海洋公園

少說已經有二十五年冇去過海洋公園。那個時候，海洋公園只係俾你睇海洋生物，係冇機動遊戲架。亦因此，當時o既海洋公園好冷清，冇乜人去!! 叫香港人為求知去睇海洋生物，你慳返啖氣喇!!
今年聖誕，決定左一家人去海洋公園。因為如果去迪士尼，仔仔就好悶!! 去海洋公園，仔仔起碼可以去睇下貓熊睇下魚。
聖誕日，未到十點已經到海洋公園，無論搭車買票都唔多人，可能因為大多數人平安夜玩得太夜未起身，整個上午都冇乜人!!
依家o既海洋公園真係大，尤其係佢依山而建，一個場地去另一個場地又冇交通工具接駁，o係個山度行上行落你都幾係嘢，再加上帶住BB，半日已經散哂!!
太太被個女帶去玩過山車，嚇到喊!! 唉!! 你估仲年紀細咩，嚇一嚇，我驚冇命落返黎呀!!
結果我玩左D乜?? 我乜都冇玩過!! 咁係唔係好唔開心?? 唔係喎!! 我見到佢地咁開心我就好開心架喇!!
除左玩機動遊戲，就係睇動物。仔仔見到大貓熊小貓熊就好開心，不停叫「貓貓」，俾佢睇下真正o既大貓熊，唔係仲好過睇相睇圖睇電視咩?? 至於海洋生物，太多人唔係睇得好多，但睇到仔仔都好開心!!
最後，睇左個冰上匯演，好精彩!! 但開始冇幾耐，BB已經訓著囉!! 希望下次可以再去喇!

普通話

我笑左好耐，想問，係唔係唔講得廣東話架呢?? 就算係!!背o個一分鐘誓詞有幾難呀?

齊家

一個好難既課題。
一家人，個個都有自己一套。就算明知自己錯，又如何!! 你要我聽你講? 我寧願死!! 我死都唔聽你講，你吹咩? 一家人，我又總唔信你可以唔理我!!
到底人地係點樣齊家架呢??
我爺爺都係個讀書人，但四個仔女得一個讀到書，做到個有用既人，但呢個三十歲就死囉!! 反而冇用o個幾個呢?? 個個都鬼咁長命!! 靠呢幾個齊家?? 父母一死立即分家，十幾年唔見面唔聯絡呀!!
我呢家呢?? 我爸爸讀唔到書，終日賭賭賭!! 我唔明白點解爺爺讀到書但爸爸咁?? 我太太又係無心向學(學，唔一定係讀書，學咩佢都冇心機)，淨係掛住買嘢同玩!! 個女始終唔係我親生，好多嘢由佢口講好過我講好多，但太太唔理，成日話大大下自己會好，咁神奇??
至於個女，佢都同社工講冇心機讀書，但又唔想做嘢，淨係想多D錢買嘢多D時間玩!! 錢從哪裡來?? 父母囉!! 父母D錢從哪裡來?? Who cares!!! 我唔俾零用錢佢使，要用咩錢就問我，但佢生父俾! 佢生父有心同我作對，我叫個女唔好既佢就支持個女做!! 依家個女日日飲汽水當水，飲到個頭都腫埋，血糖過高成日見疲倦!! 你估害到我咩!!
我個仔，工人未走仲好地地，工人走左由太太照顧，即刻唔聽話學壞，真係唔想俾佢見個仔!!
自己返到屋企都冇心機!!
齊家，我真係零分，要諗諗辦法至得!

近墨者黑

爸爸退休成日睇電視，我問佢又話冇，唉! 令到BB都跟埋佢睇。你地o既BB最鐘意睇咩節目?? 卡通?? 動物?? 兒童節目?? 你又估下我個仔最鐘意睇咩節目?? 答案第一係馬馬(賽馬預測，賽馬日直播)，第二係波波(六合彩)。我個仔日日都叫睇!!
你又估下我爸爸有冇睇??
我爸爸仲教佢記著有馬馬睇o個日冇波波睇!!
所以佢有個爛賭o既仔係好正常，可能仲有個爛賭o既孫呀!!

