燈飾展

又係一年一度既燈飾展，睇左。感覺同呢幾年一樣，毫無新意。全部人都只係想做
大陸人生意，你話你係香港人佢地直頭歧視你。但大家又冇乜創意，一味靠平。求其擺張檯，擺幾隻普通燈泡(普通電器商店有得賣果隻)出黎就想人同佢買幾十萬隻。冇錯!! 係幾十萬隻!! 你買一萬幾千隻佢都費事理你!!唉…發達真係咁容易??仲有，果D所為高科技係咩呢?? 你見到一隻10火既燈泡，於是你問佢有冇100火，佢答你有!! 就係將十隻10火既燈泡擺埋一整!! 唉!! 到底係佢低能定當我係低能呢!!
大陸D股票升到咁問你驚唔驚?? 咩高科技咩盈利… 唉!!

真正的時代股神

時代股神，係小小力既新花名。唔知點解，唔知從幾時開始有個咁既花名。亦唔知點解，依家日日都有同事黎問下小小力今日點睇，有咩心水，咩價位放咁。真係好似電視o個D財經演員咁!! So stupid!!
至於我呢個時代股神眼中既真正時代股神應該係我老細。點解?? 因為呢幾年抽新股，我認為好好既都有叫佢大手抽，而大手中左既新股佢一隻都未放過。三個幾既中國人壽，今日已經升左十幾倍喇!!

漢奸

漢奸
其實漢奸點解呢?? 個人認為係解「為左個人利益而出賣中國同人民既人!! 」，所以，個人認為叫李柱銘做漢奸又好似唔係好適當。不過我又唔明點解佢下下都話美國要點點點對中國!! 中國做既野唔好點解要同美國講?? 唔o係中國人既社會講?? 以下係李柱銘先生以前既言論:
一九八八年四月八日 《信報》
「一九八八年三月下旬，李柱銘訪問美國時說：「如果香港繼續做一百年英國殖民地，我想很多人認為是最好的，但現在香港要回歸中國。」

一九八九年六月二十四日《經濟日報》
「李柱銘一九八九年六月在美國眾議院人權委員會聽證會上說：「英國將五百五十萬港人交還中國，就像二次大戰將五百五十萬猶太人交還納粹德國。」

一九九九五年四月二十八日 《文匯報》
「美國作為世界民主的旗手，英國作為我們的宗主國，應當站出來抵擋北京欺凌。」他自稱：「敢於當殖民主義的走狗。」

一九八九年六月二十四日《經濟日報》
「各國增加貿易制裁中國政府，貿易制裁有可能推翻恐怖政府，或者改變現行政策。」

一九九○年五月七日《信報》
「一九九○年四月至五月，李柱銘在洛杉磯的兩次香港問題研討會上煽動說：「如目前基本法得不到修改以保護港人利益，一九九七年『大限』以後，香港將會因有人由於政見不同，被投入監獄而出現『政治犯』」。」

一九九一年四月七日《成報》
「李柱銘說，中英未能就新機場達成協議總比達成壞協議為佳。至於港英政府應留多少儲備金給特區政府，中國「無權過問」，港府「即使用光儲備，也未必是壞事」。」

一九九一年四月十八日《華僑日報》《經濟日報》
「李柱銘在立法局辯論新機場問題時說，他反對中國要求預留儲備金給特區政府。李柱銘離港去倫敦時聲稱，他以政黨主席身份，「要求英國政府堅持立場，不能預留儲備給特區政府。」」

一九九六年二月十六日，一九九六年二月二十三日《壹週刊》
「一九九六年二月，李柱銘聲稱，「近期有關駐港解放軍的官方宣傳鋪天蓋地……但這些宣傳卻未能平息香港人對解放軍的憂慮」。例如「解放軍橫行無忌，掛上軍區車牌橫衝直撞」；「解放軍參與經濟活動，九七後會否將內地那套搬到香港，與民爭利」；「駐港解放軍負責人一再強調解放軍會嚴格遵守特區法律」和「實行封閉式管理」，但是，「這一系列的拍心口式保證，仍未解決香港人的疑慮」。至於駐軍體現主權問題，「從現時駐軍規模來看，這恐怕不只是象徵式駐軍，因為純粹象徵式不需要這麼多海陸空軍三者兼備」。」

一九九六年四月十八日《信報》
「李柱銘在美國華盛頓傳統基金會及克雷蒙研究所分別發表演說時表示，所謂一國兩制及港人治港已經名存實亡，而九七年之後的香港將由受高度控制的傀儡政府所控制；傀儡政府將控制香港行政、立法及司法，不但不可以保護香港人權益，反而會剝削香港人權利。他還稱香港傳媒已經開始自我審查，電視台已經不願意採訪民主黨的消息。」

一九九九年五月八日
「，美國在南斯拉夫戰事中，用導彈襲擊中國駐南斯拉夫大使館，造成了二十多人傷亡。對於中國同胞慘被殺戮，李柱銘毫不尊重自己的民族，反而站在美國的一邊，在香港特別行政區立法會的殿堂，公開用英文發言，為美國的屠殺行為辯護。」

奇人

某日，同老細巡見停車場，竟然見到有個人訓o係停車場個地下，好舒服咁講緊手提電話。佢見到我地，仲笑笑口，懶洋洋咁轉身，好似訓o係自己張床咁。老細見到嚇到呢….佢立即叫個保安去叫佢起身，個保安見到o個個人，望番我老細，感覺係想同我老細講：「大驚小怪，未見過人訓o係停車場講電話咩!? 」

醒目與戅居

昨晚開夜試消防設備，叫哂所以既技工開夜。其中一個技工「FU」昨日立即請病假。同事話佢都之前既技工「一哥」一樣。小小力就覺得唔同喇!! 呢個係醒目同戅居既分別。戅居係你做左D野以為騙到全世界，其實人人都知，只不過係唔或者未踢爆你。醒目係你做左D野出黎全世界都知，但都冇你辦法。

真係人老精，鬼老靈!!

八府巡案

話說邊關有戰事，皇上派出國家既大將精兵到邊防迎戰。但皇上又唔放心呢班大將精兵會唔會用心作戰，於是警告眾將士，叫佢地醒醒定定俾心機作戰，話皇上佢自己隨時會黎突擊檢查，睇下佢地有冇偷懶，邊個偷懶殺邊個。本來大將精兵為國上戰場作戰，邊個會偷懶呢?? 皇上以為呢一招可以刺激將士勇敢殺敵，結果大家未出戰已經士氣受損。大家覺得既然皇上唔信任佢地，咁就唔好派佢地上陣喇!! 國家又唔係冇人!? 皇上乾趣派自己信任既人上陣好喇!! 結果將士們帶著底落既心情上路。
更甚既係，到邊關突擊檢查，皇上又驚危險又怕路遠。想想下都係唔去，但又唔係好放心。於是派出最信任既手下 -大宦官銀公公做八府巡案，代皇上突擊檢查呢班將士。當呢位八府巡案到達邊關，佢只係o係府中休息，半步未離開個，更加未睇過呢場戰事一眼。
戰事完畢，皇上認為八府巡案監視將士功勞最大，高度贊賞!! 一眾將士即被批評未做到完美。下一次要做得更好，如果唔係? 殺無赦
故事既皇上似唔似亡國既昏君??

呢個時代真係…..

香港人

睇報紙有三則新聞，都係有關香港人既調查。
其一係調查發現香港既青少年普片自尊感偏底。大至即係對困難時退縮逃避，不敢接受挑戰，冇主見、被動，行為懶散同覺得被人厭棄。調查話主要原因係香港既教育制度太著重學術成績而缺少左個人品格既培養。小小力覺得一半一半喇。小小力既年代教育制度都係咁，成績表就代表左一切喇。問題係現今既家長(即小小力呢一代) 對佢地既子女過份寵愛，令小朋友唔習慣負擔責任，當佢地長大進入社會，就算係成績好，都負擔唔到咁大壓力，面對困難唔識解決，最後選擇自殺去逃避。香港既未來就係靠佢地，你驚唔驚??
其二係調查發現越黎越多三十幾歲既單身人士選擇唔結婚，亦唔自立，繼續留o係屋企食父母住父母既。如果留o係屋企係為左照顧父母咁當然係好事。但大部份只係因為自己養唔起自己而依靠父母。經濟環境改善，但大部份人既生活質素反而下降。香港，還有未來嗎??
其三係調查發現經濟環境改善，但大部份香港人既工作時間越黎越長，由幾年前時間分配係60%工作40%私人到依家83%工作17%私人。咁長既工作時間唔單只影響左健康，仲產生左好多家庭同社會問題。香港人既開心指數越黎越底，很多人都想離開…你又會點呢??
如果你冇以上既問題，真係恭喜哂!!

狼來了

原著:
牧童彼得每天都在山坡上放羊。這一天，他跟平常一樣，懶洋洋地躺在草地上，看看羊兒吃草。他想﹕天天都在看羊，真悶啊！、突然，他想出一個好玩的遊戲來。「狼來了！狼來了！」彼得放聲大叫。山下的村民聽到叫聲，連忙拿着鋤頭跑上山，要把狼趕走。村民氣呼呼地跑到山坡，只見羊羣安靜地在吃草，彼得在旁笑彎了腰。哪裡有狼的踨影？村民知道被彼得戲弄，都生氣地下山了。這天，彼得又在山坡上放羊。這一回，真的來了一隻狼。彼得嚇得大叫﹕「狼來了！狼來了！」可是村民以為彼得又在說謊，不再理會他。結果，羊兒被狼羣吃光，彼得傷心地回家去了。
現實:
股市大跌，第二日又急升，如是者呢兩個月已經試左好多次。到星期一，股市再大跌，但並冇引起恐懼，大家都已經適應。電視訪訪股民，佢地異口同聲話唔洗驚，聽日實大升番，果然第二日升番哂。故事既結果唔知會係點呢??

DOWN

B仔冇事之後，太太決定要番貴州還神。錢都唔係問題，但咁長途對一個大肚婆真係唔係咁安全。我當然唔准，但我太太就係咁，做野唔諗後果，諗到就去做，邊個講都唔聽!! 講開又講，佢性格都好似我媽媽…!!!
太太如果番左貴州，我就要成個星期對住個女….唉!! 頭痛!! 我對住佢真係冇哂辦法，講又唔得，鬧又唔得。有種被虐待既感覺。
連媽媽咁小見到佢都發火，話屋企最細係佢，但最多要求係佢，最冇責任係佢，最大脾氣又係佢。連媽媽有病又脾氣大既人都冇佢發咁多脾氣…唉!!
越黎越down!!

持家之道

唔係我想教大家，係我想向大家請教。點樣可以用兩萬蚊一個月去run一個三口子既家庭。唔係講笑，我除左交6500租金之外，每個月既洗費都超過兩萬蚊!! 洗成三萬蚊一個月，太太仲話佢唔夠錢洗!! 如果唔係D股票頂住，結婚到依家已經洗哂我所有既儲蓄喇!! 股票方面我繼續開源，但點樣可以節流呢??

邪神回歸

老細今日放假後第一日番工，公司有燒馬達事件，燒電線事件同爆水喉事件o係同一日發生。公司又有地方水浸，又有地方冇冷氣，又有地方冇燈，又有廚房冇抽氣。仲有六個同事冇番工兼股市大跌。
對唔對題呀??

