轉貼:名校教了我什麼——女校生的反思

【明報專訊】直資名校被揭發一大堆混帳，那部古老幻燈片機就在我的腦袋開動不斷重播我的中學校園片段，晃眼已是十多年前的泛黃舊事。

我的母校，是港島區一家有逾百年歷史的女校，人稱「老牌名校」、「貴族學校」。我曾經為自己能夠入讀這樣的名校感到無比自豪，因為我們一班女生，既能說流利英語、又懂得吃西餐禮儀、亦能夠淡定自信於人前表現自己，根本唔將隔籬學校著旗袍紮孖辮的四眼妹放在眼內。

直至我做了記者，我才發現，所謂名校生獨有的自信、傲氣，還有世故、現實，跟那隻只懂呱呱叫的井底之蛙，沒太大分別。

八九六四 那年，我在鰂魚涌一間街坊中文小學讀小五。我是班長，自發貼了大堆剪報，發起同學手纏黑布。翌年六四1周年如是，我還記得我們和班主任一起哭。

1991年，我被派到那所名女校升中一，班主任比我更興奮，我卻戰戰兢兢。

我被編入全級最top的A班，噩夢開始——老師上課全講雞腸我聽唔明、英文堂默生字我無個寫得出、原校小學升上來的個個都已埋堆唔受我玩，和我一樣的外來生全班只有五六人，她們不是半唐番就是英文小學出身，來自中文小學的好像只我一個。

同窗：我唔想自己中文咁叻

中文堂，成為我的避難所，也是我唯一找回點點信心的課堂。可惜，我的同學都看不起中文，反而為自己中文成績遜於英文而感「自豪」。我很記得，中二那年我的同窗中文測驗全班最高分，她放學時卻苦瓜乾面口道﹕「我唔想自己中文咁叻，我要英文勁呀。」

不單我的同學，後過渡期年代的修女校長，也不將中文放在眼內。中三起我加入中文辯論隊，校方對我們的重視遠不及英文辯論，我的大師姐隊員都是高材生，閒談時笑道﹕「校長唔理我口地仲好，輸咗都無壓力。」據說，修女校長的臉孔在回歸後180度轉變，小師妹通風報訊，Sister近年經常強調要向北望學好普通話，轉直資後又花大筆錢裝修 搞個什麼孔子學堂，希望girls都要學好中國文化。

名校，就是如此現實。它貫輸的價值觀是七個字——識時務者為俊傑。不單校長，老師、同學，都很懂得做人——做一個成功的主流香港人，當然離不開一個錢字。

名校價值：識時務者為俊傑

我的同學，家住干德道司徒拔道，每天司機駕著勞斯萊斯定時定候接送。中二那年，富家女邀請我到她的大潭複式洋房，我到今天仍記得那個無敵大海景。那晚，我回到數百方呎的舊樓——我的家，感到前所未有的自卑。

同學雖然有錢，但她們不算show off——應該說，她們由開口講英文到言談間展現個人長處，是骨子裏自然流露的自信，外人覺得她們「寸」、「扮口野」，但那其實是她們是獨有的上流社會溝通方式、貴族間的溝通密碼。午飯鐘響，校園是中英夾雜的喧鬧、好動女生在球場打英式netball而非籃球羽毛球、貪靚的討論暑假去歐洲買什麼名牌。沒有人會談六四，也懶理香港回歸將至。

我當年自覺格格不入，這幾天我不停思考，這個年代獲獎學金的窮學生，入到直資學校後，可有當年我的自卑、孤單？

年輕的我用了半年時間，流了很多淚水、開了多晚通宵，就全程投入校園生活，學懂說美國 口音英文、不怕在堂上舉手答問題、在同學面前不再害羞，我學會了如何做個presentable的名校生。我的成績由包尾變成中等，更獲頒全年進步獎。我開始享受校園生活，和我的富家同學一起溫習看戲談天說笑。我享受自己被標籤成「A班精英」，有名人來校探訪，校長只會把他帶到我們A班；朗讀話劇跳舞我們A 班都拿冠軍；老師最疼惜的又是我們A班。