陰謀論

繼旺角之後日前銅鑼灣又有高空投擲腐蝕液體。其實兇徒有乜動機去行兇呢?? 從陰謀論睇，最大得益者係唔係賣「天眼」監視工具o個個人呢?? 你邊度唔裝我就邊度投擲，所有大廈都裝咁就大生意囉!! 會唔會呢??
(From Wiki)
陰謀論通常是指對歷史或當代事件作出特別解釋的說法。此類特別解釋不同於一般廣為接受的解釋，將事件解釋為個人或是團體秘密策劃的結果。而且此類特別解釋中特別激進者還會進一步駁斥那些廣為接受的解釋，認為那些是陰謀策劃者的掩飾。 說一個理論是陰謀論不但是說此理論不被廣為接受，有時還帶有此理論沒有嚴謹證據支持、荒謬不合邏輯而不值得考慮的意味。陰謀論不只是指理論，也用來指許多沒有證據的說法、傳聞。

窮到燶 帶精工

帶開o既手錶壞左，諗住平平地買返隻精工錶帶下喇!! 上網睇款，睇中隻Spring Drive(咩 係spring Drive，半機械錶，即係都係用石英...)，但係冇mark價，於是去時間廊(City Chain)搵喇，佢代理精工錶架嘛! 點知冇!! 我以為香港冇呢個款。點知同老婆行行下街見到「三寶」有，都係冇mark價，咁入去試下喇!! 我心目中五六千蚊我都會買，畢竟「窮到燶，帶精工」，精工錶會有幾貴呀!! 試下，帶起都幾好睇!! 但價錢真係嚇我一跳，$43800。 嘩!! 即刻走喇!! 「窮到燶，帶精工」邊個講架!! 原來精工都可以幾貴架!!
我老婆話，四萬幾不如買隻「勞力士」喇!!
唔知點解，我一向都唔多鐘意「勞力士」....「勞力士」貴在咩呢?
黃子華以前講過:「有邊個靠勞力搵食o既人帶得起勞力士丫?」
時代唔同囉!! 依家好多帶「勞力士」o既人都真係靠勞力搵食。每日所見最多帶「勞力士」o既係地盆佬，保安員同貨車司機。而且你認為佢越後生越冇錢o既o個班人越係多人帶。反而我見D老細真係冇乜幾多個帶「勞力士」!咁代表D乜??
「勞力士」平民化代表新一代人更多盲目追名牌，更多不設實際。係唔係??
記得有個保安員問我:「乜你冇錢買撈咩?」
唔係冇!! 只係你鐘意將D財產擺出黎俾人睇，我鐘意收收埋啫!!
四萬幾蚊隻錶，今時今日我都帶唔起!!
可能有日帶得起，我都係鐘意精工錶多D!!

既得利益者

既得利益者，因為某種制度下而得益o既人。就算呢個制度有問題，對社會或者大多數人不利，但只要影響到既得利益者o既利益，佢一定會反對。有一百萬個理由去解釋(解釋即係掩飾)點解佢反對。
香港點解冇民主? 原因之一係因為有民主黨??
你叫所有政府重要政策都好民主咁一人一票去公投，唔再需要o個D尊貴o既議員，你睇下佢反唔反對!! 佢會有一百萬個理由去解釋點解佢反對。
代議士制度(議員)只係間接民主，你選左佢代表你，但o係議會發言投票o既時候，佢係唔係真係會以你o既利益黎考慮?? 定係以自己o既政治前途作考慮??
一黨專政好唔好?? 你問執政o既一黨好唔好，佢實話好，政策唔使轉黎轉嘛，平穩d嘛，又唔使浪費時間去討論，效率又高D嘛!.......

