爸爸生日

睇友人既Blog，講到爸爸生日…其實，小小力爸爸最近都生日。
呢個係媽媽離開之後爸爸既第一個生日，我怕爸爸過得唔開心，仲叫左好耐冇見既細佬番黎。其實，爸爸始終最錫佢，我係知道既…
爸爸生日當日，露露話要自己俾錢買蛋糕，我太太俾D錢爸爸買野食，我就請一家人去食晚餐!! 仲用DV拍底左俾爸爸睇!!
見到爸爸都好開心，我都鬆一口氣。
人，係唔係長命百歲就好?? 睇見媽媽我就覺得未必喇!!
我只希望爸爸身體健康，開開心心過每一日。

低落

好快，辭職信已經遞左一個月。但係工，都仲係見得o個一份。有D低落!! Send左好多application出去，唔好話請，連見都冇得見!! 明明適合哂所有要求，但見都冇得見，但又見到報紙仲登緊廣告，咁即係點呢?? Fit哂到唔見??

媽媽離開之後，到爸爸身體開始出現問題。個醫生叫爸爸去法國醫院檢查!! 同爸爸去到法國醫院….間醫院好似酒店咁，你諗下有幾貴!! 最意外既係法國醫院既門診排隊排到政府醫院咁，香港人真係有錢。Check一Check，咁就用左$5000。係唔係真係要去法國醫院咁高級做檢查呢?? 之後再到香港體驗….感覺同法國醫院差唔多，價錢貴市價差唔多一倍。Anyway，最緊要人冇事，錢洗左算喇!!

太太既預產期3月2日已經過左，但B仔都冇乜聲氣出黎!! 如果到3月8日都唔出黎，就要入醫院打「摧生針」摧生，咁要痛十幾個鐘，太太都好驚。佢朋友剛剛打完摧生針，生完幾日都仲痛…。依家我乜都幫唔到手，只希望母子都平安!!

三月尾已經考mock exam，但書到依家都教唔到70%，而教左既我都識唔到70%，點考??

個女等升中面試，佢D同學都見哂喇，但係佢連通知都收唔到，照我睇佢唔係咁差，唔通又好似我咁連見都冇得見??

買左部DV影B仔，試影左D片想download番落部電腦，唔得!! Window Vista認佢唔到，改用card reader，Vista都認唔到!! 上網搵睇下點解喇，D人話不如產左Vista佢喇!! …即係冇辦法!! 廢中之廢!!

爸爸叫我錄電視節目俾佢睇，我好日都唔錄電視，一開機(我只係按左個power on一下) 部錄影機即刻死左!! 洗唔洗咁呀，部機一年貨仔就死係我手!! 上網睇下邊度有得整，得知呢個牌子既維修部係唔整壞機既…..唔整壞機唔通整唔壞既機?? 打電話去，果然冇人接，維修部可能已經摺埋!! MAG呢個牌子，千祈唔好買!!

屋企既淨水器又壞埋，打電話去又幾日冇人接，媽媽離開之前打電話去都冇問題，一到我手就….

過年病到依家都未好，仲要衰到幾時呢??

兄弟芝嬌

最後衝刺

真係冇諗過，遞左辭職信之後，仲越黎越多野做。做既仲唔係D手尾，係全新既項目，有D到我走左都未開既都叫我去跟!! 我自己諗，我信都遞左，為乜要咁博去幫佢完成呢D工作呢?? 大老細又點解覺得我會有呢個推動力去最後衝刺呢?? 如果我留底好多手尾，對我有咩壞處，對佢又有咩好處呢?? 呢D management，我真係諗佢唔明!!

改變主意留底既手下，又再改變主意，昨晚俾電話我，話都係決定走。又走又唔走，最後佢自己，老細同我三個既名都臭哂，咁仲唔係玩野?? 最無辜都係老細…唉!! 呢D野你插手黎做乜呢??

有電臺節目連續三日批評公司佔用公地私用，事件越黎越擴大，聽聞D management對住傳媒亂答一通…俾電臺主持批評九唔撘八，乜對住傳媒可以亂答架咩??

有間聲稱設計公司打電話黎，要求我地俾廁所既設計圖俾佢地!! 大老細叫新老細叫我俾電話間設計公司睇下俾D咩佢!! 我跟手張張紙放左落tray底!! 只係諗，點解我地要俾公司既設計圖人地?? 有個三九唔識七既人無啦啦打電話俾你叫你俾你老婆張相俾佢，你仲會唔會問佢要邊相呢?? 第二日，十萬火急叫我唔好覆個間公司，我當然冇覆喇!! 仲話我醒…我估除左碌葛，冇同事會覆囉!!!

講開碌葛，走左既前大老細都知道我走，佢第一個問題係：「乜唔係碌葛咩?? 」班判頭聽到笑到留眼水!!! 呢度係咁架喇!! 做得既做死，唔做得既hea死!!

最後，連前大老細都贊成我走….遞信已經大約一個月，真係一個話我決定錯都冇….
但我仲未搵到工喎!! 連見都冇得見喎!!

環保玩具&科學原理

番到屋企，個女話有工課唔識做。一睇，係個老師叫佢地兩 日內設計一件利用科學原理既環保玩具!! 我記憶中，我個女小學根本冇科學讀(其實香港小學都好似冇科學讀!!)，於是問下佢識D咩科學原理啦!! 個女話乜科學原理都唔識， 但老師話可以用桿控原理(乜野係桿控原理??我上網都搵唔到!!槓桿我就聽過!!)風力發電或者水力發電等!!....
我從來都冇諗過一個小學生會識風力發電或者水力發電!! 個女班上真係有同學識??
我真係想去上一堂聽下個老師點樣教佢地風力發電!!坦白講我真係唔識!!
猶豫之際，個女問我核能算唔算環保，蝙蝠用回音定位既方法可唔可以做玩具呢?
幾好喎!! 整一個核能推動又有雷達既機器人囉!!
唔知老師識唔識做隻「渣古」呢??

搵工見工

雖然話唔等錢開飯，但辭左職，都要開始搵下工。

睇見D廣告，真係心傷。工係好多，但D要求咁多，回望一下自己公司D同事，佢地仲有份工做應該要還神喇。

Send左一份，就見左一份。工作性質同依家又差唔多，位置就更加適合我(因為係機場) ，或者太耐冇見工喇，自己都覺得自己表現麻麻地。尤其係講英文，入左黎呢間公司，仲有乜機會講英文…呢幾年都只係講過一兩次!! 要見多幾份工練番下先得喇!!

講番個interview，其實呢行都做左八年，個manager問我既野都答到佢既!! 但最頂唔順係個manager問：「乜你唔洗落手落腳做架?? 」….”O”哂嘴喇!! 大哥呀!! 你睇下我寫D乜喇!! 你又睇下自己請咩post呀，差一級到manager喇，你要我拿著支螺釘批去落手落腳做，跟著又番去寫tender呀!? 真係想問番佢：「乜你要落手落腳做架?? 」

見左個幾鐘，佢話okay既會有second-interview!! 我就覺得大家都唔多match囉!!

係唔係每個manager都希望用少少人工但請個萬能既手下，又要識英文(流暢個隻) ，又要識普通話(都係流暢個隻)，最好加多一兩種外國語言(如日文或者法文咁喇!! 都係流暢個隻) ，又要有電牌，又要有水牌，又要有車牌，又要有吊船牌，冷氣/消防/水喉/電工/泥水/木工/油漆/搭棚/音響/保安系統/霓虹燈工程/電話電信系統/電腦系統/機械修理樣樣都識落手落腳做個隻，又要識同客deal，又要識做行政管理，又要識customer services，又要識做投標/寫標書，又要識做contract/proposal/capital budgeting，又要識interior design/graphic design，又要識leasing/property management野，又要識園藝/清潔/保安/風險管理/危機管理/急救，最好識埋起樓/起橋/logistic咁喇!! 不過人工得萬零蚊，番六日放勞工假咁喇!!

如果你請到咁既人，你仲有工做??

都係繼續搵工喇，希望遇到D正常D既人喇!!

自信

過份自信都唔係咩好事，以下係用黎形容小小力，都好中!!
You are great in managing everything in your life and this is how you gain respect from others. Because of this quality, you sometimes feel that you are better than the rest. Extreme confidence might lead you to the wrong path. You are a free bird and want to lead your own life. Your Love, You love life is rather different from others'. When you are in love, nothing can stop you. You may often fight with your partner but, soon after that, you will make up in a way that surprises others.
唔好既野真係要改!!

越解釋越…

在電梯再碰上改變主意留底既手下，佢主動同小小力解釋話因為佢要養爸爸，好需要呢份工，所以選擇留底。小小力講過各人有各人既困難/負擔，亦明白/體諒每個人既決定。只係心裡面有一個問題：「乜養爸爸呢個責任係突然出現架咩?? 乜遞辭職信既時候你冇考慮過呢個問題架咩?? 」
人情留一線，日後好相見!! 呢個問題最後都冇問到!!

一個時代的開始

我相信，終於，有其他新聞取代藝人不雅照片做頭條。可惜，並唔係咩好消息!!藝人沈殿霞(肥肥) 終於不敵病魔病逝。踏入鼠年，不雅照片，內地雪災，火燃南大門，死人，股票大跌.... 真係大吉利是!! (定係我太負面呢?? 又冇D好新聞提供下呢?)
出生o係呢個年代既BB，係唔係都應該適應劣境，自強不息呢??
好多朋友問我B 仔改左名未!! 其實改左喇!! 名字好簡單/普通 - 「永強」，係媽媽離開前替佢個孫改既，意思係「永遠自強不息，不要依靠別人」。
至於英文名，小小力改B仔名做「Isaac」，有笑/開心，聰明體貼的學者型男人既意思。希望B仔有學識，有智慧，同開開心心去面對生命中既各種挑戰。
B仔，一個新既時代，正為你展始喇!!

猶豫

猶豫不決，心大心細既情況下，已經遞辭職信既手下，o係唔升職，唔加人工既情況下改變主意留底。令到今次事件真係離開既只得番小小力一個，亦可以令大老細更加意氣風發。到底o係咁既情況下改變主意留底，你仲會唔會得到別人尊重呢?? 好彩小小力係任何情況下都係打算離開，如果唔係就真係….
原來小小力俾「九天風雲」既黎生更失敗。
但小小力冇怪過佢地，由始至終，小小力都唔介意佢地留底，好似小強咁，人地一家大細要養，一早已經表明唔會走，我都明白，各人有各人既難處。
希望將來再見亦是朋友喇。

改

因為小小力既辭職，令呢個部門短短十幾日內又再改組!! 其實呢次再組已經實行左， 但係身為呢個部門既組員都唔係人人知道，更何況係其他部門？？小圈子既活動幾時先會完？改組之後，情況更混亂，人人都唔知自己到底跟邊個，做Ｄ咩！！心複既仲可以選擇做Ｄ乜，唔做Ｄ乜，因為驚Ｄ心複好似小小力咁辭職！！因為咁小小力最近都接左好多豬頭骨！！ 睇黎，要成為全港最好既商場，真係子日可待！

信心

老細又同已經遞信既手下講，想手下幫佢幫到四月。老細仲話四月會有D轉變，至於係咩轉變呢，佢又冇講。但係以老細一向既作風，呢D轉變九成係未證實，又或者係佢自己一廂情願既轉變。小小力就冇咩comment喇!! 手下要既，係一個能夠明白佢地既擋箭排呀!! 老細自己有咩轉變我估佢地唔多關心。
但如果加人工，都唔係冇可能留底佢!! 因為佢既信心都開始動搖，擔心自己搵唔番咁既人工。其實以小小力見過咁多人見工，可以大膽講句佢唔單只可以搵到咁既人工，而且一定高過，呢過只係信心既問題!!
唔洗擔心咁多!!