勝王敗寇的遊戲規則

名校的遊戲規則是「精英制」，你入了A班、拎到獎，就是精英中的精英，如盛放牡丹成眾人焦點，其他班別的同學，只是你的綠葉。名校精英制，簡單來說是套用職場遊戲規則——勝者為王敗者為寇，職場的上位伎倆，名校生早在少年十五二十時就學懂——懂得識時務、懂看人眉頭眼額、懂把握機會表現自己長處。但少女含苞待放的天真純情，去了哪兒？年輕人對社會的熱血，為什麼丁點都不見？

中六那年，我被同學選了當Head Girl（雖然我不是會考狀元）。那年我18歲，成年了，看到所謂名校生、我的同學師妹，很多人雖然表面自信家境富裕，但其實心靈空虛，有的放學流連百貨公司不願回家、有的故意不穿整齊校服引人注意。我將我的發現告訴校長老師，希望他們多花時間關心同學，而非一味叫她們參加比賽幫學校拎獎。

結果我被大駡，更被視為最不聽話的Head Girl。

10多年了，如今，我不少中學同學都很有成就，有的是某某大公司主管、有的嫁了有錢人錦上添花。數月前，在婚宴重遇昔日的A班同學，她們說起自己的職業、老公、子女，當年班房裏的自信又再呈現，表現自己似乎是名校生的終身任務。

可是，我已不再是A班那個小薯仔，我不想再追隨A班大隊了。

離開名校投身記者工作後，我看到世界之大，不是只有干德道豪宅、生活也不是只有名牌拎獎、做人的價值也不是只懂得看人眉頭眼額。世界之大、胸襟之廣，是即使我們家住干德道，也知道香港有個地方叫深水埗有很多板間房；即使我們追逐名利，也關心世界大事懂得分辨是非黑白，而非趨炎附勢。

倒模生產典型香港人

教育的終極目標，是訓練每個人的獨立思考、批判思想。但名校在這方面做到幾多？名校最成功的，是它大批倒模生產一個個典型香港人——實際、精叻、識上位、識表現自己。但更深層的價值——真、善、美，名校又教了幾多？

這個每個名校生都應思考的問題。

後記

我不憎恨我的母校，畢竟它教曉我很多實際的。到今天我最好的朋友，都是和我背景類近的中學同學。雖然她們不讀報、不關心時事，但都有一顆溫柔的心。我預科時的中文老師是我最尊敬的人，也是我的死黨。

寫這篇文章，是希望香港人不要盲目貪慕名牌。所謂名校的教育理念，你作為家長是否認同？更重要的，是你希望學校教曉你的子女什麼？

而我最希望，香港出色的窮學生與富學生，都有平等機會入讀優質學校，這卻是我對直資概念的最大質疑。

文 蘆葦

小小力意見:當你從一些普通學校畢業，你會發現同一級畢業水準同名校都差很遠。雖說讀書是個人問題。但資源的分配不均衡嚴重削弱窮學生的機會。所以人人趕名校。

左搖右擺

對住D左搖右擺嘅人，我真係好容易勞氣，亦唔知點面對。

好似我個老細site I/C。有日唔知點解講開食辣。
佢表達自己嘅意見。
「我覺得食辣嘅人最有福，世界上好多食物都係辣！」
數分鐘後，佢又表達自己嘅意見。
「我覺得食辣嘅人最冇福，食辣食到對其他食物都冇晒味覺。」
你點回應？
做事都係咁，一分鐘前叫你唔使跟進，一分鐘後問你做完未！
問你點頂？
我同事話:佢考驗緊你呀！
咁，我唯有扮儍仔囉！

莫似我

囝囝真係似我，唔係樣唔係性格，呢兩樣，仔女都似媽媽，尤其係脾氣，三個基本上係同一種人。
講緊嘅係身體差，細細個藥水重過自己。
囝囝個胃生得比人細比人高，食得少又容易嘔，所以都唔敢俾多嘢佢食，成日嘔對身體都唔係幾好。已經一年喇，囝囝都係keep住28磅，冇重過。
囝囝氣管亦唔好，咳就唔易好，長期要食強化氣管藥，副作用係超興奮。
有時都唔知係藥物令佢超興奮，定係佢本身有過度活躍症。本身我表弟都係有過度活躍症，囝囝有都有可能，見表弟食D鎮靜藥，成個人呆哂，做父母點會唔擔心呢！
有時真係幫唔到佢，又唔點。
點解好嘅唔似我，唔好嘅咁似呢？