家教

星期日，BB返完學，本來打算帶埋BB見下朋友車人個BB仔鈞鈞，可惜鈞鈞最後病左，唯有下次喇!! 星期日搵小朋友玩真係係容易架!!
結果，去左銅鑼灣探太太朋友個仔肥B。呢個Blog 之前都講個肥B，即係o個個可以舉起包米既BB。肥B真係肥，佢大我個仔十數日，但重我個仔十數磅，有40磅!! 佢一餐既食量夠我太太食三日。佢媽媽好自豪，我就覺得好唔正常，叫佢睇醫生，醫生都叫肥B減肥，但佢媽媽一於少理。令肥B好遲鈍....
今次見到肥B，大過左好多，識講嘢，不停講「黑媽媽姐姐」!! 點解講呢句?? 睇碟學架喎!! 咁「黑媽媽姐姐」點解呢?真係冇人知喎!! 所以話小朋友唔好睇咁多電視咁多碟，佢自己都唔知自己講咩!!
肥B依家學得好粗魯，唔鐘意就打人。叫佢同我BB玩，佢一手抽起BB件衫，一把就打落BB塊面度。作為父母，係唔係應該教佢唔可以打人呢? 但肥B媽媽笑笑口話:「哈哈，BB你咁大力摸人呀!!」摸?? 我咁樣摸你塊面一下你牙都甩。點解BB做錯嘢你唔教佢，仲要歪曲事實?? 咁有咩好處?? 之後BB玩玩具，肥B又要搶!! 肥b媽媽叫佢唔好，肥B就用憤怒既目光望住佢媽媽，咬牙切齒，發出底沈既「胡胡」聲，之後一拳打落肥B媽媽度，肥B媽媽笑笑口話:「哈哈，BB你驚媽媽悶同媽媽玩呀!!」，之後肥B走去我BB後面，一腳踢落BB個pat pat度。肥B媽媽又笑笑口話:「哈哈，你教BB玩呀!?」肥B又走去扭BB個鼻!! 粗魯到呢? 好彩我BB冇還手，有唔同人玩具，自己走開!!
3歲以下，父母點教真係好重要，3歲定80呀!!
之前肥B媽媽叫我幫佢選左D幼稚園，唉!! 依家咁睇肥B都應該入唔到，咁冇家教....
真可惜。

係咪小兒科

三楝屋博物館展出的漢文小學1953年小學畢業會考常識科試題，

（一）斯巴達和雅典是怎樣的國家？試分述之。

（二）試述法國革命的起因。


（三）分答下列二題：

（甲）季候風地帶包括那些地區？氣候和雨量的情形怎樣？

（乙）沙漠的成因怎樣？


（四）試把中國和美國的農作方法作一比較。


5至8題任答3題


（五）香港政府的立法機關、司法機關及行政機關其組織與職權是怎樣的？


（六）香港政府何以要設華民政務司署？這個機關辦些甚麼事情？


（七）政府為甚麼要對人民徵稅？是不是隨意徵收？須經甚麼機關通過才能實行？人民對政府估定的稅額不同意時有甚麼補救方法？


（八）聯合國何時成立？會址設於何處？為實現「天下一家」的最高理想，聯合國應做些甚麼事情？


9至11題任答2題


（九）試以圖及文字解釋潮汐的原因。


（十）維他命有那幾種？每種有甚麼功用？各種維他命在食物中之含量如何？


（十一）普通蚊與瘧蚊有甚麼區別？瘧蚊怎樣傳染瘧疾？
今日既大學生常識都唔及當年既小學, 但今日小學已經用電腦, 係退步定進步?

食嘢唔做嘢

星期六，印尼工人放假返印尼，一月至返。
一個月，本來打算請個大陸工人頂住一個月。個大陸工人黎到，一睇個樣，番薯咁。黎左一日，食飯又要人叫，做嘢又企o係度睇!! 我真係頂佢唔順，不過佢發覺原來要做嘢都覺得頂唔順，第二日就走左!! 可能佢原先以為我俾錢請佢返黎係睇住我地做嘢...真係美麗的誤會。
結果，我太太要請假一個月照顧屋企人。唉!! 我太太從來都係要人照顧既人，第一日有我係屋企幫佢手都已經踢哂腳，就係「食嘢唔做嘢，做嘢打爛嘢」o個D 囉!!
第二日佢已經話不如佢同個仔返大陸!!
唉!! …....呢個月真係難過!!
冇工人既日子，我屋企可能家變。

快樂星期天

星期日，本來同BB返playgroup，去到學校樓下，學校先打俾我話都有五個BB中有四個請左請左病假要cancel。唯有同BB行街，去冒險樂園玩。可惜BB身高得87cm，仲未玩得波波池。在海港城，BB要換片，大商場就有Baby Care既設備，方便好多。所以師兄話同BB去街一定去大商場真係有佢既道理。



之後，同BB去九龍公園玩。呢度地方大又有好多BB玩既設備，最重要係好多小朋友，好熱鬧。BB玩得好開心。之後仲有雪糕食呀!!

