鐵樹開花

最近家事好煩，亦冇乜解決跡象。大家親戚朋友只係叫我等叫我忍，有用咩?? 問題發生都依家都接近十年，我等我忍左十年。有變化咩?? 如果有就係我媽媽被激死!! 咁，下一個係唔係輪到我呢?? 搬!! 你又諗下，層樓係我俾錢既，點解要我搬?? 我搬去第二度，又再黎，咁我係唔係又要再搬?? 好似做錯既係我咁喎! 但我老婆講既亦唔係冇道理，我都要顧住B仔架!! 成件事都唔關B仔事!!
係好煩好煩。我呢段日子都好少留o係屋企。
今日，坐下，突然想起細個一D往事!!!
腦海見到呀爺o係屋企種鐵樹，o個棵鐵樹，約三尺高，冇花亦冇葉，乾乾既一枝樹幹，我以為死架! 因為由我有記憶見到呀爺種左幾年，都係冇花亦冇葉。我問媽媽呢D咩黎架，呀爺做乜種枝柴呀!!
媽媽話:「 呢D係鐵樹唔係柴，係要好有耐性既人先至會種架，因為鐵樹好難至開花，種好多年都可能唔開花，可能永遠都唔開花，但如果種到鐵樹都開花，咁，呢家人就會好架喇!!」
點解會好，我唔知，風水掛!! 係唔係真係好，我都唔知道!!
我只知道，呀爺最後真係種到鐵樹開花，之後呀爺過身，鐵樹亦真係死左!!
鐵樹開花，係唔係真係好，我到依家都唔知道!!
但我知道，我記得，呀爺種鐵樹既時候，已經有嚴重肺病，能為屋企做既事，已經唔多!!
今天我見到呀爺同媽媽，感覺有一種好強大又好溫暖既力量支持我!!
無論發生咩事都會支持我!!
哭過後，我反而感覺自己填滿力量.....