繁忙的十月

有了孩子，可能以後每年十月都很忙。

個女開學，好多嘢要睇要簽要俾錢。仲要搵補習，見老師。

個仔忙著要爲佢搵幼稚園，面試，睇醫生（流感高峰期），搵活動。

工作，每年十月要做budget，要做audit，差不多要埋數。

唔知仲要忙幾多個十月呢？

貔貅館

相信跟團去個台北，都會去過貔貅館，幫你睇吓名，睇吓命，叫你買吓貔貅防身咁。今次去台北，都有去，同太太俾人批吓。(買貔貅就冇喇！咁貴！）

師父話我，命同名都五行齊備，唔洗帶貔貅，運在晚年，運到前好多小人好多事故，一事無成。雖然五行齊備，但火較弱，所以膽子較少，有才華但冇人欣賞，不能屈於人之下，所以要做老闆而不要打工，發達要都外地。人做事比較按步就班。命裏要受三刀(做手術。三刀，我剛好做過三次手術。）

師父話我太太名好，命裏五行欠水，一生要受好多刀，脾氣暴燥，但有偏財運，偏財唔係橫財，唔係賭運，係做偏門。

我倆命都算夾。咁巳經好好喇！

我都唔覺自己有才華，亦冇諗過發達，只希望身體健康，平平安安就算喇！

P.S.師父話名兩個字筆劃數加埋係9或13就係好名，咁啱，我同太太個名筆劃加埋都係13。如果加埋係10，20，30等，就係兇。信唔信？

沉淪

和太太去台北旅行。上次去台北，已經係十年前嘅事。

唔知係唔係年紀大，去旅行，我都覺得係增廣見聞，唔係淨係吃喝玩樂。

今次去台灣，感覺台灣喺亞洲，係日本之後，第二個沉淪嘅國家。以往台灣係亞洲四少龍，依家，都冇乜人再講台灣競爭力。

台灣嘅新聞節目好有趣，好少有正正經經報導，大部份都係好似綜藝節目咁，一班嘉賓去清淡。好似我當日睇到件新聞，有個女生在暴風雨中被洪水浸死，於是一班人上節目去討論一下一個一米六嘅女生點解會被一米二嘅洪水浸死，講咗半個鐘。有個司機交通失事撞到人，又一班人討論半個鐘。其他國際時事天氣財經五分鐘講晒，係唔係台灣唔係綜藝節目就冇人睇架呢？

台灣失業率最高嘅唔係四五十歲嘅中年人，係二十幾歲嘅大學畢業生。大學畢業生當中，百份之十會練好音樂，準備參加星光大道，一朝成明好過你涯幾十年，所以你見到好多年青人街頭表演，水準很高，但如果社會上有百份之十嘅人在發明星夢，社會仲有咩競爭力。