真的老了

星期日既夜晚，太太同女女都番左筲箕灣，自己留底o係東涌陪媽媽。連媽媽都訓左覺，靜靜地一個人既時候越黎越少！！開著電腦，但又唔 知為乜！！以前開著電腦總有一兩個朋友online吹下水，依家，就算 有人，都唔會應你！唔通結左婚既人唔可以再同單身既聯繫？但最奇既 係結左婚既都唔會應你，唔通連個天都唔鐘意我？
打開本書，睇幾次都唔明！！學如逆水行舟，不進則退！！睇番Ｆ７既 Econ. 竟然都唔明！！退得好快呀！！
唔知大家覺唔覺自己真係老左喇！！
好得人驚！

好消息 ﹣ＩＩ

終於都有Ｄ好消息！收到醫院既信，呀Ｂ既染色體正常，係男仔！
放心哂，太太話終於訓得著！！

破三萬

昨晚之後，已經肯定今日恆指會破三萬。o係公司開定機準備定沽貨離場，就o係呢個時候，I.T部門話黎整機。Oh…唔係嘛，部機講左三個月都唔整，就係今日先黎整?? 真係呢….。當佢地整完機既時候，先機已失，個市仲倒跌…唔通…連個天都唔鐘意我??

今日，冇乜mood，同事有清假中，office都好靜，希望平平安安咁過一日。

真相大面

終於知道點解某同事突然之間會離職。唉!! 其實好小事姐，有冇必要咁做呢!? 做大既又有D咩事都只為求自保唔理D細既….咁以後仲邊又人聽你講呢??
同事串我話大老細聽日番，問小小力會唔會又被鬧!! …哈哈!! 會唔會?? 鬧就鬧硬喇，睇下開邊樣姐!!

叫second interview個位人兄，最後都拒絕左再黎喇!! 鬼咩，出手咁底!! 人事部仲叫我下再唔好喇，半年先得一個人黎interview，好難得架咁話!! …諗!!吹脹!!

有人話老板都唔係好buy大老細o個套，佢都好難留得耐咁話!! ….呢D野當故仔聽左就算喇。可能佢未起身我都消失左喇!! 因為佢話過佢只會留有用既人，而我相信o係大老細眼中，呢個世界除左佢之外，所有人都係廢物。 所以我應該好快消失!!

十月氤氳

近年既十月都係咁，煙雲瀰漫，除左睇唔清前路，仲有一種使人窒息既感覺。秋天越黎越難受。或者係咁，大家都唔再喜歡秋天，佢亦漸漸消失。
十月，又到寫appraisal既時間，俾我寫appraisal既時間亦漸漸消失，由以前有一個星期到依家得番一個上晝。一個上晝點八份appraisal，唯有抄囉!! 不過分別都不大…
唔知幾時輪到我o係氤氳中消失呢…
有新人黎見工，睇左份resume，我就唔多想接見，因為經驗差太遠，但人事部話點都見一見喇，好難得有人黎見工!! Okay…!!見完，俾未見之前感覺仲差。十下十下，我問佢結左婚未，佢答我佢家姐結左婚….真係差D笑出黎。將份resume俾另外一個要請人既同事，佢竟然話okay，都係人一個，乜都要，再唔要請到出年都請唔到!! 再call呢位人兄second interview，佢都話暫時唔得閒咁話。請人真係咁難?? 既然咁難，點解公司都唔願意留人??

桃花依舊笑春風

好多舊人走左，又好多唔識死既人黎左。公司整體人數冇乜點變，但真係桃花依舊，人面全非。
到底你有十個人，我有十個人，人數一樣，係唔係代表你同我既生產力係一樣呢。每個人既能力都唔同，做出黎既野都有唔同!! 技術/難度越高，誤差就越大。就算呢十個人係一樣，你點指揮同我點指揮都可以有好大出入。如果唔係仲洗乜見工。
隔離部門新同事，態度串到爆，一開口：「你就係呀邊個喇下嘛，你負責D乜呀!! 」…我，好似唔係under你喎!!
至於，幣部門既新同事，佢姓乜名乜我都唔知，不過睇樣就真係好gentle，唔多似做呢行。唔知佢可以頂幾耐呢…
大老細出trip三日，心理上好過D，但佢坐左幾個星期既文件係出trip前又俾番哂我。
…
大家睇呢個blog，係唔係覺得我好有懷才不遇既感覺?? 如果係咁，你錯喇!! 我自己冇呢種感覺，亦冇想同別人o係工作上爭表現，搵好多錢，向上爬咁!! 我唔係工作狂，放落去工作既時間絕對冇想上位既同事咁多!! 所以唔升我係好正常!! 我只係想平衡D，開開心心過每一日。但原來都係好難……

小人當道

睇小小力呢個Blog，你會發現成日有好多小人出現，專篤背脊。話小小力呢樣o個樣。話小小力寫Blog出賣公司利益，話小小力超多病假，話小小力亂攪男女關係，話小小力出賣公司利益買貴貨，等等等等。今日，又到番幣集團電訊公司既廢柴經理(之前講過架喇)，佢用心良苦，寫左一編四大頁既e-mail俾我大老細，話我有心阻住佢地公司既工程進道，唔報價俾佢。請問，我有乜動機要咁做呢?? 我咁做有咩好處呢?? 要實情係，你公司叫我報價，你都要話我聽你要D乜先得架!! 呢間公司既人落到黎，你問佢係十間九不知既，咁點報價呢?? 我叫佢番去搵整D資料先報價喇!! 之後，我就被小人插喇!! 咁，點解佢要咁做呢?? 因為有D人都唔知自己下屬做D乜!! 下屬去睇左佢就當做左去覆個客okay!! 到後來終於知道原來唔係，又賴野…點算?? 就係話我有心阻住佢地公司既工程進道囉，一切都唔關佢事架!!
我在想，一個集團，咁多呢D人，真係想好都幾難。而我，點解咁多小人搵我架呢?? 我好玩D?
呢首歌，點俾條廢柴聽(sorry!!粗老左D)

轉機

近日工作上遇到既難題漸漸一一解決，身體既毛病都有好轉，媽媽既情況都轉好，股票投資都有進帳，錢銀既問題都得到緩和。好似都在轉好中。希望今年繼續好到尾喇!! 有機會既時候真係要好好把握，積穀防飢。
老細放假期間，差不多日日被大老細照肺。每次出黎，部門同事都問：「今次幾耐呀?? 飽未呀?? 」哈哈…佢地當然係輕鬆喇，每日照肺時間我一個人都佔左一半喇!!
又時唔係話咩，大老細追求完美既態度唔係唔好，但做人都要睇食飯。冇咁多資源同時間，點可以做到樣樣呢??
好似D手下既更表(roster)，要佢老人家簽名先出得。但佢樣樣野都要睇十次，於是十月既更表十月過左一半都未出，每日邊個番工邊個放假都冇人知，亂哂籠，點完美呢??
每樣事，取過平衡就最好喇!!
我就係咁諗…不過日子過過下就慣架喇!
我就係咁…景色不轉心景轉囉!!

硬食

故事係咁既…
公司維修工作，好多時都需要到一D小零件。而公司買野，一般程序，係透過中央購買去source市場上最平既產品，再由成本諮詢(cost advising) 去批准出單俾供應廠商購買。咁樣保證左要買野既職員唔會同供應廠商串通，而又保證公司可以以較平既價格入貨。
但問題係有一D零件，因為緊急而數量少，又或者經常以一個曾經使用既定價(fix rate) 去購買，咁就會由職員直接叫供應廠商先送貨，再後補番張單。
例如，你急需十隻火牛，如果經一般程序購買，可能要兩三個星期，但因為緊急，所以你叫供應廠商以舊價送十隻火牛黎救急，之後會出番單俾佢。這種運作一向冇問題。但事故發生係上個月，小小力要急需十隻火牛，於是叫供應廠商以舊價($1000)送十隻火牛黎救急，呢個價已經用左三四年，一向都冇問題。不過今次成本諮詢既同事突然話有問題，要中央購買去市場上source過。中央購買竟然去搵到$80十隻火牛，一睇就覺有問題，但貨我就用左，成本諮詢既同事唔批出單，硬要供應廠商減到$80十隻火牛。小小力都覺有問題，點解過去三四年你都批，突然間唔批?? 點解呢個一向都冇問題既程序突然間會有問題?? 成本諮詢既同事竟然話：「呢個係你既問題，關我咩事?? 」當然我都應該有辦法叫供應廠商虧損一次，以$80十隻火牛賣一次俾我。但我都未同供應廠商傾，呢位同事已經將呢件事report俾我大老細，話我買貴野… 哈哈，聽講呢個舊價係你批架喎…!!
硬食左屈先生一招，好毒呀!!
你點睇??

無聊

日子繼續無無聊聊咁過，番工番學番屋企都係咁無聊咁，點算。
昨日，病到，醫生話我係”Viral Illness” 。即係咩呢?? 唔知!! 不過醫生問我有幾多大假，叫我用哂D大假乜都唔好做休息。醫生真係理想，我既大假得番兩日，用哂黎休息有又幾大幫助呢?? 結果請左一日病假，醫生開左一個月藥俾我。
病假既一日，懶洋洋咁。上午同太太落街行下。唔知點解，乜都冇做乜都冇買但太太都好開心咁，我就覺得乜都唔做好浪費時間咁…下午食左藥，直頭大昏迷，想睇股票都支持唔住…
錢洗得好快，想問銀行借，但年利息成19%!!嘩!! 真係借唔起….唯有再想辦法!! (好左D股票頂得住!!)
番學，今年有一科”Financial Intermediation” ，全部都係essay type question!! 都唔緊要，最大問題係佢俾D paper我睇，睇左三次都唔知到講乜。到底係D英文深，定係我退步左呢?? 完全唔明，考試點寫?? 最衰既係呢科野唔drop得…哈哈!!
上堂，真係幾嚇人…九成同學唔見左!! 尤其係讀Full-time既同學，全部唔見哂!! 鬼咩，聽講year 2合格率都係得50%，如果year 1考試唔合格，仲re-sit咩，拿拿臨讀過第二樣喇!!
番工，日日都將D工作不停番手番手再番手。老細放兩個星期大假我都冇咩做過，相信老細番黎都係差唔多。仲有好大大獲留番俾佢…..哈哈!!
收到友人e-mail，佢都寫Blog喎!! 但無論係寫Xanga，寫Blog，玩MSN，玩Facebook!! 樣樣都出得咁快，你未玩熟大家已經唔玩或者玩第二樣，勸大家玩下好喇，唔好咁認真浪費咁多時間。
仲有，初初寫Xanga既時候，有個人好堅定相信「吳唱K」會成為第二個韓國天王Rain!! 已經幾年喇，Rain仲係好紅，「吳唱K」呢??
年輕人，對人對事，好容易好有信心，但有好容易放棄….點解呢??

Elements

之前D老細講到呢個新商場點好點好，又話尤其係個廁所，又香檳飲架!! 咁誇張，於是昨日同太太去睇下。咁，除左新，有日光照到個場夠光，同周圍有凳坐之外，我又睇唔到有咩咁特別。以一個工程物管人既角度我覺得有D野做得麻麻姐。廁所有香檳飲?? 我真係唔見有喎，佢地到底o係廁所飲左D咩呢!!? 廁所又因為太多人用都趕唔切清潔，格格都有….!! 100分我俾30分姐，仲比我地差喇。但我地D老細係咁架喎，人地既野係新既佢地就話好架喇!! 記得之前旺角某大型商場新開，佢地D老細去睇完又話幾好幾好，到其他人睇完話唔好，佢地又跟著話唔好!! 唉…真丟架!!

又有喜事

今日見番好耐好耐冇見既舊同事，好似肥左D喎!! 聽到佢話二月結婚，真係開心。之後佢會去英國住，可能又有排都唔見…!!不過最替佢開心既係…當我問佢去英國會做D咩既時候，佢竟然話………「唔洗做!! 」

真係開心!!

