睇相

番大陸接家姐既時候，太太要修甲，期間有個女人行埋黎話同我太太睇相，只係幾十蚊，好準咁話，仲話人人都知佢好得咁話。太太於是俾佢睇(當時，我冇同太太講過野，個女人應該唔知我地係夫妻!!)
個女人話：你自細就唔洗點做，脾氣唔好但心地善良，有好多幫到手既朋友。細個應該曾經破個相!! 二十幾歲結過婚，但呢段婚姻好快會破裂，之後要三十六歲之後再結婚先可以到尾，你丈夫會係一個身形肥大既人，越肥越好!! 你做事完全唔得，做生意一定失敗，但你只要結左第二次婚就唔洗再做，你丈夫會越黎越有錢，越做越大，打工都會打到做老板。
太太話：但我丈夫依家都失業冇野做…
個女人話：唔緊要架!!佢唔做都會好有錢…. 另外，你有兩個仔女，第一個係女，第二個係仔，仔女都比你聰明，你有八十三歲命，一路會好到尾。
…..
嘩!!! 未發生既我唔知，但發生左既100%準….
之後，個女人周圍行，行到埋黎問我睇唔睇…. 嘩!!! 咁準!! 更係唔睇喇!! 我好驚呀!

滿月

B仔滿月喇!! 希望B仔身體健康!!
滿月當晚，B仔都好聽話，俾咁多人抱黎影相都冇扭計!!
…睇相喇!!(Blogger限upload五張相，想睇更多要去我Facebook啦!!)

顛倒黑白

顛倒黑白是非,乜自由大哂架咩??我可唔可以屙尿射o個個咩MC仁架??D尿好天然架喎!!冇害架喎!!
佢唔舒服??咁我有尿唔屙出黎都好唔舒服喎!!我成家都有尿唔屙出黎既唔舒服當然比你MC仁一個人既唔舒服大喇!!咁我成家唔舒服D計先!!
MC仁：「佢唔舒服？我地舒服點計先？」
香港有MC仁呢D廢物想好都幾難!!

拖地...


咁得閒番屋企拖地喇,...D年青人真係食飽飯等屎屙....世界上好多人死,偏偏食飽飯等屎屙既唔死...

出城

太太兩個家姐話黎飲B仔既滿月酒，三家姐都冇乜問題。二家姐第一次話不如滿月酒改到五一勞動節之後等佢放假先至黎，結果被佢媽媽我外母鬧到飛起，死死氣話四月二日黎。我都計劃好去深圳接佢，結果到四月一日佢簽證都未有，原來三家姐去申請簽證既時候佢又掛住打牌冇去申請(佢就係我o係貴州捉住我打足一個星期牌唔准出街o個個)，諗著靠關係可以即要即有，點知衰左，話要四月三日先有。我唯有改四月三日去深圳接佢地。到四月三日，再打電話黎，話個簽證要四月七日先至有，叫我地不如將滿月酒改到四月七日之後先擺，…. 唉!! 如果我屋企有個咁既成員，我都覺得幾失禮，成日叫人地主人家改期就自己，結果被佢媽媽同老公再鬧次勁既!! 三家姐都唔理佢，自己一個人落黎，佢仲叫三家姐幫佢帶埋D行李落黎，佢自己繼續去打牌…. 唉!! 三家姐又答應佢…. 咁就大件事喇，佢將黎香港十日，每日三餐既食糧都放哂入去一個冇得拉既行李袋度，我估個行李袋至少都有150磅，三家姐都深圳，我幫佢搬行李…. 嘩!! 真係呢….. 我都好佩服三家姐!咁重都拉到上車(咁重，冇得拉都要拉喇，話之佢死喇!!) ，我行樓梯想一腳踢個行李袋落去呀!!番到香港，太太仲話去坐巴士，搬佢個袋行李行幾條街，不如叫救護車送我去醫院仲好喇!!

唔敢想二家姐落到黎會點!!
仲話七月去貴州帶我地一家去玩，我驚爸爸被迫打一個星期牌呀!!

重回時代

又重回時代

今日，第一日「失業」，上午去見工，地點係旺角，整個過程大約一個鐘，係同行。奇怪既係打電話俾我叫我見工既並唔係人事部，而係經理!整個過程冇written test，冇oral test，冇考我knowledge，只係吹下水咁。發覺呢個經理比我更了解時代既運作，有咩人加入咁，連舊大老細走左，去左邊，新大老細點改組都幾清楚…唔通呢度有人識我….?? 見左大約四十五分鐘，跟著做埋second interview，見個高級經理，問左D technical野，仲簡單，十五分鐘完成，佢話等人事部D同事做埋D document就okay…咁，係唔係請我架喇??

之後，同B仔去申請出世紙，原來申請出世紙，只要父母有結婚證明書，咁，只要父母是但一個去就得，連B仔都唔洗去!! 之後，帶左B仔番時代見下D舊同事，…. 靚唔靚仔呢!!嘩!!好熱鐘喎!!個個圍住我B仔，又話抱，又話摸，驚親人地小朋友嘛!! B仔咁少喊都喊喇!!為有快快走喇!! 遲D再睇過喇!!

離開時代

終於，離開時代。

原來我o係呢個時代真係幾多朋友，請大家食「散水餅」，一人一件，七打都唔夠食。

舊同事Michael打電話俾我，原來佢走既時候，大老細o係走廊捉往佢「鬧」，仲講左D好侮辱既說話，….. 咩請左你即係廢既…. 等等。山水有相逄，佢真係小氣兼小家。Michael問佢有冇鬧我，…又冇喎，自從遞信之後佢都冇再鬧我喎…我都想睇下last day佢點鬧我….

不過，舊同事「鉤仔」走左，佢都要開個會黎力數人地既不事，真係好底能又無聊。依家小小力又走左喇，唔知佢又點將我鞭屍呢!!?

臨走，終於有同事搵我影相，我以為冇人想同影相喎…




夜晚，本來有舊大老細既飯局，結果舊大老細放飛機，本來有舊同事「大力」，結果話大力要留o係旺角捉老鼠，本來仲有同事「體育健將」。最後，飯局得番五個人，兩個判頭，我老細CM，舊同事鉤仔。咁仲好，咁多唔多熟既人做咩呢!! 呢個飯局都冇乜特別目標既，至在吹下水回憶一番。整個飯局，好鬼「智能飯局」feel，食下好野，飲下靚酒，好鬼relax好鬼正!! 由兩個舊老細送我走，算係幾唔錯。

不過，好多人都好想知我既下一站o係邊，…. 其實答案好快就有架喇!!

在時代的最後一日

這是在時代的最後一日，

終於，我要離開這個工作了八年既地方，

最後既感覺係……..浪費時間，

足足浪費左自己八年時間。

走前，依家既老細問我佢舊公司有位去唔去….

我拒絕了!!

走前，有舊同事打電話俾我問去唔去佢新公司…

我感謝但亦拒絕了!!

這刻…

我想靜一靜，休息一下，

繼續自己走自己應該走既路。

疑慮

有日，太太問我係唔係好大壓力好唔開心。點解呢??太太話我冇乜表情，見到B仔都好似唔係好開心咁!!… 其實初初做爸爸又就黎失業，壓力當然有，但又未到於大到令我唔開心。相反，每次見到B仔我都好開心，只係可能無論開心唔開心我都係冇乜表情所以太太唔發覺喇!!
我冇事喎!! 人生比依家更底潮既都試過喇~~唔洗擔心喎!!
星期五，工程部同事同我Farewell，但因為辦公室政治，攪手都因為某人唔鐘意而缺席，少少十幾人既一個部門，食餐飯都分開三班人黎食，真係煩。席間，有同事間我有咩光輝既時刻。光輝?? 作為一個small potato，我可以有咩表現呢?? 最光輝一刻，咪就係大老細話改組，我即刻話唔do囉!! 咪次次有佢講冇人講!!
星期六，去買過D傢私準備搬番入東涌。本來，屋企有兩個大房(雙人) 一個細房(單人) ，咁爸爸，我同太太，個女同工人最好既安排本來應該係我同太太一個大房，個女同工人一個大房，爸爸一個細房。但我亞姨竟然同爸爸講唔好俾佢地(我同太太)訓大房，點解呢?? 結果係爸爸一個訓大雙人房，我同太太兩個人訓細既單人房，亦因此要買過好多傢私，我個房一入門口就上床…我唔明屋企邊個訓邊間房關亞姨咩事?? 點解我同太太一定唔可以訓大房??
辦遺產既事繼續，媽媽走後，留底一筆錢，根據法例轉左去爸爸戶口。之前同爸爸傾過佢年紀都大喇，以防萬一，一係戶口加埋我個名，一係將D錢轉部份去我戶口。本來爸爸都冇問題，但係之後亞姨同爸爸講千祈唔好俾D錢佢地(我同太太) 。點解呢?? 唔俾我地，咁俾哂你好唔好?? 爸爸最後改變主意，我避免爭吵，錢既野我以後都唔再提!!
好多野我估媽媽生前諗都諗唔到….
辦遺產既時間，仲有D股票要轉去爸爸名下，我叫爸爸去中央結算做轉名，本來都冇問題，但後來爸爸聽到D茶客講話D股票唔一定係中央結算俾你，而唔係中央結算俾你就唔可以去中央結算轉名…爸爸於是再三問我係唔係冇問題…唉!! 爸爸請願信過名都唔知既茶客都唔信我….唉!! 你有冇聽過匯豐出既銀紙唔可以去渣打入錢呢??….. 唉!!
我開始明白媽媽生前點解咁勞氣……
有日，舊同事Ling黎我筲箕灣屋企睇BB，我都介紹佢俾太太識。睇完我送Ling去搭車，離開屋企之後，太太表姐就同佢講話我同Ling一定有「路」，你話笑死唔笑死..!! 點解我同Ling會有「路」呢?? 仲「一定」喎!! 表姐既理由係佢老公以前都係咁….救命呀!! 我又唔係你以前老公，佢係咁唔代表我係咁…我太太身邊就充滿呢D婚姻失敗既女人，成日同佢講你老公「一定」去「滾」，一出街就係去「滾」，落街買支豉油都可以去「滾」，番工就更加唔洗講，「滾」硬喇!! 太太話本來都冇野，但聽佢表姐講講下就有D唔開心….
疑慮…其實好多時從欠缺自信同無知引起…

日本奶粉

B仔係飲呢隻日本奶粉架，唔係森永，唔係雪印，係Bean Stalk!!

下面有解釋(但唔係我寫既!):
好多人會問, 點解香港同台灣既人會叫 Beanstalk 奶粉做雪印? 除左佢叫做 Beanstalk Snow之外, 其實佢同日本雪印係有直接關係。日本雪印係 2000 年發生嚴重事故, 話說當時有好多人食用左雪印既乳製品之後出現痾嘔肚痛既中毒現象, 人數達 1萬4 千人! 雖然中毒唔及大陸既大頭奶粉嚴重同影響深遠, 但係就嚴重影響雪印聲譽, 結果銷量由全日本第一位跌到第三位, 俾明治同森永取代, 直接損失 110億日元! 而公司管理層亦都解散, 當時日本有名既大塚製藥 (有睇日劇既一定識) 接管嬰兒奶粉既業務, 以製藥既管理黎生產奶粉, 所以 Beanstalk Snow 就係 2002 由大塚製藥集資 5億日元成立。所以 Beanstalk 一直被大家稱為雪印, 但係你問好多成日去日本既人買雪印奶粉呢, 佢地一定會話你知日本雪印停產左好耐, 而產生混淆。
今年年尾日本雪印捲土重來, 係停產左 7年之後重新推出嬰兒奶粉, 實行抵食夾大件, 相比起森永、明治同 Beanstalk 越賣越細罐 (想你快d 食晒一罐賺多d), 可以同另一個老牌子和光堂睇齊。
其實日本食物有品題都唔係乜野新事, 明治都試過, 問題比起大陸既大頭奶粉實在太小兒科, 不過如果你問我邊隻最穩陣, 從 track record 黎講穩陣程度, 應該係 Beanstalk, 森永, 和光堂 > 明治 > 雪印, 從公司背景就 Beanstalk 最強。

我o係呢度訂購既，http://www.re-on.com.hk/index.php，訂8罐有Discount!!