去誠品書店，旗艦店，地方好大，但書唔多，種類同數量都唔多，音樂藝術漫畫書多過一半，其他賣精品，食物衣服cd等等，書俾香港商務還少，比大陸書城更加無得比。

今日台灣，很像十年前日本，在富有之後沉淪。

在台灣之後，應該係香港。

野人是什樣肓成的

星期六，肥B同仔仔上面試班（其實我又唔係想幫仔仔報名校。不過上下見識吓，俾仔仔學多D嘢都冇乜壞。），共九堂，已經上到第五堂，肥B五堂都未出過一句聲。老師話你幾叻都冇用，唔出聲咩面試都唔會過得到。佢唔係唔識講，只係唔鍾意就唔出聲啫。肥B媽媽成日同老師講佢喺屋企講好多嘢好叻又唱歌等等，老師話面試你一定唔好咁講，因為咁講即係話你唔識教或唔教。
肥B媽媽話終於知道點解自己個仔唔講嘢，原來係因為小小力，佢話因為肥B以前見過小小力打仔好驚，所以唔敢講嘢喎。唉!我唔係好介意食死貓。斷續喇，又睇吓面試嘅時候小小力不在埸肥B又出唔出聲。到時就會明白解決問題比搵借口／解釋重要。
之後，在學校玩滑梯，老師都教小朋友排隊。有個小朋友已經爬到滑梯頂準備滑落嚟，肥B喺後面唔排隊，一手將呢個小朋友從後面拉番個小朋友落嚟，好在小朋友爸爸手快捉住，唔係小朋友就從滑梯跌落嚟，點知肥B仲咬牙切齒揮拳打小朋友 爸爸。野人一樣，幫手捉住佢，佢就揮拳打我（所以你話佢驚我真係好難令人相信），我到最後都忍唔住，一巴車埋去，仲要還擊，跟住第二第三巴先stop到佢。唉！佢行開，冇喊，依舊咬牙切齒，佢媽媽聽到有咁嘅事，冷冷地説：係咩?
其實，何必去返學呢？野人唔須要識字!
翌日，太太要我去幫肥B填幼稚園報名表，唉，好煩！填表都唔係問題，佢唔識繁體字我幫佢寫冇問題，問題係肥B有咩興趣同能力，佢對兒子有咩期望都唔知要我作埋，唉!我對佢冇期望架喎，除咗打人都唔覺佢又咩能力喎！

Scope of Work

Scope of Work = 工作範圍

我出左個e-mail代表使用者叫人site visit報價, 引用左使用者的scope of work, 如下:
Scope of Work:
1. Remove the air-conditioners in Unit X and reinstall them in Unit Y (including electricity supply)
2. Remove the shelf racking in Unit x and reinstall them in Unit Y
3. Remove the wall mounted fans in Unit x and reinstall them in Unit Y (including electricity supply)
我覺得作為Scope,都算清楚, 但收到皇家判的technical manager的e-mail, 如下:
According to our previous numbers tele-conversation and e-mail regarding the method for seeking the quotations. You are requested to provide the detail scope of work by written for us/other contractors to calculate the quotation instead of only provide the heading of work. We are waiting for your further information for our further actions.
...這是什麼英文,什麼意思,....什麼是Scope of Work (工作範圍),....

遊行

星期日，有遊行活動悼念菲律賓死難者。主辨單位表示有八萬人出席活動。

今曰，有同事問我有沒有去遊行，我沒有，因為我覺得沒有意思，亦冇興趣被當作政治工具。被同事話我沒有同情心，將事件政治化。，

到底什麼是政治化？遊行本身不就是一政治活動嗎？集合咁多人去遊行為乜？唔係為咗俾壓力菲律賓政府咩？為什麼説我把事件政治化。那根本就是由政黨發起的政治活動，只是很多去遊行的人自己都不知道。

我想信，很多人都被傳媒密集式報導洗咗腦。我相信死者已以，生還者雖要繼續人生路，痛苦經歷唔係俾大家當娛樂活動，俾政客抽水。

呢段期間，特首做個咩有建設性嘅嘢？香港人還應不應該去治安咁差地方，當有同類事件可以用咩途徑協助可減少傷亡？講都冇講過。除咗好激動咸咗幾次，仲有咩做過？

事件之後，特首民望升4個百份點。

菲律賓

菲律賓，昨天發生流血事件，一個本地旅行團到當地旅遊，旅遊車被槍手脅持，事件最後流血終結，槍手被菲律賓警方擊斃。但亦有9名團友被殺，被誰殺?不一定是槍手啊？事件發生成十個鐘，要救人可能好多機會，是無能，還是不為？其實類似事件在菲律賓都時有發生，而且被脅持人士多數身亡，只係冇香港人大家冇留意，過一段時間大家又唔記得，繼續去菲律賓旅。菲律賓政府，甚至菲律賓人都只係當少是一宗，咁嘅地方，你仲敢去？
我就從來都唔打算去嘅，希望後人都唔好去。（我媽媽生前都係咁同我講。）

書展2010

今年書展，大會禁止o靚模入場做簽名會。少左o靚模同明星，書展終於似返個睇書買書既地方。至終o靚模寫真係健康性感定賣弄色情，我相信道德呢樣野每人心中都有一把尺一個標準，滿口歪理俾你講得過，唔代表公眾真係接受。
講返書展，似返個睇書買書既地方唔代表係一個成功既書展。今年書展，你睇到既書就係平日你o係書店既書。臺灣參展商基本上唔黎，內地參展商都冇乜書去展，內地客都係黎買文具，似特賣場多過展覽。最多係小說，烹飪書同旅遊書。我都不大感興趣。電視新聞話大會表示賣左好多文學書籍。
但，小說都係文學作品黎喎！
還有多左「一D」電子書！
但，又係o個句，書 ﹣重要既係內容，唔係形式。
至終今年消費，同去年差不多喇！