正能量

有時，太多負面既野發生，個人都會好消極，係需要一D正能量去平衡番，唔係好容易自殺或者做錯事。乜野係正能量呢?? 我都唔知點講，但係就係唔好俾D負面既野一直困繞往你。暫時放底D唔如意既事，做D容易輕鬆又冇挑戰性既野，甚至好底B既野都得，唔好迫自己走入死胡同!! 我咁喇，番工乜都做唔到…大老細乜都話唔得，整個部門都死氣沈沈，咁我就唔會繼續做公司野。休息下，行下，講下電話，食下野，睇下股票，上網打下機/搵工等等。要知道D野做唔到唔係因為你做唔到，係因為你冇辦法進入精神病人既思路，如果你跟精神病人咁做，做唔哂就夜D收工，再做唔哂就番埋星期六日同公眾假期，咁，結果唔係你會做到令精神病人滿意，而係你都變埋精神病人。善用正能量，做D簡單既野建立番自己既自信去面對每一日。

失驚無神

放假，訓醒，失驚無神腰痛，仲係痛到起唔到身，連呼吸都有困難。又一如以往，一有D怪病睇醫生一定搵唔到咩原因。相信亦一如以往，睇醫生睇到冇哂錢，病就會好番…
到底我做錯D乜呢??

專業管理人

老細開始放假之後，由我獨自面對大老細，咁就大件事。老細放假前出左既order佢全部都唔批。大老細佢認為，張order無論大小，都有一個故事。作為一個專業管理人，一定要清楚理解每一個故事既每一個細節，每一個根源，每一個字眼等。就算D野日日都做開，人人都咁做，冇人會challenge你，你都唔好做。你問番全世界第一個開始咁做既人，佢點解咁做，背後有乜原因，有冇更好既方法。冇喇!! 你都唔好做，再諗清楚係唔係人做我一定要做，我唔做我會唔會死。係會死喇!! 你都唔好做，再諗清楚你有冇方法做得好少少。冇喇!! 你可以做喇!! 但唔好忘記聽日如果要再做，你就要由頭再想一次。世界不斷在變，咁先至係專業管理人應有既態度。

舉個例，你好急要去廁所，….等等。你係唔係想行去廁所?? 用腳?? 等等!! 你有冇諗過人點解要用腳行?? 爬得唔得?? 用手行得唔得?? 你有冇研究過用腳行係一定快過爬或者用手先?? 研究清楚用腳快D?? Okay!! 但都唔好去住，你有冇諗清楚係唔係一定要去廁所先解決到問題先?? 就地解決對整個社會有冇負面衝擊呢?? 有?? 唔去唔得?? Wait…就算去，你有冇諗過就算用腳行去廁所都可以有方法行得快D優雅D呢?? 下?? 已經賴左?? 係唔係呢?? 你唔行去廁所都得喇!! 下一次要去廁所既時候一定要諗清楚喇!!

老細放假之後，我變成哲學家，思索人生既意義。

氣餒

自從某手下話被調「上山」之後，工作態度完全變哂，冇哂心機咁。我冇乜幫到佢，因為我都唔好得佢幾多。大老細好似唔多介意全部門既同事走。咁，唔滿意既走囉!!

其他同事同我講，你老細真係大整蠱，最多野做既時候放大假。我又冇乜所為，老細都幫唔到D咩，不如放下假喇，大家都要休息下。

中秋，同家人本來可以開開心心咁過節，但因為細佬又偷野，今次到偷我太太隻錶。唉…照例講大話照例唔認，照例走出去住。仲大大聲話自己有權洗自己既錢!! 咁，我地借俾佢還債既錢呢?? o個幾十萬幾時還?? 佢又係理直氣壯咁話，有錢剩先還?? 乜欠人錢係自己玩哂享樂哂先還錢俾人架咩?? 邊度有得借我都想借!! 爸爸既錯愛為社會做左一件垃圾/敗類。又一次，故息只會養奸。我受既壓力就最大，爸爸不斷迫我，要我用一個故息既方法去改變佢！！有可能咩？？

太太驗身仲未有結果，擔心。但醫生話初步睇大至正常，係男仔！！

除左希望唔好既日子快D過，我仲可以做D乜？？可唔可以教下我?

朋友們好似都好忙，留個言支持下都冇，係樓下見過面都冇時間!!
真的嗎??

有點depressed，有點氣餒!!

秋

又一個星期，好快又已經到秋天。加上打風，天氣轉涼，好多人都病左。媽媽既情況更加差，令我更加擔心。可以做既到做哂，唯有盡量令佢開心D!!

用facebook之後見番好多朋友(既相)，雖然仍舊冇聯絡同見面，但起碼都知佢地仍然健在。唔知下次見面會係咩時間，咩環境呢??

某同事同我傾左一個上晝，走既人會再加一個!! 又某同事問我見住咁多人走有咩感覺，…有咩感覺?? 此處不留人，自有留人處!! 囉!!

大學終於收左我，又可以讀下書，但唔知點解突然間冇哂heart….

最近感覺個人冇乜活力，懶洋洋咁…

以前秋天都會去旅行放鬆下，但媽媽病之後都冇去旅行….會唔會因為battery冇re-charge所以特別快用哂呢??

下一代

其實養個小朋友，供書教學真係唔少錢。女女番學，差不多日日有通知要簽，而又差不多每三張就有一張要交錢，都仲未計佢補習用既錢。一個小朋友讀書用既竟然仲多個我夜晚讀大學，咩九年免費教育，有鬼用咩!!
好似我同事得大約一萬蚊人工，但個女讀書(幼稚園)已經用左三千(學費加雜費)。當政府俾一萬蚊學券過佢，平均每個津貼一千，學校即刻加學費五百，有鬼用咩!!
以前，父母窮，政府俾機會佢地既小朋友接受同樣既教育機會，等佢地既下一代有機會改善生活。依家，連呢個機會都冇埋。

憶教授

收到友人e-mail，Prof. Chwang咁後生就去左賣鹹鴨蛋。希望佢得到安息。記得大學跟佢上堂既日子，可以用發緊夢黎形容。唔係佢教得唔好，只係自己冇好好珍惜學習既機會。一生人有幾多次機會可以遇到一個咁有料又肯教你既人?? 有D野你唔好好把握，錯過左就冇喇!!

再黎

又一個同事辭職，其實都係意料中事。而且相信過左新年有兩個!!
中午同判頭食飯，大家既話題唔再係今年係有冇人工加，有冇Bonus，中秋去邊…而係依家走可以有幾多錢退休金。唉…..(個個都唉!!)
話時話，原來佢地個個都有成四五十萬退休金走…我呢?? MPF喎!!! 唉，我死左都未有呀..!!

生日禮物

太太既唐氏綜合症驗血結果屬陽性，即BB有機會係…….
這就是我的生日禮物??
我到底做錯了什麼??
放過BB喇，好嗎?

計時炸彈

計時炸彈又爆炸，唉…..真係唔知講咩好喇!! 機會我已經俾過四次佢!! 到依家佢都死性不改…………..
好擔心雙親，好down!

親力親為

等待既時間過得特別長，到底學校收唔收我，今年有冇書讀，到依家都未知。所以計劃有暫停。都唔明做admin. 既姐姐點做野，有冇位收我洗唔洗睇三個星期呢?? 收唔收或者waiting都有個知字呀，e-mail又唔覆，電話又唔聽，算點??

又一個星期冇見媽媽，冇見媽媽既日子每晚打番屋企，細佬同爸爸都都媽媽冇事。但番屋企見到媽媽，原來情況好嚴重，媽媽瘦左好多，媽媽都嘔，食唔到又訓唔到，仲成身損傷。媽媽話佢兩個都冇乜理佢，一個跑馬，一個打機，媽媽死左佢地都未知。唉….唔明!! 我番屋企兩日，媽媽又食到，又訓到，又冇再嘔。舅父黎睇到都覺得媽媽好精神。睇黎都係要多D番屋企陪媽媽。

每樣事都係親力親為好D!!

好快，太太已經有左BB三個幾月，期間重左十八磅，係唔係重左D呢??

In-tray

我發覺老細當我個In-tray係垃圾筒。In-tray滿哂D過哂期，冇用，唔係俾我既文件，冇用既樣本，有時連廢紙都有。唉!! 以前個大老細好鐘意話我個In-tray咁滿即係我做唔哂D野但竟然放工。諗諗下不如每日放工將In-trayD野放哂落垃圾筒，咁又衛生，又顯示我做到野，日日清In-tray，勁!!

Facebook

睇報紙，作者話用咩Facebook黎搵人。到底咩係Facebook?? 有乜用?? 唔知!!
番到公司，收到友人e-mail叫我參加Facebook,… 咁，就加入左!! 但…到底咩係Facebook呢?? 有咩用呢?? 我都send左invitation俾你地，收唔收到呢??

四種不可信的人

早已經講過個地產經紀信唔過。佢騙我太太話個業主已經賣左我同太太住開筲箕灣既單位，仲迫我太太簽左份提早退租書，叫我地十一月尾搬走，我當時同佢講我唔簽，我都未走佢點可以賣，我唔簽你可以點?? 佢大我話唔簽就要早一個月，Oh! 邊有咁既道理，我話我搵律師同佢講，我點都唔簽。但太太就幫個地產經紀口，話簽左呢兩個月唔洗交租，Oh，No!! 唔係唔洗交租，係佢唔俾番兩個月按金我黎當租，D錢本來就係我既，講到好係佢送俾我咁。太太又話個地產經紀好好人，成日話請佢飲茶，又識左咁多年，叫我唔好咁。唉!! 我就由得太太簽，搬就搬喇!!
但昨日業主打電話俾我地，話想上黎睇樓，我就問佢樓都賣左仲有乜好睇，先至知層樓原來都未賣，165萬根本上冇人買，低過業主又唔想賣。業主亦冇簽過咩退租書叫我地十一月尾搬走。業主帶佢家姐上黎睇，想賣俾佢，但都唔係急，佢可以等我太太生埋都得，仲唔加我地租咁話。
咁，你話點解個地產經紀咁急要我地走?? 我諗，如果我地走左，個業主冇租收，咁唯有減價快D賣，個地產經紀就可以做成單生意喇!!
呢個世界，對我黎講有四種人信唔過，地產經紀，保險經紀，股票經紀同埋……業主!!

人間蒸發

如果好似某同事咁，離開左公司都冇乜人知，咁都幾好!! 至少連散水餅都慳番!!( 三九唔識七都要請佢食餅都唔知為乜!!) 筆老太建議小小力走既時候只係留言o係Blog!! Well，咁都幾有型喎，不過我唔相信自己可以靜靜咁人間蒸發!!
又另外一個即將離開既某女同事，睇佢個樣真係好鬼free，得閒又遲下到，得閒又射下波，等去旅行等番新工既心情，真係超正。同佢一整食野傾下，佢都希望我快D走!! 可惜大家個field好唔同，我真係冇佢走得咁易。Anyway，如果真係走，或者我都唔會再做工程喇，希望呢位同事幫到我喇!!

放榜

等左咁耐終於放榜:
Economics 57
Banking & finance 68
Accounting 58
Statistics 72
Mathematics 78
o係34分及格 ，７０分可以有First Hon.既情況下，總算對自己有個交代！！不過走去報second year既時候，竟然截左止要waiting，Shit!!

留戀

鼻膜發炎，已經有一個星期，成個星期都失去嗅覺，呼吸困難，疲倦，一日訓十個鐘頭都仲係咁。難頂!! 女女原來都有鼻敏感，成日流鼻水，差不多隔日就流鼻血。其實依家香港真係十個有八個有鼻敏感。記得細個邊有咁多人有呢D病。世界不斷左變，經濟改善但環境轉差，未來香港可能只係可以工作但唔可以住。有冇想過退休既生活係點?? 會唔會o係香港住?? 我就唔會喇!! 雖然o係香港出世，但我對香港真係冇乜留戀….