有緣再聚

一連串既Farewell飯局開始左，成三個星期，日日有飯局，想唔肥都幾難。有D已經排唔到時間飯局，唯有下午Tea一Tea!!

同友部門同事Alfred下午Tea一Tea。原來唔經唔覺大家都合作左六年，一齊睇住公司轉變，睇住佢部門舊同事一個一個消失，新人一代不如一代，辦公室政治毀左公司，大家最後亦一齊離開。傾起大家一齊工作既日子，雖然工作量不斷增加，但總係樂多於苦。

離開之後，因為大家工作行業性質都唔同，相信都冇咩機會再合作喇!!

祝福Alfred工作順利，家人都身體健康，希望有緣再聚!!

卡片背後的故事

快將離開呢個時代，終於開始冇野做，可以清一清自己野。

執卡片既時候，發覺原來呢八年來都識/見過好多人，卡片都四五百張。雖然好多都已經冇聯絡，但睇番一D舊卡片，發覺卡片背後有好多不同故事。睇住有D人同一個名但係有幾間公司卡片，八年來不停轉公司，越轉越高級。有D唔單只轉公司，仲轉埋行，最奇既仲係轉左行都仲有合作。有D自己創業，仲係行內打聲名堂。打工既，有D位高權重，但一剎那竟然人間蒸發，當中有人惹上官非，有人避債消失，有人光榮引退，有人黯然下台，更有人與世長辭。卡片裡，有好多有料之人，但更多冇料扮代表，竟然有人新上位，剛剛派完卡片就被辭退。派卡片既人又來自世界各地，有美國CNN既記者，有日本公司既社長，工程師，政府代表，有荷蘭既工程師，有韓國既電信商，有西班牙商會代表，有法國使節，有非洲既音樂人….仲有好多好多。

八年來，公司俾我好多機會同各式各樣各層既人接觸，交左好多朋友，亦令我變得更加外向，見識更多。本來好喜歡呢份工，可惜…………

最後，保留左百幾張卡片作紀念…

雪花

のびた人陰（かげ）を舗道（ほどう）にならべ
夕闇のなかを君と歩いてる　手をつないでいつまでもずっと
そばにいれたなら　泣けちゃうくらい

風が冷たくなって　冬の匂いがした
そろそろこの街に　君と近付ける季節がくる

今年、最初の雪の華を　ふたり寄り添って
眺めているこの瞬間に　幸せがあふれだす
甘えとか弱さじゃない　ただ、君を愛してる　
心からそう思った

君がいるとどんなことでも
乗りきれるような気持ちになってる
こんな日々がいつまでもきっと
続いてくことを祈っているよ

風が窓を揺らした　夜は揺り起こして
どんな悲しいことも　僕が笑顔へと変えてあげる

舞い落ちてきた雪の華が　窓の外ずっと
降りやむことを知らずに　僕らの街を染める
誰かのためになにかを　したいと思えるのが
愛ということを知った

もし、君を失ったとしたなら
星になって君を照らすだろう
笑顔も涙に濡れてる夜も
いつもいつでもそばにいるよ

今年、最初の雪の華を　ふたり寄り添って
眺めているこの瞬間に　幸せがあふれだす
甘えとか弱さじゃない　ただ、君とずっと
このまま一緒にいたい　素直にそう思える

この街に降り積もってく　真っ白な雪の華
ふたりの胸にそっと　想い出を描くよ
これからも君とずっと…

(中文歌詞)
不斷延伸的影子　在紅磚道上並列
在深夜與你並肩走著
永遠緊緊牽著手　只要能在你身旁
我就感動得快要哭泣
風兒變得寒冷　有了冬天的味道
這條街也即將到了　能和你接近的季節來臨
今年　最初的雪花　向我倆靠近
在眺望著的這個時間裡
充滿了幸福的喜悅　沒有撒嬌和脆弱
只是　愛你　打從心底愛你
只要有你在　無論發生什麼
都會有可以克服的心情
我祈禱著　這樣的日子一定會直到永遠
風兒吹得窗搖　把夜晚搖醒
無論多麼悲傷的事　我用笑容為你改變
雪花飛舞飄落　在窗外一定
不知何時雪已停　把我們的街道染色
想為某人做些什麼事　原來　這就是愛
如果　我失去了你　我會變成星星照耀你
微笑　或被淚水沾濕的夜晚　我會永遠在你身旁
今年　最初的雪花　向我倆靠近
再眺望著的這個時間裡　充滿了幸福的喜悅
沒有撒嬌和脆弱　只是　想永遠地
就這麼一直一起　我真心地這麼想
在這條街上堆積的　純白雪花
悄悄地在我倆胸口畫上回憶
從今而後也要永遠和你在一起

扭計

唔知係唔係被D噪音影響左，B仔成日都訓得唔好，訓個幾鐘就醒一醒，仲成日喊同扭計。昨晚，B仔又成晚扭計喊，又唔係肚餓，又唔係尿尿，又唔係屎屎，都唔知係乜，要抱到實一實先訓到著，成家人都冇覺好訓，真係大件事。唔知B仔係唔係好驚呢…係都唔奇，因為B仔爸爸小小力都係個好膽小既人。
太太每次見B仔喊就俾佢飲奶，有飲奶B仔就唔喊，但，咁係唔係辦法呢?? 咁細個冇理由食咁多架喎!!… 佢又唔知飽餓，你俾佢就食….唔知有冇問題呢??
點算呢??

復活節

一連四日復活節假期，唔知係唔係因為將近離職，本來已經係放假既心情，令四日假期反而覺得有點悶。假期既最後一日係mock exam，本來計劃好四日在家溫習，但竟然完全提唔起勁，懶洋洋咁睇下電視訓下覺…你以為好享受?? 對我就唔係喇!! 我好討厭呢D唔起勁全冇目的既日子。或者係最近一輪又好似事事不順咁!!個人都謝謝地，心裡面覺得你一去做就錯就失敗咁…連小小信心都建立唔到咁。如果媽媽o係度，會同我講D咩呢??
我現在又應該做D咩呢??
希望復活節後自己都復活!!
B仔一日一日長大，日日個樣都有D唔同!!我覺得佢個樣越黎越似「蠟筆小筆」，太太話如果佢好越小筆咁小小力就真係冇佢辦法!!... 唔知呢!!
期間，太太既朋友一家人黎睇B仔，佢地個仔兩歲幾大，百厭到死，你叫佢唔好做既佢偏要做，你叫佢唔好大聲叫嘈住B仔訓覺，佢就特登大聲叫。你叫佢睇下B仔，佢就埋黎一拳打落B仔到，打到B仔耳仔都紅哂，但佢父母見到都完全唔理，我太太又唔識保護B仔…咁!! 你地唔理你個百厭仔我都要保護B仔，於是由我同百厭仔「玩」囉!! 玩完，百厭仔喊住要走…再唔走，除佢褲彈佢jer jer!!!
唔知B仔大個會唔會咁百厭呢??

發癲

自從太太生完B仔番屋企坐月，樓下十七樓就開始裝修，除左星期日，日日係咁鑽係咁鑽，由11號鑽到今日18號，鑽足七日，日日不停咁由9點鑽到6點。癡線架!! 得果五百幾尺屋鑽足七日，唔好話裝修，成間屋拆埋都得喇!! B仔本來好好脾氣都開始發脾氣，太太更加完全冇得休息。…唔通我前世殺佢全家，依家黎報仇!!

打電話去環保署，佢地話朝七到晚七係冇噪音管制既，佢鑽足一年你都冇佢辦法!!

救命呀….!!!

物理治療

由於B仔出世時隻左腳有D問題(輕微向內彎)，可能影響將來行路，醫生建議B仔做物理治療。於是，昨日帶B仔去醫院做物理治療。原來B仔既情況真係好輕微，用隻牙刷掃下隻腳仔等佢向外郁已經可以，驚得我呢!! 另外，物理治療師幫B仔檢查全身關節，一切正常，…真係鬆一口氣。不過物理治療話B仔懶到死，唔多願郁!! 哦…咁咪似我囉!! 聰明既人一般都比較懶架嘛!!!

去到物理治療室，都有同其他太太傾下(原來依家營養咁好，好多BB出世都有8磅!! 我個B仔細人成個碼) ，原來好多BBo 係媽媽肚內都偏埋一邊訓，令條頸有問題要做物理治療。物理治療師將BB條頸扭番轉頭，BB個個面都紅哂，喊都呢…好恐怖呀!!做父母既既擔心就假喇!!

做子女既，好好照顧自己身體，已經係一種最基本既孝順。

滿月

好快，B仔出世已經兩個星期，話咁快又要幫B仔擺「滿月酒」喇，擺過滿月酒，希望佢醒醒目目，身體健康喇!! 滿月酒既日期係4月5日(星期六) ，地點係東涌!! 因為唔派帖，如果想參加既朋友請留言或者send個短信俾我方便我預人數喇!! Thank you!!

問題所在

太太住院期間，正值流感高峰期，醫院嚴格實施只准兩個人探訪。小小力進入病房前，被一個青年人欄住，要問我幾個問題同登記。流感高峰期，小小力都明白亦合作。小小力以為佢問我有冇發燒/有冇流感/有冇外遊之類既問題，點知佢問我既三個問題係....
青年人：「請問BB係你邊個?」
小小力：「BB係我個仔!!」
青年人：「請問BB既媽媽係你邊個?」
小小力：「.....BB係我個仔，咁我咪BB媽媽既老公囉!!」
Okay..我未必BB媽媽既老公架嘛!!
青年人：「請問你係BB媽媽既咩人?」
小小力：「.....你話呢!!」
....呢三個問題，同流感高峰有咩關係??就算係保安理由，咁既問題都真係有D問題!!香港既醫療制度真係有問題!!
入到病房，太太話個青年人係學生黎!!
原來香港既教育制度先係大問題!!

70 80 90

睇雜誌，有一段講香港人既轉變.....

七十後(70年至80年出生既一代)與九十後有明顯既代溝，七十後是工作狂，八十後願意工作但不太願意加班，九十後根本不想幹。老板請食飯，七十後總會坐在老板旁，八十後則希望最好坐遠點，九十後根本不出現。

不同年代的人待人的態度也有不同，七十後跟陌生人一起總喜歡主動找話題，八十後則不太理陌生人，找話題?太累了。至於九十後一代，除非你是帥哥美女，否則快死開。

小小力覺得筆者觀察入微，好中!!但小小力覺得自己係七十年代出生既人，待人的態度似七十後，工作的態度就似八十後。唔知B仔既一代又會係點呢??

你又係點既呢??