放棄

係唔係應該放棄寫Blog呢!? 因為真係冇乜時間寫，又冇乜好寫! 生活就係返工放工返，日日都係咁!! 我寫睇嘅都覺得悶。我連朋友都冇見，出街都係為仔仔同太太而出。好似早前太太同仔仔返左大陸，太太叫我自己出去行下，我都諗唔到有咩地方好去，於是又留返o係屋企。
世界依家係點，我真係唔係好清楚。
感覺又返去以前嘅我，除左返工，大部份時間留返o係屋企，唔出聲又唔同人講嘢。
太太同爸爸就最開心，我就算死左o係屋企，至少都可以見到條屍!!
唉!! .............

白駒過隙

比起早十年八年，呢兩年嘅時間好似過得特別快。以前返工放工，冇咩特別嘢做，好似好耐都唔過一年咁。現在，有仔仔在身邊，笑哈哈咁日子好快過左兩年。仔仔學爬行嘅影像日子仍清澈在腦海，再望一望，佢站立已經高過張餐檯。
人生，真係如白駒過隙，
(莊子 ̇知北遊:人生天地之間,若白駒之過隙,忽然而已。)
人到中年，已經唔再係追求嘅時候，應該好好去把握現在，珍惜現在所有的....
強求，失去的可能更多....
金錢如是，事業如是，學問亦如是...
要好好調整一下自己嘅心理狀況!!

最令同事氣憤的說話

最近, 基督教家庭服務中心進行調查，發現普遍被訪者討厭三低員工的原因，為「與他們溝通唔到」，及「嫌他們拖慢工作進度」。雖然三低員工不事生產，但調查發現他們的待遇褔利並未受影響，超過70%被訪者指出，表現不佳的員工薪酬、褔利等待遇只有少少甚至全無影響。他們採取兩大策略以求生存，第一是低調工作或演戲掩飾，如少做少錯或扮忙等，第二是善搞人際關係。

三低員工對公司及團隊造成負面影響， 有近30%被訪者說會因此失望離開公司，但逾20%受訪者認為，管理層不了解甚至非常不了解表現差的員工，同事間的支援不足，和公司的管治問題是造成員工表現欠佳的外在原因。

最令同事氣憤的說話

1. 老細唔出聲，幾時到你講

2. 你咁叻，你做呀

3.人工咁少係咁㗎啦

4. 駛乜咁認真呀，錯咪錯囉

5. 夠鐘收工喎，明天至做啦

點解呢五句我都好少聽？？ 我聽得比較多既係…..

1. 唔關我事喎, 我乜都唔知架！

2. 我識我坐你個位喇！

3. 得架喇, 得架喇! 你執生喇!

4. Urgent !

5. 呀邊個邊個做野真係唔得喎！

唔明

今年世界杯，有線電視有獨家播影權，兩家免費電視台只可以播有線電視連廣告既比賽。結果，即係免費電視台無波睇。咁，冇得播o米冇得播囉！但我唔明，無線 仲有世界杯節目 《世界盃動起來》。口號係「全城起動世界盃」。波都冇得播仲起乜鬼野動。個節目好有趣，每日講下南非既天氣，有時搵D醫生講下碧咸既傷係點（但碧咸係冇份踢世界盃），總之講埋哂Ｄ無關係既野.......
我唔明，為乜呢？

關於今年世界盃

我預測今年冠軍，將不出德國或巴西。
巴西，相比其他球隊， 三線較為平均，沒有特別依重某一個球員，而且個人技術好，合作亦純熟。(比較阿根廷，後防特別弱，球隊特別依重美斯，之前比賽不停換人，合作亦有問題。)

至於德國，有三個原因。第一，足球問題。所有球隊已經有一半亮相，發覺大多數球員對控制個新足球都好有問題，不論傳球，射門，龍門接波都好有問題。但德國隊好似冇呢個問題，，因為呢個新足球已經預先一年在德國聯賽使用，大多數德國球員都能夠好好控制個新足球。
第二，中場主將波歷克受傷缺陣，反而令進攻唔需要下下要經過波歷克，令現在德國進攻面更廣。
第三，數據顯示，德國數次世界盃得亞軍，八年後就得冠軍!! 1966年 亞軍 1974年 冠軍 ，1982年 亞軍 1990年 冠軍 ，2002年 亞軍....2010年呢?