睇波

自從有線冇得播英超，星期六又冇意甲睇，家下多數都係睇德國波。德國波，如果冇拜仁睇，真係悶到暈。好想好想睇下波呀。搬屋後真係要裝番NOW先得!!!
今年四大聯賽冠軍預測：德國係拜仁，英國係利物浦，意大利係AC，西班牙係皇馬。你點睇??

住家男人

最近既生活好住家男人咁，每日放工番屋企，食飯，睇電視，做下家務，咁又一日。感覺好懶，越黎越唔想做野，hea得就hea，好似係我冇辦法令個女變勤力D，反而係屋企既氣氛令我變得越黎越懶。又未有書讀，點算??
同個女買左新電腦，用Window Vista，已經冇接觸D高科技好耐，係唔係好好用架呢??
突然間有好想見下D朋友。

又到九月

又到九月，每年九月十月都覺得好煩。因為要做Budget同appraisal。煩既係兩樣野都唔知點做。做Budget，唔係叫你預算下出年洗幾多錢，而係叫你諗下出年有乜好做。唉!! 出年有乜好做?? 出年最好乜都唔好做，後年，大後年都係。又唔肯洗錢，做乜呢做，做完份Budget跟手可以放埋降垃圾箱。
做appraisal，唉!! 年年呢個時候老細都放假，得番我面對大老細。以前仲好D，依家，appraisal既命運同份budget一樣，做完跟手可以放埋降垃圾箱，俾邊個幾多分點寫法大老細都想好哂，你寫乜都改變唔到事實。最衰既係我係要寫埋手下既appraisal，今年仲成七個手下…!!唉!!
另外，睇番De-mail，原來大家成日講既「開會」叫meeting，但大老細既「開會」係叫briefing，唔怪得之有佢講冇人講喇!!

洗剪吹

各位，係你地心目中，「洗剪吹」到底要幾多錢呢?? o係東涌要$80!! o係灣仔要$70，星期六，o係筲箕灣洗剪吹只係要$38!! 點會差咁遠，$38又點有錢賺呢?? 東涌既租貴唔貴到一倍呢?? 點解東涌租樓又平過筲箕灣咁多呢??

這個星期天

筲箕灣既單位終於被賣出，最遲十一月要搬走，但我都仲未搵到樓。
獨自回家探媽媽，家中既太太就被蜜蜂咬要去醫院!! 返屋企廁所門又被反鎖，要我由東涌趕返筲箕灣去開鎖。開左鎖，到養左幾年既倉鼠突然死左!!!!
真係黑色星期天!!
仲要煩好多好多搬屋既野，都幾頭痛!!

兩極

只係一個咁細小既城市，有人日日講賺幾多幾多，要買乜買乜。有人就因為解決兩餐都有問題，要走扮打劫博拉，等坐監有飯食。社會越黎越趨向兩極化，雖然香港表面上好似比以前富有，但可能只係20%既人受惠，80%既人反而比以前更差。日日都見報紙有講窮人既苦況，但政府在大力發展經濟既同時，好似完全忘記左社會上仲有好多人需要幫助。我地當花費在奢侈品/吃喝玩樂既同時，又有冇想過呢D錢或者可以令貧窮既人有飯食有地方住有書讀有病可以睇醫生呢??

別急

今日入貨有排驚,
明天再跌面青青,
不如得閒飲杯茶,
睇定先買你至精。

開火

昨日，大老細無啦啦又叫開會。會中佢本來想講(係講唔係討論，因為佢開會從來有佢講冇人講) 有同事離開後既人事從新安排。但主菜冇講，唔知點解講講下講左話我地既Document有錯字，佢話要罰錢咁話。扮民主咁問下我地。嘩!! 寫錯字打錯字邊個冇，下下要罰錢o米帶埋錢黎打工。佢問我身邊既體育健將，體育健將冷笑一下話冇意見。問女同事，女同事好苦咁話贊成。到問黃同事，黃同事正式開火，黃同事話反對，佢話勞工法例冇話可以罰錢，打錯字又幾大問題?? 不過你喜歡話點就點架啦!! 之後，女同事，體育健將同王同事都轉向支持黃同事，火藥味轉濃。有一件事好清楚，就係黃同事以後既日子都難過。事件最後都冇結論。大老細俾人call去開第二個會。大老細離開時黑口黑口，黃同事話打定信辭職。
咁，成個會我都冇出過聲。因為大老細冇問我，如果佢問我，我會同體育健將一樣冇意見。因為你既任何意見都應該係冇用…不如等佢實行打錯字罰錢啦!! 咁咩問題都解決哂啦!!

錢可以解決問題

最近，就連只係賭下波賭下馬既朋友「神秘人」都開始買股票，佢話佢買股票既策略係底買高賣，賺一成多就走人。呢D類似既說話都聽唔少，但我相信一個人贏緊錢既時候你講乜佢都聽唔入耳。作為一個認識左三十年既朋友，唯有日日恐嚇下佢喇!!

被迫遷事件，地產代理日日都安排人上黎睇樓，都幾煩。但我都幾有信心我住到出年走佢都賣唔出。三十年既舊樓，景觀又差，方向又差，環境又差，保養又差，咁既市道叫價165萬，個個睇樓既睇幾分鐘都走人。我就唔覺得有幾多人有興趣喇!!

睇下，錢可以解決好多問題。

幫手教女已經一段時間，但發覺佢半點進步都冇，無論學術同人格行為都冇。學習上，就算個人o係度，個心都唔知去左邊…可能仲係想緊點樣可以做明星。行為依然係咁依賴，沖涼去廁所訓覺都要人服侍，完全冇辦法。半夜三點幾叫醒你陪佢訓覺，佢就訓到十一二點，我就七點幾起身，我依家仲貓熊過未結婚既時候，你話係BB就冇得講喇，十一歲喇。人地九歲讀大學，我個女十一歲差D仲要人陪去廁所，點解差咁遠?? 如果佢係我親生，我已經打到佢飛起。因為唔係佢做唔到，而係唔想做，成舊社會垃圾咁!!

媽媽同太太都話我陪佢地唔夠，但其實除左番工我都只係番屋企，乜節目都冇，但都仲係話唔夠，我問佢地我可以點，但又冇答案。咁，即係點!!?

睇下，錢唔可以解決既問題仲多。

心急人，上

打麻雀既時候，冇乜必要就唔好上牌喇!! 「心急人，上」，一上就露左底，一上就冇得守。心急，就累事喇!!

昨日，評估初步股票市場調整完成入左市，咁，就出事喇!! 唔知係我黑定我判斷差，一入市，人民銀行就無啦啦宣佈加息，次次我入市都有事發生，仲係好突然o個隻，令到我買貴左好多!

心急，真係累事架!!

另一方面，太太話佢朋友係一個完全唔識股票既師奶，但佢買股票就日日有錢賺。好似上星期大跌市o個日，佢就o係大跌千三點o個一刻以最低價$25.5買入中國人壽(係呢下次大跌市既最低位，只係出現左數分鐘) ，而且o係呢個星期反彈以最高位$33.1賣出(大反彈既最高位亦只係出現左數分鐘)，唔只賺，仲賺到盡(30%)。加埋買認股證，大跌既時候佢買跌，大升既時候佢又識買升，唔洗一個星期已經賺一倍!! 佢老公俾幾萬蚊佢，兩個月已經變成幾十萬，依家已經唔洗做。仲話遲D教我太太買股票咁話!! 唔太太問我點解人買股票我買股票，我咁差，賺得咁少!! 哈哈….媽媽聽到太太咁講叫太太唔好俾咁大壓力我!! 太太又話我唔底得佢朋友咁話!!

哈哈!! Well,… 坦白講，我冇乜底得唔底得，反而我覺得呢個師奶既故事似老千局多D(類似果D補藥黨咁)!! 股票市場賺錢，賺好多大有人左!! 但下下賺到盡，佢唔只係股神，簡直係神。我當佢賺少D，一個星期賺15%，咁一年都賺二千幾倍，仲洗做?? 太太話我唔底得，又唔緊要既，我俾幾萬蚊佢跟佢朋友買，如果佢朋友既事係真，一年後我已經有一億，唔好話我唔洗做，連我個仔我個孫都唔洗做，佢養我全家三代喎，我認錯有幾難喎!! Right??

酷愛

咁樣愛好似冇乜意思喎!!

賈詡的智慧

三國時代，賈詡 (音「許」)作為張繡的軍師，於宛城以敗軍追擊大敗曹操。三國志原文如下：『太祖比征之，一朝引軍退，繡自追之。詡謂繡曰：「不可追也，追必敗。」繡不從，進兵交戰，大敗而還。詡謂繡曰：「促更追之，更戰必勝。」繡謝曰：「不用公言，以至于此。今已敗，奈何復追？」詡曰：「兵勢有變，亟往必利。」繡信之，遂收散卒赴追，大戰，果以勝還。問詡曰：「繡以精兵追退軍，而公曰必敗；退以 敗卒擊勝兵，而公曰必克？悉如公言，何其反而皆驗也？」詡曰：「此易知耳。 將軍雖善用兵，非曹公敵也。軍雖新退，曹公必自斷后；追兵雖精，將既不敵， 彼士亦銳，故知必敗。曹公攻將軍無失策，力未盡而退，必國內有故；已破將軍，必輕軍速進，縱留諸將斷后，諸將雖勇，亦非將軍敵，故雖用敗兵而戰必勝 也。」繡乃服。』這是賈詡在宛城之戰後第二次讓曹操敗得莫名其妙。

賈詡智慧之處係：「未睇清楚，千祈唔好追!! 」

一仗功成萬夫死

所以話，唔好妒忌人地買股票賺幾多幾多，
今日，係香港股票歷史上最悲痛既一日，
恆生指數一開市升幾十點，之後立即倒跌，下午一度跌一千三百點，跟著跌幅又收窄，收市只係跌二百幾點。
殺完好友殺淡友。
相信技術分析的某同事，話跌一千三百點既時候已經跌穿二百五十天平均線，一定要放，結果放完之後立即升番一千點….佢呢幾年o係股市賺既錢呢個星期已經輸凸，睇見佢比死更難接。

迫遷

同太太住開筲箕灣既單位，業主話要收番黎賣。突然之間，好急咁要搵屋搬。再睇一睇D租盤，只係三個月時間，租金已經升左接近兩成。買又好似太貴，唉!! 真係頭痛。個女點樣可以咁早由東涌到筲箕灣番學呢?? 真係被佢玩死。

商場的寄生蟲

同同事傾開，佢話公司管理層話要引入某某大牌子咁話。小小力都話成事機會接近零。小小力以前都講過，大牌子係唔會願意同D垃圾牌子公司同場做生意，因為有種影衰哂既感覺。最衰既係，一旦呢個商場有呢D垃圾牌子公司出現，成個場都downgrade左，大牌子快快離開，越黎越多垃圾牌子進入。當成個場都充滿著垃圾牌子，任何大牌子都唔會再考慮進入。多比寄生蟲，要清除，就一定要徹底，垃圾牌子走剩一兩個都係死路一條。而咁徹底既行動，需要好大勇氣…小小力又睇唔到有!