跟著返屋企帶BB剪頭髮，都係好睇!!

一家人就咁過左一個快樂星期天。

有圖為證

有圖為證，我話個女間房似垃圾房，唔係講笑。作為一個人，點可以咁架?

工作態度與讀書

原來，好多人(尤其係年青人)以為工剩進修係晉升既唯一同必然途徑。即係話，我讀書，你必定要升我。我讀完書，有張證書，根本上你唔可以唔升我。唔升我，係你破壞規則，我一定要走。如果係咁，小小力至少係Senior Manager喇！佢地唔明，讀書只係Bonus，工作態度同能力先至係升唔升你既必要條件。公司又唔係學校。
工作態度同能力，又以態度更重要。
有日，同朋友閒談，佢話公司個文員，佢draft左D文件俾個文員打左俾老細睇，個文員同佢講：「打完俾老細睇，睇完老細又改，改完又要再打，不如你俾老細改完份草稿先俾我打喇！」
咩態度?
講返我，早幾日，俾左份文件個文員幫我scan(公司部舊式scanner，要排隊等又要逐張逐張scan，我就唔得閒下下排隊等)，唔趕，冇期限，做記錄。今日，佢俾返份文件我，話唔得閒，叫我自己scan! 冇期限喎？得閒先scan囉！佢都費事答我行左去! 下午，見佢吹水吹左半個鐘，夠scan哂份文件喇!
我唔知點解喇！
你覺得呢？
我唔知呀！淨係知我打字，影印，scan我樣樣識，但樣樣我自己做返請文員做乜？
做就怕多，錢就怕少！
不過，今時今日，我唔會再鬧人再提點人囉!
做個忍士呀！
關人忍士!

爛片兩套

終於，真係去睇左《2012末日預言》。冇報紙講贊中國人/靠中國人講得咁誇張。世界末日，又係大量電腦動畫，爆呀爆呀!! 冇乜啟示亦冇乜故事可言，反而好多唔合理既情節。係一套睇電腦動畫睇足300分鐘既電影。俾50分。
又睇左《旺角監獄》，都係因為太太鐘意睇張家輝。張家輝扮演精神分裂症既主角其實演得好好!! 但又係黑社會，唉!! 又唔知故事想表達D乜，又係o個個舊概念，一切唔合理既情節都可以解釋 – 因為主角有精神病，精神病人諗嘢唔合理係好合理既!! 唉!! ...而且，拍精神分裂只有一種方法，即係《有你終身美麗》o個種表達方法，照抄。套戲全冇創意，俾40分。P.S.全院計埋我地得7個人睇。

全國山河一片紅

那夜打邊爐，仲同朋友講起集郵。係呀!! 我地幾個細細個都有集郵，郵票簿依家都仲o係度。有D郵票依家已經值幾千蚊一個，但大家都係冇打算賣，希望一代傳一代傳落去。其實集郵真係一項好好既嗜好及投資，但依家既年輕人，除左打機，仲有乜嗜好呢??

轉貼自ATV
文化大革命期間發行的郵票「全國山河一片紅」，因為郵票上的地圖國界有爭議，當年一發行就被回收，流出民間的只有少數，令它成為新中國著名的珍貴郵票，當年只值八分錢但今日身價已超過幾十萬。

郵票下方有三個工農兵手執「毛語錄」面露笑容，他們後面還有一批民眾高舉革命委員會旗幟，郵票上方是中國地圖，除了台灣全幅都是紅色，正代表郵票的設計意念：「所以當時一個最重要的就是兩派鬥爭，後來大聯合，各個省要成立革命委員會，反面就（人民日報）一看，就攪了一個發表一篇社論，就是全國山河一片紅，全國山河一片紅的意思就是各個省都成立了革命委員會，那就是統一的、一致的。」