當然，信不信由你。

碳管理

依家流行環保，於是早前被公司安排上左個「carbon management」，由主辦單位請間碳排放顧問公司黎講。大部份講者都係鬼，or， 西人。
點樣可以令座大廈減少碳排放(或者，另一個角度，我地叫節能。)
隻鬼自問自答: 「最有效既方法係拆左座大廈，用一個今時今日較節能既技術起過!」
我好欣賞佢，唔係欣賞佢既建議，係欣賞佢o係咁多人面前講D咁既廢話又唔面紅又唔笑！！ 真係叻！我返去講返俾老細聽，一個「O」哂咀，一個笑爆咀！！
我就覺得，講少Ｄ廢話，或者拆左座大廈唔起就更有效減少碳排放喇!!
隻鬼又自問自答: 「其次，唔開冷氣」
我贊同！！人地問我點樣可以用少D電，我幾時都話: 「扮壞機，停左個chiller plant (中央冷氣) 」
不過，咁等於你問點樣可以降底失業率，我答你:「死咁Ｄ人囉！」
隻鬼又自問自答:「再其次，開少D設備，例如影印機！！」
哈哈！！ 公司部影印機同大部份打工仔既命運一樣，過勞死！點可能開少Ｄ！
不如叫我地一星期返四日工喇，咁仲環保!
隻鬼又再自問自答:「要技術上配合！」
呢點我真係同意，而且要俾老板聽，環保淨係講係冇用架！！好似公司要我地出單（order )要印雙面，但公司部舊式家用printer只可以印單面，公司出單個程式又唔可以選擇頁數印，咁點呀！？print左單面再用影印機印返雙面囉! 每印一頁雙面單（order )就製造一頁單面廢紙！！講係最環保既公司， 做起黎係最唔環保既公司。
仲講咩碳管理!

兒子的問題

仔仔兩歲喇，唔知係唔係我過份擔心呢，我覺得仔仔有D問題....

首先，BB唔係應該一路成長發育會越黎越重架咩!? 點解我仔仔呢半年都冇重過!? 重輕左，得二十幾磅...人地肥B成四十幾磅，點會差咁遠架!!

第二，仔仔除左爸爸，基本上唔聽第二個人講/教!! 唔知係唔係屋企習慣將責任推哂俾爸爸，有咩事就爸爸打!! 所以依家淨係聽爸爸話，淨係爸爸o係屋企先聽話食飯訓覺!! ….返playgroup都唔聽老師話....

第三，好大問題，仔仔唔同其他小朋友玩!! 因為我冇乜親戚/朋友有小朋友同佢玩，所以好多時都係自己一個!! 返playgroup佢都唔同人玩.....自己同自己玩，一係同爸爸玩。

或者，有時打得太勁，有次伸手想摸下仔仔個頭，佢好驚咁縮開.....好心痛!!

係兒子的問題，定係爸爸的問題!?

感覺好無助.......

讀幼兒班

三月同仔仔到東涌聖公會幼兒院面試，之後叫等通知!! 等呀等呀!! 等極都冇消息，於是打電話問。校長話...幼兒院每年只係收二十幾人。見左百幾人。仔仔排到六十幾。就算輪幾轉都輪唔到仔仔。我問....仔仔面試係唔係好差，校長又話唔係! 佢話排名係跟申請先後去決定。咁就奇喇!! 跟申請先後去決定，你見百幾人做咩呢!? 唔得又唔通知我!!

校長又話叫我去東涌試下第二間!! 唉!! 八月開學，差唔多六月你至叫我去試第二間，有位我都唔讀喇!! 勁貴!! 四千幾蚊一個月我點俾得起，太遠咁細個又唔係幾好!!