之後，同事話當呢個大牌子既管理層睇完呢個商場既租戶組合(tenant mix) ，立即決定唔租呢個商場。原來呢個大牌子既管理層既智慧，只係同小小力差不多水平，遠遠不及呢個商場既管理層。

風雲不測週末天

打風，風竟然會去而複反，真係天有不測之風雲。

今年第一個八號風球，黎得快，風又大，公司地面既樹都被吹到，我地都要落手落腳去縛樹。大風雨下由頭濕到落腳。結果完成後被其他同事遲一個鐘離開。

離開既時候，太太同個女話要o係地鐵站等埋我。咁就違反左我平日既原則，即係打風就盡快番屋企，冇必要等，除非坐的士。同埋就係唔坐地鐵。唔知點解我成日覺得坐地鐵好危險，有咩事想走都走唔到….但太太係一個唔聽人講又唔話得佢既人…算吧喇!! 試一次打風坐地鐵。

結果，如果大家有睇電視都見到咩事，中環站人山人海，行都行唔到，想離開地鐵站出去呼吸下新鮮空氣都唔得，又熱，差D窒息…呢程地鐵，坐左兩個鐘，小小力差唔多六點先番到屋企。

番到屋企，仲要俾媽媽鬧。當然喇，咁耐都番唔到屋企又聯絡唔到(手提電話都收唔到)… 擔心架!!

都好在大家都冇事，亦俾左太太一個教訓!!

風風雨雨既週末，應承左女女同佢睇卡通片。因為一家人睇戲，五十蚊一張飛睇戲再加埋買野食，每次都差唔多要三百蚊…到唔好話唔貴。於是今次選擇左睇早上九點。太太話未試過..Well，我就試得多喇!! 好似今次咁，睇早上九點，三十蚊一張飛，再加埋D信用卡積分，一家人睇戲都係七十蚊，早上睇戲又唔洗買野食，真係平過買隻DVD番屋企睇!! 一個月加埋公司有D免費飛，三百蚊一個月一家人已經可以睇四套戲喇!!… 唉!! 冇錢冇辦法喇，生活艱難呀!!

仍然風風雨雨既週日，兩個呀姨黎左探媽媽，一齊飲下茶打下麻雀，都係熱鬧!! 小小力打左三圈，贏一千蚊，本來都唔錯，點知呢個時候太太爭住打…Well，okay喇，大家玩下。結果太太打左五圈，小小力得番一百蚊入八達通，真係冇興既!! Anyway，好過冇喇!! ….哈哈~!!

哲學

好似好多事發生既昨日，馬力咁就死左…人，真係好化學，話黎就黎，話走就走。計劃太過長遠太過美好，可能令你你去好多……強如諸葛亮都估唔到自己出師未捷身先死，一般人如果冇乜偉大既理想同過人能力，都係輕鬆D簡單D好。畢竟失敗係常人既專利，個個都有亦試過，冇乜特別。

會考又放榜，一如往年，電視都係訪問D好績既。今年最特別既係有一個十四歲既優等學生。唔知點解，十四歲已經考會考，感覺佢失去既俾得到既更多。人生有起點有終點，路程已經定左，行得快都唔會行遠左，步速快慢只會決定你係人生邊個階段停留耐D，行得大快，就失去左短暫而珍貴既童年回憶。

打風，初初仲話呢個風會好大風，吹得好正。轉眼間，風已經減弱，仲走埋。天有不測之風雲，人有旦夕之禍福….一切事，睇開D喇!!

開能源會，原來今年比舊年平均熱左0.6度... 一個人力量，好多野唔係靠你一人之力可以改變得到…要改變世界，不如改變自己。

有冇相同既地方呢??

公事

公司又一個高層「鉤仔」親口證實已經辭職，九月尾將離開服務左接近十年嘅公司。總覺得，呢個部門冇左邊個都得，冇左佢就真係唔係好得…唔知下次到邊個呢!!
自從呢個新老細上場，大家都好似做野冇哂心機…大家都計劃離開，留下嘅同事點算呢??
有時都懷疑自己嘅領導能力，手下超多病假。佢地請完病假交番醫生紙番黎，我簽完交上去，新老細鬧，問點解佢地會病，問點解佢地會請咁多病假，佢唔會批咁話。我同太太講開，佢話佢係老細都唔會批。我真係覺得自己嘅領導能力有問題，原來一般人都係咁諗，如果自己係老細，手下病假係會唔批!!
到抵有咩辦法令手下唔會病，病又唔會請病假呢??

時間消逝

好快，結婚已經有兩個月。但唔知點解，仲係冇乜結左婚既感覺。我仍然同未結婚之前既生活差唔多。可能因為婚後我兩都比較少有一齊既家庭生活，各有各忙既關係….任何事都冇大變，除左錢洗得好快!!
好快，太太又已經有左，今次真係要小心D。Well，但係太太既心態都冇乜點變。我都建議佢不如去溜冰。已經停工休息既太太，仍舊周圍去玩，仍舊番大陸，仍舊咁大頭蝦，同個女番大陸，個女過左關佢先發覺自己冇帶回鄉證…..任何事都冇大變，除左錢真係洗得好快。
預產期係農曆新年，會唔會做鼠年第一B上電視呢??
好快，媽媽既病已經有兩年多，情況冇好亦冇壞，媽媽都接受左呢個事實。依家仲多左個護士日日到屋企洗傷口，但情況都不太壞…..任何事都冇大變，除左錢真係洗得好快好快。
時間消逝，相信困難既時間都一樣!!

大鱷的午餐

在小小力壞孩子基金早已經提醒大家八月要小心股市會大調整，估唔到踏入八月第一日就做野，乘匯豐同恆生業績好大家唔覺唔覺既時候整死隻中移動(又已經講過中移動係大鱷做野既工具)。唔知大家有冇做到大鱷的午餐呢?? 壞孩子基金係唔係應該搬黎呢度呢??
建議大家暫時唔好買住，入貨就買番大鱷既工具 - 中移動!! 因為工具用左要買番黎下次用!!

讀書何用

每次入市，股票市場都暴跌。昨日小小力又大舉入市，今日果然又大跌。Sorry!! 下次一定事先話你地知!!
太太話佢D朋友買股票個個都賺大錢，點解小小力買股票賺得咁少。小小力每次既答案都係我比較安全，唔學佢地買消息股買窩輪。一個大跌就死得!! 好似今日咁，佢地應該死哂，但太太話佢地因為呢幾日去旅行所以早幾日已經放哂……
原來有運係唔洗理會咩風險既，行行下路都好自然咁會踢到金…
小小力學左咁多投資既知識，都勝唔過一個連自己買左咩股票都唔知既師奶(每次問佢地既答案都係一個number，即股票代號，其他乜都唔知)，有時真係唔知點同D後輩講點解要好好讀書…哈哈!!
或者，好似某人咁講，讀多D書，你就可以明白點解讀書係冇用既!!

衛生意識

更多更多既同事病倒，老細開始懷疑係冷氣系統既問題。本星期日辦公室洗風喉，老細亦定左一部殺菌機放o係辦公室我個位(Well，大家都認為我係疾病既源頭) 。其實，我想講，只要大家繼續欠缺衛生意識，去完廁所唔洗手，有病唔帶口罩，發燒繼續番工，咁，o係辦公室放咩做咩都係冇用!!
小小力已經病左有十日，仍然未好番!! 其間，聽到隔鄰同事話佢太太問佢點解入左呢間公司之後病左年幾都未好過!! 睇黎，成日病既問題都唔只發生既我身上!!

是日大暑

大暑，應該係一年之中最熱既一日。但天文臺話已經唔算熱喇。其實天氣咁反常，用中國既二十四個氣節去預測天氣仲準唔準呢??天氣咁熱，做乜都冇心機，除左訓，真係連食都懶得食…日日十點幾已經訓，乜都冇做，點算!! 奇怪既係反而瘦左!! 應該係唔好既現象!!
感覺呢個夏天好浪費，以前都有去下camp去下游水，運動下，依家去踢波已經變成唯一戶外運動，咁落去可能等唔到退休已經bye-bye啦!!
至於出外旅行，因為冇錢，更加唔洗諗!!
如果可以去D凍D既地方避下暑就好囉!!

解釋之難

有d野真係好難解釋。我姨丈話匯豐中國翔龍基金買唔過，又冇過去表現可以參考，中國A股有咁價，蠢人先至買等等…
我好同意姨丈既分析，但唔同意蠢人先至買。正因為咁多蠢人因為QDII而買呢隻基金，所以供不應求，基金既價格就一定會搶高!! 有時聰明既人都要諗下D蠢人諗乜架!! 呢隻基金我抽唔到，但一上市就用兩萬蚊買左四手，到第二日早上，已經比招股價升七成多，小小力已經賺左萬五蚊喇!!
信不信由你!!

時代病院

呢個真係可以叫得做時代病院，小小力手下有七個人，但呢幾日平均都都三至四個請病假，沙士既時候都冇咁嚴重。D工作冇人做，因為咁我同老細俾大老細星期六鬧左一朝(星期六唔洗番工但打電話黎鬧) ，星期一繼續鬧，鬧我地點解冇contingency plan(意外事故政策)… 無言以對，試想，我既情況等於明日你番公司，發覺突然有一半同事死左冇番工，你話對公司會唔會有影響?? 如果冇，呢一半同事應該立即解散，因為佢地既存在係多餘既，有同冇都冇影響。如果有，點解你冇contingency plan?? 如果有contingency plan，乜 你日日諗住有一半人唔番工咩?? 你好得閒咩!!

之後，老細再分開再鬧，話我懶，等野做，佢想升我坐佢個位，但我唔夠主動…等等。
Well，o係度咁耐，我可唔可以升到老細個位我自己心中有數，至於點解我冇野做…唉!! 我所有既大project都俾大老細hold住，然後問我點解冇野做，請問我應該點答呢?? 我老細老細話叫我搵D料去設計個廁所就有野做喇!! 唉!! 我係做工程唔係做設計架!! 個廁所俾設計師設計大老細都唔收貨，唔通要我設計好過個設計師先升我職?? 算把喇!!

書展2007

又到一年一度既書展，今年好能夠睇到香港特色!! 即係興邊樣就全世界都賣o個樣，賣到死，賣到爛，賣到賣唔到唯止。咁，今年興D乜呢?? 書商都估因為股市熱，個個都會買投資書喇。於是，每個大欄你可以見到過數百本投資書，其他書就反且冇乜。連去到Page One都感覺冇乜書好買，比往年失色好多!!
但睇電視書商話投資書既銷量比想像中差。小小力個人估係因為股市已經熱左一段時間，要買書黎增加投資知識既應該一早都買左喇!! 但電視訪問D讀者，讀者話唔買係因為D資訊唔update，貼士都係睇報紙準D喎!! 唉!! D書商太睇得起香港人啦，我地睇投資書唔係求知識，而係求貼士!! 我o係度勸呢D投資書，記住：「市場上一秒都已經太耐喇!!! 」，報紙都係講緊昨日既事，要update就上網俾錢買資訊喇!!( 但如果你係大戶就唔好喇!!)
講番書展，第一日去收獲唔係咁大，買左D關於通識同英文既書俾女女，另外買左D書俾自己，當中都有三本投資書。Anyway，小小力覺得以下幾本書幾特別…
其中有兩本係Stephen Hawking(霍金)既On the shoulders of Giants同God created the integers，用一個有趣既角度去睇物理學同數學。不過你唔係好冇興趣就唔好睇喇，因為呢兩本書成舊磚咁厚…
一本係投資書，林森池(Well, 呢個就真係真正既Banker，唔係<一擲千金>o個D) 既<平民資本家--市場錯價與股市泡沫>(佢仲有一本<證券分析實踐>講個別行業股票既估值) 講市場上既資訊陷阱，小小力覺得係投資者必讀….不過…幾深下!!

