物有所值

星期日，從英國飛黎教四堂既講師到左上堂，講師係我好欣賞既類型，即係兩手空空入黎就可以講書o個D。一講就講左六個鐘，好多同學都好不滿。因為佢勁「插」我地，以下係一D對話。
講師：「同學，你抄咩??」
同學A：「抄黑板D野!! 」
講師：「你抄黎做咩?? 你黎聽我講野唔係黎抄野!! 你掛住抄又聽唔到我講野!! 你抄黎做咩呢 ?? 你知唔知黑板D野錯架?? 」

講師：「同學，頭先我叫你地寫底既重點，點解你唔寫底呢?? 」
同學B：「因為我記得!! 」
講師望一望同學B做既題目。
講師：「你記得? 你知唔知點解你做唔到?? 就係因為我頭先講既重點你漏左!! 你記得?? 」

講師：「同學，我叫你試做既題目你做咩唔做呢?? 你等咩呢??」
同學C：「我諗緊!! 」
講師：「同學，俾三分鐘你做，過左兩分鐘你都仲o係度諗，諗咩呢你? 諗到咩你都寫底喇，試下喇!! 」

同學D：「因為英語唔係我地Mother Tongue(母語) ，所以我地諗得比較慢!! 」
講師：「NO! 呢個考試係世界性既，四千幾個考生中大多數既母語都唔係英語，例如印尼咁!! 你地知唔知佢地考試平均比你地高一個grade。咁係因為佢地既老師冇精美既筆記連答案。佢地都有諗過D問題。但係你地就冇諗過，筆記有既你地就知但都唔明，筆記冇既就完全唔知!! 淨係坐o係度等答案 !! 我地考試係考Application，所以你地D筆記一定冇，亦所以考試個個都咁低分!! 香港區有First Honour已經係好多年前喇!! 」
課後D同學仲繼續鬧個講師唔得。但小小力反而覺得物有所值，原來上堂上左咁耐我依家先至知做乜!!