，我唔出聲，亦唔駁嘴！
之後，土豪惡霸同D乜總乜總飲到醉，神壇都推倒，又如何？做法事係佢唔做，又如何？太太既兄弟當眾被佢鬧到狗血淋頭，又如何？佢照顧你地一家，叫你地食屎你地都食！
照顧你一家?? 你有冇想過，沒有貪官，每人可能搵到十蚊！有貪官，每人可能搵得兩蚊，然後貪官俾返三蚊你，你覺得佢俾你既比你搵既更多，佢真係照顧你一家喇！

纨绔子弟
土豪惡霸個仔， 纨绔子弟，讀書唔成，大學畢唔到業，土豪惡霸走後門俾錢做到畢業，一畢業，就被安排幹部喇 !! 還以為自己好醒，有幾個錢就大哂，問我：八千蚊睇次醫生你睇過未呀? 北海道你去過未呀？結婚我打算去！馬爾代夫你去過未呀？結婚我打算去！
唉！八千蚊睇次醫生好叻咩？唔使睇醫生就叻！結婚去北海道？北海道有咩令你想去? 馬爾代夫呢?
井底之蛙！
吹水佢就叻，辦事？就黎三十歲人，起身著衫都仲要靠媽媽！幹部？有足一個月冇返過工喇！可恨中國政府都唔知仲有幾多幹部係咁！

醫療
貴州睇電視，廣告最多係醫療/醫院廣告！有80﹪！
人工平均千多元，入醫院吊鹽水二百幾，棉花沙布藥物樣樣錢，急救費幾百，一般人有病，冇錢入醫院，唯有等死！
醫療/醫院廣告，唔係俾窮人睇！可以想像貴州雖然窮，但有錢既貪官亦很多！
有日，坐車，馬路上有個人向行緊既車直衝埋黎尋死，司機避開左，但亦有Ｄ驚！太太話好多人有病冇錢醫，都係死，不如俾你車死，車死左你要賠償返幾萬蚊俾佢家人！死一個，活一家！！
唉！人命何價！？