大風吹

今日，突然之間大風吹，將地面藝術展既布景吹倒。幸好當時冇行人經過，因為塊布景我地要七個人先搬到，如果壓落行人頭上，唔死都重傷!!
點解會咁?? 其實放o係地面既結構(structure) 都應該考慮到要承受風力既問題!! 但唔知從幾時開始結構安全既評價由做廣告推廣既某人去做。佢又只係識睇好唔好睇(Well, 其實我覺得佢連呢樣都唔識).. 咁，就出事喇!!! 所以講，冇乜事都唔好行埋黎喇!!
更唔明既係，上次火樹銀花賀聖誕咁大件事，今次原班人馬仲可以再做咁大project，點解?? 唔通香港冇哂製作公司??

可以嗎

一早起來，家中飼養既龜死左，而且死得好恐怖。四腳伸直反肚，個頭好似人吊頸死咁…令整日都心緒不寧!!
媽媽又入左醫院，手上傷口化膿。媽媽每日都痛到訓唔到覺。醫生話情況好嚴重，需要動手術，但因為媽媽身體太弱，醫生都擔心用麻醉藥會令媽媽再醒唔番。依家唯有不斷用消毒藥水洗傷口去減慢傷口腐爛….媽媽都冇哂心機!!
可以讓媽媽好番嗎??

不第後賦菊詩

唐代有個人叫黃巢，是讀書人。開始時是走傳統的建功立業之路——參加進士考試。據說黃巢的父親給他取名為「巢」，就是指望兒子日後能夠榮登科榜。「巢」可書作「窠」，音科，民間吉祥語中有「五子登科」之說。然而，黃巢的運氣不是那麼好，屢戰屢敗，數次參加考試，每一次都名落孫山。落第後的黃巢終於絕望了，決定再也不參加科舉考試了。他題了那首《不第後賦菊詩》抒發心中的不平之氣。詩中充滿豪邁的英雄不羈之氣，氣勢之大詩中罕見。唐朝未年由於地方藩鎮割據，朝中宦官專權，局面日益惡化，以致民變蜂起，西元880年不滿現狀的黃巢率農民起義軍殺入唐朝京師「長安」，實現了他的理想。
有時想，其實讀書考好成績，都不一定代表可以有一番成就。最重要還是認清楚自己要走的路，努力去實現自己的理想。
《不第後賦菊詩》：
待到秋來九月八，我花開後百花殺。沖天香陣透長安，滿城盡帶黃金甲。

知恥近乎勇

人，寧可以沒有錢財，但不能沒有骨氣；寧可以沒有地位，不能沒有人格；寧可以失去一切，不能失去道德。一個人想要頂天立地，做到所謂「仰不愧於天，俯不怍於人」的坦坦蕩蕩，除了做人心胸要豁達，處事往來要圓融，品德各方面也要有所增進。怎樣增品進德？

《禮記．中庸》子曰：「好學近乎知，力行近乎仁，知恥近乎勇。」

第一、好學近乎知：一個人要增長智慧，最要緊的是養成好學的習慣美德。你能好學，就能從基本的生活技能、語言、自然、歷史、經濟、科學、哲學等，上至天文，下至地理，各種範疇都有所涉獵研究，無所不通，慢慢開拓知識領域，就能成為一個智人。

第二、力行近乎仁：力行，就是要身體實踐，它不是掛在嘴上說說而已，而是實際執行。凡是好的事，不是說的，而是做的，凡是好的話，也不是說了就算了，也是要去做的。大凡心存仁愛的人，寧可自己吃虧不要緊，他會想到要照顧別人。因此，身體力行的人是一位仁者。

第三、知恥近乎勇：恥，是一種慚愧心，恥於自己有所不知，恥於自己有所不能，恥於自己有所不淨，恥於自己有種種的不足。知恥就會勇敢，發奮圖強，知恥就會向上，努力不懈。知恥的人，肯得面對自己的缺失，能認錯改過的人，品德自然增長。

一個好例子，我個女考試考得好差，責備同佢講道理既時候，佢半點羞恥心都冇!! 佢唔會努力去改進自己，搵自己既不足，而係努力去搵其他差過佢既人!! 證明俾你睇一山還有一山底，佢仲未係呢個世界最衰o個個。
於是，同一道理，我都叫佢以後唔需要打扮，因為街邊仲有D乞兒衰過佢。以後唔好叫買野，因為呢個世界有大把人冇錢買野。以後唔好睇電視，因為呢個世界有大把人冇睇電視。以後乜都唔好想，因為呢個世界有大把人冇自由想做自己想做既野。一步一步咁做世界上最衰o個個。

唉!! 有時見到佢日日打開份報紙睇下邊度請明星想去做，我發覺自己想佢讀好D書真係事倍功半…何必呢?? 我感覺羞恥既事，對佢黎講或者係榮譽呢??

家政

因為太太既表姐有事番左大陸，太太又有病要停工休息要人照顧，個女放暑假又冇人睇住佢學習(唉!! 個女係分分鐘都要人睇住先會做工課，所以每日放工番屋企我都要勞氣到晚上十二點先可以休息，再係咁，命都短幾年..!!) ，太太o係教女方面又絕對幫唔到手…於是，暫時叫個女同太太番東涌住，自己一個住筲箕灣。第一，佢地日日有人照顧，第二，唔好等病毒互相感染(我自己現在日日都要食抗生素) ，第三，讓我都可以休息下!!
一個人住，又要從新學家政喇!!

做假

美洲杯冠軍戰，由巴西對阿根廷。呢個賽事由開始阿根廷就以無敵既氣勢全勝入決賽，而且每場都贏得非常之輕鬆。相反，決賽另一對手巴西初賽第一場就以2:0輸俾墨西哥(四強阿根廷輕鬆贏墨西哥3:0) ，之後巴西多場都差不多用盡九牛二虎之力先僅僅過關。令大部份人都睇好阿根廷而變成熱門，結果決賽巴西竟然輕鬆大勝阿根廷3:0。情況同1998年世界杯巴西大熱卻大敗俾法國3:0類似。
所以話：「賭波等如倒錢落海!! 」

大病人

差不多全家人都病左，。媽媽又入左醫院，太太既感冒越黎越嚴重，睇左兩次醫生反而仲差左。真係奇怪，唔知會唔會係互相感染呢!!? 明天起開始臨時隔離，自己一個人住住先，到好番為止!!
工作都冇乜心機，一份好簡單既報標文件，竟然改左半年都仲改緊。好煩!! 為既只係D雞毛蒜皮，可有可無既措辭….唉!! 好多手上既工作已經推遲到2008甚至2009。唔知我有生之年睇唔睇到呢D工作完成呢!!
大病人唔係我,係我太太...真擔心..!!

奇

投資左一方向被認為保守但安全既公用事業股香港中華煤氣有限公司 (0003) ，估唔到唔夠一個月已經升差不多一成。連咁穩陣既公司都升成咁，再係咁落去，仲洗做?? 一個月升一成，一年已經係2.8倍，兩年仲差不多9倍。放三十萬落去，三年後已經有八百幾萬，退休喇!!! 唔怪得咁多人話放棄本身職業去玩股票喇!!

一生何求

一個美國商人坐在墨西哥海邊一個小漁村的碼頭上，看著一個墨西哥漁夫划著一艘小船靠岸。小船上有好幾尾大黃鰭鮪魚，這個美國商人對墨西哥漁夫能這麼高檔的魚恭維了一番，還問要多少時間才能抓這麼多？

墨西哥漁夫說，才一會兒功夫就抓到了。

美國人再問，你為甚麼不待久一點，好多抓一些魚？

墨西哥漁夫覺得不以為然: 這些魚已經足夠我一家人生活所需啦！

美國人又問：那麼你一天剩下那麼多時間都在幹甚麼？

墨西哥漁夫解釋：我呀？我每天睡到自然醒，出海抓幾條魚，回來後跟孩子們玩一玩，再跟老婆睡個午覺，黃昏時晃到村子裡喝點小酒，跟哥兒們玩玩吉他，我的日子可過得充滿又忙碌呢！

美國人不以為然，幫他出主意，他說：我是美國哈佛大學企管碩士，我倒是可以幫你忙！你應該每天多花一些時間去抓魚，到時候你就有錢去買條大一點的船。自然你就可以抓更多魚，在買更多漁船。然後你就可以擁有一個漁船隊。到時候你就不必把魚賣給魚販子，而是直接賣給加工廠。然後你可以自己開一家罐頭工廠。如此你就可以控制整個生產、加工處理和行銷。然後你可以離開這個小漁村，搬到墨西哥城，再搬到洛杉磯，最後到紐約。在那裡經營你不斷擴充的企業。

墨西哥漁夫問：這又花多少時間呢？

美國人回答：十五到二十年。

墨西哥漁夫問：然後呢？

美國人大笑著說：然後你就可以在家當皇帝啦！時機一到，你就可以宣佈股票上市，把你的公司股份賣給投資大眾。到時候你就發啦！你可以幾億幾億地賺！

墨西哥漁夫問：然後呢？

美國人說：到那個時候你就可以退休啦！你可以搬到海邊的小漁村去住。每天睡到自然醒，出海隨便抓幾條魚，跟孩子們玩一玩，再跟老婆睡個午覺，黃昏時，晃到村子裡喝點小酒，跟哥兒們玩玩吉他囉！

墨西哥漁夫疑惑的說：我現在不就是這樣了嗎？

賊

有一位青年畫家，在還沒成名前，住在一間狹隘的小房子裡，靠畫人像維生。一天，一個富人經過，看他的畫工細緻，很喜歡，便請他幫忙畫一幅人像，雙方約好酬勞是一萬元。

一個星期後，人像完成了，富人依約前來拿畫。這時富人心裡起了歹念，欺他年輕又未成名，不肯按照原先的約定付給酬勞金。

富人心中想著：「畫中的人像是我，這幅畫如果我不買，那麼，絕沒有人會買。我又何必花那麼多錢來買呢？」於是富人賴賬，他說只願花三千元買這幅畫。

青年畫家傻住了，他從來沒碰過這種事，心裡有點慌，花了許多唇舌，向富人據理力爭，希望富人能遵守約定，做個有信用的人。

「我只能花三千元買這幅畫，你別再囉唆了。」富人認為他居上風。「最後，我問你一句，三千元，賣不賣？」青年畫家知道富人故意賴賬，心中憤憤不平，他以堅定的語氣說：「不賣。我寧可不賣這幅畫，也不願受你的屈辱。今天你失信毀約，將來一定要你付出二十倍的代價。」

「笑話，二十倍，是二十萬耶！我才不會笨得花二十萬買這幅畫。」「那麼，我們等著瞧好了。」青年畫家對悻悻然離去的富人說。

經過這一個事件的刺激後，畫家搬離了這個傷心地，重新拜師學藝，日夜苦練。皇天不負苦心人，十幾年後，他終於闖出了一片天地，在藝術界上，成為一位知名的人物。

那個富人呢？自從離開畫室後，第二天就把畫家的畫和話淡忘了。直到有一天，富人的好幾位朋友不約而同的來告訴他：「好友！有一件事好奇怪喔！這些天我們去參觀一位成名藝術家的畫展，其中有一幅畫不二價，畫中的人物跟你長得一模一樣，標示價格二十萬。好笑的是，這幅畫的標題竟然是--賊。」

富人好像被人當頭打了一棍，富人想起了十多年前畫家的事。這件事對自己的傷害太大了，他立刻連夜趕去找青年畫家，向他道歉，並且花了二十萬買回那幅人像畫。

青年憑著一股不服輸的志氣，讓富人低了頭。這個年輕人名叫畢卡索。

沒有人能屈辱，打敗你，除了你自己。

精神病院出院條件

有一位記者訪問一間精神病院，以下是一則記者沒有刊出的談話內容 ......

記者："請問你們是如何分辨病人是否完全康復過來的呢？"

精神病院院長："好簡單，只要放一浴缸的水，給他們一支匙羹和一支湯勺，要求他們把浴缸騰空...."