夷齊讓園

黃大仙求籤，問事業，求得39簽 - 夷齊讓園

籤文
夷齊不忍食周粟。兄弟心甘採蕨餐。
讓國名應垂萬古。可憐餓倒首陽山。

籤文意思
昔伯夷叔齊。兄弟讓國。隱於首陽山。採蕨薇而食。其讓國之名。留傳萬代。然無飯食而餓死。真可惜矣。求得此籤者。當立一點善心。隱忍受苦。先難而後易也。此籤吉中有凶。凡事宜謹慎。

解說
事事未能稱心。

問事業問到要餓死.....真係!!

問家宅，求得17簽 - 月下追賢

籤文
秋水蒹葭白露盈。盈庭月色浸階清。
清風吹動馬鈴響。響接晨鐘不斷聲。

籤文意思
秋天多露，月色滿階，風吹馬鈴，響接晨鐘之聲。此乃漢時，韓信投奔漢高祖，未獲重用，夤夜馳歸。為張良所知，告信之能於高祖，乃月下追回韓信時之情景也。求得此簽，凡事皆平穩，雖或阻滯，到底必好，有吉而無凶。

解說
家人安康。

咁都好D.....

流感大流行

呢一次流感高峰，好似沙士咁o係地區爆發，好多學童染病，有小朋友甚至死亡。屋企有兩個小朋友既小小力都好擔心，早早已經買定口罩/消毒藥水/探熱針等等。晚上，政府突然宣佈小學幼稚園緊急停課兩週，提早放復活節假，小朋友開心，家長都冇咁擔心。
早上番到公司，自己部門十二個人，得番五個番工，真恐怖。
希望唔好係另一次沙士喇!!!

回憶何價

媽媽生前同爸爸去旅行，影左好多Video，全部都係Hi-8帶，屋企部手提攝錄機已經壞左九世，依家Hi-8已經唔出，想睇番都唔得，至少我都想俾B仔睇下嫲嫲係點既樣。早前朋友Michael話快圖美可以代客將Hi-8帶轉做DVD，於是今日去問。係!! 佢地真係可以做到，但勁貴，轉60分鐘既帶要HK$230!! 媽媽留下既帶大大話話都有二十幾個鐘。
但….回憶何價?? 我就話無價喇….幾千蚊可以俾B仔睇到佢從未見過既嫲嫲，已經物有所值。

回家

今日，太太同B仔出院!!番到屋企，B仔好聽話!!係沖涼同換衫就喊....長輩話唔好B仔一喊就理佢..但B仔平時咁聽話，見佢突然間喊成咁都忍唔住抱下佢喇!!一抱就唔喊囉!!即刻笑囉!!...我會唔會寵壞B仔呢??
番到屋企，要沖奶俾B仔飲，初初話好貴唔買既日本奶粉最後都買左，真係要快D搵奶粉錢至得喇!!
唉!!小小力真係...

父女面試

B仔出世既第二日，小小力又去見工，係遞辭職信後既第二次，地點係中環。
其實面試既部份自己既表現都唔錯，但仲有一部份考試，三十分鐘做一份十七題關於facilities management同building services既試卷。唉!!…. 我真係唔多識答!! 係我地公司要求底，定係人地要求高呢??
十七題問題係..
1. Name different type of maintenance strategies
2. How to plan a good preventive maintenance strategy?
3. Estimate the cable size for 100A Isolator.
4. What are the tests and works carried out by contractors in WR2?
5. Name some common method to start up motor
6. What is the discharge pressure of R22 and F134a in summer time?
7. What can you see in the data log for a condenser coil that is dirty
8. What is the COP of water-cooled chiller and air-cooled chiller?
9. Compare the size, power, noisy level, life of centrifugal type, reciprocating and two screw type chiller!
10. What is the supply temperature of FCU/AHU!?
11. If the office have no drainage system, what would u suggest for provision?
12. What is the operating distance of hose reel?
13. What is the range of the flexible tube of hose reel?
14. How to operate(or activate) a smoke curtain!?
15. If there is a abnormal pressure drop in the discharge pressure of chiller pump, what is the problem?
16. How to check/inspect busbar!?
17. What is Automatics Sequential Control of Chiller?
…全面試歷時個半小時…累!!

第二日，到個女中一面試，個女話好緊張。小小力都話，其實以個女既成績同課外活動既表現，o係東涌只有學校搵佢，面唔面試都冇關係。到學校面試，老師話好欣賞我同埋個女一齊去，話有分加喎!! 原來真係唔係咁多家長同小朋友一齊去…之後，面試分英文，廣東話同普通話部份….尤其係普通話，我個女應該好過個老師好多!! 面試歷時七分鐘，老師話個女其實去試Band 1英文中學都有機會得。係咪呢?? 洗乜驚!!

爸爸小小力的擔心

初為人父既小小力，每次見到B仔，既開心又擔心。擔心佢身體有咩事，好大壓力!!
B仔出世已經三日，日日個樣都好似有D唔同，第一日覺得佢似舅父仔，第二日覺得佢似我，第三日變左唔知似邊個。Anyway，佢好得意，除左換片同冇野食之外，佢係唔多喊，仲成日笑!! 大家見到佢都好開心!!
擔心既係，就係佢唔多喊，有唔舒服唔識講又唔識喊，咁我地點知呢?? 好似昨日小小力太太幫佢剪指甲指損左B仔手指，流哂血，佢都唔喊既!! 係佢唔怕痛定唔識喊呢??
好掛住B仔喎….

B仔

終於，太太 o係打「摧生針」之前日作動入醫院生B仔!! 但生產既過程絕不順利， 期間B仔心跳一直減慢，差D窒息，結果要開刀!!最後，B仔o係三月七日早上出世，母子平安。B仔重6.7磅，除左剛剛出黎既一刻，B仔都冇喊過!!第一次抱住B仔， 佢仲望住我笑，感覺真係好奇妙!!

危中有機

公司發生左既事，係唔容易解決，但總會有解決既時候。雨過亦一定會天晴!! 某D同事呢個時間好努力咁幫老板手搵圖呀搵契呀咁!! 雖然做呢D野對解決事件應該冇乜幫助，但老板應該會記得有人呢個時候幫過佢。呢位同事仲唔升!!?

小小力覺得時來運到，都冇咩好講囉!!
A姐話天冇眼呀!!

太太小心

「小心睇住太太」
講就容易，但我都要番工，邊可以日日睇住佢呢?? 仲有幾日就生得，我估佢都應該知道要小心喇，但現實並唔係咁囉!!!
早兩日，太太仲走去海邊捉魚。都仲未夠，佢見人地避風塘D艇仔咁得意，俾錢個船家俾佢坐上艇坐游幾個圈。佢從來都冇諗過危險…
昨日，係屋企又話悶，睇恐怖片，D血腥場面唔單嚇驚佢，佢嚇到B仔，個肚成個大力踢左一下…
我太太話佢又唔得，講佢又唔聽，咁大個人仲係細路咁，我都好擔心B仔既將來。

走得快

事件都唔係咁易解決!!電臺節目既部份更精彩,但係我唔識upload上黎,有興趣既朋友我個別e俾你喇!!依家你o係度野餐都冇人敢話你!! 今日D記者試左喇!!

爸爸生日

睇友人既Blog，講到爸爸生日…其實，小小力爸爸最近都生日。
呢個係媽媽離開之後爸爸既第一個生日，我怕爸爸過得唔開心，仲叫左好耐冇見既細佬番黎。其實，爸爸始終最錫佢，我係知道既…
爸爸生日當日，露露話要自己俾錢買蛋糕，我太太俾D錢爸爸買野食，我就請一家人去食晚餐!! 仲用DV拍底左俾爸爸睇!!
見到爸爸都好開心，我都鬆一口氣。
人，係唔係長命百歲就好?? 睇見媽媽我就覺得未必喇!!
我只希望爸爸身體健康，開開心心過每一日。

低落

好快，辭職信已經遞左一個月。但係工，都仲係見得o個一份。有D低落!! Send左好多application出去，唔好話請，連見都冇得見!! 明明適合哂所有要求，但見都冇得見，但又見到報紙仲登緊廣告，咁即係點呢?? Fit哂到唔見??

媽媽離開之後，到爸爸身體開始出現問題。個醫生叫爸爸去法國醫院檢查!! 同爸爸去到法國醫院….間醫院好似酒店咁，你諗下有幾貴!! 最意外既係法國醫院既門診排隊排到政府醫院咁，香港人真係有錢。Check一Check，咁就用左$5000。係唔係真係要去法國醫院咁高級做檢查呢?? 之後再到香港體驗….感覺同法國醫院差唔多，價錢貴市價差唔多一倍。Anyway，最緊要人冇事，錢洗左算喇!!

太太既預產期3月2日已經過左，但B仔都冇乜聲氣出黎!! 如果到3月8日都唔出黎，就要入醫院打「摧生針」摧生，咁要痛十幾個鐘，太太都好驚。佢朋友剛剛打完摧生針，生完幾日都仲痛…。依家我乜都幫唔到手，只希望母子都平安!!

三月尾已經考mock exam，但書到依家都教唔到70%，而教左既我都識唔到70%，點考??

個女等升中面試，佢D同學都見哂喇，但係佢連通知都收唔到，照我睇佢唔係咁差，唔通又好似我咁連見都冇得見??

買左部DV影B仔，試影左D片想download番落部電腦，唔得!! Window Vista認佢唔到，改用card reader，Vista都認唔到!! 上網搵睇下點解喇，D人話不如產左Vista佢喇!! …即係冇辦法!! 廢中之廢!!

爸爸叫我錄電視節目俾佢睇，我好日都唔錄電視，一開機(我只係按左個power on一下) 部錄影機即刻死左!! 洗唔洗咁呀，部機一年貨仔就死係我手!! 上網睇下邊度有得整，得知呢個牌子既維修部係唔整壞機既…..唔整壞機唔通整唔壞既機?? 打電話去，果然冇人接，維修部可能已經摺埋!! MAG呢個牌子，千祈唔好買!!

屋企既淨水器又壞埋，打電話去又幾日冇人接，媽媽離開之前打電話去都冇問題，一到我手就….

過年病到依家都未好，仲要衰到幾時呢??

兄弟芝嬌

最後衝刺

真係冇諗過，遞左辭職信之後，仲越黎越多野做。做既仲唔係D手尾，係全新既項目，有D到我走左都未開既都叫我去跟!! 我自己諗，我信都遞左，為乜要咁博去幫佢完成呢D工作呢?? 大老細又點解覺得我會有呢個推動力去最後衝刺呢?? 如果我留底好多手尾，對我有咩壞處，對佢又有咩好處呢?? 呢D management，我真係諗佢唔明!!

改變主意留底既手下，又再改變主意，昨晚俾電話我，話都係決定走。又走又唔走，最後佢自己，老細同我三個既名都臭哂，咁仲唔係玩野?? 最無辜都係老細…唉!! 呢D野你插手黎做乜呢??

有電臺節目連續三日批評公司佔用公地私用，事件越黎越擴大，聽聞D management對住傳媒亂答一通…俾電臺主持批評九唔撘八，乜對住傳媒可以亂答架咩??

有間聲稱設計公司打電話黎，要求我地俾廁所既設計圖俾佢地!! 大老細叫新老細叫我俾電話間設計公司睇下俾D咩佢!! 我跟手張張紙放左落tray底!! 只係諗，點解我地要俾公司既設計圖人地?? 有個三九唔識七既人無啦啦打電話俾你叫你俾你老婆張相俾佢，你仲會唔會問佢要邊相呢?? 第二日，十萬火急叫我唔好覆個間公司，我當然冇覆喇!! 仲話我醒…我估除左碌葛，冇同事會覆囉!!!