不要升職

同隔離部門既大魔頭傾開(Well，連小小力同大魔頭都有計傾，你真係要相信呢個世界係冇永遠既敵人!!) ，佢本來打算升佢部門某D同事，但呢D同事都拒絕升職，原因係升職工作量增加至少50%，但人工只係增加5%!! 就算再升多一級，人工都多唔到20%，而且都升到盡!! 但係佢行出去，多50%工作量人工點只多20%!! 留底都好明顯唔係因為錢，係因為可以Hea!! 你增加佢工作量，佢當然say No喇!!
隔離部門同呢個部門，面對同樣既問題。基層職員人工太底，好多職位長期空缺，成年都請唔到人，剩餘既變左人工冇加都越黎越多野做，亦因為越黎越多人走。問題越黎越嚴重。
要成為全港最好既商場，除左早D訓等發夢，我真係睇唔到有乜可能!!
冇眼睇!!

發花癲

放假，大老細叫老細打電話黎，話人工唔會加，職唔會升，照樣調我 組，一切同樣照舊跟我遞信前冇分別，問我考慮成點！考慮？乜都冇 變咁我仲有咩要考慮呀！你係唔係精神有問題呢？定係天真到我會信你唔加我人工係為我好，唔升我職又係為我 好，調我組去做Ｄ從來未做過 既野又係為我好呢？？當日唔當面鬧你係俾面我老細唔係俾面你呀，見好你就收喇！
發花癲!!!

天真

真係教壞細路！！
本來影Ｄ咁既淫褻照片係你個人既事，照片被網上流傳你都係受害 者！！ 但請唔好用「天真」黎形容自己！！小小力就唔相信你天真到 當時唔知自己做緊乜！有做過就有做過囉！！ 又冇人迫你！又報假案 話照片係移花接木，被踢爆又話自己勇敢面對！呢Ｄ咁既態度，真係教壞細路！

鼠年新開始

鼠年新開始，祝各位身體健康，事事順利。
講番新年，又見番好多成年冇見既朋友，真係好!! 原來好多朋友豬年工作都唔多順利，遇到好多小人。有D都同我一樣，一踏入鼠年就辭職。希望大家都快D搵番份好工喇!!
番到公司，唔知點解舊老細好似當我透明咁!! 唉!! 算把喇!! 黑面係解決唔到問題架!! 如果得，小小力日日都包青天上身喇!! 希望舊老細都保重身體，身體健康喇!!
新開始，隔離推廣部又有四個同事辭職。
唔知仲有幾多人離開呢!!
同舊同事「鉤仔」聯絡，佢都知咁多人走。仲好替我地高興咁喎!!
唔知將來大家既路會係點呢??
新既一年，拭目以待!!

過渡期

遞左辭職信，過渡期開始，同一般將離職既同事唔同，剛轉組既小小力離開既時候將唔會有太多野handover。選擇呢個時間辭職，一來呢兩個月有一個月特別短。二來呢兩個月特別多假期，活火山放十幾日假，佢放完假D手下都差唔多離開喇，跟著小小力又放番十日假，再番黎都差唔多離開喇，時間有限，唔洗handover喇!!三來小小力身體又唔多好呢，都要多D「休息」下。咁....小小力都唔知可以見到佢地幾多日!!真係好!!好多年都未試個咁輕鬆咁開心...

過渡期開始，亦準備下farewell手下farewell自己既活動，同大家道別!!Well!!實在太多，唔講活動，淨係道別D供應商，電視臺/電臺，電信供應商，廣告商，agency firm，工程公司，判頭，客等等等等都過百人。至少都要同佢地吹下水，多謝佢地八年來既信任同支持!!唔同佢地講自己都唔知，原來佢地信任小小力多過信任公司其他人，如果小小力離開，佢地情願做小D公司生意，因為唔賺好過損失喎!!

小小力唔知點解，消息傳得咁快!!工程公司同判頭最快，佢地D老細已經黎搵我!!大家講既都差唔多..
「恭禧哂你!!你真係走得好，走得合時，點都好，去到邊坐底左俾個電話我，去到邊做乜野都係朋友，要幫手記得出聲!!」
好鬼行呀!!不過，幫過我既我一定記得你!!
「不過，你走左工程部門真係散哂....你舊老細又咁(小小力唔打呢個字喇)....唉!!都係少D黎好D喇!!」
唔好咁喇，「鉤仔」(總監)走都冇影響，小小力走既影響點可能大得過佢呢...

小小力總相信「位在人情在」，我唔知呢D說話有幾多係真心，有幾多係假意，亦冇意思去分，總之唔係我敵人既都係我朋友，出面見喇!!

煽動

記得上Sociology (社會學)既時候(小小力真係怪人一個，讀讀下工程又走去讀下金融，讀下社會學又讀下心理學)，老師話人好奇怪既，係某一個氣氛下，好容易受人影響，做一D原來自己係唔會做既野。而呢D氣氛既製造過程叫做「煽動」(instigation )。製造呢種氣氛，潛意識既指示，有時比利誘或者直接指示更有效!!

可惜老師冇教小小力點樣去煽動，唔知小小力會唔會在社會大學學識呢樣野呢???

80/20

我記得上公司個WSIT(work and services improvement team)training 既時候教過，一個棘手既問題， 可能有好多成因，你只要解決80%既成因，問題已經縮小到可以不理，冇必需浪費大量資源去理最後既20%!! 股票市場都係架喎，大戶要推底個市，佢都唔洗推底哂所有股票架，推底頭三幾隻重磅股，你洗驚其他股票唔跌??

80/20亦可以解為世界上80%既人既命運，係操縱在20%既人手上!!

世界上80%既財富，亦可係落在20%富有既人手上!!

係唔係100%既人跟隨我既心意行事並唔重要，因為僅餘既20%根本唔會有太大影響!!

一個時代的終結

終於，今日正式遞左辭職信俾新老細，真正既倒數亦正式開始，原來好快已經八年了。

一個時代的終結，我連小小傷感都沒有，因為這亦代表另一個時代的開始!!灑開大步，勇往直前，咁先係架嘛!! 成日婆婆媽媽，長嗟短嘆等人可憐係冇用架!! 唔好諗住有人會幫你喇!! 冇架!! 見到有敵人就去打底佢!! 我打佢唔底都要佢冇好日子過!!

小小力既大老細都係咁話喇!!佢話唔炒小小力，都要佢冇好日子過!!

一個時代既終結，下一個時代既故事又會係點架呢??

發皮四

轉組，走唔走都好要開始要將D工作交俾「活火山」，大老細同活火山講過，只要佢接收哂小小力既工作，就會冇乜野做!!!(Well，因為大家成日見我行下行下咁，實係冇乜野做喇!!) 。開始交接第一日，仲笑笑口，第二日已經開始黑面，第三日終於火山爆發…
活火山：「咁X多野點做呀!! 」
小小力：「冇辦法喇!! 」
活火山：「呢D野俾D碌葛做喇!! 」
小小力：「唔喇!! 呢D野你老細(即係我前老細) 係唔會俾碌葛做架，死九次都未過年呀!! 」
活火山：「咩呀!! 樣樣野都話係我做，我唔X做架!! 」
小小力：「得得得!! 冷靜D，我或者慢慢再交俾你喇!! 」
講真，活火山爆發，小小力都有D驚，仲有一半野未交俾佢，點算??

辦公室政治

一月三十日，遞辭職信俾老細佢唔收，話叫我等二月一日遞俾轉組新老細，Well，okay! 一場老細下屬關聯，我都俾面佢既。之後，又叫我等二月六日遞信，話我仲可以賺埋四月四日既公眾假期咁話，又話叫埋我會辭職既手下下個月六日遞信，咁就可以一齊走。(我係兩個月通知，我手下係一個月通知)。咁講，賺唔賺一日我唔至在，甚至等到二月六日遞信都唔係問題!! 只係突然間對我咁好??兩個月前已經靜靜地做好哂轉組準備既老細，當時又有冇為我想過當所有野都準備好既時候我連小小既bargain power都會冇埋呢??等我冇哂bargain power既時候叫我去同personnel打小人針??最後死既係邊個?? 邊個又係最大得益者?? 唔係唔我呢??

Fine!!二月六日遞信就二月六日遞信喇，對我冇特別損失!! 但點解要埋我會辭職既手下下個月六日遞信呢??一唔一齊走又有乜緊要呢?? 我地又唔至於要同年同月同日死咁緊要喎!!佢地又冇公眾假期!!

今日，我手下同我講老細昨日靜靜打電話俾佢地，叫佢地唔好走，哈哈，佢地唔走，
就得番我一個走喇， 咁就成功踢我走喇!! 我冇乜所為，但我都想知手下點諗，佢地話：「........ 」(都係粗口!)

想講，當一team人中有一個利己主義存在，咩teamwork都唔洗講，全team都散哂。同埋底級既同事係怕辦公室政治多過怕做野!!今時今日有眼睇喇 ...

何必呢?

我都係同手下打下牌，吹下水，踢下波好過!!

荊軻刺秦皇

上youtube，睇番好多年前一段荊軻刺秦皇既片，仍然覺得好好睇，有感而發。

話說燕國弱小，無法抵抗秦國。燕國太子丹計劃派勇士出使秦國，以重利誘秦皇。秦王貪婪，一定想得到利益。這時就劫持他，使他歸還所侵佔的諸侯土地，這樣最好不過，如果不行，就殺了他。秦國一時無主，一定內亂。這時諸侯合縱，一定能打敗秦國。於是邀請劍士荊軻使秦，荊軻想了很久：「這是國家大事，我才能低下，恐怕不足以勝任。」太子急忙磕頭，再三請求，尊荊軻為上卿，安排他住最好的屋子，每天問安，供給三牲俱全的食物，車馬美女隨他享受，荊軻都不答應，友人問荊軻太子把最好的都給了你，你為什麼不答應?? 荊軻答：「佢對我咁好，因為佢想要我條命呀!!」

最後，荊軻還是答應了，太子易水送別荊軻，荊軻和著用變徵調唱歌：「風蕭蕭兮易水寒，壯士一去兮不復返。」

自此，有人突然對我好好，我會好有介心。

這麼近又那麼遠

今日之前，我以為六合彩只係一個騙局，成日話有人中頭獎，咁多年，我一個都唔識。
今日之後，我終於識個中六合彩頭獎既人，原來只係近在身邊。
中左六合彩之後又會點呢?? 仲會唔會一齊打下牌吹下水??
感覺….真的遠了!!
公司一眾人都忘記左唔開心，繼續吹水!!
到底七位幸運兒會唔會離開公司呢??
點解買既時候唔搵埋我呢??
七位幸運兒離之後，呢個部門又會點呢??

爆

昨日，手下o係我身後換燈，突然間，隻燈膽爆左，嚇得我呢…是為「爆燈」!!

昨晚，見天氣凍，同太太去食煲仔飯，食食下，突然間，個煲都爆左，嚇得我呢…是為「爆煲」!!