當年用了三日時間設計再給中央審批，「全國山河一片紅」郵票終於在六八年十一月二十五日在北京率先發行，但隨即被指設計有問題要全國回收：「印了多少郵票要全數銷掉，銷毀掉，所以這一下子「矇」了，你被打為反革命都綽綽有餘，一點都不過，所以我都不知道怎麼錯，錯在哪呢？他們也猜測了，就是紅地圖裡面把台灣沒畫紅，說是漏掉了，好像說不要台灣了，（傳聞）就這樣炒起來的，但是我的理解就是說這是誤解，因為當時遊行就是那樣抬個地圖，我是看見的，為甚麼沒有畫紅，因為台灣沒有成立革命委員會，你畫紅了反而錯了，對不對？」

雖然全國回收但仍有少量流落民間，數量少於幾千張，設計又有爭議，令一個小小的郵票身價由八分錢漲至今時今日小的一款升至過百萬，大的就更貴至幾百萬：「擁有這枚一片紅的郵票，它就像我擁有一部奔馳（平治）車一樣，是一個身份，這些年代炒作更厲害。」

一枚「全國山河一片紅」現在的身價，在香港相信可買到一個過百萬元的單位，但設計者萬維生本身並無擁有這枚郵票，他甚至指這個集郵愛好者心目的心頭好，並不是他的代表作：「我的代表作是兒童郵票，天鵝郵票，是我畫得比較滿意的，這個是在特殊年代出來的，一個東西當時在亂哄哄的時候畫出來，不那麼精準，從藝術性來說就不夠。」

萬維生目前仍有創作郵票及其他畫作，雖然其他作品不及「全國山河一片紅」那麼受關注，但他覺得滿足感更大。

十二月

十二月，大家有咩活動? 有冇D家庭活動，有冇D有其他BB參與既活動?? 咩BBQ咩Party乜都好!! 就算簡簡單單食下飯都好!!

打邊爐

十一月已經凍得好緊要，真係近年少見，市區氣溫都係得10度左右。咁既日子，最好都係三五知己約埋一齊打邊爐。昨晚，就同三個小學同學去長沙灣打邊爐。成晚任飲任食都係每人$80，抵!!

我地幾個自從出黎做嘢都唔係成日見面，反而今年市度唔好，大家仲可以保持三個月聚一聚，而且仲唔使趕頭趕命，都唔知係好事定壞事。聽佢講，出面好多都七折支薪，我其中一朋友都八折。

友人Dick從澳門回流返香港，做左十幾年嘢終於都搵返份安安定定既工，真係替佢開心。更開心既係，過左39年單身既生活，終於都拍拖喇!! Facebook真係幫到手喎!! 我以為佢終生食齋架….!

友人Edmond既女女原來已經5歲，出年讀小一。最近忙於同個女四周圍去名校面試，小朋友同父母都要考，真辛苦。佢問我知唔知依家D幼稚園英文幾深?? 幼稚園要問兩棲類動物既英文(amphibian)，你識唔識?? 我就唔識(唔記得) !! 但我想問幼稚園學呢D有乜意義?? 幼稚園小朋友知唔知乜嘢係兩棲類動物，冇其他更有用既字可以學咩?? Edmond既女女最後終於入到間名校，St. Margaret!! 得嘗所望，希望佢開開心心喇!!

我BB都仲未識嘢，唔知以後會點呢?

墨家哲學

墨家思想，出現於中國春秋戰國時代，經過漢代「罷黜百家，獨尊儒術」之後基本消失。事實上，今日睇返墨家思想哲學，其實好適合現代人去學習。當然，墨家思想既艱苦訓練同嚴厲規則並非人人可以做到，但學習呢種思想對於活在現今物質主義功利、主義社會既人好有幫助。
墨家思想主要可歸納為「墨家十論」，即：兼愛、非攻、尚賢、尚同、天志、事鬼、非命、非樂、節用。

兼愛:是一種無分別之愛，大家放下成見，愛人如己，更無分親疏上下而平等互愛，這是一種極其理想的觀念，只要人們平等互愛，視人如己，則不會有不孝慈、盜賊、侵奪等事。

非攻:非攻是把兼愛思想推廣至國與國之間。非攻是指不侵略，不政擊別國。戰爭必會帶來傷害，就算是戰勝，亦難免有死傷，甚致會招致滅亡。為了證實侵略之害，凡屬以強侵弱，以眾暴寡之諸侯，必遭其排斥，而弱者寡者，必捨身以救，死有所不辭也。