講開碌葛，走左既前大老細都知道我走，佢第一個問題係：「乜唔係碌葛咩?? 」班判頭聽到笑到留眼水!!! 呢度係咁架喇!! 做得既做死，唔做得既hea死!!

最後，連前大老細都贊成我走….遞信已經大約一個月，真係一個話我決定錯都冇….
但我仲未搵到工喎!! 連見都冇得見喎!!

環保玩具&科學原理

番到屋企，個女話有工課唔識做。一睇，係個老師叫佢地兩 日內設計一件利用科學原理既環保玩具!! 我記憶中，我個女小學根本冇科學讀(其實香港小學都好似冇科學讀!!)，於是問下佢識D咩科學原理啦!! 個女話乜科學原理都唔識， 但老師話可以用桿控原理(乜野係桿控原理??我上網都搵唔到!!槓桿我就聽過!!)風力發電或者水力發電等!!....
我從來都冇諗過一個小學生會識風力發電或者水力發電!! 個女班上真係有同學識??
我真係想去上一堂聽下個老師點樣教佢地風力發電!!坦白講我真係唔識!!
猶豫之際，個女問我核能算唔算環保，蝙蝠用回音定位既方法可唔可以做玩具呢?
幾好喎!! 整一個核能推動又有雷達既機器人囉!!
唔知老師識唔識做隻「渣古」呢??

搵工見工

雖然話唔等錢開飯，但辭左職，都要開始搵下工。

睇見D廣告，真係心傷。工係好多，但D要求咁多，回望一下自己公司D同事，佢地仲有份工做應該要還神喇。

Send左一份，就見左一份。工作性質同依家又差唔多，位置就更加適合我(因為係機場) ，或者太耐冇見工喇，自己都覺得自己表現麻麻地。尤其係講英文，入左黎呢間公司，仲有乜機會講英文…呢幾年都只係講過一兩次!! 要見多幾份工練番下先得喇!!

講番個interview，其實呢行都做左八年，個manager問我既野都答到佢既!! 但最頂唔順係個manager問：「乜你唔洗落手落腳做架?? 」….”O”哂嘴喇!! 大哥呀!! 你睇下我寫D乜喇!! 你又睇下自己請咩post呀，差一級到manager喇，你要我拿著支螺釘批去落手落腳做，跟著又番去寫tender呀!? 真係想問番佢：「乜你要落手落腳做架?? 」

見左個幾鐘，佢話okay既會有second-interview!! 我就覺得大家都唔多match囉!!

係唔係每個manager都希望用少少人工但請個萬能既手下，又要識英文(流暢個隻) ，又要識普通話(都係流暢個隻)，最好加多一兩種外國語言(如日文或者法文咁喇!! 都係流暢個隻) ，又要有電牌，又要有水牌，又要有車牌，又要有吊船牌，冷氣/消防/水喉/電工/泥水/木工/油漆/搭棚/音響/保安系統/霓虹燈工程/電話電信系統/電腦系統/機械修理樣樣都識落手落腳做個隻，又要識同客deal，又要識做行政管理，又要識customer services，又要識做投標/寫標書，又要識做contract/proposal/capital budgeting，又要識interior design/graphic design，又要識leasing/property management野，又要識園藝/清潔/保安/風險管理/危機管理/急救，最好識埋起樓/起橋/logistic咁喇!! 不過人工得萬零蚊，番六日放勞工假咁喇!!

如果你請到咁既人，你仲有工做??

都係繼續搵工喇，希望遇到D正常D既人喇!!

自信

過份自信都唔係咩好事，以下係用黎形容小小力，都好中!!
You are great in managing everything in your life and this is how you gain respect from others. Because of this quality, you sometimes feel that you are better than the rest. Extreme confidence might lead you to the wrong path. You are a free bird and want to lead your own life. Your Love, You love life is rather different from others'. When you are in love, nothing can stop you. You may often fight with your partner but, soon after that, you will make up in a way that surprises others.
唔好既野真係要改!!

越解釋越…

在電梯再碰上改變主意留底既手下，佢主動同小小力解釋話因為佢要養爸爸，好需要呢份工，所以選擇留底。小小力講過各人有各人既困難/負擔，亦明白/體諒每個人既決定。只係心裡面有一個問題：「乜養爸爸呢個責任係突然出現架咩?? 乜遞辭職信既時候你冇考慮過呢個問題架咩?? 」
人情留一線，日後好相見!! 呢個問題最後都冇問到!!

一個時代的開始

我相信，終於，有其他新聞取代藝人不雅照片做頭條。可惜，並唔係咩好消息!!藝人沈殿霞(肥肥) 終於不敵病魔病逝。踏入鼠年，不雅照片，內地雪災，火燃南大門，死人，股票大跌.... 真係大吉利是!! (定係我太負面呢?? 又冇D好新聞提供下呢?)
出生o係呢個年代既BB，係唔係都應該適應劣境，自強不息呢??
好多朋友問我B 仔改左名未!! 其實改左喇!! 名字好簡單/普通 - 「永強」，係媽媽離開前替佢個孫改既，意思係「永遠自強不息，不要依靠別人」。
至於英文名，小小力改B仔名做「Isaac」，有笑/開心，聰明體貼的學者型男人既意思。希望B仔有學識，有智慧，同開開心心去面對生命中既各種挑戰。
B仔，一個新既時代，正為你展始喇!!

猶豫

猶豫不決，心大心細既情況下，已經遞辭職信既手下，o係唔升職，唔加人工既情況下改變主意留底。令到今次事件真係離開既只得番小小力一個，亦可以令大老細更加意氣風發。到底o係咁既情況下改變主意留底，你仲會唔會得到別人尊重呢?? 好彩小小力係任何情況下都係打算離開，如果唔係就真係….
原來小小力俾「九天風雲」既黎生更失敗。
但小小力冇怪過佢地，由始至終，小小力都唔介意佢地留底，好似小強咁，人地一家大細要養，一早已經表明唔會走，我都明白，各人有各人既難處。
希望將來再見亦是朋友喇。

改

因為小小力既辭職，令呢個部門短短十幾日內又再改組!! 其實呢次再組已經實行左， 但係身為呢個部門既組員都唔係人人知道，更何況係其他部門？？小圈子既活動幾時先會完？改組之後，情況更混亂，人人都唔知自己到底跟邊個，做Ｄ咩！！心複既仲可以選擇做Ｄ乜，唔做Ｄ乜，因為驚Ｄ心複好似小小力咁辭職！！因為咁小小力最近都接左好多豬頭骨！！ 睇黎，要成為全港最好既商場，真係子日可待！

信心

老細又同已經遞信既手下講，想手下幫佢幫到四月。老細仲話四月會有D轉變，至於係咩轉變呢，佢又冇講。但係以老細一向既作風，呢D轉變九成係未證實，又或者係佢自己一廂情願既轉變。小小力就冇咩comment喇!! 手下要既，係一個能夠明白佢地既擋箭排呀!! 老細自己有咩轉變我估佢地唔多關心。
但如果加人工，都唔係冇可能留底佢!! 因為佢既信心都開始動搖，擔心自己搵唔番咁既人工。其實以小小力見過咁多人見工，可以大膽講句佢唔單只可以搵到咁既人工，而且一定高過，呢過只係信心既問題!!
唔洗擔心咁多!!

不要升職

同隔離部門既大魔頭傾開(Well，連小小力同大魔頭都有計傾，你真係要相信呢個世界係冇永遠既敵人!!) ，佢本來打算升佢部門某D同事，但呢D同事都拒絕升職，原因係升職工作量增加至少50%，但人工只係增加5%!! 就算再升多一級，人工都多唔到20%，而且都升到盡!! 但係佢行出去，多50%工作量人工點只多20%!! 留底都好明顯唔係因為錢，係因為可以Hea!! 你增加佢工作量，佢當然say No喇!!
隔離部門同呢個部門，面對同樣既問題。基層職員人工太底，好多職位長期空缺，成年都請唔到人，剩餘既變左人工冇加都越黎越多野做，亦因為越黎越多人走。問題越黎越嚴重。
要成為全港最好既商場，除左早D訓等發夢，我真係睇唔到有乜可能!!
冇眼睇!!

發花癲

放假，大老細叫老細打電話黎，話人工唔會加，職唔會升，照樣調我 組，一切同樣照舊跟我遞信前冇分別，問我考慮成點！考慮？乜都冇 變咁我仲有咩要考慮呀！你係唔係精神有問題呢？定係天真到我會信你唔加我人工係為我好，唔升我職又係為我 好，調我組去做Ｄ從來未做過 既野又係為我好呢？？當日唔當面鬧你係俾面我老細唔係俾面你呀，見好你就收喇！
發花癲!!!

天真

真係教壞細路！！
本來影Ｄ咁既淫褻照片係你個人既事，照片被網上流傳你都係受害 者！！ 但請唔好用「天真」黎形容自己！！小小力就唔相信你天真到 當時唔知自己做緊乜！有做過就有做過囉！！ 又冇人迫你！又報假案 話照片係移花接木，被踢爆又話自己勇敢面對！呢Ｄ咁既態度，真係教壞細路！

鼠年新開始

鼠年新開始，祝各位身體健康，事事順利。
講番新年，又見番好多成年冇見既朋友，真係好!! 原來好多朋友豬年工作都唔多順利，遇到好多小人。有D都同我一樣，一踏入鼠年就辭職。希望大家都快D搵番份好工喇!!
番到公司，唔知點解舊老細好似當我透明咁!! 唉!! 算把喇!! 黑面係解決唔到問題架!! 如果得，小小力日日都包青天上身喇!! 希望舊老細都保重身體，身體健康喇!!
新開始，隔離推廣部又有四個同事辭職。
唔知仲有幾多人離開呢!!
同舊同事「鉤仔」聯絡，佢都知咁多人走。仲好替我地高興咁喎!!
唔知將來大家既路會係點呢??
新既一年，拭目以待!!

過渡期

遞左辭職信，過渡期開始，同一般將離職既同事唔同，剛轉組既小小力離開既時候將唔會有太多野handover。選擇呢個時間辭職，一來呢兩個月有一個月特別短。二來呢兩個月特別多假期，活火山放十幾日假，佢放完假D手下都差唔多離開喇，跟著小小力又放番十日假，再番黎都差唔多離開喇，時間有限，唔洗handover喇!!三來小小力身體又唔多好呢，都要多D「休息」下。咁....小小力都唔知可以見到佢地幾多日!!真係好!!好多年都未試個咁輕鬆咁開心...

過渡期開始，亦準備下farewell手下farewell自己既活動，同大家道別!!Well!!實在太多，唔講活動，淨係道別D供應商，電視臺/電臺，電信供應商，廣告商，agency firm，工程公司，判頭，客等等等等都過百人。至少都要同佢地吹下水，多謝佢地八年來既信任同支持!!唔同佢地講自己都唔知，原來佢地信任小小力多過信任公司其他人，如果小小力離開，佢地情願做小D公司生意，因為唔賺好過損失喎!!