係唔係好爛gag呢….
我諗，到底個天要同我講D咩呢??

雙升

部門大肚王同事同體育健將雙雙升職，恭禧之餘，回想這八年，原來跟我老細既，一個都冇升過。難怪大家都當呢度係垃圾之家。老細下下被人串，真係幾不是味兒。餘下既日子佢都幾難頂。
部門其他同事加人工都高我一倍，lunch既時候前大老細仲話今年係我地集團十年黎加得最好既一年，到底佢係講俾我聽定係講俾我老細聽呢，因為佢仲衰過我!! 真係冇哂胃口。
今日學左一句：「你人工加得唔多因為你人工高嘛!! 」
好鬼底死!!

色戒背後的問題

請問各位有冇睇「色戒」，你覺得好唔好睇，點解好睇?? 點解唔好睇?? 戲情有
冇需要梁朝偉露蛋蛋??? 其實，大部份人都係為左睇梁朝偉露蛋蛋去睇，同意嗎??

請問各位有冇睇「色戒背後的故事」呢?? 亞視做既歷史節目，我估都係冇多喇，點解?? 都冇梁朝偉既蛋蛋睇!!

如果電視同時做「色戒背後的故事」同「秀才愛上兵」，你會睇邊套??

那一日，開電視，剛剛做僅「秀才愛上兵」，講一班著古裝既官兵去搶老百姓既野，當中有「禽流雞，孔雀石綠魚，蘇丹紅雞蛋…」，到底佢想做咩呢?? 係唔係想話你聽唔好睇喇，浪費你時間呀!!

電視/電影既底俗化問題都幾嚴重。

34週

星期二，放假同太太去檢查，B仔已經34週喇。按計算太太應該重左13公斤，但事實係重左16公斤，少少超重，可能係我太擔心B仔營養唔夠，身體好似我咁差。於是叫太太食好多野，但原來BB太重都係一個問題，生既時候可能有困難。依家開始食番正常D，希望B仔同太太都身體健康。
去到健康院，睇左D幫BB沖涼既影片，BB仔真係好得意，但我地兩個都好驚同B仔沖涼，驚整親佢嘛!!
心情係既緊張又興奮。

四叔

點解最近唔見四叔出黎講野既?? 又話好有信心，又話睇好第一季見三萬點!! 唉!! 我相信上一次調整如果唔係佢咁早走出黎話自己好有信心，已經買左一百億，依家大家可能冇咁傷。依家就算上番三萬好多人都救唔番，相比起四叔，李老千(人地叫超人) 就醒目得多，靜靜雞賣哂D航運股，佢賣哂你先知呀，你問佢佢仲話你知佢睇好航運業架!! 喂喂，佢公司做航運碼頭架，整個航運業好唔好佢最清楚喇，佢睇好會賣哂D航運股?? 結果，由佢賣航運股到依家，航運股跌左六七成呀!! 呢D就係醒喇!!

四叔!!有時好心真係會做壞事架!!

成績表

公司最後派成績表，加5%，我就唔滿意喇。呢個幅度係全部門最底，但我絕對唔識為自己既表現係全部門最差，只係有D人刻意要我唔好過啫!!
手下大多數都加10%以上，咁都唔錯!! 但大家既決定都冇變，一切睇我!!
睇我??

英語學習

Warning Letter既典範,殿堂級大師-完美人型(perfect human prototype)之作,句子華麗!!
真係....

Despite my repeated reminders, XX department has been being liable for outstanding invoice processing of work done and even outstanding Works Orders issuance for work completed covering period of 0.5 – 2 years. Job Holders, especially those have been frequently being chased for backlog clearance, are hereby formally reminded to settle the outstanding as soon. Otherwise, in the absence of reasonable explanation, disciplinary actions including warning will be issued to respective staff accordingly.
Please respect the seriousness of the above-mentioned issue since we indeed have been ruining out credit in front of our working partners.

Perfect Human Prototype

勸小朋友未經訓練,千祈唔好學!!

好景

距離過年仲有三個星期，市面上都冇乜新年氣氛，大家有冇好想購物既衝動?? 周圍都話大家賺多左，又大幅加人工，你又有冇受惠呢?? 同一D做廣告既行家傾開，佢地都話個市度又唔係真係咁好，今年聖誕同新年都唔係真係咁好景，生意只係好一般。小小力記得佢地生意好既年份，有生意俾佢地都話唔得閒，依家就得閒日日搵我問有冇野做。小小力相信一個地方連廣告都冇乜野做，經濟好極有限。
早幾日，做工程既判頭都話未試過咁早已經冇工開，真係大件事。
相信傳媒話大家賺多左都係指股票市場賺既錢，但最近咁既情況真係…賺左都嘔番出黎!!
仲諗著開開心心咁離開….點知突然…!!

一場遊戲一場夢

十二月，用三個星期賺左十幾萬!!
一月，唔洗一個星期就輸番凸!!
哈哈....
人生就係唔大上大落，買股票更加係一場數字遊戲!!
一場遊戲一場夢，夢醒就乜都冇!!
咁，又再玩過囉!!

唔好咁灰喇!!

集結號

睇左<集結號>,個人覺得好值得睇!!
(集結號唔係隻船)

故事背景發生在1948年到1956年間，一個連隊的戰士全部陣亡卻無人知曉，全片通過尋找追溯的過程展現了這幾個戰士的英勇和感人的事蹟。

解放戰爭期間，一連連長老谷接到三團團長的命令，帶領士兵火速趕往陣地完成一項阻擊任務，以便讓大部隊安全轉移。他們約好，一連聽到集結號之後，就可以突圍撤走。但全連戰士始終沒有聽到集結號的吹響，除了老谷一人被老鄉救下，其他的戰士全部戰死。從此以後，尋找團長問清楚為什麼集結號沒吹響，成了老谷一生的追求。

幾十年後，他才得知，三團團長早就犧牲在朝鮮戰場上了。團長的警衛員道出了秘密：當年大部隊轉移的時候，團長根本沒讓號手吹號，當時已經決定用一連的犧牲去換取大部隊的安全轉移。直到生命的最後一刻，團長仍然為自己的決定內疚懺悔。老谷最終原諒了團長。最後，戰友的屍體被發現，老谷為戰友在墓前吹響集結號，讓戰友得到安息。

戰鬥場面拍得好迫真震撼!! 處理感情既部份好流暢!! 講連長對一班戰友既義氣,對國家既忠心好感人,..缺字既家書，冇寄出去既信，無名碑林....睇到喊!!

每一個犧牲都是永垂不朽。

但我估呢類電影香港冇乜市場喇!!得兩間戲院做!!

面試題目

以下係三條中一面試題目：
1.蘋果與學習有什麼關係??
2.吸塵器除吸塵外，還有什麼用途??
3.掃把除掃地，還有什麼用途??
睇完呢D題目，唔好話中一，連我都未識答。識答又代表D咩呢?? 問呢D問題又想試D咩呢?? 呢D問題真係好似Microsoft入職D面試題目…乜我地D中一學生咁勁咩??
仲有題目關於：
-香港經濟 / 財政報告
-特首連任
-中央與香港特區的關係
一個小六學生真係識答??

幸福的一代

星期六，為左個女報中一，晚上去聽樓下間中學舉辦既中一入學講座。傳說呢間中學係全離島最好既中學，雖然個女肯定入唔到Band 1既中學，我都希望佢入到間Band 2最好既中學。當晚，都有好多家長帶同子女出席。講座中學校介紹左好多關於新學制(3-3-4) 既資料，校園活動，面試等等。我覺得呢一代既小朋友好幸福，中學唔係再死讀書，好多活動可以令你學以至用。讀書方面，亦唔再限死一係文科，一係理科，一係商科。你可以選擇你喜歡既科目。好似小小力咁，讀理科唔喜歡讀生物但喜歡讀經濟同歷史，小小力既年代根本冇選擇，讀理科一定要讀生物，一定唔可以讀經濟同歷史。依家，你可以選擇讀物理，化學加經濟同歷史。
當晚，最開心應該係個女，因為離島區既小學同佢間小學本身已經有一段距離，好多新移民學生(佢既對手) 成績底，冇課外活動，冇獎項，連份表都填得好差。間中學收200人，睇完我都相信個女百份百入到呢間中學，因為唔好話搵199個好過佢，要搵19個都難。
講座完左之後，個女問我會唔會入到黎第一年就考第一!!
唉!! ……真冇大志!!

寧靜

老細同幾個同事去上堂，大老細去seminar，碌葛去開會。整個部門都靜哂，得番兩個人，可以專心清理堆積既文件，希望我唔o係度既日子唔會帶俾老細太大麻煩。
手下更加無心戀戰，士氣底落，連有問題都廢事出聲。只係問過我係唔係真係要離開。我既答案係：如果人工加到20%，唔好同錢鬥氣，留底囉!! 但有可能咩??
連手下都冇野講，寧靜變為死寂。
以往，大家同事每日都一齊食lunch，吹下水，熱熱鬧鬧咁。依家都冇我份…
老細開始好多事自己黎，或者搵同事「活火山」幫手(活火山之得名，係某日王同事大叫：「嘩!! 活火山又爆喇!! 」) ，判頭問乜調左組咩??
大家睇完係唔係感覺我好download呢?? 老實講我冇!! 位在人情在，呢D事我見唔少，早就化哂喇!!
反而我喜歡這大風雨前席既寧靜感覺!!

真亦假時假亦真

上市消息兩則

少林寺上市

新華網報道，外傳中國河南省登封市市政府正醞釀推動嵩山少林旅遊集團在香港上市，登封市因舉世聞名的少林寺而被譽為「功夫搖籃」。報道表示，嵩山少林旅遊集團計劃上市項目包括交通和賓館酒店服務，其中還包括一家高級酒店。此外，還有運送遊客前往嵩山頂峰的電纜車，但纜車並不負責把遊客送至少林寺。登封市負責旅遊的市委官員裴松憲拒絕透露希望通過該集團上市而融得的具體資金數額，也未透露任何有關上市運作的細節。少林寺歷史悠久，因少林武僧融合佛教理念在內的少林功夫而聞名於世。當地政府和少林寺武僧希望利用「少林」這一品牌及所蘊含的武術精神創造價值。報道又指出，登封市經濟中的三分之一依靠少林寺和少林功夫帶動的旅遊業創造。官方數據顯示，二零零六年共有四百一十三萬人次到河南省旅遊，比二零零五年增加百分之二十九。

中國火葬（601444）上市

由於近期股市大跌，股民自殺越來越多，造成火葬場事業紅紅火火。為此國資委決定讓全國火葬場捆綁上市，總資產萬億，屬於大盤藍籌股，具有超強的成長性。殯 葬業屬於強制性服務行業，壟斷資源明顯，年利潤增長率預計為100%以上。墓地屬於房地產板塊，一平方的價格比市面最貴的深圳上海樓價還貴出幾倍，利潤 3000%以上，屬於持續性向好的穩定收益品種，而且具有稀缺資源和環保概念！
中葬集團欲整合旗下火葬墓業資源實施整體上市，目前已經在發改委審批中，申購價44.44元，成功申購者免費再送精美墓碑一塊。
另據傳：最新私募內參，據悉鑒于最近股民自殺增速明顯加快，而且可預期的未來還將持續增長，整體上市後601444將用一部分募集資金開發火葬發電和火葬供暖以及可轉肥等，將成為能源、供水供熱、農業的新龍頭，後市想像空間廣闊。

中國真係一個神奇既國度，所有事件/事物/消息都會係假，只有假既野先係最真。太太聽完之後話一定要買中國火葬。哈哈，如果真係有，我都想買!!