記者搶答道："我明白了，正常人會用湯勺，而精神病人會用匙羹。"..................

現在想請問你又會點呢?

同病相連

小小力同太太都病左，真係同病相連。其實又唔係D咩大病，小小力病慣又冇咩事!! 但太太就唔同，十年都唔病一次，一病就好大件事，行都行唔到，講野又冇力，面青青咁。真係擔心!!! 平日照顧開佢既表姐又有事要番大陸，咁個女又冇人照顧，真係幾煩…
到底，病慣係唔係一件好事呢??

鬼掩眼

失踪多時既友人「喇嘛」終於現身俾其他朋友見到，朋友話佢冇穿冇爛已經好好。點知佢仲話要步小小力後塵要結婚，仲話對方年輕貌美。唉!!…38歲人喇，幾時先至醒呢?? 一個年輕貌美既女仔，同一個冇錢，冇學識，年輕唔細，日日債主臨門又唔俊既男人結婚…唔通「鬼掩眼」??

難以想像

如果我話見到大老細渣住個電話o係度行黎行去，你會諗到D乜?? 好忙碌既老細, right?? 如果我話見到大老細渣住個冇插線既桌上型電話o係度行黎行去，你會諗到D乜??…. 我真係諗唔到喎!!

家長

上星期六第一次以家長身份見家長，分享一下我既感覺。
小小力既女考完試，巡例都要見下家長，同老師一齊睇下成績表，但估唔到真係巡例得咁緊要….
小小力既女上學期考第五，今個學期明顯睇到佢係懶左，但都估唔到咁差，差到連名再都冇得排。
我問：「老師，你認為佢有D咩問題?? 係唔係佢上堂唔集中?? 唔明定係有其他原因?? 」
老師：「我認為佢將來都應該會做明星!! 佢好注重外表，失去左一個小學生應有既純真，番學係唔需要咁既!! 」
我：「我明白既，呢方面我會提番佢，但咁同佢成績唔好有咩關係??」
老師：「咁都冇咩關係既，佢係學校都好聽話，呢份係我地方學校參加既比賽同得獎成績…. 」(份參賽項目有五頁紙，雙面!!)
我：「嘩!! 咁多既……我覺得佢成日要準備參加呢個比賽o個個比賽，用左好多時間去準備比賽，對佢學習會有影響喎!! 」
老師：「我覺得冇影響，其實今年參加既比賽已經少左!! 」
我：「我覺得絕對有影響，最重要係o係比賽過程中，佢冇從失敗中吸收經驗，只顧將輸比賽既責任推俾老師話評分唔公平，推俾其他同學話佢地做得唔好，從來就冇檢討過係自己唔好!! 」
老師：「咁一定係喇!! 」
我：「下? 」
老師：「……我會同佢講，仲有咩問題??」
我：「仲有佢對學習上所有野都提唔起興趣，做完功課交代就算…. 」
老師：「其實班上面好多成績好既同學都有補習!! 不過我都可以同佢講…」
唉!! 其他既我都唔寫喇，o係學習上，同學成績唔好，一係就係家長既問題，一係就係同學既問題，老師同學校本身一定冇問題…. 我講咁多野呢個老師都冇寫底過，見完三十幾個家長，三日後番學我都唔指望呢個老師記得我講過D咩教番個女，咁既老師點教出一個有責任感既同學?? 唔怪得個個家長見兩分鐘就可以走人…最後
老師：「如果冇咩問題，我諗今日到此為止，因為仲有好多家長等緊」
我只係講左二十分鐘，仲有好多野未講，但都冇乜心機講落去…只希望誤人子弟既老師快D消失!! 」

愛國者

睇電視節目，一班七月一日上街遊行既學生(相信係大學生)接受訪問，佢地話反對粉飾太平，睇到有唔對既地方就要出聲，要上街，年青人係要有批判性，咁先係愛國。
小小力睇完，又有D野想問…
粉飾太平，即係話依家係唔太平…咁，算小小力蠢，請問依家既社有咩咁唔太平?? 有咩咁動盪?? 要知道一個社會咁大，每日每處都會有著大大少少既問題，如果有一D小問題大家都覺得社會係唔太平，要將一D小事化大，唔可以粉飾太平，咁，社會漸漸就變得永無寧日…. 咁，你做D野令社會變得不安，係愛國咩??
上街，對所唔對既地方就要出聲，叫反對。反對左，又有咩建議俾政府應該點做?? 係冇既!! 樣樣都叫唔好做，又冇建議，咁又係愛國咩?? 愛國唔係淨係用把口架!!
批判性…其實係唔係想講批判性思維(Critical Thinking) 呢?? 你又唔係法官，俾你批判左既野係冇用架喎!! 批判完，又點呢?? o米繼續批判第二樣囉!! 難聽D講叫「吹水」!!
小小力相信，愛國係要身體力衡既!! 而o個D自稱愛國者既，更加係對真正愛國者既一種侮辱。

食物敏感

食物敏感呢樣野，真係可大可小。千祈唔好相信敏感呢樣，食食下習慣左就冇事…。食物敏感少會削弱抵抗力，重即會死亡。好似小小力既姨丈，就係對味精有敏感，一次唔小心食左味精產生敏感，出現呼吸困難，最後就係咁死左!!
話說小小力都有食物敏感，熟知小小力既都知小小力係唔食得蟹既，食小小都會全身出紅點，嚴重既會腫到變豬頭。昨晚，回家同媽媽到外面食晚飯，小小力唔知其中一個湯有蟹，食左先至知。咁，就出事喇!! 小小力成晚成身出紅點，癢，嘴腫，眼紅，抽根，發燒，心跳加速，呼吸困難…成個人好似發狂咁…!! 成晚都冇訓，一個人走左出大廳發狂…到今朝情況先穩定番。
所以，以後食海鮮，真係唔好叫小小力試下食蟹，多謝哂喇!!

保險

有樣野，太太同媽媽好似，就係佢地最相信既唔係丈夫(或者仔) ，而係D唔係好熟既朋友或者係街邊唔識既師奶。事原太太五年前幫個女買左份儲蓄人壽保險，問我點…我詳細睇過份保險…超貴!! 一個冇收入既小朋友，冇病冇痛，竟然每個月要供千幾蚊，保額仲係得二十二萬。(比起我有收入，年紀大咁多，保額有一百萬既，我每個月供保險都唔洗一千蚊)…我問太太供完未，佢話未。佢話買既時候個Sales同佢講話供五年供完，但上個月佢打電話俾個Sales問仲 有幾耐供完，個Sales話仲有五年，而且供到個女十八歲可以有十幾萬…唉!! 請問，個女今年十一歲，供多五年供完佢都係得十六歲，點解又會供到十八歲?? 十幾萬?? 你再供落去就唔只喇，最小供左二十幾萬!! 真係「昆明擺檔擺明昆」!! 於是我叫太太cut左份保險。第二日，太太話表姐話我冇睇清楚，叫唔好cut!!我問表姐有冇睇，佢話冇。哈哈，冇睇過既表姐話我冇睇清楚，真係…. 好，我又要你心服口服，於是又叫表姐同我清楚咁睇多一次!!
表姐：「拿拿拿，呢度寫明五年之後就有息派，幾好架!! 」
小小力：「咁依家都過左五年喇，有冇息收過呀?? 」
表姐：「咁又冇…」
小小力：「表姐你睇清楚，份保單寫住，供滿二十年之後，由第一個五年開始，每五年一定派息1.25%。二十五年後，我個女都三十一歲喇，我當份保單現金值有三十萬(實際一定冇!!) ，1.25%即係三千幾蚊，每五年先得三千幾蚊，有咩用?? 每五年先一次，你人生又有幾多個五年?? 」
表姐：「….. 佢呢度寫回報率好高喎!! 十年已經多一倍!! 」
小小力：「係!! 因為佢第一句寫左假設每年回報率有10%!!咁當然有，如果佢假設年回報率有100%，出年已經有一倍喇，但問題係佢每年回報率連4%都冇，再減去通貨膨脹，就係點解你供完五年又五年，五年又五年喇!! 再者，份保單有幾多錢關你咩事，現金值先係你可以到手既錢，太約得40%…有咩用?? 」
表姐：「但係要cut一定要證明佢冇野做…」
小小力：「我個女買呢份保險既時候都冇野做，買人壽保險同有冇野做有咩關係?? 份保單係話如果要申請失業供款優惠，一定要證明冇野做!! 」
表姐：「但cut左要蝕二萬蚊喎!! 」
小小力：「但再供可能要蝕五至十萬蚊喎!! 」
表姐：「大陸中國人壽都唔咁既!! 我買o個份三年就連本帶利收番哂，仲保我一世架。」
小小力：「以前中國人壽D Sales為左做quota亂開單，保險公司又要保你，又有咁多錢過你賺，邊有咁著數呀?? 如果依家仲有，你幫我地一家人一人買份呀!! 」
表姐：「咁又冇…. 」
唉~~~~~

教太太

朋友問，結婚後生活有冇唔慣，唔適應。我既答案係冇!! 因為我兩工作時間既不同，其實每日見面同一齊既時間都唔夠兩個鐘…咁，同未結婚o米差唔多.. 唔適應既，應該係教女既生活。每日，都有幾個鐘教女…點樣令個女同太太聽話先係最頭痛。你冇睇錯，令太太聽話原來都好頭痛。我叫個女唔好日日食完飯飲氣水，轉頭太太就買兩支可樂番黎俾個女飲。我叫個女做功課唔好睇電視，太太就叫住要睇電視。唉!!…

大國崛起

睇中央電視大戲《貞觀長歌》，好感動。呢個係中國歷史上最光明，最民主既時代。國家既大臣，都願意放棄個人榮辱甚至生命去保護同重建呢個大戰過後既國家，使大唐迅速復元發展。
但回顧目前既中國，人人利字當頭，要國家走上大國之路，還有好遠既路要走。
之前睇《大國崛起》，講葡萄牙、西班牙、荷蘭、英國、法國、德國、日本、俄羅斯、美國這九個國家的興衰史。被問到點解冇中國?? 小小力既答案係，o係現代，中國幾時做過大國??
《大國崛起》，一定要睇呀!! 尤其係講荷蘭一集!!
唐太宗曾說過「以銅為鏡,可正衣冠,以古為鏡,可知興替,以人為鏡,可知得失」

愛在瘟疫蔓延

同事問，點解我仲成日帶住口罩，病咁耐都未好?? 我重伸，我冇病，呢兩個星期都冇病。點解帶口罩?? 道理同你去醫院探病帶口罩一樣，唔係你有病，係醫院D人有病會傳染你。小小力既部門係公司既疫區，每日都有人病，而且有病既人亦絕對唔帶口罩向四周圍既人咳。所以，小小力亦學到野，有病既時候我亦絕對唔帶口罩，發燒既時候就走去D有病唔帶口罩既同事度對住佢咳，將病傳俾佢，咁會快D好番。好番，我就帶口罩!!
或者，將病傳俾至愛既同事係一種愛既體現。讓同事分享我既痛苦，病越重，愛越深。

人才

七月，公司竟然加某D同事既人工，理由係挽留人才。咁，冇人工加既係唔係等於話公司根本上唔重視?? 公司唔加既係唔係表示公司根本唔關心呢D人既去留?? 呢個行動，到底係唔係真係挽留到人才? 對公司員工士氣有幫助嗎?? 要鼓勵某些好員工，點解唔正正式式出通知，等所有人都知道，亦好讓冇得加既好好努力?? 鬼鬼鼠鼠咁進行，俾人一種私相受受既感覺，有冇得加係關係問題而同能力冇關…

父親的抉擇

話咁快，個女已經要準備選擇中學。依家既制度係每人只可以選兩間中學，如果呢兩間中學唔收，就會將你轉左去統一派位，到時派到咩都唔知。個女自己話好想讀Band 1既學校。但我睇佢既成績，真係唔係咁樂觀。如果佢肯努力D，都仲有得救，但事實係佢根本冇乜心機讀書，想讀Band 1既學校只係虛榮心作怪。至於小小力，都想個女讀Band 1既學校，原因係因為小小力覺得個女冇乜定力，好容易受周圍環境影響…如果o係一間校風好既學校讀書，佢都仲好D，相反就真係冇得救…
除左學業成績，人格，品行等等就更重要…如果幫佢選Band 1既學校，到時唔收，去到Band 5既學校…點算??
小小力就係一個好例子，Band 1既成績派左去Band 5既學校….