小小力唔知點解，消息傳得咁快!!工程公司同判頭最快，佢地D老細已經黎搵我!!大家講既都差唔多..
「恭禧哂你!!你真係走得好，走得合時，點都好，去到邊坐底左俾個電話我，去到邊做乜野都係朋友，要幫手記得出聲!!」
好鬼行呀!!不過，幫過我既我一定記得你!!
「不過，你走左工程部門真係散哂....你舊老細又咁(小小力唔打呢個字喇)....唉!!都係少D黎好D喇!!」
唔好咁喇，「鉤仔」(總監)走都冇影響，小小力走既影響點可能大得過佢呢...

小小力總相信「位在人情在」，我唔知呢D說話有幾多係真心，有幾多係假意，亦冇意思去分，總之唔係我敵人既都係我朋友，出面見喇!!

煽動

記得上Sociology (社會學)既時候(小小力真係怪人一個，讀讀下工程又走去讀下金融，讀下社會學又讀下心理學)，老師話人好奇怪既，係某一個氣氛下，好容易受人影響，做一D原來自己係唔會做既野。而呢D氣氛既製造過程叫做「煽動」(instigation )。製造呢種氣氛，潛意識既指示，有時比利誘或者直接指示更有效!!

可惜老師冇教小小力點樣去煽動，唔知小小力會唔會在社會大學學識呢樣野呢???

80/20

我記得上公司個WSIT(work and services improvement team)training 既時候教過，一個棘手既問題， 可能有好多成因，你只要解決80%既成因，問題已經縮小到可以不理，冇必需浪費大量資源去理最後既20%!! 股票市場都係架喎，大戶要推底個市，佢都唔洗推底哂所有股票架，推底頭三幾隻重磅股，你洗驚其他股票唔跌??

80/20亦可以解為世界上80%既人既命運，係操縱在20%既人手上!!

世界上80%既財富，亦可係落在20%富有既人手上!!

係唔係100%既人跟隨我既心意行事並唔重要，因為僅餘既20%根本唔會有太大影響!!

一個時代的終結

終於，今日正式遞左辭職信俾新老細，真正既倒數亦正式開始，原來好快已經八年了。

一個時代的終結，我連小小傷感都沒有，因為這亦代表另一個時代的開始!!灑開大步，勇往直前，咁先係架嘛!! 成日婆婆媽媽，長嗟短嘆等人可憐係冇用架!! 唔好諗住有人會幫你喇!! 冇架!! 見到有敵人就去打底佢!! 我打佢唔底都要佢冇好日子過!!

小小力既大老細都係咁話喇!!佢話唔炒小小力，都要佢冇好日子過!!

一個時代既終結，下一個時代既故事又會係點架呢??

發皮四

轉組，走唔走都好要開始要將D工作交俾「活火山」，大老細同活火山講過，只要佢接收哂小小力既工作，就會冇乜野做!!!(Well，因為大家成日見我行下行下咁，實係冇乜野做喇!!) 。開始交接第一日，仲笑笑口，第二日已經開始黑面，第三日終於火山爆發…
活火山：「咁X多野點做呀!! 」
小小力：「冇辦法喇!! 」
活火山：「呢D野俾D碌葛做喇!! 」
小小力：「唔喇!! 呢D野你老細(即係我前老細) 係唔會俾碌葛做架，死九次都未過年呀!! 」
活火山：「咩呀!! 樣樣野都話係我做，我唔X做架!! 」
小小力：「得得得!! 冷靜D，我或者慢慢再交俾你喇!! 」
講真，活火山爆發，小小力都有D驚，仲有一半野未交俾佢，點算??

辦公室政治

一月三十日，遞辭職信俾老細佢唔收，話叫我等二月一日遞俾轉組新老細，Well，okay! 一場老細下屬關聯，我都俾面佢既。之後，又叫我等二月六日遞信，話我仲可以賺埋四月四日既公眾假期咁話，又話叫埋我會辭職既手下下個月六日遞信，咁就可以一齊走。(我係兩個月通知，我手下係一個月通知)。咁講，賺唔賺一日我唔至在，甚至等到二月六日遞信都唔係問題!! 只係突然間對我咁好??兩個月前已經靜靜地做好哂轉組準備既老細，當時又有冇為我想過當所有野都準備好既時候我連小小既bargain power都會冇埋呢??等我冇哂bargain power既時候叫我去同personnel打小人針??最後死既係邊個?? 邊個又係最大得益者?? 唔係唔我呢??

Fine!!二月六日遞信就二月六日遞信喇，對我冇特別損失!! 但點解要埋我會辭職既手下下個月六日遞信呢??一唔一齊走又有乜緊要呢?? 我地又唔至於要同年同月同日死咁緊要喎!!佢地又冇公眾假期!!

今日，我手下同我講老細昨日靜靜打電話俾佢地，叫佢地唔好走，哈哈，佢地唔走，
就得番我一個走喇， 咁就成功踢我走喇!! 我冇乜所為，但我都想知手下點諗，佢地話：「........ 」(都係粗口!)

想講，當一team人中有一個利己主義存在，咩teamwork都唔洗講，全team都散哂。同埋底級既同事係怕辦公室政治多過怕做野!!今時今日有眼睇喇 ...

何必呢?

我都係同手下打下牌，吹下水，踢下波好過!!

荊軻刺秦皇

上youtube，睇番好多年前一段荊軻刺秦皇既片，仍然覺得好好睇，有感而發。

話說燕國弱小，無法抵抗秦國。燕國太子丹計劃派勇士出使秦國，以重利誘秦皇。秦王貪婪，一定想得到利益。這時就劫持他，使他歸還所侵佔的諸侯土地，這樣最好不過，如果不行，就殺了他。秦國一時無主，一定內亂。這時諸侯合縱，一定能打敗秦國。於是邀請劍士荊軻使秦，荊軻想了很久：「這是國家大事，我才能低下，恐怕不足以勝任。」太子急忙磕頭，再三請求，尊荊軻為上卿，安排他住最好的屋子，每天問安，供給三牲俱全的食物，車馬美女隨他享受，荊軻都不答應，友人問荊軻太子把最好的都給了你，你為什麼不答應?? 荊軻答：「佢對我咁好，因為佢想要我條命呀!!」

最後，荊軻還是答應了，太子易水送別荊軻，荊軻和著用變徵調唱歌：「風蕭蕭兮易水寒，壯士一去兮不復返。」

自此，有人突然對我好好，我會好有介心。

這麼近又那麼遠

今日之前，我以為六合彩只係一個騙局，成日話有人中頭獎，咁多年，我一個都唔識。
今日之後，我終於識個中六合彩頭獎既人，原來只係近在身邊。
中左六合彩之後又會點呢?? 仲會唔會一齊打下牌吹下水??
感覺….真的遠了!!
公司一眾人都忘記左唔開心，繼續吹水!!
到底七位幸運兒會唔會離開公司呢??
點解買既時候唔搵埋我呢??
七位幸運兒離之後，呢個部門又會點呢??

爆

昨日，手下o係我身後換燈，突然間，隻燈膽爆左，嚇得我呢…是為「爆燈」!!

昨晚，見天氣凍，同太太去食煲仔飯，食食下，突然間，個煲都爆左，嚇得我呢…是為「爆煲」!!

係唔係好爛gag呢….
我諗，到底個天要同我講D咩呢??

雙升

部門大肚王同事同體育健將雙雙升職，恭禧之餘，回想這八年，原來跟我老細既，一個都冇升過。難怪大家都當呢度係垃圾之家。老細下下被人串，真係幾不是味兒。餘下既日子佢都幾難頂。
部門其他同事加人工都高我一倍，lunch既時候前大老細仲話今年係我地集團十年黎加得最好既一年，到底佢係講俾我聽定係講俾我老細聽呢，因為佢仲衰過我!! 真係冇哂胃口。
今日學左一句：「你人工加得唔多因為你人工高嘛!! 」
好鬼底死!!

色戒背後的問題

請問各位有冇睇「色戒」，你覺得好唔好睇，點解好睇?? 點解唔好睇?? 戲情有
冇需要梁朝偉露蛋蛋??? 其實，大部份人都係為左睇梁朝偉露蛋蛋去睇，同意嗎??

請問各位有冇睇「色戒背後的故事」呢?? 亞視做既歷史節目，我估都係冇多喇，點解?? 都冇梁朝偉既蛋蛋睇!!

如果電視同時做「色戒背後的故事」同「秀才愛上兵」，你會睇邊套??

那一日，開電視，剛剛做僅「秀才愛上兵」，講一班著古裝既官兵去搶老百姓既野，當中有「禽流雞，孔雀石綠魚，蘇丹紅雞蛋…」，到底佢想做咩呢?? 係唔係想話你聽唔好睇喇，浪費你時間呀!!

電視/電影既底俗化問題都幾嚴重。

34週

星期二，放假同太太去檢查，B仔已經34週喇。按計算太太應該重左13公斤，但事實係重左16公斤，少少超重，可能係我太擔心B仔營養唔夠，身體好似我咁差。於是叫太太食好多野，但原來BB太重都係一個問題，生既時候可能有困難。依家開始食番正常D，希望B仔同太太都身體健康。
去到健康院，睇左D幫BB沖涼既影片，BB仔真係好得意，但我地兩個都好驚同B仔沖涼，驚整親佢嘛!!
心情係既緊張又興奮。

四叔

點解最近唔見四叔出黎講野既?? 又話好有信心，又話睇好第一季見三萬點!! 唉!! 我相信上一次調整如果唔係佢咁早走出黎話自己好有信心，已經買左一百億，依家大家可能冇咁傷。依家就算上番三萬好多人都救唔番，相比起四叔，李老千(人地叫超人) 就醒目得多，靜靜雞賣哂D航運股，佢賣哂你先知呀，你問佢佢仲話你知佢睇好航運業架!! 喂喂，佢公司做航運碼頭架，整個航運業好唔好佢最清楚喇，佢睇好會賣哂D航運股?? 結果，由佢賣航運股到依家，航運股跌左六七成呀!! 呢D就係醒喇!!

四叔!!有時好心真係會做壞事架!!

成績表

公司最後派成績表，加5%，我就唔滿意喇。呢個幅度係全部門最底，但我絕對唔識為自己既表現係全部門最差，只係有D人刻意要我唔好過啫!!
手下大多數都加10%以上，咁都唔錯!! 但大家既決定都冇變，一切睇我!!
睇我??

英語學習

Warning Letter既典範,殿堂級大師-完美人型(perfect human prototype)之作,句子華麗!!
真係....

Despite my repeated reminders, XX department has been being liable for outstanding invoice processing of work done and even outstanding Works Orders issuance for work completed covering period of 0.5 – 2 years. Job Holders, especially those have been frequently being chased for backlog clearance, are hereby formally reminded to settle the outstanding as soon. Otherwise, in the absence of reasonable explanation, disciplinary actions including warning will be issued to respective staff accordingly.
Please respect the seriousness of the above-mentioned issue since we indeed have been ruining out credit in front of our working partners.

Perfect Human Prototype

勸小朋友未經訓練,千祈唔好學!!

好景

距離過年仲有三個星期，市面上都冇乜新年氣氛，大家有冇好想購物既衝動?? 周圍都話大家賺多左，又大幅加人工，你又有冇受惠呢?? 同一D做廣告既行家傾開，佢地都話個市度又唔係真係咁好，今年聖誕同新年都唔係真係咁好景，生意只係好一般。小小力記得佢地生意好既年份，有生意俾佢地都話唔得閒，依家就得閒日日搵我問有冇野做。小小力相信一個地方連廣告都冇乜野做，經濟好極有限。
早幾日，做工程既判頭都話未試過咁早已經冇工開，真係大件事。
相信傳媒話大家賺多左都係指股票市場賺既錢，但最近咁既情況真係…賺左都嘔番出黎!!
仲諗著開開心心咁離開….點知突然…!!