各有前因莫羨人

十二月，股票大有收穫，唔知點解公司內有D唔熟既人都黎問我有冇貼士。豬姐都黎問。咁講，我又唔係D咩大戶，邊得咁多貼士，都係靠自己睇下試下學番黎。高風險高回報係永恆既定律，你見我又咁高回報，其實我當中係承受左好大既風險。你見我三個星期賺十幾萬好羨慕?? 但你又知唔知昨日即使股市冇乜大跌，我一日都輸左五萬!! 你又有冇諗過自己一日冇左五萬會點呢??
食得鹹魚抵得渴，各有前因莫羨人!!
如果買股票只係想賺少少而冇乜長期目標，今年千祈唔好買股票!!

Ready

今日，太太到健康院驗身，醫生話B仔個頭已經轉左向下，準備好黎呢個世界喇!! 點解三月先預產，咁快就準備好既?? 醫生仲話B仔好大個，叫太太唔好食咁多野，唔係好難生喎!! 希望一切順利，B仔同太太都健健康康，肥肥白白喇!!

歷久常新

好耐冇聽既歌，聽番一樣咁好聽!! 聽日文歌，都係KOKIA有D保證!!

進修

公司安排左兩個課程俾我地進修，Excel同Photoshop!! 番工時間上喎!! 每個課程上兩日Full Day喎!!小小力同老細即刻兩個課程都報哂!! 有人問乜你地唔識Excel咩!!? 傻喇!! 識唔識Excel唔重要，學D乜都唔重要!! 最重要係唔洗係度對住D人，你叫我學加減乘除我都去!!
可惜，大老細話我同老細唔可以同時唔o係公司，每人只可以上一個課程!! 咁，我選擇Photoshop喇!!

姑狗寒

公司出過部新call機俾我地，但新call機無論call台同call機型號都同舊機一樣。咁點解要出過部新呢?? 原來新call機冇哂D資訊，即係交通，天氣，新聞等等。到底咁做慳得幾多呢?? 我地呢D要睇天氣當風更呀開吊船呀咁點呢?? 出左新call機，立即引起好大noise!!!
今日，公司話部新call機冇問題要收番先喎!! 唔係呀!! 我用過冇問題呀!! 我想用新機喎!!

從前有個人叫姑狗寒，佢生仔冇pat pat呀!!

紀律處分

根據政府既指引，紀律處分係指對違規或者有失職/有失專業操守既人或者機構既處罰，一般包括書面譴責(Reprimand) ，釘牌(Suspension of license) ，在牌照上附加條件(attachment of condition to license) ，訓誡( Admonishment) ，罰款(fine) 同降/革職。
今日，收到大老細e-mail，話今日唔交report，紀律處分!!
我昨日交左，但真係想收番，睇下佢點紀律處分我!! 話唔定係殺頭或者誅九族喎!!
呢個e-mail真係要留番，第日post俾多D人睇!!
真係一隻戅狗狗!!

飛輪海

飛輪海，四個台灣黎既男子組合，上次黎差D毀滅呢個場，氣勢比倒數更勁。諗都諗唔到D妹妹仔(飛輪海fans)咁有組織，咁有殺傷力。
今次再黎，如臨大敵，一早已經邀請埋警方開會，工作人員加多一倍。
當日，妹妹仔fans依舊多，但氣勢比上次已經差好遠囉!! 呢D靠樣搵食既男子組合多的是，好快走紅又好快消失。
今次係飛輪海第二隻大碟，小小力估佢地去唔到第四隻大碟已經要消失，有同事仲話第三隻都未必有。點解我咁估呢?? 上次飛輪海黎我問佢飛輪海係乜黎，佢話佢最鐘意飛輪海。事隔唔夠一年，我話俾佢聽飛輪海又黎喇!! 佢話佢最憎飛輪海，最鐘意棒棒堂同黑澀會美眉。
你知唔知係乜呀??
晚上，睇電視，棒棒堂唱歌，唉!! ….我真係唔知D歌唱乜…
你又睇下..



好難頂!!

美利樓

唔係講笑，我第一次去美利樓。至於赤柱，我冇記錯，上一次去赤柱係中五學校旅行，已經係二十年前既事。環境變左好多，好多人，但搵鬼老笨既商店仍然存在!! 十幾二十蚊一件T-shirt賣到百幾蚊，好過去搶!! 到係睇下相喇!!




我鬼鐘意我太太依家個樣，肥o都o都咁，好得意!!

元旦

唔知點解，最近冇病冇痛，休息又夠，但整日都好似好疲倦好眼訓咁!! 太太話我隻眼成日都得番一條線咁。係唔係因為天氣凍特別想訓呢??
元旦，同太太同個女去左睇書展。有D失望，冇乜書睇，但都收我十五蚊入場費。三個人成四十五蚊，買本書都得囉!! 本來想帶個女睇下書，但佢始終都只係對D貓貓狗狗相片既書有興趣。期間，遇到太太個姐妹個女黎睇書。之後我個女去左呢個女仔屋企玩。太太話呢個女仔只係大我個女半年，佢父母離左婚，父母都冇同佢住得佢同姑姐住，但佢都好叻!! 俾我既感覺，無論行為舉止都似個中二學生，我個女就似二年級，好難想像佢地差半年。
教小朋友都係要盡快俾佢自立好D!!
之後，我同太太去shopping。好似好耐冇陪佢咁…買左D護膚品俾太太!! 佢覺得好開心，我覺得女人錢好易搵。
晚上，番東涌食野!! 去左間steak house，勁難食!!
咁，又過左個元旦喇!!

最後的倒數

呢個已經係第七個倒數。
亦都會係最後一個。
比較起以往既倒數，今年感覺冷清左D!! 以往未到下午四點已經人山人海，今年就到傍晚六點都係得小貓三幾隻。可能係太多地方有倒數活動喇!! 打開報紙，全港有十幾個地方有倒數。漸漸地，我地呢個一年一度既大型節目都開始有D失色。
今年既準備工作亦係最差既一年，節目晚上九點開始，到傍晚七點都仲o係度安裝煙花裝置。試都冇試過就要正式，我都係第一次。點解今年咁亂?? 因為就係缺少左一個同咁多個部門團體開會既人 -大老細。以前有大老細接觸聯繫各路人馬，大家都好清楚要做D乜野!! 今年呢?? 大老細換左人，新既大老細一次會都冇開過，連佢自己都唔知要做D乜野，點指揮?? 佢仲o係倒數前叫開會安排工作。唉!! 失敗!!
小小力仲被安排去接待VIP…佢真係唔明白小小力o係呢個節目既重要性!! 所有電台，電視台，燈光，音響，電力，煙花，工程等等等等既協調人都係我!! 所有工作人員有事都只係識搵我，我去接待VIP邊個做coordination?? 由一個職位咁低微既職員去接待VIP有冇問題?? 咁高咁大既經理經理話佢：「你有冇事呀?? 接待VIP更係你去喇!! 」佢唔識答，又冇改變安排，選擇整晚隱藏。唉!! 失敗!!
開show，前大老細番左黎，好似佢仍然係呢度既大老細咁，安排工作，接待VIP等等等等。最後完show，仲發號司令叫全體工作人員上台影相。唉!! 我係大老細會選擇o係天台跳落黎攞番個彩。
不如睇下相喇!!

年年難過年年過

年年難過年年過。
去年一月，都係咁講過。真係冇講錯，好快又一年!! 07年真係難過。或者，算係我人生既一個最底潮。今年令我明白到，樣樣都可以等，孝順真係唔可以等架!! 可惜…

工作方面，唔洗講喇!! 遇到小人，不進且退。我都唔明白，自己o個種與世無爭既態度點解都會被針對?? 定要將小小力除之而後快!! 唉!! 罷了!! 此處不留人，自有留人處!! 隨著倒數活動結束，我o係呢個時代既倒數亦正式開始。

又話今年屬狗既好好，邊個話架!! 睇下我!!? 雖然今年農曆年未過，但剩下既日子又好得去邊呢??
健康方面，一年差過一年，都預左!! 但差既程度比想像中快!! 不過，真係兼顧唔到咁多喇!! 健康係今年放棄左既野!! 冇野好講!!

學業方面，大家真係要祝我學業進步先得喇!! 多事之秋，學業o係07年係半放棄狀態!! 但你叫我最後底空飛過，我會好失望，唔讀好過!! 所以剩下既時間要加倍努力，希望追番失去左既時間!!

太太方面，身體健康，一切正常。有佢既支持難過既日子都一一度過!! 多謝!!

兒女方面，B仔出世既準備都七七八八，期待o個一日既到來!! 原來預產期正正係爸爸生日!! 希望為爸爸帶來最好既生日禮品。女女方面，無論我點努力，佢品格同學業都乜冇大進步。太太既朋友既兒女比我個女更差既，經過一番努力，都已經迎頭趕上，入哂Band 1既學校。我個女，仍然發明星夢，仍然對住D貓貓狗狗成個鐘淨係識得講：「好得意呀!! 」，唔識佢，仲以為佢弱智，除左「好得意呀!! 」唔識講第二句。老師話佢絕對入唔到Band 1，甚至Band 2!! 唉!! 或者，人係要跌過先會識行，永遠扶著佢的話，當有一日手放開佢就會跌到。做父親既我，只有在旁邊睇住佢跌，等佢在失敗中學習同成長，又唔洗跌到起唔到身咁喇。希望太太慢慢會明白!!

錢方面，或者算係過去一年比較好既一樣。每年既目標都係希望身家番一番!! 07年把握到股市升浪，番左兩番，成績理想。長遠希望提早四十五歲前退休!!

展望08年既目標，只有兩個，都係媽媽擔心我做唔到既遺願：「好好照顧爸爸，離開呢間公司!! 」

兒女債

休息既今日,又病(呢D係唔係休閒病呢??一放假就病),...在家同好耐冇見既友人MSN,...知道某舊同事有左BB,...!!
恭禧!!恭禧!!
轉頭,睇一睇財經雜誌,...原來呢一兩年係另一個嬰兒潮既開始!!可能因為呢一兩年經濟轉好,多左人認為可以養得起一個小朋友!! 06年全年有大約70000個BB出生,07年呢??淨係11月已經有60000個BB出生!! 作為父母既,有冇想過當佢地既BB成長之後進入社會,要面對既競爭有幾大??生兒育女,..唔係生左養得大就算!!兒女債...唔係有錢就還得哂!!
今年,小小力自己做左人父母,先至知要教一個小朋友有幾難!!
越難,越覺媽媽既偉大!!

邦邦的婚宴

今日係好朋友邦邦結婚既大喜日子，但因為有孝在身未能出席邦邦既婚宴。Anyway，希望邦邦同冰冰白頭到老，永結同心!!
時間真係過得好快，由當日o係大學十下十下，到今日大家(大部份同學)都成家立室，有D都做埋爸爸喇….日子真係過得好快!!

喂!! 未結婚o個個呀!! 加把勁喇!! 等飲你o個餐呀!!