尚賢:主張賢者在位，能者稱職。統治者是最賢能的人，所以要由人民來選舉。不賢不能的統治者，人民可以廢之、役之。而選拔賢人的原則是不論親疏貴賤，一律平等看待。

尚同: 在國家未有刑政之時，因無是非標準而天下大亂，故國家既立之後，便應有一統一之標準。天子上同於天，統治者亦上同於天子，家長上同於統治者，個人上同於家長，在下者皆須尚同於上，而在上者又以兼相愛交相利為令，如此則天下之人必皆兼相愛，交相利。

天志:天有意志，有感情，是操人類禍福權力的主宰，而天也是人類的榜樣，所以人類的行為必須合乎天意，若違天意而行，會受天處罰。

事鬼:墨子以鬼神為存在，並操有賞善罰惡之權。其動機是以鬼神觀念拯救亂世。如人們對鬼神的存在深信不疑，並相信鬼神對人之賞罰，那便可以改善人的行為。他借助鬼神的威力向王公大人呼籲，希望他們能攝於鬼神有賞賢罰暴的權力，而推行有利於民的政治。

非命:不承認有天命之存在，認為人力定可勝天命。命是暴王所作，懶人所述，王公大人的國家治亂，卿大夫的貴賤榮辱，人民的貧富、饑飽、寒暖，都決定於人的努力或不努力，不在於命運。

非樂:貴族所採用各種禮樂制度，皆屬浪費而不實用，只是繁文縟節而已。好樂是損耗民財、民力、民事，而社會人士之為樂，必有損害天下之。

節用:提倡極其刻苦樸素的生活，是一種極端救世的苦行學派。在當時，人民不能人人平等地過高水準生活，使只有先教人平等地過低水準生活，故主張節用。

節葬:不贊成花費金錢在葬禮之上，以為這是不必要的奢侈。

除天志事鬼之外，小小力基本上覺得大部份都值得學習。對個人而言，尤其係要節用、非樂、非命，唔好做咁多不必要既浪費。

兒子的黑色星期五

2009年11月13日，係BB既黑色星期五。
當日下午，工人放佢o係房訓。平日有個嘢裝房門防止房門柵埋既，但工人冇呢日裝，仲唔知點解工人按左個門鎖，風一吹，房門立即反鎖。再加上搵唔到鎖匙，得番BB一個o係黑暗既房內，好彩BB未醒。
五點幾，工人打電話俾我，好彩我返工既地方近屋企，於是即刻返去。返到去，BB都仲未醒，諗住快快手手落街搵個開鎖佬開左佢，要我自己開真係唔知開幾耐，如果BB醒左實嚇死佢!!
點知搵緊開鎖佬既時候BB已經醒左，於是叫個開鎖佬快D出發，個開鎖佬仲慢吞吞，真係一派大師風範。返到屋企，聽到BB喊，叫個開鎖佬快D開。o係我心目中，一個專業開鎖佬開把咁既房門喇叭鎖一兩分鐘乜都得喇!! 點知呢個一派大師風範既開鎖佬整左十分鐘都未得，又話冇帶鉗。唉!! 我都未見過開鎖佬用鉗開喇叭鎖!! 你要鉗我俾你，但睇你個樣都係唔識開，BB又越喊越緊要，唉!! 我都係決定call消防。
今次報警又好快喎，可能因為BB喇，十幾分鐘就到喇!! 消防員到，個開鎖佬都仲未開到把鎖，咁係功夫都搵到食?? 佢真係要返去再培訓至得喇!!
可能因為BB既關係，有五個消防員，兩個救護員，兩個警察到場。消防員用斧頭五秒就開左門，不過門，門鎖，門框都爛哂!! 見BB爬o係床度喊，真係可憐，BB見到爸爸抱實唔放，我諗BB真係好驚。唔肯落地，唔要工人抱， 又唔肯肯入房。之後帶BB去玩去食雪糕先冇事。
唉!! 希望我吸哂BB既黑氣，唔好好似爸爸咁黑就好喇!