一場遊戲一場夢

十二月，用三個星期賺左十幾萬!!
一月，唔洗一個星期就輸番凸!!
哈哈....
人生就係唔大上大落，買股票更加係一場數字遊戲!!
一場遊戲一場夢，夢醒就乜都冇!!
咁，又再玩過囉!!

唔好咁灰喇!!

集結號

睇左<集結號>,個人覺得好值得睇!!
(集結號唔係隻船)

故事背景發生在1948年到1956年間，一個連隊的戰士全部陣亡卻無人知曉，全片通過尋找追溯的過程展現了這幾個戰士的英勇和感人的事蹟。

解放戰爭期間，一連連長老谷接到三團團長的命令，帶領士兵火速趕往陣地完成一項阻擊任務，以便讓大部隊安全轉移。他們約好，一連聽到集結號之後，就可以突圍撤走。但全連戰士始終沒有聽到集結號的吹響，除了老谷一人被老鄉救下，其他的戰士全部戰死。從此以後，尋找團長問清楚為什麼集結號沒吹響，成了老谷一生的追求。

幾十年後，他才得知，三團團長早就犧牲在朝鮮戰場上了。團長的警衛員道出了秘密：當年大部隊轉移的時候，團長根本沒讓號手吹號，當時已經決定用一連的犧牲去換取大部隊的安全轉移。直到生命的最後一刻，團長仍然為自己的決定內疚懺悔。老谷最終原諒了團長。最後，戰友的屍體被發現，老谷為戰友在墓前吹響集結號，讓戰友得到安息。

戰鬥場面拍得好迫真震撼!! 處理感情既部份好流暢!! 講連長對一班戰友既義氣,對國家既忠心好感人,..缺字既家書，冇寄出去既信，無名碑林....睇到喊!!

每一個犧牲都是永垂不朽。

但我估呢類電影香港冇乜市場喇!!得兩間戲院做!!

面試題目

以下係三條中一面試題目：
1.蘋果與學習有什麼關係??
2.吸塵器除吸塵外，還有什麼用途??
3.掃把除掃地，還有什麼用途??
睇完呢D題目，唔好話中一，連我都未識答。識答又代表D咩呢?? 問呢D問題又想試D咩呢?? 呢D問題真係好似Microsoft入職D面試題目…乜我地D中一學生咁勁咩??
仲有題目關於：
-香港經濟 / 財政報告
-特首連任
-中央與香港特區的關係
一個小六學生真係識答??

幸福的一代

星期六，為左個女報中一，晚上去聽樓下間中學舉辦既中一入學講座。傳說呢間中學係全離島最好既中學，雖然個女肯定入唔到Band 1既中學，我都希望佢入到間Band 2最好既中學。當晚，都有好多家長帶同子女出席。講座中學校介紹左好多關於新學制(3-3-4) 既資料，校園活動，面試等等。我覺得呢一代既小朋友好幸福，中學唔係再死讀書，好多活動可以令你學以至用。讀書方面，亦唔再限死一係文科，一係理科，一係商科。你可以選擇你喜歡既科目。好似小小力咁，讀理科唔喜歡讀生物但喜歡讀經濟同歷史，小小力既年代根本冇選擇，讀理科一定要讀生物，一定唔可以讀經濟同歷史。依家，你可以選擇讀物理，化學加經濟同歷史。
當晚，最開心應該係個女，因為離島區既小學同佢間小學本身已經有一段距離，好多新移民學生(佢既對手) 成績底，冇課外活動，冇獎項，連份表都填得好差。間中學收200人，睇完我都相信個女百份百入到呢間中學，因為唔好話搵199個好過佢，要搵19個都難。
講座完左之後，個女問我會唔會入到黎第一年就考第一!!
唉!! ……真冇大志!!

寧靜

老細同幾個同事去上堂，大老細去seminar，碌葛去開會。整個部門都靜哂，得番兩個人，可以專心清理堆積既文件，希望我唔o係度既日子唔會帶俾老細太大麻煩。
手下更加無心戀戰，士氣底落，連有問題都廢事出聲。只係問過我係唔係真係要離開。我既答案係：如果人工加到20%，唔好同錢鬥氣，留底囉!! 但有可能咩??
連手下都冇野講，寧靜變為死寂。
以往，大家同事每日都一齊食lunch，吹下水，熱熱鬧鬧咁。依家都冇我份…
老細開始好多事自己黎，或者搵同事「活火山」幫手(活火山之得名，係某日王同事大叫：「嘩!! 活火山又爆喇!! 」) ，判頭問乜調左組咩??
大家睇完係唔係感覺我好download呢?? 老實講我冇!! 位在人情在，呢D事我見唔少，早就化哂喇!!
反而我喜歡這大風雨前席既寧靜感覺!!

真亦假時假亦真

上市消息兩則

少林寺上市

新華網報道，外傳中國河南省登封市市政府正醞釀推動嵩山少林旅遊集團在香港上市，登封市因舉世聞名的少林寺而被譽為「功夫搖籃」。報道表示，嵩山少林旅遊集團計劃上市項目包括交通和賓館酒店服務，其中還包括一家高級酒店。此外，還有運送遊客前往嵩山頂峰的電纜車，但纜車並不負責把遊客送至少林寺。登封市負責旅遊的市委官員裴松憲拒絕透露希望通過該集團上市而融得的具體資金數額，也未透露任何有關上市運作的細節。少林寺歷史悠久，因少林武僧融合佛教理念在內的少林功夫而聞名於世。當地政府和少林寺武僧希望利用「少林」這一品牌及所蘊含的武術精神創造價值。報道又指出，登封市經濟中的三分之一依靠少林寺和少林功夫帶動的旅遊業創造。官方數據顯示，二零零六年共有四百一十三萬人次到河南省旅遊，比二零零五年增加百分之二十九。

中國火葬（601444）上市

由於近期股市大跌，股民自殺越來越多，造成火葬場事業紅紅火火。為此國資委決定讓全國火葬場捆綁上市，總資產萬億，屬於大盤藍籌股，具有超強的成長性。殯 葬業屬於強制性服務行業，壟斷資源明顯，年利潤增長率預計為100%以上。墓地屬於房地產板塊，一平方的價格比市面最貴的深圳上海樓價還貴出幾倍，利潤 3000%以上，屬於持續性向好的穩定收益品種，而且具有稀缺資源和環保概念！
中葬集團欲整合旗下火葬墓業資源實施整體上市，目前已經在發改委審批中，申購價44.44元，成功申購者免費再送精美墓碑一塊。
另據傳：最新私募內參，據悉鑒于最近股民自殺增速明顯加快，而且可預期的未來還將持續增長，整體上市後601444將用一部分募集資金開發火葬發電和火葬供暖以及可轉肥等，將成為能源、供水供熱、農業的新龍頭，後市想像空間廣闊。

中國真係一個神奇既國度，所有事件/事物/消息都會係假，只有假既野先係最真。太太聽完之後話一定要買中國火葬。哈哈，如果真係有，我都想買!!

各有前因莫羨人

十二月，股票大有收穫，唔知點解公司內有D唔熟既人都黎問我有冇貼士。豬姐都黎問。咁講，我又唔係D咩大戶，邊得咁多貼士，都係靠自己睇下試下學番黎。高風險高回報係永恆既定律，你見我又咁高回報，其實我當中係承受左好大既風險。你見我三個星期賺十幾萬好羨慕?? 但你又知唔知昨日即使股市冇乜大跌，我一日都輸左五萬!! 你又有冇諗過自己一日冇左五萬會點呢??
食得鹹魚抵得渴，各有前因莫羨人!!
如果買股票只係想賺少少而冇乜長期目標，今年千祈唔好買股票!!

Ready

今日，太太到健康院驗身，醫生話B仔個頭已經轉左向下，準備好黎呢個世界喇!! 點解三月先預產，咁快就準備好既?? 醫生仲話B仔好大個，叫太太唔好食咁多野，唔係好難生喎!! 希望一切順利，B仔同太太都健健康康，肥肥白白喇!!

歷久常新

好耐冇聽既歌，聽番一樣咁好聽!! 聽日文歌，都係KOKIA有D保證!!

進修

公司安排左兩個課程俾我地進修，Excel同Photoshop!! 番工時間上喎!! 每個課程上兩日Full Day喎!!小小力同老細即刻兩個課程都報哂!! 有人問乜你地唔識Excel咩!!? 傻喇!! 識唔識Excel唔重要，學D乜都唔重要!! 最重要係唔洗係度對住D人，你叫我學加減乘除我都去!!
可惜，大老細話我同老細唔可以同時唔o係公司，每人只可以上一個課程!! 咁，我選擇Photoshop喇!!

姑狗寒

公司出過部新call機俾我地，但新call機無論call台同call機型號都同舊機一樣。咁點解要出過部新呢?? 原來新call機冇哂D資訊，即係交通，天氣，新聞等等。到底咁做慳得幾多呢?? 我地呢D要睇天氣當風更呀開吊船呀咁點呢?? 出左新call機，立即引起好大noise!!!
今日，公司話部新call機冇問題要收番先喎!! 唔係呀!! 我用過冇問題呀!! 我想用新機喎!!

從前有個人叫姑狗寒，佢生仔冇pat pat呀!!

紀律處分

根據政府既指引，紀律處分係指對違規或者有失職/有失專業操守既人或者機構既處罰，一般包括書面譴責(Reprimand) ，釘牌(Suspension of license) ，在牌照上附加條件(attachment of condition to license) ，訓誡( Admonishment) ，罰款(fine) 同降/革職。
今日，收到大老細e-mail，話今日唔交report，紀律處分!!
我昨日交左，但真係想收番，睇下佢點紀律處分我!! 話唔定係殺頭或者誅九族喎!!
呢個e-mail真係要留番，第日post俾多D人睇!!
真係一隻戅狗狗!!

飛輪海

飛輪海，四個台灣黎既男子組合，上次黎差D毀滅呢個場，氣勢比倒數更勁。諗都諗唔到D妹妹仔(飛輪海fans)咁有組織，咁有殺傷力。
今次再黎，如臨大敵，一早已經邀請埋警方開會，工作人員加多一倍。
當日，妹妹仔fans依舊多，但氣勢比上次已經差好遠囉!! 呢D靠樣搵食既男子組合多的是，好快走紅又好快消失。
今次係飛輪海第二隻大碟，小小力估佢地去唔到第四隻大碟已經要消失，有同事仲話第三隻都未必有。點解我咁估呢?? 上次飛輪海黎我問佢飛輪海係乜黎，佢話佢最鐘意飛輪海。事隔唔夠一年，我話俾佢聽飛輪海又黎喇!! 佢話佢最憎飛輪海，最鐘意棒棒堂同黑澀會美眉。
你知唔知係乜呀??
晚上，睇電視，棒棒堂唱歌，唉!! ….我真係唔知D歌唱乜…
你又睇下..



好難頂!!

美利樓

唔係講笑，我第一次去美利樓。至於赤柱，我冇記錯，上一次去赤柱係中五學校旅行，已經係二十年前既事。環境變左好多，好多人，但搵鬼老笨既商店仍然存在!! 十幾二十蚊一件T-shirt賣到百幾蚊，好過去搶!! 到係睇下相喇!!




我鬼鐘意我太太依家個樣，肥o都o都咁，好得意!!