聖誕 快樂

這個聖誕，你，過得快樂嗎??
這個聖誕節，有五日假期，陪爸爸過左四日，去左好多地方。工展會，尖沙咀睇燈飾，去赤柱，返大陸…!!呢D地方都係爸爸以前成日同媽媽去既。但對我，真係冇乜感覺。因為當佢地身體健康既時候，我從來都冇同佢地去過呢D地方。…當你學會珍惜既時候，原來已經失去。
快樂係咩呢??
假期既最後一日，爸爸去左打麻雀。剩底我，太太同個女o係屋企休息。對住個女既日子真係好難過。剩係叫佢沖涼到唔知浪費幾大氣力。o係忙辦媽媽身後事既日子，冇時間迫佢沖涼既日子，佢竟然可以五日唔沖涼…唉!! 昨日，我番左工，太太出左街辦事，佢又竟然可以由朝早起身到夜晚成日都唔刷牙。到底佢由邊個度學番黎架呢?? 佢媽媽我太太都唔係咁架喎!! 真係連賓妹都乾淨過佢!! 一個人，點可以容忍自己去到咁既地步???
所以，假期既最後一日，我選擇訓覺訓足一日，冇眼睇!!
希望將來B仔唔係咁…..唔係我實自殺!!
聖誕過後，發覺股票o係呢半個月賺左十萬，但半點開心既感覺都冇!!
原來，錢真係換唔到快樂…
到底點先可以重拾快樂呢??

朋友，聖誕快樂!!

十萬火急講廢話

上次，大老細十萬火急叫開會。總結講左四樣野。第一係已走左既王同事有好多數未埋(關我地咩事!? 佢唔埋數炒我地呀??) ，第二係放假打電話俾你要即刻聽(呢個擺明係針對我老細喇!! Well，番緊工都有機會miss call喇!! 又要炒呀??) ，第三係唔好用大假黎prepare考試(呢個擺明係針對某女同事喇!! Well，我放大假做乜關你咩事呢?? 又要炒呀??) ，第四係要我地做到「以客為本，態度專業，群策群力，勇於創新，居安思危」(請問點叫做做到?? 點叫做唔到?? 專業態度係點呢?? 創新到咩地步為之好呢??D咁抽象既野會唔會解釋下呢?? 係唔係D高高在上既management都鐘意叫埋D咁既口號既呢?? 叫完又有咩實質作用呢?? 做唔到係唔係又要炒呀??)
最唔明既係，點解要十萬火急講呢D野呢??

「十萬火急講廢話，萬千師奶賀台慶」

同樣咁無聊!!

重複犯錯

媽媽既身後事暫時告一段落。親手按按鈕將媽媽火化果種感覺真係好難受。

唔知道係唔係受最近既心情影響，番公司做野都不停犯錯，而且仲重複犯錯。唉!!… 老細對我算鬧得少囉!! 雖然事情已經過去，但心情肯定未回復!! 黎緊有五日假期，希望好好休息一下，盡快回復過黎。畢竟同家人一齊要走既路相信仲有好長好長。對我做錯野而受影響既同事，真係要講聲：「Sorry! 」

媽媽既葬禮，都錯漏百出。負責葬禮既係爸爸既朋友，做開葬禮既，但又遲到，又帶漏野，又唔見野，又唔見左人，又收得貴。唉!! 做呢D事又唔想同人噪…依家明白咩叫「唔熟唔食」喇。

有小小力識左三十年既朋友H係媽媽既葬禮當晚話黎又唔黎，另一朋友M因此同朋友H大吵一場。唉!!… 可必呢!! 唔黎就算啦!!

正因為好多人都話黎又唔黎，結果場面好冷清。小小力對唔住媽媽…

冇乜心機寫，下次繼續。

認錯

有時真係唔怪得大老細話我，我出D文件差不多份份都有打錯字我睇唔到!!! 係我自己打既冇乜錯，但我draft俾文員打既就份份改完幾次都仲係錯!! 最衰既係，睇過份文件發現得title錯，俾番文員改。改完番黎對番title冇錯，出街!! 跟手俾大老細彈番轉頭，原來文件中間有野錯!!! 而呢D錯，o係第一次check既時候係冇既…!! 打錯字都小事，有時仲有段同D文件完全冇關既字paste左o係度!! 更奇既係，我俾
老細出街既文件，有錯佢永遠睇唔到，只有大老細先睇到!! 更奇中奇既係，如果D錯大老細都睇唔到，再上多幾個高層都唔會有人睇到，出埋街再反番黎都唔會有人睇到!!
所以，每份文件平均改五次，每次都要由頭再睇過。得幾頁紙既文件都仲好D，有幾百頁既標書就直頭想死喇!!
唉!! 有咩辦法呢??

談兵變

九鐵前總裁黎文熹出書爆當年兵變內幕。書我未睇過，但當時小小力都認為政府一定會撐二少。最高管理層唔可能被D底級管理層咁玩法。小小力唔明佢地當時既心態係點…但都好有興趣。如果，兵變o個班唔係管理層係基層員工，情況又會係點呢?? 如果，基層服務員同司機都罷工，又可唔可以迫到二少落黎呢??
小小力覺得，要兵變成功，目標要清澈，大家要團結，絕對唔可以讓步，絕對唔可以被分化，抱著於敵同亡既決心…有家庭負擔，又怕痕又怕痛睇定邊邊形勢好o個D，千祈唔好預佢!!
如果係我，會點呢??

洩氣

或者係太多唔開心既事發生，整個人好似洩左度氣咁。依家返工都冇哂心機，只係想快快收工走人。連書同報紙都唔想睇，好死..
公司既廢人繼續D無聊既權力鬥爭…唉!! 我只係想多D時間陪伴屋企人，其他事都唔多想理，畢竟我都已經係一個活死人喇…
某同事可能已經知道自己升硬，開始意氣風發，話下面邊個唔高興就走囉，佢唔mind咁話…
有時覺得當你好用力咁爬到高位，回頭一看下面根本冇哂人，咁.. 最高同最底又有乜分別呢…

只係想唔到，我，係呢個時代既結局，會係咁…

守護天使

太太話昨晚見到媽媽…..事情係咁既..
昨晚太太睡夢中醒來，見到媽媽企o係床邊，對太太話：「小心冷親呀!! 」，之後仲摸左太太個肚幾下，仲邊摸邊叫：「B仔!! B仔!! 」，然後幫太太冚被。離開之前，太太問媽媽依家幾點鐘!媽媽話：「四點零五分呀!!」媽媽走左之後，太太起身去廁所，之後睇一睇鐘，時間係四點二十分…

太太話唔係夢，因為有真實既感覺，見到既媽媽已經唔再病魔既折磨，唔再需要靠氧氣喉呼吸…

露露話我媽媽佢都未黎過筲箕灣，我話俾露露聽，媽媽已經變成我地既守護神，冇地方係神去唔到既..

我相信媽媽真係黎過，因為媽媽都想見下個孫，我亦相信媽媽在另一個世界，一直守護著我地一家…….

感謝

仍然難以接受媽媽離開既事實，尤其獨自一個人既時候….
Anyway，想再一次多謝朋友丸頭為媽媽介紹左黃醫生，減輕左媽媽呢段期間既痛苦…
多謝黃醫生對媽媽既照顧…
多謝呢段期間關心/擔心/支持我既朋友。
請原諒我沒有時間一一去道謝…

最想不到一班手下都送給我既支持同鼓勵….
多謝哂..
放心，我會支持住，好好照顧家人，好好生活下去!!

樹欲靜而風不息

媽媽終於o係今日離開左!!
經過兩年多病魔既折磨，媽媽終於得到解脫…

只係這３７年來都未有令媽媽得到幸福快樂，
而這一生我都冇辦法再令媽媽得到幸福，快樂

媽媽，你安心上路吧！
我會好好照顧爸爸，
希望來生再有機會做你既孩子，
報未完既恩。

樹欲靜而風不息，子欲養而親不在。

醫生說

你媽媽可能過唔到今晚．．．

Appraisal之後

大老細俾我既評語係：
「因為在職位上工作得耐而失去動力，雖要轉換去新既工作崗位。」
新既工作崗位，唔通係洗廁所？
小小力覺得，你不如炒我好過喇！！唔係我一定同你玩到底。
全部人做完Appraisal，平時俾佢鬧到死既一兩個同事突然評語好好！
點解？ 呢Ｄ叫分化！
最後，每一個都冇好下場！
開大會，大老細之上既大大老細公開支持佢！！ 其他經理感覺冇引！！
我感覺公司最小有兩個白癡！
病假龍虎榜出左幾日收番埋，唔通白癡開始自己既真正身份係一個白癡！！小小力正準備請病假，可惜病假龍虎榜已經消失！
何Ｂ女安慰受左大老細氣忍唔住要爆既老細話：「算喇！！花無百日紅！」
小小力在旁說：「可惜你等唔到o個日呢！」
何Ｂ女問小小力幾時過黎幫手，小小力話：「出埋雙糧我都走囉，算吧喇！！」
老細對小小力話：「如果唔變唔好走喇！你走左我死硬！」
小小力話：「我走唔走你都死硬！我走，死你一個！我唔走，死我地兩個，算吧喇！！」

終於有用

就算係一條廢柴，佢存在於天地之間，都總有佢既用處!!

Facebook都終於有點用。竟然有接近三十年冇見/聯絡既小學同學在Facebook遇上，大家講起喜歡扭人耳仔既王老師，設於廁所既小食部，放學走後門…真係好懷念!!

學校已經搬左，睇番新既學校website，老師都冇一個識，但最奇怪既係…高中時既校長，竟然做左新小學既校董!!

睇番轉頭，只係三十年，小小力讀過既中小學都拆哂….
真係好懷念呀!!

病假龍虎榜

感覺，
以往，未到年尾，未做Appraisal，大家都士氣高脹。為乜?? 大家心照!!
今年，同樣未到年尾，未做Appraisal，大家都已經冇哂士氣，點解?? 都係o個句，心照喇!!
維修組，七個人，一個放大假，三個請病假，冇左一半manpower!! okay喇，who care?
大老細立即出個病假龍虎榜，列哂佢地上去，目的，都係想羞辱下大家!!
但，大家既反應係：「白癡，so what? 」

你明唔咩叫做做又三十六，唔做又三十六呢??
冇請過病假，搵咁多!! 狂請病假，都係搵咁多!!
你會點做呢???

完美人型最大既缺點就係自以為冇缺點…
病假龍虎榜….唉!!

老驥伏櫪

睇番舊年既Blog，又以下一段:
「開大會，我被調走去另外一組，手下亦被抽起，感覺像被出賣。
我在這裡既時間還有幾多呢??
真正既Count Down開始。」
歷史一再重演，但心態已經唔同!! 再冇被出賣既感覺!! 唔會再不知所惜
經一事，長一智!! 又睇下點?
這幾年，真的有點累!!
依家既心態係 - 老驥伏櫪!!