終於輪到中國

轉貼自信報
《 2012》吹捧中國救地球
內地觀眾極度亢奮　被斥現自我膨脹心態
2009年11月13日

中國拯救世界？投資逾 2億美元（約 15.6億港元）的電影《 2012末日預言》蹂躪，今日將在內地上映，電影講述世界各地飽受火山爆發、地震、海嘯等災害，解放軍拯救美國人的同時，中國負起興建挪亞方舟、拯救生還者，重建文明的重擔。電影未上畫，卻已引起內地人的極度亢奮，觀眾在看試片時無不高呼：「太爽了，終於輪到拯救地球了！」有北京學者批評「這正反應了當前大國崛起，中國人只聽讚美、順耳的聲音，有自我膨脹的心態。」

電影《 2012末日預言》導演羅倫艾默烈治（Roland Emmerich）根據瑪雅文化，預言世界末日將會在 2012年 12月 21日來臨。片中男主角一家展開末世大逃亡，其間洛杉磯在地震中下沉、巨浪夾帶甘迺迪號航空母艦將白宮壓成碎片、高達 1,500米的海嘯覆蓋珠穆朗瑪峰……。各國政府啟動挪亞方舟計劃，讓世界各地精英和領導人在災難中存活，待日後重建地球文明。


西方惡評如潮「災難大雜燴」

西方影評對電影惡評如潮，其中影評網站「爛番茄（ Rotten Tomatoes）」統計，正面評價者僅 37％，有影評人稱長達 2小時 40分的電影是「災難大雜燴」，「（電影）沒有主題，沒有哲學視角，沒有宗教上對於災難的看法，只有一群慌不擇路的人。」
但電影日前在內地舉行試片時卻受觀眾歡迎。影片開始不到 15分鐘，就出現一名拿着喇叭的解放軍，用標準的普通話說：「黨和政府一定會幫助大家重建家園」。之後，一群坐飛機逃難的美國人迫降在中國雪山，求助無望時，解放軍從天而降施救。電影又講述各國支持中國作為興建挪亞方舟的基地，因為「交給其他國家是不可能完成」……到了電影末段，當美國臨時決策人看到海嘯將至，拒絕讓更多人進入方舟時，中國是首批決定打開船閘的國家。

電影不斷表現中國政府和中國人民的偉大，讓試片現場，不時出現了觀眾的笑聲和歡呼聲。他們的心情十分亢奮。

「這反映了中共長期教育的失敗。國人只聽讚美、順耳的聲音。這種心態在近年越來越嚴重！」北京學者司馬瀚表示，隨中國越來越強大，中國人自我膨脹的心態，越來越厲害，「影片如此吹捧中國政府，這也反映了美國電影工作者，已掌握了在中國的生存之道，票房一定大賣。」

網民哀嘆：誰來拯救中國

《 2012末日預言》發行商預計，電影在內地票房將有 3.5億元人民幣。據悉，內地當局在審查這部電影期間沒有刪剪任何鏡頭，這是外國入口影片中罕見的。

有內地網民認為，雖然現在中國民眾的生活正逐步富裕起來，但面對的社會問題卻同時湧現，「中國或許可以拯救世界，但前提是誰來拯救中國」。有觀眾認為，國民在看完該電影後，應加以反省國家當前的不足，而非沉醉在幾個有中國鏡頭的電影之中。
廣東《南方都市報》

網民有話說
•「中國人慢慢地站起來了！」
•「開始拍馬屁了，迎合中國人的市場。」
•「影片一刀未剪通過審查。都應該這樣，不動剪刀會死啊！」
•「看到有人幫自己炫耀，肯定開心的花上 80元去看『自己』怎麼拯救世界。」
•「又一次滿足了中國人的虛弱的虛榮心。」
•「中國人拯救世界，是因為中國的票房對導演來說太重要了！」



曾幾何時，小小力睇日本空想特撮系列(鹹蛋超人同幪面超人)既時候，成日都會懷疑，點解怪獸同外星人黎到地球都只係襲擊東京，唔會話襲擊北京或者南京咁既呢?? 對抗襲擊，永遠都冇中國人份!!

今次，終於輪到中國喇!!

小小力幾歲時諗既嘢，今日竟然令許多內地人極度亢奮!!

……………. 唉!!