元旦

唔知點解，最近冇病冇痛，休息又夠，但整日都好似好疲倦好眼訓咁!! 太太話我隻眼成日都得番一條線咁。係唔係因為天氣凍特別想訓呢??
元旦，同太太同個女去左睇書展。有D失望，冇乜書睇，但都收我十五蚊入場費。三個人成四十五蚊，買本書都得囉!! 本來想帶個女睇下書，但佢始終都只係對D貓貓狗狗相片既書有興趣。期間，遇到太太個姐妹個女黎睇書。之後我個女去左呢個女仔屋企玩。太太話呢個女仔只係大我個女半年，佢父母離左婚，父母都冇同佢住得佢同姑姐住，但佢都好叻!! 俾我既感覺，無論行為舉止都似個中二學生，我個女就似二年級，好難想像佢地差半年。
教小朋友都係要盡快俾佢自立好D!!
之後，我同太太去shopping。好似好耐冇陪佢咁…買左D護膚品俾太太!! 佢覺得好開心，我覺得女人錢好易搵。
晚上，番東涌食野!! 去左間steak house，勁難食!!
咁，又過左個元旦喇!!

最後的倒數

呢個已經係第七個倒數。
亦都會係最後一個。
比較起以往既倒數，今年感覺冷清左D!! 以往未到下午四點已經人山人海，今年就到傍晚六點都係得小貓三幾隻。可能係太多地方有倒數活動喇!! 打開報紙，全港有十幾個地方有倒數。漸漸地，我地呢個一年一度既大型節目都開始有D失色。
今年既準備工作亦係最差既一年，節目晚上九點開始，到傍晚七點都仲o係度安裝煙花裝置。試都冇試過就要正式，我都係第一次。點解今年咁亂?? 因為就係缺少左一個同咁多個部門團體開會既人 -大老細。以前有大老細接觸聯繫各路人馬，大家都好清楚要做D乜野!! 今年呢?? 大老細換左人，新既大老細一次會都冇開過，連佢自己都唔知要做D乜野，點指揮?? 佢仲o係倒數前叫開會安排工作。唉!! 失敗!!
小小力仲被安排去接待VIP…佢真係唔明白小小力o係呢個節目既重要性!! 所有電台，電視台，燈光，音響，電力，煙花，工程等等等等既協調人都係我!! 所有工作人員有事都只係識搵我，我去接待VIP邊個做coordination?? 由一個職位咁低微既職員去接待VIP有冇問題?? 咁高咁大既經理經理話佢：「你有冇事呀?? 接待VIP更係你去喇!! 」佢唔識答，又冇改變安排，選擇整晚隱藏。唉!! 失敗!!
開show，前大老細番左黎，好似佢仍然係呢度既大老細咁，安排工作，接待VIP等等等等。最後完show，仲發號司令叫全體工作人員上台影相。唉!! 我係大老細會選擇o係天台跳落黎攞番個彩。
不如睇下相喇!!

年年難過年年過

年年難過年年過。
去年一月，都係咁講過。真係冇講錯，好快又一年!! 07年真係難過。或者，算係我人生既一個最底潮。今年令我明白到，樣樣都可以等，孝順真係唔可以等架!! 可惜…

工作方面，唔洗講喇!! 遇到小人，不進且退。我都唔明白，自己o個種與世無爭既態度點解都會被針對?? 定要將小小力除之而後快!! 唉!! 罷了!! 此處不留人，自有留人處!! 隨著倒數活動結束，我o係呢個時代既倒數亦正式開始。

又話今年屬狗既好好，邊個話架!! 睇下我!!? 雖然今年農曆年未過，但剩下既日子又好得去邊呢??
健康方面，一年差過一年，都預左!! 但差既程度比想像中快!! 不過，真係兼顧唔到咁多喇!! 健康係今年放棄左既野!! 冇野好講!!

學業方面，大家真係要祝我學業進步先得喇!! 多事之秋，學業o係07年係半放棄狀態!! 但你叫我最後底空飛過，我會好失望，唔讀好過!! 所以剩下既時間要加倍努力，希望追番失去左既時間!!

太太方面，身體健康，一切正常。有佢既支持難過既日子都一一度過!! 多謝!!

兒女方面，B仔出世既準備都七七八八，期待o個一日既到來!! 原來預產期正正係爸爸生日!! 希望為爸爸帶來最好既生日禮品。女女方面，無論我點努力，佢品格同學業都乜冇大進步。太太既朋友既兒女比我個女更差既，經過一番努力，都已經迎頭趕上，入哂Band 1既學校。我個女，仍然發明星夢，仍然對住D貓貓狗狗成個鐘淨係識得講：「好得意呀!! 」，唔識佢，仲以為佢弱智，除左「好得意呀!! 」唔識講第二句。老師話佢絕對入唔到Band 1，甚至Band 2!! 唉!! 或者，人係要跌過先會識行，永遠扶著佢的話，當有一日手放開佢就會跌到。做父親既我，只有在旁邊睇住佢跌，等佢在失敗中學習同成長，又唔洗跌到起唔到身咁喇。希望太太慢慢會明白!!

錢方面，或者算係過去一年比較好既一樣。每年既目標都係希望身家番一番!! 07年把握到股市升浪，番左兩番，成績理想。長遠希望提早四十五歲前退休!!

展望08年既目標，只有兩個，都係媽媽擔心我做唔到既遺願：「好好照顧爸爸，離開呢間公司!! 」

兒女債

休息既今日,又病(呢D係唔係休閒病呢??一放假就病),...在家同好耐冇見既友人MSN,...知道某舊同事有左BB,...!!
恭禧!!恭禧!!
轉頭,睇一睇財經雜誌,...原來呢一兩年係另一個嬰兒潮既開始!!可能因為呢一兩年經濟轉好,多左人認為可以養得起一個小朋友!! 06年全年有大約70000個BB出生,07年呢??淨係11月已經有60000個BB出生!! 作為父母既,有冇想過當佢地既BB成長之後進入社會,要面對既競爭有幾大??生兒育女,..唔係生左養得大就算!!兒女債...唔係有錢就還得哂!!
今年,小小力自己做左人父母,先至知要教一個小朋友有幾難!!
越難,越覺媽媽既偉大!!

邦邦的婚宴

今日係好朋友邦邦結婚既大喜日子，但因為有孝在身未能出席邦邦既婚宴。Anyway，希望邦邦同冰冰白頭到老，永結同心!!
時間真係過得好快，由當日o係大學十下十下，到今日大家(大部份同學)都成家立室，有D都做埋爸爸喇….日子真係過得好快!!

喂!! 未結婚o個個呀!! 加把勁喇!! 等飲你o個餐呀!!

聖誕 快樂

這個聖誕，你，過得快樂嗎??
這個聖誕節，有五日假期，陪爸爸過左四日，去左好多地方。工展會，尖沙咀睇燈飾，去赤柱，返大陸…!!呢D地方都係爸爸以前成日同媽媽去既。但對我，真係冇乜感覺。因為當佢地身體健康既時候，我從來都冇同佢地去過呢D地方。…當你學會珍惜既時候，原來已經失去。
快樂係咩呢??
假期既最後一日，爸爸去左打麻雀。剩底我，太太同個女o係屋企休息。對住個女既日子真係好難過。剩係叫佢沖涼到唔知浪費幾大氣力。o係忙辦媽媽身後事既日子，冇時間迫佢沖涼既日子，佢竟然可以五日唔沖涼…唉!! 昨日，我番左工，太太出左街辦事，佢又竟然可以由朝早起身到夜晚成日都唔刷牙。到底佢由邊個度學番黎架呢?? 佢媽媽我太太都唔係咁架喎!! 真係連賓妹都乾淨過佢!! 一個人，點可以容忍自己去到咁既地步???
所以，假期既最後一日，我選擇訓覺訓足一日，冇眼睇!!
希望將來B仔唔係咁…..唔係我實自殺!!
聖誕過後，發覺股票o係呢半個月賺左十萬，但半點開心既感覺都冇!!
原來，錢真係換唔到快樂…
到底點先可以重拾快樂呢??

朋友，聖誕快樂!!

十萬火急講廢話

上次，大老細十萬火急叫開會。總結講左四樣野。第一係已走左既王同事有好多數未埋(關我地咩事!? 佢唔埋數炒我地呀??) ，第二係放假打電話俾你要即刻聽(呢個擺明係針對我老細喇!! Well，番緊工都有機會miss call喇!! 又要炒呀??) ，第三係唔好用大假黎prepare考試(呢個擺明係針對某女同事喇!! Well，我放大假做乜關你咩事呢?? 又要炒呀??) ，第四係要我地做到「以客為本，態度專業，群策群力，勇於創新，居安思危」(請問點叫做做到?? 點叫做唔到?? 專業態度係點呢?? 創新到咩地步為之好呢??D咁抽象既野會唔會解釋下呢?? 係唔係D高高在上既management都鐘意叫埋D咁既口號既呢?? 叫完又有咩實質作用呢?? 做唔到係唔係又要炒呀??)
最唔明既係，點解要十萬火急講呢D野呢??

「十萬火急講廢話，萬千師奶賀台慶」

同樣咁無聊!!

重複犯錯

媽媽既身後事暫時告一段落。親手按按鈕將媽媽火化果種感覺真係好難受。

唔知道係唔係受最近既心情影響，番公司做野都不停犯錯，而且仲重複犯錯。唉!!… 老細對我算鬧得少囉!! 雖然事情已經過去，但心情肯定未回復!! 黎緊有五日假期，希望好好休息一下，盡快回復過黎。畢竟同家人一齊要走既路相信仲有好長好長。對我做錯野而受影響既同事，真係要講聲：「Sorry! 」

媽媽既葬禮，都錯漏百出。負責葬禮既係爸爸既朋友，做開葬禮既，但又遲到，又帶漏野，又唔見野，又唔見左人，又收得貴。唉!! 做呢D事又唔想同人噪…依家明白咩叫「唔熟唔食」喇。

有小小力識左三十年既朋友H係媽媽既葬禮當晚話黎又唔黎，另一朋友M因此同朋友H大吵一場。唉!!… 可必呢!! 唔黎就算啦!!

正因為好多人都話黎又唔黎，結果場面好冷清。小小力對唔住媽媽…

冇乜心機寫，下次繼續。

認錯

有時真係唔怪得大老細話我，我出D文件差不多份份都有打錯字我睇唔到!!! 係我自己打既冇乜錯，但我draft俾文員打既就份份改完幾次都仲係錯!! 最衰既係，睇過份文件發現得title錯，俾番文員改。改完番黎對番title冇錯，出街!! 跟手俾大老細彈番轉頭，原來文件中間有野錯!!! 而呢D錯，o係第一次check既時候係冇既…!! 打錯字都小事，有時仲有段同D文件完全冇關既字paste左o係度!! 更奇既係，我俾
老細出街既文件，有錯佢永遠睇唔到，只有大老細先睇到!! 更奇中奇既係，如果D錯大老細都睇唔到，再上多幾個高層都唔會有人睇到，出埋街再反番黎都唔會有人睇到!!
所以，每份文件平均改五次，每次都要由頭再睇過。得幾頁紙既文件都仲好D，有幾百頁既標書就直頭想死喇!!
唉!! 有咩辦法呢??