習慣

唔知係唔係D產品既Life Cycle越黎越短，令我地對D新事物新產品好快習慣，好快適應，又好快覺得厭。
玩/用Facebook，都唔夠兩個月，已經覺得好悶，好多人send好多好多好多application俾我，睇都睇唔哂，安裝左又會用既都唔夠五個!! 咩將人同人既關係拉近，又係廢話!! 你send個message俾個friend，佢都唔覆你或者兩個月先覆你，你仲記得當時既心情係點?? 當時想講D乜?? send個蛋糕俾我又食唔到?? 我淨係知上Facebook最多用既係DELETE同IGNORE!!
點知星期日既電視節目仲走去當新科技介紹，同事王生睇完仲話問我地知係唔世界有樣新科技叫Facebook!! 另外一個王生話係唔係D做左爸爸既都鐘意睇完報紙電視就好似發現驚天大祕密咁周圍同人講…!!哈哈，唔知呢?? 我都冇同個女講過Facebook!! 佢想學用我都唔俾喇!!
總覺得電腦科技既野，距離佢越遠，個人既思考能力同集中力越強!!
太多野都習慣左並唔係一件好事!!

無緣

有道是：「買匯豐，有買貴，冇買錯。」
但我相信我同匯豐真係無緣..
小小力人生到今日計三次買匯豐，三次都要輸錢止蝕離場(跌過10%)。大市更加會跟隨我買匯豐而大跌。記得細個同媽媽講過，人人都咁好運係得我咁黑，大個我一定要買匯豐，要衰，唔好淨係得我一個。You’ll never walk alone嘛!! Right?
好彩今年都賺左差唔多十幾二十萬姐!!

夾心階層

又一個手下同我講，話過年後會走喇，頂唔順，叫我請定人!! 唉!! 高層容易走，底層更容易走，偏偏我地呢D夾心階層就最難走。辭左職既友同事，同我都係夾心階層，兩個月都搵唔到工!!…. 灰到爆!!
黎緊仲又好多底層同事會走，真係玩死我地呢D夾心階層呀!!

「六合彩券 惠澤社群」應該改做「六合彩券 人生希望」

一杯水

黑色星期五，繼續黑色！
晚上收到爸爸既電話，媽媽入左醫院。原來因為病魔既折騰，媽媽又再一次想自殺。好彩今次工人見到阻止，打電話送左媽媽入醫院。去到醫院，醫生講媽媽肺部受感染引起肺炎，情況未太差，但叫我 地有心理準備。媽媽情況穩定後，零晨離開醫院！！
黑色後繼續黑色！
回家後，大約兩個鐘，細佬終於番屋企！仲係俾兩個大耳窿壓番黎，原來大耳窿話當晚佢過左大海，好容易咁輸哂又問大耳窿借左九萬蚊，又好快咁輸哂於是帶埋大耳窿番黎叫屋企俾錢！或者之前試過太多次係咁，佢根本唔需要同屋企解釋，帶得大耳窿番黎我地就要自自然然 俾錢。又或者佢太過高估屋企既經濟狀況，呢幾年屋企幫佢還債大大話話都還左一百幾十萬，加上媽媽既醫藥費，可以講就算有金山銀 礦都用哂！我唯有同大耳窿講，你唔走我報警！第二日佢仲走去醫院搵媽媽，媽媽都唯有叫醫院趕佢走！為左爸爸安全，亦避免佢番屋企偷錢，換左屋企把鎖！至於佢既生死，都冇人再關心！
乜野係壓力？就好似叫你用手握著一杯水，容乜易！但叫你用手握著一杯水唔放三個鐘呢？呢Ｄ就係壓力！如果你放底杯水休息下再黎過，壓力就可以減輕，但我三年黎都未放過手。
黑色，應該會繼續係黑色！

打小人

老細同我做appraisal，樣樣評分都係咁多年最差既。老細話大老細好唔鐘意我，但佢話大老細暫時又唔會炒我，但又唔會俾我好過。咁，老細問我有咩打算。唉…講真，大老細又點只唔鐘意我一個呢?? 佢都係想炒哂我地班舊人姐。又唔升又唔加人工，除左走我仲可以有咩打算呀?? 老細話睇下我有咩辦法令佢鐘意我…唉!! 真係浪費時間。老細又話我走左佢就死喇。唉!! 我走唔走你都死架喇，關咩事!!

出年又轉job位，轉左去睇埋消防同BMS，!! 出年既事出年先算喇!!

真係要打小人!!

與垃圾同在

晚上收到個女既老師既電話，老師話個女今次呈分試前試驗，數學唔合格！！老師話佢最大問題係唔集中同懶。唔集中係上堂掛住傾計，開始左上堂都仲掛住傾，老師分開佢同同學坐，點知隔住一行佢都仲可以繼續傾！！得佢自己一個佢都自己同自己傾，於是上堂就唔知老師教乜，番屋企打電話俾同學問功課，又繼續傾！！懶呢？？Ｄ數學多過一個step佢都唔想計，求求其其寫個答案。你教佢佢都唔想學。你話俾佢聽唔讀書冇用架，佢話俾你聽佢願與垃圾同在!! 而且身體力衡，全部污穢既衣服，食過既食物，費紙，膠袋，氣水罐放哂o係張床，跟著唔沖涼就訓!! 鬧完又係咁，話完又係咁，打完都係咁!! 你一係幫佢執，一係唔好理佢，佢就唔打算改架喇!!

邏輯

馬路邊，地面畫雙黃線，即係禁止停車，加埋有個牌寫住不准停車，夠清楚喇!!
話說，有日有條友停左架車o係雙黃線個不准停車牌前面等人，保安上前趕佢走。佢就大大聲話：「你唔俾我停架車o係度我點睇到個牌寫住不准停車呀!! 」保安於是向上司回報，佢上司再向高層回報，再向高高層回報。呢位高高層覺得呢條友講既野好有道理，唔停低架車點睇到個牌寫D乜呢? 於是下令將雙黃線改做單黃線，等D友仔可以停低架車睇不准停車牌。就係咁，停車場入口就不准停車，但可以停車睇不准停車牌。
請問呢D咩邏輯黎呢?

政策

乜公司既政策，有改變係唔需要同職員交待架咩??
話說，入黎呢間公司既時候，正常收工既時間之後就當O.T.。夠四個鐘O.T.就補半日假。兩年之後，公司縮骨，O.T.由八點先開始計，夠四個鐘O.T.就補半日假，但過十二點就當另外一日計。例如你今晚八點O.T.到零晨兩點，咁由八點到十二點夠四個鐘當半日，由十二點到兩點得兩個鐘，唔夠四個鐘唔計!! 六個鐘O.T.得番四個鐘補假。如果由十點O.T.到零晨兩點，你就乜都冇。如果你係收工一路直落，六點O.T.到零晨兩點，八個鐘O.T.都係得番四個鐘補假。
上星期試野收工一路直落O.T.到十二點幾，填O.T.人事部唔批，理由係O.T.改左九點先開始計。下?? 邊個話架?? 乜公司既政策你話點就點架咩??O.T.改左九點先開始計竟然全公司都冇人知?? 呢D咩政策黎架?? 九點先開始計，到十二點得三個鐘，唔夠四個鐘又唔計，咁即係零晨先開始計喇!! 擺明搵笨!!
咁多人死又唔你死喎!!

鴨記粉絲

小小力老細係鴨記粉絲(fans) 已經好多人都知，佢個個星期都去鴨記，買買埋埋D唔等洗野，又鐘意去買鴨記D高科技野番公司用，咩放大器(唔work既)，無線接收器(過十尺唔work既，但聲稱工作範圍20米)，咩喇叭(又係唔多work既，D聲冇乜放大度既) ，風扇(唔涼但好嘈既)，Mic(上舞臺用唔到既)，高科燈泡(半年唔到就死既)，萬能接收器(收到本地免費電視臺only)，LED電筒(應該照唔到一尺以外既野).. 唔知幾時有太陽能電筒呢??
講番呢位鴨記粉絲，佢成日用鴨記野係公司度，D判頭同供應商成日笑佢，咁大間公司成日用鴨記野咁cheap!! 都唔係問題喇，佢唔怕人笑就得喇!! 問題係如果你用大廠野，有事大廠負責。用鴨記野呢?? 有事唔通你叫鴨記D友仔負責??
老細仲係成日叫我去鴨記睇野，我次次都話唔順路。
P.S. 鴨記係深水步鴨寮街。

燈飾展

又係一年一度既燈飾展，睇左。感覺同呢幾年一樣，毫無新意。全部人都只係想做
大陸人生意，你話你係香港人佢地直頭歧視你。但大家又冇乜創意，一味靠平。求其擺張檯，擺幾隻普通燈泡(普通電器商店有得賣果隻)出黎就想人同佢買幾十萬隻。冇錯!! 係幾十萬隻!! 你買一萬幾千隻佢都費事理你!!唉…發達真係咁容易??仲有，果D所為高科技係咩呢?? 你見到一隻10火既燈泡，於是你問佢有冇100火，佢答你有!! 就係將十隻10火既燈泡擺埋一整!! 唉!! 到底係佢低能定當我係低能呢!!
大陸D股票升到咁問你驚唔驚?? 咩高科技咩盈利… 唉!!

真正的時代股神

時代股神，係小小力既新花名。唔知點解，唔知從幾時開始有個咁既花名。亦唔知點解，依家日日都有同事黎問下小小力今日點睇，有咩心水，咩價位放咁。真係好似電視o個D財經演員咁!! So stupid!!
至於我呢個時代股神眼中既真正時代股神應該係我老細。點解?? 因為呢幾年抽新股，我認為好好既都有叫佢大手抽，而大手中左既新股佢一隻都未放過。三個幾既中國人壽，今日已經升左十幾倍喇!!

漢奸

漢奸
其實漢奸點解呢?? 個人認為係解「為左個人利益而出賣中國同人民既人!! 」，所以，個人認為叫李柱銘做漢奸又好似唔係好適當。不過我又唔明點解佢下下都話美國要點點點對中國!! 中國做既野唔好點解要同美國講?? 唔o係中國人既社會講?? 以下係李柱銘先生以前既言論:
一九八八年四月八日 《信報》
「一九八八年三月下旬，李柱銘訪問美國時說：「如果香港繼續做一百年英國殖民地，我想很多人認為是最好的，但現在香港要回歸中國。」

一九八九年六月二十四日《經濟日報》
「李柱銘一九八九年六月在美國眾議院人權委員會聽證會上說：「英國將五百五十萬港人交還中國，就像二次大戰將五百五十萬猶太人交還納粹德國。」

一九九九五年四月二十八日 《文匯報》
「美國作為世界民主的旗手，英國作為我們的宗主國，應當站出來抵擋北京欺凌。」他自稱：「敢於當殖民主義的走狗。」

一九八九年六月二十四日《經濟日報》
「各國增加貿易制裁中國政府，貿易制裁有可能推翻恐怖政府，或者改變現行政策。」

一九九○年五月七日《信報》
「一九九○年四月至五月，李柱銘在洛杉磯的兩次香港問題研討會上煽動說：「如目前基本法得不到修改以保護港人利益，一九九七年『大限』以後，香港將會因有人由於政見不同，被投入監獄而出現『政治犯』」。」

一九九一年四月七日《成報》
「李柱銘說，中英未能就新機場達成協議總比達成壞協議為佳。至於港英政府應留多少儲備金給特區政府，中國「無權過問」，港府「即使用光儲備，也未必是壞事」。」

一九九一年四月十八日《華僑日報》《經濟日報》
「李柱銘在立法局辯論新機場問題時說，他反對中國要求預留儲備金給特區政府。李柱銘離港去倫敦時聲稱，他以政黨主席身份，「要求英國政府堅持立場，不能預留儲備給特區政府。」」

