不合格的父親

我唔係講我爸爸，係講我自己，作為一個爸爸，我真係覺得我唔合格!!
昨晚，稍為寧靜冇爭吵既一晚。晚飯後，同仔仔玩積木。玩左一陣，仔仔帶起紙筆，o係紙上面畫呀畫呀。原來仔仔識揸筆!! 好開心，打電話俾返緊工既老婆。但老婆o既回應，係好平淡:「係呀!!佢其實早已經識喇!!」 …..原來，仔仔早已經識揸筆，只係我呢個爸爸唔知道!!!
回想呢段日子，屋企吵吵鬧鬧，但仔仔都好聽話，就算病都冇乜特別扭計，冇人陪就自己玩。佢見到我放工返屋企，就會即刻攞拖鞋俾爸爸，走黎錫錫爸爸。晚上工人切生果，切好佢就即刻攞俾爸爸食。我晚上我晚上腰痛坐o係梳化，仔仔就會爬上梳化，爬到爸爸背後幫爸爸鎚背。但我知道，所有都唔係我教!!
「養不教，父之過」，我真係要好好努力。
對住個女，我投降!! 我真係唔識教。屋企咩環境，佢咁大個都有眼見喇!! 但佢仲不停問你攞錢，而要錢既目的只係去玩!! 佢問你攞$300，你解釋俾佢聽冇， 佢跟著問你攞$500，你鬧佢， 佢跟著問你攞$1000。佢精神轟彈你。
佢日日狂打電話，千幾分鐘都話唔夠都話唔夠。有乜咁多野講?? 我爸爸話佢唔好打咁多電話，佢好毫咁話:「打爆我俾!!」俾?? 俾條繩定俾條毛?? 結果打多三百幾蚊，叫佢俾。「 冇!」，但佢又繼續有錢去玩!! 有錢繼續自己使，欠你既繼續欠你!! 講唔聽，鬧唔理!! Cut佢電話老婆話唔好!!
我完全冇辦法，完全唔合格!!