咁，冇辦法....唔讀囉!!

改變命運

又有好多日冇寫Blog，太多家事要處理，冇哂時間。有時連upload相上facebook
咁簡單都冇時間整，唔通真係有個歲月神偷??令我乜都冇做過但又唔見哂D時間??

上星期有一晚同幾個友人食飯，係自從友人Dick證實有嚴重糖尿病之後第一次gathering 。唉!! 見到佢真係辛苦，四十歲未夠已經咁，成餐飯食得幾條菜，又要拮手指check住血糖(手指都拮到爛哂)，又要食中藥(萬幾蚊藥一個月)，又要打胰島素。瘦左三十磅!! 以後嘅日子點過...! 睇黎我自己都真係要認真減下肥先至得喇!!


飯局中，友人Edmond叫我等個女夠十八歲即刻同佢申請公屋!! 我知呀!! 香港地，解決左住嘅問題，就算搵幾千蚊都有機會生存到。到時，有間公屋可能係佢一生人最大嘅成就!! 可惜，佢成十五歲人喇!! 仲今日想去澳洲讀書，明日要讀醫，後日要做考古學家!! 但從來唔想想一個半個學期冇交二十幾次功課嘅人今年係會升唔到班!!

社工見過太太，話唔好俾咁大壓力佢唔好鬧佢!! 真係夠底能，好似學生嘅所有問題都係因為家長鬧同俾壓力!! 你見個我鬧佢咩??我冇要求過佢讀書要有咩成績，畢竟唔係人人喜歡讀書!! 但起碼要做個有責任嘅人，連自己起居飲食都要人完全照顧，真係死得人架!! 我想問一問社工，你每日人話你知要食飯你覺唔覺得有壓力!?

話說有日佢去海洋公園，早上七點出門先發覺自己唔見左張Pass。於是叫工人所有嘢都唔好做即刻幫佢搵!! 自己冇手尾點解自己唔搵呀? 我唔准工人幫佢搵，係唔係俾好大壓力佢?? 跟住佢先要去廁所後面搵，去廚房D爐具後面搵，去我個房D櫃搵，真係夠弱智，你唔見左自己張Pass唔係應該先去你自己個房搵咩?? 樣樣嘢依賴人嘅人真係可以少少嘢都做唔到!! 去廁所廚房搵唔到，佢話一定o係學校，於是打算假日打電話叫哂所有老師返學校開哂Locker幫佢搵!! 真係夠底能，老師會唔會理你?? 又失敗!! 於是打電話叫D同學黎屋企幫佢搵!! 發神經!! 我阻止佢，叫人黎搜我屋企?? 我唔見左嘢算邊個?? 我唔准佢D同學入黎屋企!! 之後我去食早餐等佢自己搵!! 返黎，我以為屋企有盜竊案，點解我屋企D嘢擺哂o係街!! 原來我話唔准佢D同學入黎屋企幫佢搵，佢就將屋企D櫃桶搬哂出街俾D同學幫佢搵!! 弱智真係死得人!! 我趕哂佢D同學走，叫佢自己搵，搵唔到唔好去喇!! 最後搵左兩個鐘，原來張Pass係佢自己房電腦後面.....

仔仔手術後，康復中!! 太太成日叫我多D陪個仔，但事實係我日日都陪個仔，冇陪個仔o個個係佢.....

最近「黑」得好得好緊要!! 喪事馬拉松，投資輸到我唔信!! 每個決定都錯哂!! 開冷氣機冷氣機壞，冇辦法唯有開開風扇!! 開風扇連風扇都壞埋!! 唯有買個部冷氣機喇，預好哂叫埋師父睇埋位喇，部冷氣機死而復生!! 爸爸問:「點會咁架!?」佢真係未試過人生可以衰到貼地嘅時候好多嘢係解釋唔到架!!
同事幫我影印，明明佢影開冇事，一幫我影連影印機都壞埋!! 咁我話我唔影印o係電腦print喇!! 影印機竟然又死而復生!! 同事問:「點會咁架!?」佢真係未試過人生可以衰到貼地.....

最後，老細叫我行遠D!!

一切皆是命，半點不由人!??

仔仔，記著!! 人唔可以認命!!

爸爸仍在努力去改變命運....