一九九六年二月十六日，一九九六年二月二十三日《壹週刊》
「一九九六年二月，李柱銘聲稱，「近期有關駐港解放軍的官方宣傳鋪天蓋地……但這些宣傳卻未能平息香港人對解放軍的憂慮」。例如「解放軍橫行無忌，掛上軍區車牌橫衝直撞」；「解放軍參與經濟活動，九七後會否將內地那套搬到香港，與民爭利」；「駐港解放軍負責人一再強調解放軍會嚴格遵守特區法律」和「實行封閉式管理」，但是，「這一系列的拍心口式保證，仍未解決香港人的疑慮」。至於駐軍體現主權問題，「從現時駐軍規模來看，這恐怕不只是象徵式駐軍，因為純粹象徵式不需要這麼多海陸空軍三者兼備」。」

一九九六年四月十八日《信報》
「李柱銘在美國華盛頓傳統基金會及克雷蒙研究所分別發表演說時表示，所謂一國兩制及港人治港已經名存實亡，而九七年之後的香港將由受高度控制的傀儡政府所控制；傀儡政府將控制香港行政、立法及司法，不但不可以保護香港人權益，反而會剝削香港人權利。他還稱香港傳媒已經開始自我審查，電視台已經不願意採訪民主黨的消息。」

一九九九年五月八日
「，美國在南斯拉夫戰事中，用導彈襲擊中國駐南斯拉夫大使館，造成了二十多人傷亡。對於中國同胞慘被殺戮，李柱銘毫不尊重自己的民族，反而站在美國的一邊，在香港特別行政區立法會的殿堂，公開用英文發言，為美國的屠殺行為辯護。」

奇人

某日，同老細巡見停車場，竟然見到有個人訓o係停車場個地下，好舒服咁講緊手提電話。佢見到我地，仲笑笑口，懶洋洋咁轉身，好似訓o係自己張床咁。老細見到嚇到呢….佢立即叫個保安去叫佢起身，個保安見到o個個人，望番我老細，感覺係想同我老細講：「大驚小怪，未見過人訓o係停車場講電話咩!? 」

醒目與戅居

昨晚開夜試消防設備，叫哂所以既技工開夜。其中一個技工「FU」昨日立即請病假。同事話佢都之前既技工「一哥」一樣。小小力就覺得唔同喇!! 呢個係醒目同戅居既分別。戅居係你做左D野以為騙到全世界，其實人人都知，只不過係唔或者未踢爆你。醒目係你做左D野出黎全世界都知，但都冇你辦法。

真係人老精，鬼老靈!!

八府巡案

話說邊關有戰事，皇上派出國家既大將精兵到邊防迎戰。但皇上又唔放心呢班大將精兵會唔會用心作戰，於是警告眾將士，叫佢地醒醒定定俾心機作戰，話皇上佢自己隨時會黎突擊檢查，睇下佢地有冇偷懶，邊個偷懶殺邊個。本來大將精兵為國上戰場作戰，邊個會偷懶呢?? 皇上以為呢一招可以刺激將士勇敢殺敵，結果大家未出戰已經士氣受損。大家覺得既然皇上唔信任佢地，咁就唔好派佢地上陣喇!! 國家又唔係冇人!? 皇上乾趣派自己信任既人上陣好喇!! 結果將士們帶著底落既心情上路。
更甚既係，到邊關突擊檢查，皇上又驚危險又怕路遠。想想下都係唔去，但又唔係好放心。於是派出最信任既手下 -大宦官銀公公做八府巡案，代皇上突擊檢查呢班將士。當呢位八府巡案到達邊關，佢只係o係府中休息，半步未離開個，更加未睇過呢場戰事一眼。
戰事完畢，皇上認為八府巡案監視將士功勞最大，高度贊賞!! 一眾將士即被批評未做到完美。下一次要做得更好，如果唔係? 殺無赦
故事既皇上似唔似亡國既昏君??

呢個時代真係…..

香港人

睇報紙有三則新聞，都係有關香港人既調查。
其一係調查發現香港既青少年普片自尊感偏底。大至即係對困難時退縮逃避，不敢接受挑戰，冇主見、被動，行為懶散同覺得被人厭棄。調查話主要原因係香港既教育制度太著重學術成績而缺少左個人品格既培養。小小力覺得一半一半喇。小小力既年代教育制度都係咁，成績表就代表左一切喇。問題係現今既家長(即小小力呢一代) 對佢地既子女過份寵愛，令小朋友唔習慣負擔責任，當佢地長大進入社會，就算係成績好，都負擔唔到咁大壓力，面對困難唔識解決，最後選擇自殺去逃避。香港既未來就係靠佢地，你驚唔驚??
其二係調查發現越黎越多三十幾歲既單身人士選擇唔結婚，亦唔自立，繼續留o係屋企食父母住父母既。如果留o係屋企係為左照顧父母咁當然係好事。但大部份只係因為自己養唔起自己而依靠父母。經濟環境改善，但大部份人既生活質素反而下降。香港，還有未來嗎??
其三係調查發現經濟環境改善，但大部份香港人既工作時間越黎越長，由幾年前時間分配係60%工作40%私人到依家83%工作17%私人。咁長既工作時間唔單只影響左健康，仲產生左好多家庭同社會問題。香港人既開心指數越黎越底，很多人都想離開…你又會點呢??
如果你冇以上既問題，真係恭喜哂!!

狼來了

原著:
牧童彼得每天都在山坡上放羊。這一天，他跟平常一樣，懶洋洋地躺在草地上，看看羊兒吃草。他想﹕天天都在看羊，真悶啊！、突然，他想出一個好玩的遊戲來。「狼來了！狼來了！」彼得放聲大叫。山下的村民聽到叫聲，連忙拿着鋤頭跑上山，要把狼趕走。村民氣呼呼地跑到山坡，只見羊羣安靜地在吃草，彼得在旁笑彎了腰。哪裡有狼的踨影？村民知道被彼得戲弄，都生氣地下山了。這天，彼得又在山坡上放羊。這一回，真的來了一隻狼。彼得嚇得大叫﹕「狼來了！狼來了！」可是村民以為彼得又在說謊，不再理會他。結果，羊兒被狼羣吃光，彼得傷心地回家去了。
現實:
股市大跌，第二日又急升，如是者呢兩個月已經試左好多次。到星期一，股市再大跌，但並冇引起恐懼，大家都已經適應。電視訪訪股民，佢地異口同聲話唔洗驚，聽日實大升番，果然第二日升番哂。故事既結果唔知會係點呢??

DOWN

B仔冇事之後，太太決定要番貴州還神。錢都唔係問題，但咁長途對一個大肚婆真係唔係咁安全。我當然唔准，但我太太就係咁，做野唔諗後果，諗到就去做，邊個講都唔聽!! 講開又講，佢性格都好似我媽媽…!!!
太太如果番左貴州，我就要成個星期對住個女….唉!! 頭痛!! 我對住佢真係冇哂辦法，講又唔得，鬧又唔得。有種被虐待既感覺。
連媽媽咁小見到佢都發火，話屋企最細係佢，但最多要求係佢，最冇責任係佢，最大脾氣又係佢。連媽媽有病又脾氣大既人都冇佢發咁多脾氣…唉!!
越黎越down!!

持家之道

唔係我想教大家，係我想向大家請教。點樣可以用兩萬蚊一個月去run一個三口子既家庭。唔係講笑，我除左交6500租金之外，每個月既洗費都超過兩萬蚊!! 洗成三萬蚊一個月，太太仲話佢唔夠錢洗!! 如果唔係D股票頂住，結婚到依家已經洗哂我所有既儲蓄喇!! 股票方面我繼續開源，但點樣可以節流呢??

邪神回歸

老細今日放假後第一日番工，公司有燒馬達事件，燒電線事件同爆水喉事件o係同一日發生。公司又有地方水浸，又有地方冇冷氣，又有地方冇燈，又有廚房冇抽氣。仲有六個同事冇番工兼股市大跌。
對唔對題呀??

真的老了

星期日既夜晚，太太同女女都番左筲箕灣，自己留底o係東涌陪媽媽。連媽媽都訓左覺，靜靜地一個人既時候越黎越少！！開著電腦，但又唔 知為乜！！以前開著電腦總有一兩個朋友online吹下水，依家，就算 有人，都唔會應你！唔通結左婚既人唔可以再同單身既聯繫？但最奇既 係結左婚既都唔會應你，唔通連個天都唔鐘意我？
打開本書，睇幾次都唔明！！學如逆水行舟，不進則退！！睇番Ｆ７既 Econ. 竟然都唔明！！退得好快呀！！
唔知大家覺唔覺自己真係老左喇！！
好得人驚！

好消息 ﹣ＩＩ

終於都有Ｄ好消息！收到醫院既信，呀Ｂ既染色體正常，係男仔！
放心哂，太太話終於訓得著！！

破三萬

昨晚之後，已經肯定今日恆指會破三萬。o係公司開定機準備定沽貨離場，就o係呢個時候，I.T部門話黎整機。Oh…唔係嘛，部機講左三個月都唔整，就係今日先黎整?? 真係呢….。當佢地整完機既時候，先機已失，個市仲倒跌…唔通…連個天都唔鐘意我??

今日，冇乜mood，同事有清假中，office都好靜，希望平平安安咁過一日。

真相大面

終於知道點解某同事突然之間會離職。唉!! 其實好小事姐，有冇必要咁做呢!? 做大既又有D咩事都只為求自保唔理D細既….咁以後仲邊又人聽你講呢??
同事串我話大老細聽日番，問小小力會唔會又被鬧!! …哈哈!! 會唔會?? 鬧就鬧硬喇，睇下開邊樣姐!!

叫second interview個位人兄，最後都拒絕左再黎喇!! 鬼咩，出手咁底!! 人事部仲叫我下再唔好喇，半年先得一個人黎interview，好難得架咁話!! …諗!!吹脹!!

有人話老板都唔係好buy大老細o個套，佢都好難留得耐咁話!! ….呢D野當故仔聽左就算喇。可能佢未起身我都消失左喇!! 因為佢話過佢只會留有用既人，而我相信o係大老細眼中，呢個世界除左佢之外，所有人都係廢物。 所以我應該好快消失!!

十月氤氳

近年既十月都係咁，煙雲瀰漫，除左睇唔清前路，仲有一種使人窒息既感覺。秋天越黎越難受。或者係咁，大家都唔再喜歡秋天，佢亦漸漸消失。
十月，又到寫appraisal既時間，俾我寫appraisal既時間亦漸漸消失，由以前有一個星期到依家得番一個上晝。一個上晝點八份appraisal，唯有抄囉!! 不過分別都不大…
唔知幾時輪到我o係氤氳中消失呢…
有新人黎見工，睇左份resume，我就唔多想接見，因為經驗差太遠，但人事部話點都見一見喇，好難得有人黎見工!! Okay…!!見完，俾未見之前感覺仲差。十下十下，我問佢結左婚未，佢答我佢家姐結左婚….真係差D笑出黎。將份resume俾另外一個要請人既同事，佢竟然話okay，都係人一個，乜都要，再唔要請到出年都請唔到!! 再call呢位人兄second interview，佢都話暫時唔得閒咁話。請人真係咁難?? 既然咁難，點解公司都唔願意留人??