談兵變

九鐵前總裁黎文熹出書爆當年兵變內幕。書我未睇過，但當時小小力都認為政府一定會撐二少。最高管理層唔可能被D底級管理層咁玩法。小小力唔明佢地當時既心態係點…但都好有興趣。如果，兵變o個班唔係管理層係基層員工，情況又會係點呢?? 如果，基層服務員同司機都罷工，又可唔可以迫到二少落黎呢??
小小力覺得，要兵變成功，目標要清澈，大家要團結，絕對唔可以讓步，絕對唔可以被分化，抱著於敵同亡既決心…有家庭負擔，又怕痕又怕痛睇定邊邊形勢好o個D，千祈唔好預佢!!
如果係我，會點呢??

洩氣

或者係太多唔開心既事發生，整個人好似洩左度氣咁。依家返工都冇哂心機，只係想快快收工走人。連書同報紙都唔想睇，好死..
公司既廢人繼續D無聊既權力鬥爭…唉!! 我只係想多D時間陪伴屋企人，其他事都唔多想理，畢竟我都已經係一個活死人喇…
某同事可能已經知道自己升硬，開始意氣風發，話下面邊個唔高興就走囉，佢唔mind咁話…
有時覺得當你好用力咁爬到高位，回頭一看下面根本冇哂人，咁.. 最高同最底又有乜分別呢…

只係想唔到，我，係呢個時代既結局，會係咁…

守護天使

太太話昨晚見到媽媽…..事情係咁既..
昨晚太太睡夢中醒來，見到媽媽企o係床邊，對太太話：「小心冷親呀!! 」，之後仲摸左太太個肚幾下，仲邊摸邊叫：「B仔!! B仔!! 」，然後幫太太冚被。離開之前，太太問媽媽依家幾點鐘!媽媽話：「四點零五分呀!!」媽媽走左之後，太太起身去廁所，之後睇一睇鐘，時間係四點二十分…

太太話唔係夢，因為有真實既感覺，見到既媽媽已經唔再病魔既折磨，唔再需要靠氧氣喉呼吸…

露露話我媽媽佢都未黎過筲箕灣，我話俾露露聽，媽媽已經變成我地既守護神，冇地方係神去唔到既..

我相信媽媽真係黎過，因為媽媽都想見下個孫，我亦相信媽媽在另一個世界，一直守護著我地一家…….

感謝

仍然難以接受媽媽離開既事實，尤其獨自一個人既時候….
Anyway，想再一次多謝朋友丸頭為媽媽介紹左黃醫生，減輕左媽媽呢段期間既痛苦…
多謝黃醫生對媽媽既照顧…
多謝呢段期間關心/擔心/支持我既朋友。
請原諒我沒有時間一一去道謝…

最想不到一班手下都送給我既支持同鼓勵….
多謝哂..
放心，我會支持住，好好照顧家人，好好生活下去!!

樹欲靜而風不息

媽媽終於o係今日離開左!!
經過兩年多病魔既折磨，媽媽終於得到解脫…

只係這３７年來都未有令媽媽得到幸福快樂，
而這一生我都冇辦法再令媽媽得到幸福，快樂

媽媽，你安心上路吧！
我會好好照顧爸爸，
希望來生再有機會做你既孩子，
報未完既恩。

樹欲靜而風不息，子欲養而親不在。

醫生說

你媽媽可能過唔到今晚．．．

Appraisal之後

大老細俾我既評語係：
「因為在職位上工作得耐而失去動力，雖要轉換去新既工作崗位。」
新既工作崗位，唔通係洗廁所？
小小力覺得，你不如炒我好過喇！！唔係我一定同你玩到底。
全部人做完Appraisal，平時俾佢鬧到死既一兩個同事突然評語好好！
點解？ 呢Ｄ叫分化！
最後，每一個都冇好下場！
開大會，大老細之上既大大老細公開支持佢！！ 其他經理感覺冇引！！
我感覺公司最小有兩個白癡！
病假龍虎榜出左幾日收番埋，唔通白癡開始自己既真正身份係一個白癡！！小小力正準備請病假，可惜病假龍虎榜已經消失！
何Ｂ女安慰受左大老細氣忍唔住要爆既老細話：「算喇！！花無百日紅！」
小小力在旁說：「可惜你等唔到o個日呢！」
何Ｂ女問小小力幾時過黎幫手，小小力話：「出埋雙糧我都走囉，算吧喇！！」
老細對小小力話：「如果唔變唔好走喇！你走左我死硬！」
小小力話：「我走唔走你都死硬！我走，死你一個！我唔走，死我地兩個，算吧喇！！」

終於有用

就算係一條廢柴，佢存在於天地之間，都總有佢既用處!!

Facebook都終於有點用。竟然有接近三十年冇見/聯絡既小學同學在Facebook遇上，大家講起喜歡扭人耳仔既王老師，設於廁所既小食部，放學走後門…真係好懷念!!

學校已經搬左，睇番新既學校website，老師都冇一個識，但最奇怪既係…高中時既校長，竟然做左新小學既校董!!

睇番轉頭，只係三十年，小小力讀過既中小學都拆哂….
真係好懷念呀!!

病假龍虎榜

感覺，
以往，未到年尾，未做Appraisal，大家都士氣高脹。為乜?? 大家心照!!
今年，同樣未到年尾，未做Appraisal，大家都已經冇哂士氣，點解?? 都係o個句，心照喇!!
維修組，七個人，一個放大假，三個請病假，冇左一半manpower!! okay喇，who care?
大老細立即出個病假龍虎榜，列哂佢地上去，目的，都係想羞辱下大家!!
但，大家既反應係：「白癡，so what? 」

你明唔咩叫做做又三十六，唔做又三十六呢??
冇請過病假，搵咁多!! 狂請病假，都係搵咁多!!
你會點做呢???

完美人型最大既缺點就係自以為冇缺點…
病假龍虎榜….唉!!

老驥伏櫪

睇番舊年既Blog，又以下一段:
「開大會，我被調走去另外一組，手下亦被抽起，感覺像被出賣。
我在這裡既時間還有幾多呢??
真正既Count Down開始。」
歷史一再重演，但心態已經唔同!! 再冇被出賣既感覺!! 唔會再不知所惜
經一事，長一智!! 又睇下點?
這幾年，真的有點累!!
依家既心態係 - 老驥伏櫪!!

習慣

唔知係唔係D產品既Life Cycle越黎越短，令我地對D新事物新產品好快習慣，好快適應，又好快覺得厭。
玩/用Facebook，都唔夠兩個月，已經覺得好悶，好多人send好多好多好多application俾我，睇都睇唔哂，安裝左又會用既都唔夠五個!! 咩將人同人既關係拉近，又係廢話!! 你send個message俾個friend，佢都唔覆你或者兩個月先覆你，你仲記得當時既心情係點?? 當時想講D乜?? send個蛋糕俾我又食唔到?? 我淨係知上Facebook最多用既係DELETE同IGNORE!!
點知星期日既電視節目仲走去當新科技介紹，同事王生睇完仲話問我地知係唔世界有樣新科技叫Facebook!! 另外一個王生話係唔係D做左爸爸既都鐘意睇完報紙電視就好似發現驚天大祕密咁周圍同人講…!!哈哈，唔知呢?? 我都冇同個女講過Facebook!! 佢想學用我都唔俾喇!!
總覺得電腦科技既野，距離佢越遠，個人既思考能力同集中力越強!!
太多野都習慣左並唔係一件好事!!

無緣

有道是：「買匯豐，有買貴，冇買錯。」
但我相信我同匯豐真係無緣..
小小力人生到今日計三次買匯豐，三次都要輸錢止蝕離場(跌過10%)。大市更加會跟隨我買匯豐而大跌。記得細個同媽媽講過，人人都咁好運係得我咁黑，大個我一定要買匯豐，要衰，唔好淨係得我一個。You’ll never walk alone嘛!! Right?
好彩今年都賺左差唔多十幾二十萬姐!!

夾心階層

又一個手下同我講，話過年後會走喇，頂唔順，叫我請定人!! 唉!! 高層容易走，底層更容易走，偏偏我地呢D夾心階層就最難走。辭左職既友同事，同我都係夾心階層，兩個月都搵唔到工!!…. 灰到爆!!
黎緊仲又好多底層同事會走，真係玩死我地呢D夾心階層呀!!

「六合彩券 惠澤社群」應該改做「六合彩券 人生希望」

一杯水

黑色星期五，繼續黑色！
晚上收到爸爸既電話，媽媽入左醫院。原來因為病魔既折騰，媽媽又再一次想自殺。好彩今次工人見到阻止，打電話送左媽媽入醫院。去到醫院，醫生講媽媽肺部受感染引起肺炎，情況未太差，但叫我 地有心理準備。媽媽情況穩定後，零晨離開醫院！！
黑色後繼續黑色！
回家後，大約兩個鐘，細佬終於番屋企！仲係俾兩個大耳窿壓番黎，原來大耳窿話當晚佢過左大海，好容易咁輸哂又問大耳窿借左九萬蚊，又好快咁輸哂於是帶埋大耳窿番黎叫屋企俾錢！或者之前試過太多次係咁，佢根本唔需要同屋企解釋，帶得大耳窿番黎我地就要自自然然 俾錢。又或者佢太過高估屋企既經濟狀況，呢幾年屋企幫佢還債大大話話都還左一百幾十萬，加上媽媽既醫藥費，可以講就算有金山銀 礦都用哂！我唯有同大耳窿講，你唔走我報警！第二日佢仲走去醫院搵媽媽，媽媽都唯有叫醫院趕佢走！為左爸爸安全，亦避免佢番屋企偷錢，換左屋企把鎖！至於佢既生死，都冇人再關心！
乜野係壓力？就好似叫你用手握著一杯水，容乜易！但叫你用手握著一杯水唔放三個鐘呢？呢Ｄ就係壓力！如果你放底杯水休息下再黎過，壓力就可以減輕，但我三年黎都未放過手。
黑色，應該會繼續係黑色！

打小人

老細同我做appraisal，樣樣評分都係咁多年最差既。老細話大老細好唔鐘意我，但佢話大老細暫時又唔會炒我，但又唔會俾我好過。咁，老細問我有咩打算。唉…講真，大老細又點只唔鐘意我一個呢?? 佢都係想炒哂我地班舊人姐。又唔升又唔加人工，除左走我仲可以有咩打算呀?? 老細話睇下我有咩辦法令佢鐘意我…唉!! 真係浪費時間。老細又話我走左佢就死喇。唉!! 我走唔走你都死架喇，關咩事!!

出年又轉job位，轉左去睇埋消防同BMS，!! 出年既事出年先算喇!!

真係要打小人!!

與垃圾同在

晚上收到個女既老師既電話，老師話個女今次呈分試前試驗，數學唔合格！！老師話佢最大問題係唔集中同懶。唔集中係上堂掛住傾計，開始左上堂都仲掛住傾，老師分開佢同同學坐，點知隔住一行佢都仲可以繼續傾！！得佢自己一個佢都自己同自己傾，於是上堂就唔知老師教乜，番屋企打電話俾同學問功課，又繼續傾！！懶呢？？Ｄ數學多過一個step佢都唔想計，求求其其寫個答案。你教佢佢都唔想學。你話俾佢聽唔讀書冇用架，佢話俾你聽佢願與垃圾同在!! 而且身體力衡，全部污穢既衣服，食過既食物，費紙，膠袋，氣水罐放哂o係張床，跟著唔沖涼就訓!! 鬧完又係咁，話完又係咁，打完都係咁!! 你一係幫佢執，一係唔好理佢，佢就唔打算改架喇!!