聚舊

昨晚，同亮、Ling、Phoebe食飯。原因係阿亮同阿Ling會喺7月6日結婚。日子真係過得快，大家都曾經喺時代廣場一起工作，阿Ling當時都只係十幾歲。好快，已經過咗十年。睇住佢兩個大，開始認識，到拍拖，到結婚，自己覺得，緣份嘅事真係好奇妙，當初又點估到佢兩個會最後走埋一齊組織家庭！

大家傾開都覺，時代廣場一間咁出名嘅公司，估唔到真係留唔到人，員工進進出出，幾年間已經人面全非。人工底固然係問題，但管理可能係更大問題，以住那一種團結同凝聚力已經一去不返。

離開咗嘅同事大都有更好的發展，都證明係人才，只係公司唔識利用同珍惜。咁多個之中，真係不得不佩服前老細謝先生，一個非常「吹」得嘅人（亦係我見過嘅人之中最吹得嘅一個），由做建築出身，到做商場經理，再到今日在金融界主持財經節目，我相信佢每方面都唔係專家，但可以吹到係，真係五體投地。

所以溝通同表達能力真係可以決定你嘅將來。

飯後，又各自散去，其實大家都已經很少見面。我在想，往後十年，大家又會變成點呢？我地又會幾時再見呢？