桃花依舊笑春風

好多舊人走左，又好多唔識死既人黎左。公司整體人數冇乜點變，但真係桃花依舊，人面全非。
到底你有十個人，我有十個人，人數一樣，係唔係代表你同我既生產力係一樣呢。每個人既能力都唔同，做出黎既野都有唔同!! 技術/難度越高，誤差就越大。就算呢十個人係一樣，你點指揮同我點指揮都可以有好大出入。如果唔係仲洗乜見工。
隔離部門新同事，態度串到爆，一開口：「你就係呀邊個喇下嘛，你負責D乜呀!! 」…我，好似唔係under你喎!!
至於，幣部門既新同事，佢姓乜名乜我都唔知，不過睇樣就真係好gentle，唔多似做呢行。唔知佢可以頂幾耐呢…
大老細出trip三日，心理上好過D，但佢坐左幾個星期既文件係出trip前又俾番哂我。
…
大家睇呢個blog，係唔係覺得我好有懷才不遇既感覺?? 如果係咁，你錯喇!! 我自己冇呢種感覺，亦冇想同別人o係工作上爭表現，搵好多錢，向上爬咁!! 我唔係工作狂，放落去工作既時間絕對冇想上位既同事咁多!! 所以唔升我係好正常!! 我只係想平衡D，開開心心過每一日。但原來都係好難……

小人當道

睇小小力呢個Blog，你會發現成日有好多小人出現，專篤背脊。話小小力呢樣o個樣。話小小力寫Blog出賣公司利益，話小小力超多病假，話小小力亂攪男女關係，話小小力出賣公司利益買貴貨，等等等等。今日，又到番幣集團電訊公司既廢柴經理(之前講過架喇)，佢用心良苦，寫左一編四大頁既e-mail俾我大老細，話我有心阻住佢地公司既工程進道，唔報價俾佢。請問，我有乜動機要咁做呢?? 我咁做有咩好處呢?? 要實情係，你公司叫我報價，你都要話我聽你要D乜先得架!! 呢間公司既人落到黎，你問佢係十間九不知既，咁點報價呢?? 我叫佢番去搵整D資料先報價喇!! 之後，我就被小人插喇!! 咁，點解佢要咁做呢?? 因為有D人都唔知自己下屬做D乜!! 下屬去睇左佢就當做左去覆個客okay!! 到後來終於知道原來唔係，又賴野…點算?? 就係話我有心阻住佢地公司既工程進道囉，一切都唔關佢事架!!
我在想，一個集團，咁多呢D人，真係想好都幾難。而我，點解咁多小人搵我架呢?? 我好玩D?
呢首歌，點俾條廢柴聽(sorry!!粗老左D)

轉機

近日工作上遇到既難題漸漸一一解決，身體既毛病都有好轉，媽媽既情況都轉好，股票投資都有進帳，錢銀既問題都得到緩和。好似都在轉好中。希望今年繼續好到尾喇!! 有機會既時候真係要好好把握，積穀防飢。
老細放假期間，差不多日日被大老細照肺。每次出黎，部門同事都問：「今次幾耐呀?? 飽未呀?? 」哈哈…佢地當然係輕鬆喇，每日照肺時間我一個人都佔左一半喇!!
又時唔係話咩，大老細追求完美既態度唔係唔好，但做人都要睇食飯。冇咁多資源同時間，點可以做到樣樣呢??
好似D手下既更表(roster)，要佢老人家簽名先出得。但佢樣樣野都要睇十次，於是十月既更表十月過左一半都未出，每日邊個番工邊個放假都冇人知，亂哂籠，點完美呢??
每樣事，取過平衡就最好喇!!
我就係咁諗…不過日子過過下就慣架喇!
我就係咁…景色不轉心景轉囉!!

硬食

故事係咁既…
公司維修工作，好多時都需要到一D小零件。而公司買野，一般程序，係透過中央購買去source市場上最平既產品，再由成本諮詢(cost advising) 去批准出單俾供應廠商購買。咁樣保證左要買野既職員唔會同供應廠商串通，而又保證公司可以以較平既價格入貨。
但問題係有一D零件，因為緊急而數量少，又或者經常以一個曾經使用既定價(fix rate) 去購買，咁就會由職員直接叫供應廠商先送貨，再後補番張單。
例如，你急需十隻火牛，如果經一般程序購買，可能要兩三個星期，但因為緊急，所以你叫供應廠商以舊價送十隻火牛黎救急，之後會出番單俾佢。這種運作一向冇問題。但事故發生係上個月，小小力要急需十隻火牛，於是叫供應廠商以舊價($1000)送十隻火牛黎救急，呢個價已經用左三四年，一向都冇問題。不過今次成本諮詢既同事突然話有問題，要中央購買去市場上source過。中央購買竟然去搵到$80十隻火牛，一睇就覺有問題，但貨我就用左，成本諮詢既同事唔批出單，硬要供應廠商減到$80十隻火牛。小小力都覺有問題，點解過去三四年你都批，突然間唔批?? 點解呢個一向都冇問題既程序突然間會有問題?? 成本諮詢既同事竟然話：「呢個係你既問題，關我咩事?? 」當然我都應該有辦法叫供應廠商虧損一次，以$80十隻火牛賣一次俾我。但我都未同供應廠商傾，呢位同事已經將呢件事report俾我大老細，話我買貴野… 哈哈，聽講呢個舊價係你批架喎…!!
硬食左屈先生一招，好毒呀!!
你點睇??

無聊

日子繼續無無聊聊咁過，番工番學番屋企都係咁無聊咁，點算。
昨日，病到，醫生話我係”Viral Illness” 。即係咩呢?? 唔知!! 不過醫生問我有幾多大假，叫我用哂D大假乜都唔好做休息。醫生真係理想，我既大假得番兩日，用哂黎休息有又幾大幫助呢?? 結果請左一日病假，醫生開左一個月藥俾我。
病假既一日，懶洋洋咁。上午同太太落街行下。唔知點解，乜都冇做乜都冇買但太太都好開心咁，我就覺得乜都唔做好浪費時間咁…下午食左藥，直頭大昏迷，想睇股票都支持唔住…
錢洗得好快，想問銀行借，但年利息成19%!!嘩!! 真係借唔起….唯有再想辦法!! (好左D股票頂得住!!)
番學，今年有一科”Financial Intermediation” ，全部都係essay type question!! 都唔緊要，最大問題係佢俾D paper我睇，睇左三次都唔知到講乜。到底係D英文深，定係我退步左呢?? 完全唔明，考試點寫?? 最衰既係呢科野唔drop得…哈哈!!
上堂，真係幾嚇人…九成同學唔見左!! 尤其係讀Full-time既同學，全部唔見哂!! 鬼咩，聽講year 2合格率都係得50%，如果year 1考試唔合格，仲re-sit咩，拿拿臨讀過第二樣喇!!
番工，日日都將D工作不停番手番手再番手。老細放兩個星期大假我都冇咩做過，相信老細番黎都係差唔多。仲有好大大獲留番俾佢…..哈哈!!
收到友人e-mail，佢都寫Blog喎!! 但無論係寫Xanga，寫Blog，玩MSN，玩Facebook!! 樣樣都出得咁快，你未玩熟大家已經唔玩或者玩第二樣，勸大家玩下好喇，唔好咁認真浪費咁多時間。
仲有，初初寫Xanga既時候，有個人好堅定相信「吳唱K」會成為第二個韓國天王Rain!! 已經幾年喇，Rain仲係好紅，「吳唱K」呢??
年輕人，對人對事，好容易好有信心，但有好容易放棄….點解呢??

Elements

之前D老細講到呢個新商場點好點好，又話尤其係個廁所，又香檳飲架!! 咁誇張，於是昨日同太太去睇下。咁，除左新，有日光照到個場夠光，同周圍有凳坐之外，我又睇唔到有咩咁特別。以一個工程物管人既角度我覺得有D野做得麻麻姐。廁所有香檳飲?? 我真係唔見有喎，佢地到底o係廁所飲左D咩呢!!? 廁所又因為太多人用都趕唔切清潔，格格都有….!! 100分我俾30分姐，仲比我地差喇。但我地D老細係咁架喎，人地既野係新既佢地就話好架喇!! 記得之前旺角某大型商場新開，佢地D老細去睇完又話幾好幾好，到其他人睇完話唔好，佢地又跟著話唔好!! 唉…真丟架!!

又有喜事

今日見番好耐好耐冇見既舊同事，好似肥左D喎!! 聽到佢話二月結婚，真係開心。之後佢會去英國住，可能又有排都唔見…!!不過最替佢開心既係…當我問佢去英國會做D咩既時候，佢竟然話………「唔洗做!! 」

真係開心!!

正能量

有時，太多負面既野發生，個人都會好消極，係需要一D正能量去平衡番，唔係好容易自殺或者做錯事。乜野係正能量呢?? 我都唔知點講，但係就係唔好俾D負面既野一直困繞往你。暫時放底D唔如意既事，做D容易輕鬆又冇挑戰性既野，甚至好底B既野都得，唔好迫自己走入死胡同!! 我咁喇，番工乜都做唔到…大老細乜都話唔得，整個部門都死氣沈沈，咁我就唔會繼續做公司野。休息下，行下，講下電話，食下野，睇下股票，上網打下機/搵工等等。要知道D野做唔到唔係因為你做唔到，係因為你冇辦法進入精神病人既思路，如果你跟精神病人咁做，做唔哂就夜D收工，再做唔哂就番埋星期六日同公眾假期，咁，結果唔係你會做到令精神病人滿意，而係你都變埋精神病人。善用正能量，做D簡單既野建立番自己既自信去面對每一日。

失驚無神

放假，訓醒，失驚無神腰痛，仲係痛到起唔到身，連呼吸都有困難。又一如以往，一有D怪病睇醫生一定搵唔到咩原因。相信亦一如以往，睇醫生睇到冇哂錢，病就會好番…
到底我做錯D乜呢??

專業管理人

老細開始放假之後，由我獨自面對大老細，咁就大件事。老細放假前出左既order佢全部都唔批。大老細佢認為，張order無論大小，都有一個故事。作為一個專業管理人，一定要清楚理解每一個故事既每一個細節，每一個根源，每一個字眼等。就算D野日日都做開，人人都咁做，冇人會challenge你，你都唔好做。你問番全世界第一個開始咁做既人，佢點解咁做，背後有乜原因，有冇更好既方法。冇喇!! 你都唔好做，再諗清楚係唔係人做我一定要做，我唔做我會唔會死。係會死喇!! 你都唔好做，再諗清楚你有冇方法做得好少少。冇喇!! 你可以做喇!! 但唔好忘記聽日如果要再做，你就要由頭再想一次。世界不斷在變，咁先至係專業管理人應有既態度。

舉個例，你好急要去廁所，….等等。你係唔係想行去廁所?? 用腳?? 等等!! 你有冇諗過人點解要用腳行?? 爬得唔得?? 用手行得唔得?? 你有冇研究過用腳行係一定快過爬或者用手先?? 研究清楚用腳快D?? Okay!! 但都唔好去住，你有冇諗清楚係唔係一定要去廁所先解決到問題先?? 就地解決對整個社會有冇負面衝擊呢?? 有?? 唔去唔得?? Wait…就算去，你有冇諗過就算用腳行去廁所都可以有方法行得快D優雅D呢?? 下?? 已經賴左?? 係唔係呢?? 你唔行去廁所都得喇!! 下一次要去廁所既時候一定要諗清楚喇!!

老細放假之後，我變成哲學家，思索人生既意義。