女為悅己者容

女為悅己者容，意思係女子為欣賞自己的人裝扮。現今既社會，好似已經完全接受。不過，「容」字依家唔只解作打扮，仲可以解作整容。將原本既樣整到一個佢自己認為好好但其他人都唔認同既樣.. 係唔係真係有需要呢?? 男士又鐘唔鐘意你既另一半去整容呢?? 女士，如果你既另一半想你去整容，你又去唔去呢??
有問：「女為悅己者容，咁男呢?? 」…. 咁!! 因為D化妝品/技術咁貴，女為悅己者容，就令到男為悅己者窮喇!!
原句來自<史記刺客列傳>：「士為知己者死，女為說己者容。今智伯知我，我必為報讎而死，以報智伯，則吾魂魄不愧矣。」

原來如此

婚後，某日，小小力既證婚人(有到場朋友，還記得嗎??)既家姐打電話俾我太太，叫我地一齊出黎食飯，話當係結婚禮物。小小力覺得佢地已經黎左飲，已經送左禮喇，唔好咁客氣啦，於是推左。點知呢位姐姐又話咁當回娘家食飯，小小力又覺得太太既娘家又o係度使乜當，而且我又去左.. 真係怪。不過都叫到我地第二想囉，咁好啦，應承佢遲的一齊食飯喇!! 點知更怪既係佢話叫埋小小力家人一齊出黎食飯，下?? 咁大件事?? 我太太問佢洗唔洗叫埋老爺同奶奶，佢又話唔洗!! 咁，小小力家得番一個細佬，叫佢出黎食飯?? 真係奇!! 之後，當證婚人問到小小力細佬幾多歲，幾時生日同有冇女朋友既時候…終於都知，原來如此，係證婚人想識我細佬…因為呢件事，小小力個女笑左佢叔叔成晚。

仲有乜好做

呢個暑假，仲有乜好做呢?? 堂又暫時冇得上，當我想話搵D野學，全家一齊反對，大家都建議我休息一下!! 我都同意要休息，但休息都唔係日訓夜訓架…到底有咩好做呢?? 教女?? 連佢都放暑假。同佢玩?? 佢又唔多願郁!! 陪太太，大家工作休息時間又唔係好就。陪媽媽?? 媽媽o係醫院我又唔留得咁耐!! 睇戲，我已經睇哂!! 連DVD+VCD都睇埋。書又睇得差唔多。投資六七月有唔係好時候。行街又冇野想買(亦冇乜錢買) 。電視我又唔睇既。打麻雀又唔夠腳。戶外運動又太熱容易中暑(尤其係我咁肥) ，打機又年紀大眼慢….. 唉!! 將來點算呢??

虛榮心

網上小故事一個:
全美最top的B-school是UPENN的Wharton衆所周知，大概50年前有個本科生，他因為覺得那裏的教授"無料到"而退學，名校又如何?

然後他跑去Columbia University讀master，就只為了向那裏一個有料的教授學習。

那個人叫Warren Buffet，而那個教授叫Benjamin Graham。

苗服

去到貴州，當然要睇下苗族文化，當中又少不免著下苗服影下相。可惜既係苗族人一般身材都比較細小(連小小力去到周圍都俾人話高大你就知喇!!) ，最大o個件苗服我都著唔落…只可以幫著苗服既太太影相…不過太太著苗服真係幾好睇。而且著住咁多飾物咁重既苗服太太到可以好輕鬆騎上馬，勁!! 更勁既係，小小力幫太太影相既時候唔小心開左閃光燈，嚇到隻馬成隻彈起，但太太都控制到…. 小小力要多多學習!!

夜郎自大

漢朝的時候，在西南地方有一個叫夜郎的小國。夜郎國雖然是一個獨立的國家，但國土卻小得可憐，它不過和漢朝的一個縣差不多大，而且物產不豐，生產很少，連畜牲都不多。有一次，漢朝派使臣前去夜郎，因為夜郎國的國王從來就沒離開過自己的國家，他也不知道外面的情況，竟然不知天高地厚的問漢朝使者說﹕【那漢朝和我的國家相比，哪一個大？】這是一個很可笑的故事，以僅僅一個縣那麼小的地方，要和偌大的漢朝相比，就像是井底之蛙，見識十分淺薄的人，才會這樣的妄自尊大。但是，在我們現實生活中，像夜郎國王這樣的人，恐怕還不少呢！有些人，由於常常處在小圈子裏，而不知道外面的世界有多大，還以為自己是個很了不起的人，這種高傲自大的思想，實在是要不得的。至於有些人，明明知道天外有天，人上有人，卻還妄自尊大，那就更不值得一談了。
後來的人，凡是見到沒有什麼本領，卻自以為很了不起，瞧不起別人的人，我們就說他是【夜郎自大】。
夜郎國，就係o係貴州省西部一個苗族小王國。今次小小力都有機會睇一睇呢個夜郎王寨。其實呢個夜郎王寨唔係真既，只係中央電視臺為拍電視戲「夜郎王」而建造既，不過都幾好玩架，至少小小力都可以扮下「夜郎王」oY!!




睇完夜郎王寨，原本打算打電話俾人車我地落山(夜郎王寨係o係山上) ，點知電話打唔到，正在想辦法之際，小小力太太見山邊有馬，就話：「好!! 我地騎馬落山」。當小小力正想話我未騎過馬架，小小力太太已經上馬走左…就係咁，小小力就第一次騎馬喇!! 不過，又幾好玩喎!!

黃果樹

黃果樹大瀑布高77.8米、寬101.0米，是我國最大的瀑布，也是世界著名大瀑布之一。小小力到黃果樹瀑布既時候，正好落過雨，令瀑布既氣勢更盛!! 企o係瀑布對面到濕哂，好似落大雨咁，亦因為太濕，攝錄同機相機都一度失靈。





題外話，黃果樹係要收入場費既，每位180蚊。對當地中等收入既人黎講差不多係佢地人工既十份一，好貴。但入場門口有好多人話收50蚊就得。於是三姐俾左每位50蚊人，o個個人就帶我地去離入口約一公里既路上，從一個預先剪開左既鐵絲網進入左黃果樹瀑布區…. 就係咁，政府收入場費既收入基本上係零!!

中國涼都

六盤水市位於中國貴州省西部，西與雲南省相接，東部為安順市，北部為畢節地區，南部為黔西南州。六盤水市是鐵路樞紐，貴陽至昆明與內江至昆明的鐵路均通過六盤水市，市內的鐵路編組站是中國西南最大的編組站之一。香港的航班可直達貴陽，六盤水距貴陽公路270公里(小小力從貴陽飛車去要四個鐘) 。
六盤水市氣候依海拔高低呈垂直分佈，平均氣溫12——14攝氏度，年降雨量1200——1400毫米。冬無嚴寒，夏無酷暑。市中心區海拔1800米，夏季平均氣溫19.8攝氏度，是消夏避暑的勝地，全年涼爽舒適的時間達223天以上，譽為“涼都”。
出發前朋友話俾小小力知，貴州夏天有攝氏40度，咁就出事喇。小小力到六盤水，氣溫得19度!! 好彩小小力唔多怕凍姐!! 在六盤水，除左到三姐家，仲去左玉舍國家森林公園同夜郎王寨。
其實，六盤水係貴州最富有既市，但貧富差距相當大。好似三姐屬於有錢人，三四千尺既複式大屋，50吋大電視，保安系統，電力，煤氣一應齊全。出入有車代步。但街上你仍然見到好多好窮既農民，連鞋都冇得著在叫賣，佢地家中冇電，仍然燃煤燃柴。我地食餐飯既價錢，可能已經係佢地一年既收入….
車我地出出入入既王兄，身為公安，薪水每月兩千蚊，但佢食既煙七十蚊一包，開既名車十幾萬，油錢每日都要成百蚊，食餐飯又幾百.. 咁既生活兩千蚊一個月點支持得到?? 其他政府職員，返工返九點，十一去食飯打麻雀，三點至返工，四點又放工喇!!
在當地，廉潔係會被嘲笑!!
三姐仲介紹左好多乜總乜總既高官過我識，一齊食飯打麻雀…唉!! 我一D都唔enjoy!!
三姐的家…

初到貴州

貴州，一個o係認識小文英之前完全唔識既地方(我連有貴州呢個省都唔知，我以為係一個城市) 。其實，也好難怪小小力，因為呢個地方，從來都冇乜歷史大事發生過，亦冇乜偉人出產過。唯一聽過，就係香港電臺既有關扶貧電視節目講貴州係全中國數一數二最窮既地方。
今次因為要同太太返貴州探望家人，所以都做左D資料搜查，順便同大家一下。
貴州，簡稱黔，是中國西南內陸的一個多民族省份，除漢族外，還居住著48個民族，其中以苗族人最多，大約有500萬。傳說中，中國上古時代南方九黎族的首領蚩尤在涿鹿之戰中被黃帝率領的部落聯盟擊敗。蚩尤部落一部分歸附黃帝，一部分南遷逃入山區(貴州)，演化為南方的苗族、黎族、瑤族等多個少數民族。蚩尤是苗族的一位大祖神，在苗人心目中有非常崇高的地位。至今在苗族的民俗中仍有許多崇拜蚩尤的重要活動。
貴州地處雲貴高原，東靠湖南，南鄰廣西，西毗雲南，北連四川和重慶，全省都處於山區，當地有一句說話「開門見山」就正好形容左當地既環境，家家戶戶都見到山!!
當小小力坐既飛機到達省會貴陽，以為自己坐既飛機o係農場降落…機場既四周圍乜都冇，機場大樓之細亦係小小力所見之最。到達後第一個見到既親人，係小文英既三姐，當地西部森林公園同度假村既老板。就係咁，開始小小力貴州之旅既第一站，貴陽西部，有「中國涼都」之稱既六盤水市。

Man in Black

小小力真係"Man in Black"，一起程去貴州，華南地區就落大雨，大水災。回程就到香港天氣唔好，飛機delay六個鐘。返到深圳就唔見左價值數千既手信。返到香港，就輪到東涌地鐵站低壓變壓站冒煙，小小力被困地鐵站，仲要吊車都跌埋落黎影響左地鐵站解散….

我們結婚了

六月二日，小小力同太太小文英(明)於香港大會堂完成左結婚註冊儀式，開始進入人生另一個階段。是夜亦於東涌設宴款待親友。感謝各位既支持，雖然唔係咩大型婚宴。但大家送給小小力既祝福同支持已經令足夠小小力一世難忘。所邀請的，全部都到齊，真係好高興!! 另外，特別要感謝兩位好友，細路仔同邦邦!! 兩位放底繁忙既工作，全日幫助小小力去完成婚禮，非常感謝…
唯一美中不足既，係小小力既媽媽仍然留左醫院，未能出席。希望媽媽放心，升級做Daddy既小小力以後會加倍努力去照顧保護我地既家庭!!!
努力呀!! 小小力!!!
以下係一D當日既照片分享: